| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๗. ยกฺขปโญฺห
7. Yakkhapañho
๗. ‘‘ภเนฺต นาคเสน, อตฺถิ โลเก ยกฺขา นามา’’ติ? ‘‘อาม, มหาราช, อตฺถิ โลเก ยกฺขา นามา’’ติฯ ‘‘จวนฺติ ปน เต, ภเนฺต, ยกฺขา ตมฺหา โยนิยา’’ติ? ‘‘อาม, มหาราช, จวนฺติ เต ยกฺขา ตมฺหา โยนิยา’’ติฯ ‘‘กิสฺส ปน, ภเนฺต นาคเสน, เตสํ มตานํ ยกฺขานํ สรีรํ น ทิสฺสติ, กุณปคโนฺธปิ น วายตี’’ติ? ‘‘ทิสฺสติ, มหาราช, มตานํ ยกฺขานํ สรีรํ, กุณปคโนฺธปิ เตสํ วายติ, มตานํ, มหาราช, ยกฺขานํ สรีรํ กีฎวเณฺณน วา ทิสฺสติ, กิมิวเณฺณน วา ทิสฺสติ, กิปิลฺลิกวเณฺณน วา ทิสฺสติ, ปฎงฺควเณฺณน วา ทิสฺสติ, อหิวเณฺณน วา ทิสฺสติ, วิจฺฉิกวเณฺณน วา ทิสฺสติ, สตปทิวเณฺณน วา ทิสฺสติ, ทิชวเณฺณน วา ทิสฺสติ, มิควเณฺณน วา ทิสฺสตี’’ติฯ ‘‘โก หิ, ภเนฺต นาคเสน, อโญฺญ อิทํ ปญฺหํ ปุโฎฺฐ วิสเชฺชยฺย อญฺญตฺร ตวาทิเสน พุทฺธิมตา’’ติฯ
7. ‘‘Bhante nāgasena, atthi loke yakkhā nāmā’’ti? ‘‘Āma, mahārāja, atthi loke yakkhā nāmā’’ti. ‘‘Cavanti pana te, bhante, yakkhā tamhā yoniyā’’ti? ‘‘Āma, mahārāja, cavanti te yakkhā tamhā yoniyā’’ti. ‘‘Kissa pana, bhante nāgasena, tesaṃ matānaṃ yakkhānaṃ sarīraṃ na dissati, kuṇapagandhopi na vāyatī’’ti? ‘‘Dissati, mahārāja, matānaṃ yakkhānaṃ sarīraṃ, kuṇapagandhopi tesaṃ vāyati, matānaṃ, mahārāja, yakkhānaṃ sarīraṃ kīṭavaṇṇena vā dissati, kimivaṇṇena vā dissati, kipillikavaṇṇena vā dissati, paṭaṅgavaṇṇena vā dissati, ahivaṇṇena vā dissati, vicchikavaṇṇena vā dissati, satapadivaṇṇena vā dissati, dijavaṇṇena vā dissati, migavaṇṇena vā dissatī’’ti. ‘‘Ko hi, bhante nāgasena, añño idaṃ pañhaṃ puṭṭho visajjeyya aññatra tavādisena buddhimatā’’ti.
ยกฺขปโญฺห สตฺตโมฯ
Yakkhapañho sattamo.
