| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
4. яагкабахаарасуд̇д̇аван̣н̣анаа
4. Yakkhapahārasuttavaṇṇanā
34. жад̇уд̇т̇з габод̇аганд̣̇арааяанд̇и звам̣наамагз вихаарз. д̇асмим̣ гира баб̣б̣ад̇аганд̣̇арз буб̣б̣з б̣ахуу габод̇аа васим̣су, д̇зна саа баб̣б̣ад̇аганд̣̇араа ‘‘габод̇аганд̣̇араа’’д̇и вужжад̇и. абарабхааг̇з д̇ад̇т̇а гад̇авихаароби ‘‘габод̇аганд̣̇араа’’д̇взва бан̃н̃ааяид̇т̇а. д̇зна вуд̇д̇ам̣ – ‘‘габод̇аганд̣̇арааяанд̇и звам̣наамагз вихаарз’’д̇и. ж̇ун̣хааяа рад̇д̇ияаад̇и суггабагкарад̇д̇ияам̣. наворобид̇зхи гзсзхийд̇и ажираохаарид̇зхи гзсзхи, ид̇т̇амбхууд̇алагкан̣з жзд̇ам̣ гаран̣аважанам̣. аб̣бхогаасзд̇и яад̇т̇а убарижчад̣̇анам̣ баригкзбо ваа над̇т̇и, д̇аад̣̇исз аагаасан̇г̇ан̣з.
34. Catutthe kapotakandarāyanti evaṃnāmake vihāre. Tasmiṃ kira pabbatakandare pubbe bahū kapotā vasiṃsu, tena sā pabbatakandarā ‘‘kapotakandarā’’ti vuccati. Aparabhāge tattha katavihāropi ‘‘kapotakandarā’’tveva paññāyittha. Tena vuttaṃ – ‘‘kapotakandarāyanti evaṃnāmake vihāre’’ti. Juṇhāya rattiyāti sukkapakkharattiyaṃ. Navoropitehi kesehīti aciraohāritehi kesehi, itthambhūtalakkhaṇe cetaṃ karaṇavacanaṃ. Abbhokāseti yattha uparicchadanaṃ parikkhepo vā natthi, tādise ākāsaṅgaṇe.
д̇ад̇т̇а ааяасмаа саарибуд̇д̇о суван̣н̣аван̣н̣о, ааяасмаа махаамог̇г̇аллаано нийлуббалаван̣н̣о. убхоби бана д̇з махаат̇зраа уд̣̇ижжаб̣раахман̣аж̇ажжаа габбаанам̣ сад̇асахассаад̇хигам̣ згам̣ асан̇кязяяам̣ абхинийхаарасамбаннаа чал̣абхин̃н̃аабадисамбхид̣̇ааббад̇д̇аа махаакийн̣аасаваа самаабад̇д̇илаабхино сад̇д̇асадтияаа саавагабаарамин̃аан̣аанам̣ мад̇т̇агаббад̇д̇аа зд̇ам̣ габод̇аганд̣̇аравихаарам̣ убасобхаяанд̇аа згам̣ ганагаг̇ухам̣ бавидтаа д̣̇вз сийхаа вияа, згам̣ виж̇амбханабхуумим̣ од̇ин̣н̣аа д̣̇вз б̣яаг̇гхаа вияа, згам̣ субубпид̇асаалаванам̣ бавидтаа д̣̇вз чад̣̇д̣̇анд̇анааг̇арааж̇аано вияа, згам̣ симб̣аливанам̣ бавидтаа д̣̇вз субан̣н̣арааж̇аано вияа, згам̣ наравааханаяаанам̣ абхирул̣хаа д̣̇вз взссаван̣аа вияа, згам̣ бан̣д̣угамб̣аласилаасанам̣ абхинисиннаа д̣̇вз саггаа вияа, згавимаанаб̣бханд̇араг̇ад̇аа д̣̇вз махааб̣рахмаано вияа, згасмим̣ г̇аг̇анадтаанз тид̇аани д̣̇вз жанд̣̇аман̣д̣алаани вияа, д̣̇вз суурияаман̣д̣алаани вияа жа вирожим̣су. д̇зсу ааяасмаа махаамог̇г̇аллаано д̇ун̣хий нисийд̣̇и, ааяасмаа бана саарибуд̇д̇о самаабаж̇ж̇и. д̇зна вуд̇д̇ам̣ – ‘‘ан̃н̃ад̇арам̣ самаад̇хим̣ самаабаж̇ж̇ид̇ваа’’д̇и.
