Yajnavalkya Upanishad

॥ yājñavalkyopaniṣat ॥

saṃnyāsajñānasampannā yānti yadvaiṣṇavaṃ padam ।
tadvai padaṃ brahmatattvaṃ rāmacandrapadaṃ bhaje ॥

oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥

hariḥ oṃ ॥

atha janako ha vaideho yājñavalkyamupasametyovāca
bhagavansaṃnyāsamanubrūhīti kathaṃ saṃnyāsalakṣaṇam । sa
hovāca yājñavalkyo brahmacaryaṃ samāpya gṛhī bhavet ।
gṛhādvanī bhūtvā pravrajet । yadi vetarathā brahmacaryādeva
pravrajedgṛhādvā vanādvā । atha punarvratī vāvratī vā snātako
vā'snātako vā utsannāgniranagnoko'vā yadahareva virajettadahareva
pravrajet । tadeke prājāpatyāmeveṣṭiṃ kurvanti । atha vā na
kuryādāgneyyāmeva kuryāt । agnirhi prāṇaḥ । prāṇamevaitayā karoti ।
traidhātavīyāmeva kuryāt । etayaiva trayo dhātavo yaduta sattvaṃ
rajastama iti ayaṃ te yonirṛtvijo yato jāto arocathāḥ । taṃ jānannagna
ārohāthāno vardhayā rayimityanena mantreṇāgnimājighret । eṣa vā
agneryoniryaḥ prāṇaṃ gaccha svāṃ yoniṃ gaccha svāhetyevamevaita-
dāgrāmādagnimāhṛtya pūrvavadagnimājighret yadagniṃ na vindedapsu
juhuyādāpo vai sarvā devatāḥ sarvābhyo devatābhyo juhomi svāheti
sājyaṃ haviranāmayam । mokṣamantrastrayyevaṃ veda tadbrahma
tadupāsitavyam । śikhāṃ yajñopavītaṃ chittvā saṃnyastaṃ mayeti
trivāramuccaret । evamevaitadbhagavanniti vai yājñavalkyaḥ ॥ 1॥

atha hainamatriḥ papraccha yājñavalkyaṃ yajñopavītī
kathaṃ brāhmaṇa iti । sa hovāca yājñavalkya idaṃ
praṇavamevāsya tadyajñopavītaṃ ya ātmā । prāśyācamyāyaṃ
vidhiratha vā parivrāḍvivarṇavāsā muṇḍo'parigrahaḥ śuciradrohī
bhaikṣamāṇo brahma bhūyāya bhavati । eṣa panthāḥ
parivrājakānāṃ vīrādhvani vā'nāśake vāpāṃ praveśe
vāgnipraveśe vā mahāprasthāne vā । eṣa panthā brahmaṇā
hānuvittasteneti sa saṃnyāsī brahmaviditi । evamevaiṣa bhagavanniti
vai yājñavalkya । tatra paramahaṃsā nāma saṃvartakāruṇi-
śvetaketudūrvāsaṛbhunidāghadattātreyaśukavāmadeva-
hārītakaprabhṛtayo'vyaktaliṅgā'vyaktācārā anunmattā
unmattavadācarantaḥ parastrīpuraparāṅmukhāstridaṇḍaṃ
kamaṇḍaluṃ bhuktapātraṃ jalapavitraṃ śikhāṃ yajñopavītaṃ
bahirantaścetyetatsarvaṃ bhūḥ svāhetyapsu parityajyātmāna-
manvicchet । yathā jātarūpadharā nirdvandvā niṣparigrahā-
stattvabrahmamārge samyaksampannāḥ śuddhamānasāḥ
prāṇasandhāraṇārthaṃ yathoktakāle vimukto bhaikṣamācara-
nnudarapātreṇa lābhālābhau samau bhūtvā karapātreṇa vā
kamaṇḍalūdakapo bhaikṣamācarannudaramātrasaṃgrahaḥ
pātrāntaraśūnyo jalasthalakamaṇḍalurabādhakarahaḥsthala-
niketano lābhālābhau samau bhūtvā śūnyāgāradevagṛha-
tṛṇakūṭavalmīkavṛkṣamūlakulālaśālāgnihotraśālānadī-
pulunagirikuharakoṭarakandaranirjharasthaṇḍileṣvaniketanivāsya-
prayatnaḥśubhāśubhakarmanirmūlanaparaḥ saṃnyāsena
dehatyāgaṃ karoti sa paramahaṃso nāmeti । āśāmbaro na
namaskāro na dāraputrābhilāṣī lakṣyālakṣyanirvartakaḥ
parivrāṭ parameśvaro bhavati । atraite ślokā bhavanti ।
yo bhavetpūrvasaṃnyāsī tulyo vai dharmato yadi ।
tasmai praṇāmaḥ kartavyo netarāya kadācana ॥ 1॥

