| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. யமகஸுத்தவண்ணனா
3. Yamakasuttavaṇṇanā
85. ததியே தி³ட்டி²க³தந்தி ஸசே ஹிஸ்ஸ ஏவங் ப⁴வெய்ய ‘‘ஸங்கா²ரா உப்பஜ்ஜந்தி சேவ நிருஜ்ஜ²ந்தி ச, ஸங்கா²ரப்பவத்தமேவ அப்பவத்தங் ஹோதீ’’தி, தி³ட்டி²க³தங் நாம ந ப⁴வெய்ய, ஸாஸனாவசரிகங் ஞாணங் ப⁴வெய்ய. யஸ்மா பனஸ்ஸ ‘‘ஸத்தோ உச்சி²ஜ்ஜதி வினஸ்ஸதீ’’தி அஹோஸி, தஸ்மா தி³ட்டி²க³தங் நாம ஜாதங். தா²மஸா பராமாஸாதி தி³ட்டி²தா²மேன சேவ தி³ட்டி²பராமாஸேன ச.
85. Tatiye diṭṭhigatanti sace hissa evaṃ bhaveyya ‘‘saṅkhārā uppajjanti ceva nirujjhanti ca, saṅkhārappavattameva appavattaṃ hotī’’ti, diṭṭhigataṃ nāma na bhaveyya, sāsanāvacarikaṃ ñāṇaṃ bhaveyya. Yasmā panassa ‘‘satto ucchijjati vinassatī’’ti ahosi, tasmā diṭṭhigataṃ nāma jātaṃ. Thāmasā parāmāsāti diṭṭhithāmena ceva diṭṭhiparāmāsena ca.
யேனாயஸ்மா ஸாரிபுத்தோதி யதா² நாம பச்சந்தே குபிதே தங் வூபஸமேதுங் அஸக்கொந்தா ராஜபுரிஸா ஸேனாபதிஸ்ஸ வா ரஞ்ஞோ வா ஸந்திகங் க³ச்ச²ந்தி, ஏவங் தி³ட்டி²க³தவஸேன தஸ்மிங் தே²ரே குபிதே தங் வூபஸமேதுங் அஸக்கொந்தா தே பி⁴க்கூ² யேன த⁴ம்மராஜஸ்ஸ த⁴ம்மஸேனாபதி ஆயஸ்மா ஸாரிபுத்தோ , தேனுபஸங்கமிங்ஸு. ஏவங்ப்³யாகோ²தி தேஸங் பி⁴க்கூ²னங் ஸந்திகே விய தே²ரஸ்ஸ ஸம்முகா² பக்³க³ய்ஹ வத்துங் அஸக்கொந்தோ ஓலம்ப³ந்தேன ஹத³யேன ‘‘ஏவங்ப்³யாகோ²’’தி ஆஹ. தங் கிங் மஞ்ஞஸி, ஆவுஸோதி? இத³ங் தே²ரோ தஸ்ஸ வசனங் ஸுத்வா, ‘‘நாயங் அத்தனோ லத்³தி⁴யங் தோ³ஸங் பஸ்ஸதி, த⁴ம்மதே³ஸனாய அஸ்ஸ தங் பாகடங் கரிஸ்ஸாமீ’’தி சிந்தெத்வா திபரிவட்டங் தே³ஸனங் தே³ஸேதுங் ஆரபி⁴.
Yenāyasmāsāriputtoti yathā nāma paccante kupite taṃ vūpasametuṃ asakkontā rājapurisā senāpatissa vā rañño vā santikaṃ gacchanti, evaṃ diṭṭhigatavasena tasmiṃ there kupite taṃ vūpasametuṃ asakkontā te bhikkhū yena dhammarājassa dhammasenāpati āyasmā sāriputto , tenupasaṅkamiṃsu. Evaṃbyākhoti tesaṃ bhikkhūnaṃ santike viya therassa sammukhā paggayha vattuṃ asakkonto olambantena hadayena ‘‘evaṃbyākho’’ti āha. Taṃ kiṃ maññasi, āvusoti? Idaṃ thero tassa vacanaṃ sutvā, ‘‘nāyaṃ attano laddhiyaṃ dosaṃ passati, dhammadesanāya assa taṃ pākaṭaṃ karissāmī’’ti cintetvā tiparivaṭṭaṃ desanaṃ desetuṃ ārabhi.