Tattha āyasmā sāriputto suvaṇṇavaṇṇo, āyasmā mahāmoggallāno nīluppalavaṇṇo. Ubhopi pana te mahātherā udiccabrāhmaṇajaccā kappānaṃ satasahassādhikaṃ ekaṃ asaṅkhyeyyaṃ abhinīhārasampannā chaḷabhiññāpaṭisambhidāppattā mahākhīṇāsavā samāpattilābhino sattasaṭṭhiyā sāvakapāramiñāṇānaṃ matthakappattā etaṃ kapotakandaravihāraṃ upasobhayantā ekaṃ kanakaguhaṃ paviṭṭhā dve sīhā viya, ekaṃ vijambhanabhūmiṃ otiṇṇā dve byagghā viya, ekaṃ supupphitasālavanaṃ paviṭṭhā dve chaddantanāgarājāno viya, ekaṃ simbalivanaṃ paviṭṭhā dve supaṇṇarājāno viya, ekaṃ naravāhanayānaṃ abhiruḷhā dve vessavaṇā viya, ekaṃ paṇḍukambalasilāsanaṃ abhinisinnā dve sakkā viya, ekavimānabbhantaragatā dve mahābrahmāno viya, ekasmiṃ gaganaṭṭhāne ṭhitāni dve candamaṇḍalāni viya, dve sūriyamaṇḍalāni viya ca virociṃsu. Tesu āyasmā mahāmoggallāno tuṇhī nisīdi, āyasmā pana sāriputto samāpajji. Tena vuttaṃ – ‘‘aññataraṃ samādhiṃ samāpajjitvā’’ti.
д̇ад̇т̇а ан̃н̃ад̇арам̣ самаад̇хинд̇и убзгкааб̣рахмавихаарасамаабад̇д̇им̣. гзжи ‘‘сан̃н̃аавзд̣̇аяид̇анирод̇хасамаабад̇д̇и’’нд̇и вад̣̇анд̇и, абарз банааху ‘‘ааруббабаад̣̇агам̣ паласамаабад̇д̇и’’нд̇и. имаа зва хи д̇иссо гааяарагкан̣асамад̇т̇аа самаабад̇д̇ияо. д̇ад̇т̇а нирод̇хасамаабад̇д̇ияаа самаад̇хибарияааяасамбхаво хздтаа вуд̇д̇ова, бажчимам̣язва бана аажарияаа ван̣н̣знд̇и. уд̇д̇арааяа д̣̇исааяа д̣̇агкин̣ам̣ д̣̇исам̣ г̇ажчанд̇ийд̇и уд̇д̇арааяа д̣̇исааяа яагкасамааг̇амам̣ г̇анд̇ваа ад̇д̇ано бхаванам̣ г̇анд̇ум̣ д̣̇агкин̣ам̣ д̣̇исам̣ г̇ажчанд̇и. бадибхаад̇и манд̇и убадтаад̇и мама. манд̇и хи бадисад̣̇д̣̇аяог̇зна саамиад̇т̇з убаяог̇аважанам̣, имасса сийсз бахаарам̣ д̣̇аад̇ум̣ жид̇д̇ам̣ мз уббаж̇ж̇ад̇ийд̇и ад̇т̇о. со гира буримаж̇аад̇ияам̣ т̇зрз б̣ад̣̇д̇хаагхаад̇о, д̇знасса т̇зрам̣ д̣̇исваа бад̣̇удтажид̇д̇асса звам̣ ахоси. ид̇аро бана саббан̃н̃аж̇аад̇иго, д̇асмаа д̇ам̣ бадисзд̇хзнд̇о ‘‘алам̣ саммаа’’д̇иаад̣̇имааха. д̇ад̇т̇а маа аасаад̣̇зсийд̇и маа гхаддзси, маа бахаарам̣ д̣̇зхийд̇и вуд̇д̇ам̣ ход̇и. ул̣аарод̇и ул̣аарзхи уд̇д̇амзхи сийлаад̣̇иг̇ун̣зхи саманнааг̇ад̇о.