pramādino bahiścittāḥ piśunāḥ kalahotsukāḥ ।
saṃnyāsino'pi dṛśyante devasaṃdūṣitāśayāḥ ॥ 2॥

nāmādibhyaḥ pare bhūmni svārājye cetsthito'dvathe ।
praṇametkaṃ tadātmajño na kāryaṃ karmaṇā tadā ॥ 3॥

īśvaro jīvakalayā praviṣṭo bhagavāniti ।
praṇameddaṇḍavadbhūmāvāśvacaṇḍālagokharam ॥ 4॥

māṃsapāñcālikāyāstu yantraloke'ṅgapañjare ।
snāyvasthigranthiśālinyaḥ striyaḥ kimiva śobhanam ॥ 5॥

tvaṅmāṃsaraktabāṣpāmbu pṛthakkṛtvā vilocane ।
samālokaya ramyaṃ cetkiṃ mudhā parimuhyasi ॥ 6॥

meruśṛṅgataṭollāsi gaṅgājalasyopamā ।
dṛṣṭā yasminmune muktāhārasyollasaśālitā ॥ 7॥

śmanāneṣu diganteṣu sa eva lalanāstanaḥ ।
śvabhirāsvādyate kāle laghupiṇḍa ivāndhasaḥ ॥ 8॥

keśakajjaladhāriṇyo duḥsparśā locanapriyāḥ ।
duṣkṛtāgniśikhā nāryo dahanti tṛṇavannaram ॥ 9॥

jvalanā atidūre'pi sarasā api nīrasāḥ ।
striyo hi narakāgnīnāmindhanaṃ cāru dāruṇam ॥ 10॥

kāmanāmnā kirātena vikīrṇā mugdhacetasaḥ ।
nāryo naravihaṅgānāmaṅgabandhanavāgurāḥ ॥ 11॥

janmapalvalamatsyānāṃ cittakardamacāriṇām ।
puṃsāṃ durvāsanārajjurnārībaḍiśapiṇḍikā ॥ 12॥

sarveṣāṃ doṣaratnānāṃ susamudgikayānayā ।
duḥkhaśṛṅkhalayā nityamalamastu mama striyā ॥ 13॥

yasya strī tasya bhogecchā nistrīkasya kva bhogabhūḥ ।
striyaṃ tyaktvā jagattyaktaṃ jagattyaktvā sukhī bhavet ॥ 14॥

alabhyamānastanayaḥ pitarau kleśayecciram ।
labdho hi garbhapātena prasavena ca bādhate ॥ 15॥

jātasya graharogādi kumārasya ca dhūrtatā ।
upanīte'pyavidyatvamanudvāhaśca paṇḍite ॥ 16॥

yūnaśca paradārādi dāridryaṃ ca kuṭumbinaḥ ।
putraduḥkhasya nāstyanto dhanī cenmriyate tadā ॥ 17॥

na pāṇipādacapalo na netracapalo yatiḥ ।
na ca vākcapalaścaiva brahmabhūto jitendriyaḥ ॥ 18॥

ripau baddhe svadehe ca samaikātmyaṃ prapaśyataḥ ।
vivekinaḥ kutaḥ kopaḥ svadehāvayaveṣviva ॥ 19॥

apakāriṇi kopaścetkope kopaḥ kathaṃ na te ।
dharmārthakāmamokṣāṇāṃ prasahya paripanthini ॥ 20॥

namo'stu mama kopāya svāśrayajvāline bhṛśam ।
kopasya mama vairāgyadāyine doṣabodhine ॥ 21॥

yatra suptā janā nityaṃ prabuddhastatra saṃyamī ।
prabuddhā yatra te vidvānsuṣuptiṃ yāti yogirāṭ ॥ 22॥

cidihāstīti cinmātramidaṃ cinmayameva ca ।
cittvaṃ cidahamete ca lokāściditi bhāvaya ॥ 23॥

yatīnāṃ tadupādeyaṃ pārahaṃsyaṃ paraṃ padam ।
nātaḥ parataraṃ kiñcidvidyate munipuṅgavaḥ ॥ 24॥

ityupaniṣat ॥

oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥

hariḥ oṃ tatsat ॥

iti yājñavalkyopaniṣatsamāptā ॥