தங் கிங் மஞ்ஞஸி, ஆவுஸோ யமக, ரூபங் ததா²க³தோதி இத³ங் கஸ்மா ஆரத்³த⁴ங்? அனுயோக³வத்தங் தா³பனத்த²ங். திபரிவட்டதே³ஸனாவஸானஸ்மிஞ்ஹி தே²ரோ ஸோதாபன்னோ ஜாதோ. அத² நங் அனுயோக³வத்தங் தா³பேதுங் ‘‘தங் கிங் மஞ்ஞஸீ’’திஆதி³மாஹ? ததா²க³தோதி ஸத்தோ. ரூபங் வேத³னா ஸஞ்ஞா ஸங்கா²ரா விஞ்ஞாணந்தி இமே பஞ்சக்க²ந்தே⁴ ஸம்பிண்டெ³த்வா ‘‘ததா²க³தோ’’தி ஸமனுபஸ்ஸஸீதி புச்ச²தி. எத்த² ச தே, ஆவுஸோதி இத³ங் தே²ரஸ்ஸ அனுயோகே³ பு⁴ம்மங். இத³ங் வுத்தங் ஹோதி – எத்த² ச தே எத்தகே டா²னே தி³ட்டே²வ த⁴ம்மே ஸச்சதோ தி²ரதோ ஸத்தே அனுபலப்³பி⁴யமானேதி. ஸசே தங், ஆவுஸோதி இத³மேதங் அஞ்ஞங் ப்³யாகராபேதுகாமோ புச்ச²தி. யங் து³க்க²ங் தங் நிருத்³த⁴ந்தி யங் து³க்க²ங், ததே³வ நிருத்³த⁴ங், அஞ்ஞோ ஸத்தோ நிருஜ்ஜ²னகோ நாம நத்தி², ஏவங் ப்³யாகரெய்யந்தி அத்தோ².
Taṃ kiṃ maññasi, āvuso yamaka, rūpaṃ tathāgatoti idaṃ kasmā āraddhaṃ? Anuyogavattaṃ dāpanatthaṃ. Tiparivaṭṭadesanāvasānasmiñhi thero sotāpanno jāto. Atha naṃ anuyogavattaṃ dāpetuṃ ‘‘taṃ kiṃ maññasī’’tiādimāha? Tathāgatoti satto. Rūpaṃ vedanā saññā saṅkhārā viññāṇanti ime pañcakkhandhe sampiṇḍetvā ‘‘tathāgato’’ti samanupassasīti pucchati. Ettha ca te, āvusoti idaṃ therassa anuyoge bhummaṃ. Idaṃ vuttaṃ hoti – ettha ca te ettake ṭhāne diṭṭheva dhamme saccato thirato satte anupalabbhiyamāneti. Sace taṃ, āvusoti idametaṃ aññaṃ byākarāpetukāmo pucchati. Yaṃ dukkhaṃ taṃ niruddhanti yaṃ dukkhaṃ, tadeva niruddhaṃ, añño satto nirujjhanako nāma natthi, evaṃ byākareyyanti attho.
ஏதஸ்ஸேவ அத்த²ஸ்ஸாதி ஏதஸ்ஸ பட²மமக்³க³ஸ்ஸ. பி⁴ய்யோஸோமத்தாய ஞாணாயாதி அதிரேகப்பமாணஸ்ஸ ஞாணஸ்ஸ அத்தா²ய, ஸஹவிபஸ்ஸனகானங் உபரி ச திண்ணங் மக்³கா³னங் ஆவிபா⁴வத்தா²யாதி அத்தோ². ஆரக்க²ஸம்பன்னோதி அந்தோஆரக்கே²ன சேவ ப³ஹிஆரக்கே²ன ச ஸமன்னாக³தோ. அயோக³க்கே²மகாமோதி சதூஹி யோகே³ஹி கே²மபா⁴வங் அனிச்ச²ந்தோ. பஸய்ஹாதி பஸய்ஹித்வா அபி⁴ப⁴வித்வா. அனுபக²ஜ்ஜாதி அனுபவிஸித்வா.
Etasseva atthassāti etassa paṭhamamaggassa. Bhiyyosomattāya ñāṇāyāti atirekappamāṇassa ñāṇassa atthāya, sahavipassanakānaṃ upari ca tiṇṇaṃ maggānaṃ āvibhāvatthāyāti attho. Ārakkhasampannoti antoārakkhena ceva bahiārakkhena ca samannāgato. Ayogakkhemakāmoti catūhi yogehi khemabhāvaṃ anicchanto. Pasayhāti pasayhitvā abhibhavitvā. Anupakhajjāti anupavisitvā.