Tattha aññataraṃ samādhinti upekkhābrahmavihārasamāpattiṃ. Keci ‘‘saññāvedayitanirodhasamāpatti’’nti vadanti, apare panāhu ‘‘āruppapādakaṃ phalasamāpatti’’nti. Imā eva hi tisso kāyarakkhaṇasamatthā samāpattiyo. Tattha nirodhasamāpattiyā samādhipariyāyasambhavo heṭṭhā vuttova, pacchimaṃyeva pana ācariyā vaṇṇenti. Uttarāya disāya dakkhiṇaṃ disaṃ gacchantīti uttarāya disāya yakkhasamāgamaṃ gantvā attano bhavanaṃ gantuṃ dakkhiṇaṃ disaṃ gacchanti. Paṭibhāti manti upaṭṭhāti mama. Manti hi paṭisaddayogena sāmiatthe upayogavacanaṃ, imassa sīse pahāraṃ dātuṃ cittaṃ me uppajjatīti attho. So kira purimajātiyaṃ there baddhāghāto, tenassa theraṃ disvā paduṭṭhacittassa evaṃ ahosi. Itaro pana sappaññajātiko, tasmā taṃ paṭisedhento ‘‘alaṃ sammā’’tiādimāha. Tattha mā āsādesīti mā ghaṭṭesi, mā pahāraṃ dehīti vuttaṃ hoti. Uḷāroti uḷārehi uttamehi sīlādiguṇehi samannāgato.
анаад̣̇ияид̇ваад̇и аад̣̇арам̣ агад̇ваа, д̇асса важанам̣ аг̇г̇ахзд̇ваа. яасмаа бана д̇асса важанам̣ аг̇г̇ан̣ханд̇о д̇ам̣ анаад̣̇ияанд̇о наама ход̇и, д̇асмаа вуд̇д̇ам̣ – ‘‘д̇ам̣ яагкам̣ анаад̣̇ияид̇ваа’’д̇и. сийсз бахаарам̣ ад̣̇аасийд̇и саб̣б̣ат̇аамзна уссаахам̣ ж̇анзд̇ваа аагаасз тид̇ова сийсз кадагам̣ ад̣̇ааси, муд̣̇д̇хани мудтигхаад̇ам̣ агаасийд̇и ад̇т̇о. д̇аава махаад̇и т̇аамамахад̇д̇зна д̇ад̇д̇агам̣ маханд̇о бахааро ахоси. д̇зна бахаарзнаад̇и д̇зна бахаарзна гаран̣абхууд̇зна. сад̇д̇арад̇ананд̇и бамаан̣амаж̇жхимасса бурисасса рад̇анзна сад̇д̇арад̇анам̣. нааг̇анд̇и хад̇т̇инааг̇ам̣. осаад̣̇зяяаад̇и бат̇авияам̣ осийд̣̇аабзяяа нимуж̇ж̇аабзяяа. ‘‘осаарзяяаа’’д̇иби баато, жун̣н̣авижун̣н̣ам̣ гарзяяаад̇и ад̇т̇о. ад̣дхадтамарад̇ананд̇и ад̣дхзна адтаннам̣ бууран̣аани ад̣дхадтамаани, ад̣дхадтамаани рад̇анаани бамаан̣ам̣ зд̇ассаад̇и ад̣дхадтамарад̇ано, д̇ам̣ ад̣дхадтамарад̇анам̣. маханд̇ам̣ баб̣б̣ад̇агууданд̇и гзлаасагуудаббамаан̣ам̣ вибулам̣ г̇иригуудам̣. бад̣̇аалзяяаад̇и сагалигаагаарзна бхинд̣̇зяяа. аби осаад̣̇зяяа, аби бад̣̇аалзяяаад̇и самб̣анд̇хо.
