| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৭০. যমকপাটিহীরঞাণনিদ্দেসো
70. Yamakapāṭihīrañāṇaniddeso
১১৬. কতমং তথাগতস্স যমকপাটিহীরে ঞাণং? ইধ তথাগতো যমকপাটিহীরং করোতি অসাধারণং সাৰকেহি। উপরিমকাযতো অগ্গিক্খন্ধো পৰত্ততি, হেট্ঠিমকাযতো উদকধারা পৰত্ততি; হেট্ঠিমকাযতো অগ্গিক্খন্ধো পৰত্ততি, উপরিমকাযতো উদকধারা পৰত্ততি; পুরত্থিমকাযতো অগ্গিক্খন্ধো পৰত্ততি, পচ্ছিমকাযতো উদকধারা পৰত্ততি; পচ্ছিমকাযতো অগ্গিক্খন্ধো পৰত্ততি, পুরত্থিমকাযতো উদকধারা পৰত্ততি; দক্খিণঅক্খিতো অগ্গিক্খন্ধো পৰত্ততি, ৰামঅক্খিতো উদকধারা পৰত্ততি; ৰামঅক্খিতো অগ্গিক্খন্ধো পৰত্ততি, দক্খিণঅক্খিতো উদকধারা পৰত্ততি; দক্খিণকণ্ণসোততো অগ্গিক্খন্ধো পৰত্ততি, ৰামকণ্ণসোততো উদকধারা পৰত্ততি; ৰামকণ্ণসোততো অগ্গিক্খন্ধো পৰত্ততি, দক্খিণকণ্ণসোততো উদকধারা পৰত্ততি; দক্খিণনাসিকাসোততো অগ্গিক্খন্ধো পৰত্ততি, ৰামনাসিকাসোততো উদকধারা পৰত্ততি; ৰামনাসিকাসোততো অগ্গিক্খন্ধো পৰত্ততি, দক্খিণনাসিকাসোততো উদকধারা পৰত্ততি; দক্খিণঅংসকূটতো অগ্গিক্খন্ধো পৰত্ততি, ৰামঅংসকূটতো উদকধারা পৰত্ততি; ৰামঅংসকূটতো অগ্গিক্খন্ধো পৰত্ততি, দক্খিণঅংসকূটতো উদকধারা পৰত্ততি; দক্খিণহত্থতো অগ্গিক্খন্ধো পৰত্ততি, ৰামহত্থতো উদকধারা পৰত্ততি; ৰামহত্থতো অগ্গিক্খন্ধো পৰত্ততি, দক্খিণহত্থতো উদকধারা পৰত্ততি; দক্খিণপস্সতো অগ্গিক্খন্ধো পৰত্ততি, ৰামপস্সতো উদকধারা পৰত্ততি; ৰামপস্সতো অগ্গিক্খন্ধো পৰত্ততি, দক্খিণপস্সতো উদকধারা পৰত্ততি; দক্খিণপাদতো অগ্গিক্খন্ধো পৰত্ততি , ৰামপাদতো উদকধারা পৰত্ততি; ৰামপাদতো অগ্গিক্খন্ধো পৰত্ততি, দক্খিণপাদতো উদকধারা পৰত্ততি; অঙ্গুলঙ্গুলেহি অগ্গিক্খন্ধো পৰত্ততি, অঙ্গুলন্তরিকাহি উদকধারা পৰত্ততি; অঙ্গুলন্তরিকাহি অগ্গিক্খন্ধো পৰত্ততি, অঙ্গুলঙ্গুলেহি উদকধারা পৰত্ততি; একেকলোমতো অগ্গিক্খন্ধো পৰত্ততি, একেকলোমতো উদকধারা পৰত্ততি; লোমকূপতো লোমকূপতো অগ্গিক্খন্ধো পৰত্ততি, লোমকূপতো লোমকূপতো উদকধারা পৰত্ততি।
116. Katamaṃ tathāgatassa yamakapāṭihīre ñāṇaṃ? Idha tathāgato yamakapāṭihīraṃ karoti asādhāraṇaṃ sāvakehi. Uparimakāyato aggikkhandho pavattati, heṭṭhimakāyato udakadhārā pavattati; heṭṭhimakāyato aggikkhandho pavattati, uparimakāyato udakadhārā pavattati; puratthimakāyato aggikkhandho pavattati, pacchimakāyato udakadhārā pavattati; pacchimakāyato aggikkhandho pavattati, puratthimakāyato udakadhārā pavattati; dakkhiṇaakkhito aggikkhandho pavattati, vāmaakkhito udakadhārā pavattati; vāmaakkhito aggikkhandho pavattati, dakkhiṇaakkhito udakadhārā pavattati; dakkhiṇakaṇṇasotato aggikkhandho pavattati, vāmakaṇṇasotato udakadhārā pavattati; vāmakaṇṇasotato aggikkhandho pavattati, dakkhiṇakaṇṇasotato udakadhārā pavattati; dakkhiṇanāsikāsotato aggikkhandho pavattati, vāmanāsikāsotato udakadhārā pavattati; vāmanāsikāsotato aggikkhandho