| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༧. ཡཀྑཔཉྷོ
7. Yakkhapañho
༧. ‘‘བྷནྟེ ནཱགསེན, ཨཏྠི ལོཀེ ཡཀྑཱ ནཱམཱ’’ཏི? ‘‘ཨཱམ, མཧཱརཱཛ, ཨཏྠི ལོཀེ ཡཀྑཱ ནཱམཱ’’ཏི། ‘‘ཙཝནྟི པན ཏེ, བྷནྟེ, ཡཀྑཱ ཏམྷཱ ཡོནིཡཱ’’ཏི? ‘‘ཨཱམ, མཧཱརཱཛ, ཙཝནྟི ཏེ ཡཀྑཱ ཏམྷཱ ཡོནིཡཱ’’ཏི། ‘‘ཀིསྶ པན, བྷནྟེ ནཱགསེན, ཏེསཾ མཏཱནཾ ཡཀྑཱནཾ སརཱིརཾ ན དིསྶཏི, ཀུཎཔགནྡྷོཔི ན ཝཱཡཏཱི’’ཏི? ‘‘དིསྶཏི, མཧཱརཱཛ, མཏཱནཾ ཡཀྑཱནཾ སརཱིརཾ, ཀུཎཔགནྡྷོཔི ཏེསཾ ཝཱཡཏི, མཏཱནཾ, མཧཱརཱཛ, ཡཀྑཱནཾ སརཱིརཾ ཀཱིཊཝཎྞེན ཝཱ དིསྶཏི, ཀིམིཝཎྞེན ཝཱ དིསྶཏི, ཀིཔིལླིཀཝཎྞེན ཝཱ དིསྶཏི, པཊངྒཝཎྞེན ཝཱ དིསྶཏི, ཨཧིཝཎྞེན ཝཱ དིསྶཏི, ཝིཙྪིཀཝཎྞེན ཝཱ དིསྶཏི, སཏཔདིཝཎྞེན ཝཱ དིསྶཏི, དིཛཝཎྞེན ཝཱ དིསྶཏི, མིགཝཎྞེན ཝཱ དིསྶཏཱི’’ཏི། ‘‘ཀོ ཧི, བྷནྟེ ནཱགསེན, ཨཉྙོ ཨིདཾ པཉྷཾ པུཊྛོ ཝིསཛྫེཡྻ ཨཉྙཏྲ ཏཝཱདིསེན བུདྡྷིམཏཱ’’ཏི།
7. ‘‘Bhante nāgasena, atthi loke yakkhā nāmā’’ti? ‘‘Āma, mahārāja, atthi loke yakkhā nāmā’’ti. ‘‘Cavanti pana te, bhante, yakkhā tamhā yoniyā’’ti? ‘‘Āma, mahārāja, cavanti te yakkhā tamhā yoniyā’’ti. ‘‘Kissa pana, bhante nāgasena, tesaṃ matānaṃ yakkhānaṃ sarīraṃ na dissati, kuṇapagandhopi na vāyatī’’ti? ‘‘Dissati, mahārāja, matānaṃ yakkhānaṃ sarīraṃ, kuṇapagandhopi tesaṃ vāyati, matānaṃ, mahārāja, yakkhānaṃ sarīraṃ kīṭavaṇṇena vā dissati, kimivaṇṇena vā dissati, kipillikavaṇṇena vā dissati, paṭaṅgavaṇṇena vā dissati, ahivaṇṇena vā dissati, vicchikavaṇṇena vā dissati, satapadivaṇṇena vā dissati, dijavaṇṇena vā dissati, migavaṇṇena vā dissatī’’ti. ‘‘Ko hi, bhante nāgasena, añño idaṃ pañhaṃ puṭṭho visajjeyya aññatra tavādisena buddhimatā’’ti.
ཡཀྑཔཉྷོ སཏྟམོ།
Yakkhapañho sattamo.