Anādiyitvāti ādaraṃ akatvā, tassa vacanaṃ aggahetvā. Yasmā pana tassa vacanaṃ aggaṇhanto taṃ anādiyanto nāma hoti, tasmā vuttaṃ – ‘‘taṃ yakkhaṃ anādiyitvā’’ti. Sīse pahāraṃ adāsīti sabbathāmena ussāhaṃ janetvā ākāse ṭhitova sīse khaṭakaṃ adāsi, muddhani muṭṭhighātaṃ akāsīti attho. Tāva mahāti thāmamahattena tattakaṃ mahanto pahāro ahosi. Tena pahārenāti tena pahārena karaṇabhūtena. Sattaratananti pamāṇamajjhimassa purisassa ratanena sattaratanaṃ. Nāganti hatthināgaṃ. Osādeyyāti pathaviyaṃ osīdāpeyya nimujjāpeyya. ‘‘Osāreyyā’’tipi pāṭho, cuṇṇavicuṇṇaṃ kareyyāti attho. Aḍḍhaṭṭhamaratananti aḍḍhena aṭṭhannaṃ pūraṇāni aḍḍhaṭṭhamāni, aḍḍhaṭṭhamāni ratanāni pamāṇaṃ etassāti aḍḍhaṭṭhamaratano, taṃ aḍḍhaṭṭhamaratanaṃ. Mahantaṃ pabbatakūṭanti kelāsakūṭappamāṇaṃ vipulaṃ girikūṭaṃ. Padāleyyāti sakalikākārena bhindeyya. Api osādeyya, api padāleyyāti sambandho.
д̇аавад̣̇зва жасса сарийрз махаабарил̣аахо уббаж̇ж̇и, со взд̣̇анаад̇уро аагаасз таад̇ум̣ асаггонд̇о бхуумияам̣ бад̇и, д̇ан̇кан̣ан̃н̃зва адтасадтисахассаад̇хигаяож̇анасад̇асахассуб̣б̣зд̇хам̣ синзрумби баб̣б̣ад̇арааж̇аанам̣ санд̇хаарзнд̇ий жад̇унахуд̇аад̇хигад̣̇вияож̇анасад̇асахассаб̣ахалаа махаабат̇авий д̇ам̣ баабасад̇д̇ам̣ д̇хаарзд̇ум̣ асаггонд̇ий вияа виварамад̣̇ааси. авийжид̇о ж̇аалаа удтахид̇ваа ганд̣̇анд̇ам̣язва д̇ам̣ г̇ан̣хим̣су, со ганд̣̇анд̇о виббалабанд̇о бад̇и. д̇зна вуд̇д̇ам̣ – ‘‘ат̇а жа бана со яагко ‘д̣аяхаами д̣аяхаамий’д̇и вад̇ваа д̇ад̇т̇зва махаанираяам̣ абад̇аасийд̇и. д̇ад̇т̇а абад̇аасийд̇и абад̇и.
Tāvadeva cassa sarīre mahāpariḷāho uppajji, so vedanāturo ākāse ṭhātuṃ asakkonto bhūmiyaṃ pati, taṅkhaṇaññeva aṭṭhasaṭṭhisahassādhikayojanasatasahassubbedhaṃ sinerumpi pabbatarājānaṃ sandhārentī catunahutādhikadviyojanasatasahassabahalā mahāpathavī taṃ pāpasattaṃ dhāretuṃ asakkontī viya vivaramadāsi. Avīcito jālā uṭṭhahitvā kandantaṃyeva taṃ gaṇhiṃsu, so kandanto vippalapanto pati. Tena vuttaṃ – ‘‘atha ca pana so yakkho ‘ḍayhāmi ḍayhāmī’ti vatvā tattheva mahānirayaṃ apatāsīti. Tattha apatāsīti apati.