pavattati, dakkhiṇanāsikāsotato udakadhārā pavattati; dakkhiṇaaṃsakūṭato aggikkhandho pavattati, vāmaaṃsakūṭato udakadhārā pavattati; vāmaaṃsakūṭato aggikkhandho pavattati, dakkhiṇaaṃsakūṭato udakadhārā pavattati; dakkhiṇahatthato aggikkhandho pavattati, vāmahatthato udakadhārā pavattati; vāmahatthato aggikkhandho pavattati, dakkhiṇahatthato udakadhārā pavattati; dakkhiṇapassato aggikkhandho pavattati, vāmapassato udakadhārā pavattati; vāmapassato aggikkhandho pavattati, dakkhiṇapassato udakadhārā pavattati; dakkhiṇapādato aggikkhandho pavattati , vāmapādato udakadhārā pavattati; vāmapādato aggikkhandho pavattati, dakkhiṇapādato udakadhārā pavattati; aṅgulaṅgulehi aggikkhandho pavattati, aṅgulantarikāhi udakadhārā pavattati; aṅgulantarikāhi aggikkhandho pavattati, aṅgulaṅgulehi udakadhārā pavattati; ekekalomato aggikkhandho pavattati, ekekalomato udakadhārā pavattati; lomakūpato lomakūpato aggikkhandho pavattati, lomakūpato lomakūpato udakadhārā pavattati.
ছন্নং ৰণ্ণানং – নীলানং, পীতকানং, লোহিতকানং, ওদাতানং, মঞ্জিট্ঠানং 1, পভস্সরানং ভগৰা চঙ্কমতি, নিম্মিতো তিট্ঠতি ৰা নিসীদতি ৰা সেয্যং ৰা কপ্পেতি। ভগৰা তিট্ঠতি, নিম্মিতো চঙ্কমতি ৰা নিসীদতি ৰা সেয্যং ৰা কপ্পেতি। ভগৰা নিসীদতি, নিম্মিতো চঙ্কমতি ৰা তিট্ঠতি ৰা সেয্যং ৰা কপ্পেতি। ভগৰা সেয্যং কপ্পেতি, নিম্মিতো চঙ্কমতি ৰা তিট্ঠতি ৰা নিসীদতি ৰা। নিম্মিতো চঙ্কমতি, ভগৰা তিট্ঠতি ৰা নিসীদতি ৰা সেয্যং ৰা কপ্পেতি। নিম্মিতো তিট্ঠতি, ভগৰা চঙ্কমতি ৰা নিসীদতি ৰা সেয্যং ৰা কপ্পেতি। নিম্মিতো নিসীদতি, ভগৰা চঙ্কমতি ৰা তিট্ঠতি ৰা সেয্যং ৰা কপ্পেতি। নিম্মিতো সেয্যং কপ্পেতি, ভগৰা চঙ্কমতি ৰা তিট্ঠতি ৰা নিসীদতি ৰা। ইদং তথাগতস্স যমকপাটিহীরে ঞাণং।
Channaṃ vaṇṇānaṃ – nīlānaṃ, pītakānaṃ, lohitakānaṃ, odātānaṃ, mañjiṭṭhānaṃ 2, pabhassarānaṃ bhagavā caṅkamati, nimmito tiṭṭhati vā nisīdati vā seyyaṃ vā kappeti. Bhagavā tiṭṭhati, nimmito caṅkamati vā nisīdati vā seyyaṃ vā kappeti. Bhagavā nisīdati, nimmito caṅkamati vā tiṭṭhati vā seyyaṃ vā kappeti. Bhagavā seyyaṃ kappeti, nimmito caṅkamati vā tiṭṭhati vā nisīdati vā. Nimmito caṅkamati, bhagavā tiṭṭhati vā nisīdati vā seyyaṃ vā kappeti. Nimmito tiṭṭhati, bhagavā caṅkamati vā nisīdati vā seyyaṃ vā kappeti. Nimmito nisīdati, bhagavā caṅkamati vā tiṭṭhati vā seyyaṃ vā kappeti. Nimmito seyyaṃ kappeti, bhagavā caṅkamati vā tiṭṭhati vā nisīdati vā. Idaṃ tathāgatassa yamakapāṭihīre ñāṇaṃ.
যমকপাটিহীরঞাণনিদ্দেসো সত্ততিমো।
Yamakapāṭihīrañāṇaniddeso sattatimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৭০. যমকপাটিহীরঞাণনিদ্দেসৰণ্ণনা • 70. Yamakapāṭihīrañāṇaniddesavaṇṇanā