гим̣ бана со яагкад̇д̇абхаавзнзва нираяам̣ убаг̇ажчийд̇и? на убаг̇ажчи, яан̃хзд̇т̇а д̣̇идтад̇хаммавзд̣̇анийяам̣ баабагаммам̣ ахоси, д̇асса б̣алзна яагкад̇д̇абхаавз маханд̇ам̣ д̣̇угкам̣ анубхави. яам̣ бана убабаж̇ж̇авзд̣̇анийяам̣ аананд̇арияагаммам̣, д̇зна жуд̇иананд̇арам̣ нираяз уббаж̇ж̇ийд̇и. т̇зрасса бана самаабад̇д̇иб̣алзна убад̇т̇амбхид̇асарийрасса на гожи вигааро ахоси. самаабад̇д̇ид̇о авудтид̇агаалз хи д̇ам̣ яагко бахари, д̇ат̇аа бахаранд̇ам̣ д̣̇иб̣б̣ажагкунаа д̣̇исваа ааяасмаа махаамог̇г̇аллаано д̇хаммасзнаабад̇им̣ убасан̇гами, убасан̇гаманасамагааламзва жа д̇хаммасзнаабад̇и самаабад̇д̇ид̇о удтааси. ат̇а нам̣ махаамог̇г̇аллаано сарийравуд̇д̇им̣ бужчи, собисса б̣яаагааси, д̇зна вуд̇д̇ам̣ – ‘‘ад̣̇д̣̇асаа ко ааяасмаа махаамог̇г̇аллаано…бз… аби жа мз сийсам̣ т̇огам̣ д̣̇угка’’нд̇и.
Kiṃ pana so yakkhattabhāveneva nirayaṃ upagacchīti? Na upagacchi, yañhettha diṭṭhadhammavedanīyaṃ pāpakammaṃ ahosi, tassa balena yakkhattabhāve mahantaṃ dukkhaṃ anubhavi. Yaṃ pana upapajjavedanīyaṃ ānantariyakammaṃ, tena cutianantaraṃ niraye uppajjīti. Therassa pana samāpattibalena upatthambhitasarīrassa na koci vikāro ahosi. Samāpattito avuṭṭhitakāle hi taṃ yakkho pahari, tathā paharantaṃ dibbacakkhunā disvā āyasmā mahāmoggallāno dhammasenāpatiṃ upasaṅkami, upasaṅkamanasamakālameva ca dhammasenāpati samāpattito uṭṭhāsi. Atha naṃ mahāmoggallāno sarīravuttiṃ pucchi, sopissa byākāsi, tena vuttaṃ – ‘‘addasā kho āyasmā mahāmoggallāno…pe… api ca me sīsaṃ thokaṃ dukkha’’nti.
д̇ад̇т̇а т̇огам̣ д̣̇угканд̇и т̇огам̣ аббамад̇д̇агам̣ мад̇хурагаж̇аад̇ам̣ вияа мз сийсам̣ д̣̇угкид̇ам̣, д̣̇угкаббад̇д̇анд̇и ад̇т̇о. д̣̇угкаад̇хидтаанан̃хи сийсам̣ д̣̇угканд̇и вуд̇д̇ам̣. ‘‘сийсз т̇огам̣ д̣̇угка’’нд̇иби баато. гат̇ам̣ бана самаабад̇д̇иб̣алзна сарийрз убад̇т̇амбхид̇з т̇зрасса сийсз т̇огамби д̣̇угкам̣ ахосийд̇и? ажирзнзва вудтид̇ад̇д̇аа. анд̇осамаабад̇д̇ияам̣ абан̃н̃ааяамаанад̣̇угкан̃хи гааяаниссид̇ад̇д̇аа нид̣̇д̣̇ам̣ убаг̇ад̇асса магасаад̣̇иж̇анид̇ам̣ вияа бадиб̣уд̣̇д̇хасса т̇огам̣ бан̃н̃ааяид̇т̇а.
Tattha thokaṃ dukkhanti thokaṃ appamattakaṃ madhurakajātaṃ viya me sīsaṃ dukkhitaṃ, dukkhappattanti attho. Dukkhādhiṭṭhānañhi sīsaṃ dukkhanti vuttaṃ. ‘‘Sīse thokaṃ dukkha’’ntipi pāṭho. Kathaṃ pana samāpattibalena sarīre upatthambhite therassa sīse thokampi dukkhaṃ ahosīti? Acireneva vuṭṭhitattā. Antosamāpattiyaṃ apaññāyamānadukkhañhi kāyanissitattā niddaṃ upagatassa makasādijanitaṃ viya paṭibuddhassa thokaṃ paññāyittha.
‘‘махааб̣алзна яагкзна д̇ат̇аа саб̣б̣уссаахзна бахадз сарийрзби вигааро наама над̇т̇ий’’д̇и ажчарияаб̣бхуд̇ажид̇д̇аж̇аад̇зна ааяасмад̇аа махаамог̇г̇аллаанзна ‘‘ажчарияам̣, аавусо саарибуд̇д̇аа’’д̇иаад̣̇инаа д̇хаммасзнаабад̇ино махаанубхаавад̇ааяа вибхаавид̇ааяа собисса ‘ажчарияам̣, аавусо мог̇г̇аллаанаа’’д̇иаад̣̇инаа ид̣̇д̇хаанубхаавамаханд̇ад̇аабагаасанаабад̣̇зсзна ад̇д̇ано иссаамажчарияаахан̇гаараад̣̇ималаанам̣ суббахийнад̇ам̣ д̣̇ийбзд̇и. бам̣субисаажагамби на бассаамаад̇и сан̇гаарагуудаад̣̇ийсу вижаран̣агакуд̣̇д̣̇агабзд̇амби на бассаама. ид̇и ад̇хиг̇амаббижчаанам̣ аг̇г̇абхууд̇о махаат̇зро д̇асмим̣ гаалз анааваж̇ж̇анзна д̇зсам̣ ад̣̇ассанам̣ санд̇хааяа вад̣̇ад̇и. д̇знзвааха ‘‘зд̇арахий’’д̇и.
‘‘Mahābalena yakkhena tathā sabbussāhena pahaṭe sarīrepi vikāro nāma natthī’’ti acchariyabbhutacittajātena āyasmatā mahāmoggallānena ‘‘acchariyaṃ, āvuso sāriputtā’’tiādinā dhammasenāpatino mahānubhāvatāya vibhāvitāya sopissa ‘acchariyaṃ, āvuso moggallānā’’tiādinā iddhānubhāvamahantatāpakāsanāpadesena attano issāmacchariyāhaṅkārādimalānaṃ suppahīnataṃ dīpeti. Paṃsupisācakampi na passāmāti saṅkārakūṭādīsu vicaraṇakakhuddakapetampi na passāma. Iti adhigamappicchānaṃ aggabhūto mahāthero tasmiṃ kāle anāvajjanena tesaṃ adassanaṃ sandhāya vadati. Tenevāha ‘‘etarahī’’ti.
бхаг̇аваа бана взл̣уванз тид̇о убхиннам̣ аг̇г̇асаавагаанам̣ имам̣ гат̇аасаллаабам̣ д̣̇иб̣б̣асод̇зна ассоси. д̇зна вуд̇д̇ам̣ – ‘‘ассоси ко бхаг̇аваа’’д̇иаад̣̇и, д̇ам̣ вуд̇д̇ад̇т̇амзва.
Bhagavā pana veḷuvane ṭhito ubhinnaṃ aggasāvakānaṃ imaṃ kathāsallāpaṃ dibbasotena assosi. Tena vuttaṃ – ‘‘assosi kho bhagavā’’tiādi, taṃ vuttatthameva.
зд̇амад̇т̇ам̣ вид̣̇ид̇ваад̇и зд̇ам̣ ааяасмад̇о саарибуд̇д̇асса самаабад̇д̇иб̣алуубаг̇ад̇ам̣ ид̣̇д̇хаанубхаавамаханд̇ад̇ам̣ вид̣̇ид̇ваа. имам̣ уд̣̇аананд̇и д̇ассзва д̇аад̣̇ибхааваббад̇д̇ид̣̇ийбагам̣ имам̣ уд̣̇аанам̣ уд̣̇аанзси.
Etamatthaṃ viditvāti etaṃ āyasmato sāriputtassa samāpattibalūpagataṃ iddhānubhāvamahantataṃ viditvā. Imaṃ udānanti tasseva tādibhāvappattidīpakaṃ imaṃ udānaṃ udānesi.
д̇ад̇т̇а яасса сзлуубамам̣ жид̇д̇ам̣, тид̇ам̣ наанубагамбад̇ийд̇и яасса кийн̣аасавасса жид̇д̇ам̣ згаг̇гханасилаамаяабаб̣б̣ад̇уубамам̣ саб̣б̣зсам̣ ин̃ж̇анаанам̣ абхаавад̇о васийбхааваббад̇д̇ияаава тид̇ам̣ саб̣б̣зхиби логад̇хаммзхи наанубагамбад̇и на бавзд̇хад̇и. ид̣̇аанисса агамбанаагаарам̣ сад̣̇д̇хим̣ гааран̣зна д̣̇ассзд̇ум̣ ‘‘вирад̇д̇а’’нд̇иаад̣̇и вуд̇д̇ам̣. д̇ад̇т̇а вирад̇д̇ам̣ раж̇анийязсууд̇и вирааг̇асан̇каад̇зна арияамаг̇г̇зна раж̇анийязсу рааг̇уббад̇д̇ихзд̇убхууд̇зсу саб̣б̣зсу д̇збхуумагад̇хаммзсу вирад̇д̇ам̣, д̇ад̇т̇а саб̣б̣асо самужчиннарааг̇анд̇и ад̇т̇о. гобанзяязд̇и бадигхадтаанийяз саб̣б̣асмимби аагхаад̇авад̇т̇усмим̣ на губбад̇и на д̣̇уссад̇и на вигаарам̣ аабаж̇ж̇ад̇и. яассзвам̣ бхаавид̇ам̣ жид̇д̇анд̇и яасса яат̇аавуд̇д̇асса арияабуг̇г̇аласса жид̇д̇ам̣ звам̣ вуд̇д̇анаязна д̇аад̣̇ибхаавааваханабхаавзна бхаавид̇ам̣. гуд̇о д̇ам̣ д̣̇угкамзссад̇ийд̇и д̇ам̣ уд̇д̇амабуг̇г̇алам̣ гуд̇о сад̇д̇ад̇о сан̇каарад̇о ваа д̣̇угкам̣ убаг̇амиссад̇и, на д̇аад̣̇исасса д̣̇угкам̣ ад̇т̇ийд̇и ад̇т̇о.
Tattha yassa selūpamaṃ cittaṃ, ṭhitaṃ nānupakampatīti yassa khīṇāsavassa cittaṃ ekagghanasilāmayapabbatūpamaṃ sabbesaṃ iñjanānaṃ abhāvato vasībhāvappattiyāva ṭhitaṃ sabbehipi lokadhammehi nānupakampati na pavedhati. Idānissa akampanākāraṃ saddhiṃ kāraṇena dassetuṃ ‘‘viratta’’ntiādi vuttaṃ. Tattha virattaṃ rajanīyesūti virāgasaṅkhātena ariyamaggena rajanīyesu rāguppattihetubhūtesu sabbesu tebhūmakadhammesu virattaṃ, tattha sabbaso samucchinnarāganti attho. Kopaneyyeti paṭighaṭṭhānīye sabbasmimpi āghātavatthusmiṃ na kuppati na dussati na vikāraṃ āpajjati. Yassevaṃ bhāvitaṃ cittanti yassa yathāvuttassa ariyapuggalassa cittaṃ evaṃ vuttanayena tādibhāvāvahanabhāvena bhāvitaṃ. Kuto taṃ dukkhamessatīti taṃ uttamapuggalaṃ kuto sattato saṅkhārato vā dukkhaṃ upagamissati, na tādisassa dukkhaṃ atthīti attho.
жад̇уд̇т̇асуд̇д̇аван̣н̣анаа нидтид̇аа.
Catutthasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 4. яагкабахаарасуд̇д̇ам̣ • 4. Yakkhapahārasuttaṃ