புப்³பு³ட்டா²யீதிஆதீ³ஸு தூ³ரதோவ ஆக³ச்ச²ந்தங் தி³ஸ்வா ஆஸனதோ பட²மதரங் வுட்டா²தீதி புப்³பு³ட்டா²யீ. தஸ்ஸ ஆஸனங் த³த்வா தஸ்மிங் நிஸின்னே பச்சா² நிபததி நிஸீத³தீதி, பச்சா²னிபாதீ. பாதோவ வுட்டா²ய ‘‘எத்தகா கஸிதுங் க³ச்ச²த², எத்தகா வபிது’’ந்தி வா ஸப்³ப³பட²மங் வுட்டா²தீதி புப்³பு³ட்டா²யீ. ஸாயங் ஸப்³பே³ஸு அத்தனோ அத்தனோ வஸனட்டா²னங் க³தேஸு கே³ஹஸ்ஸ ஸமந்ததோ ஆரக்க²ங் ஸங்விதா⁴ய த்³வாரானி த²கெத்வா ஸப்³ப³பச்சா² நிபஜ்ஜனதோபி பச்சா²னிபாதீ. ‘‘கிங் கரோமி , அய்யபுத்த ? கிங் கரோமி அய்யபுத்தா’’தி? முக²ங் ஓலோகெந்தோ கிங்காரங் படிஸாவேதீதி கிங்காரபடிஸ்ஸாவீ. மனாபங் சரதீதி மனாபசாரீ. பியங் வத³தீதி பியவாதீ³. மித்ததோபி நங் ஸத்³த³ஹெய்யாதி மித்தோ மே அயந்தி ஸத்³த³ஹெய்ய. விஸ்ஸாஸங் ஆபஜ்ஜெய்யாதி ஏகதோ பானபோ⁴ஜனாதி³ங் கரொந்தோ விஸ்ஸாஸிகோ ப⁴வெய்ய. ஸங்விஸ்ஸத்தோ²தி ஸுட்டு² விஸ்ஸத்தோ².
Pubbuṭṭhāyītiādīsu dūratova āgacchantaṃ disvā āsanato paṭhamataraṃ vuṭṭhātīti pubbuṭṭhāyī. Tassa āsanaṃ datvā tasmiṃ nisinne pacchā nipatati nisīdatīti, pacchānipātī. Pātova vuṭṭhāya ‘‘ettakā kasituṃ gacchatha, ettakā vapitu’’nti vā sabbapaṭhamaṃ vuṭṭhātīti pubbuṭṭhāyī. Sāyaṃ sabbesu attano attano vasanaṭṭhānaṃ gatesu gehassa samantato ārakkhaṃ saṃvidhāya dvārāni thaketvā sabbapacchā nipajjanatopi pacchānipātī. ‘‘Kiṃ karomi , ayyaputta ? Kiṃ karomi ayyaputtā’’ti? Mukhaṃ olokento kiṃkāraṃ paṭisāvetīti kiṃkārapaṭissāvī. Manāpaṃ caratīti manāpacārī. Piyaṃ vadatīti piyavādī. Mittatopi naṃ saddaheyyāti mitto me ayanti saddaheyya. Vissāsaṃ āpajjeyyāti ekato pānabhojanādiṃ karonto vissāsiko bhaveyya. Saṃvissatthoti suṭṭhu vissattho.
ஏவமேவ கோ²தி எத்த² இத³ங் ஓபம்மஸங்ஸந்த³னங் – பா³லக³ஹபதிபுத்தோ விய ஹி வட்டஸன்னிஸ்ஸிதகாலே அஸ்ஸுதவா புது²ஜ்ஜனோ , வத⁴கபச்சாமித்தோ விய அப³லது³ப்³ப³லா பஞ்சக்க²ந்தா⁴, வத⁴கபச்சாமித்தஸ்ஸ ‘‘பா³லக³ஹபதிபுத்தங் உபட்ட²ஹிஸ்ஸாமீ’’தி உபக³தகாலோ விய படிஸந்தி⁴க்க²ணே உபக³தா பஞ்சக்க²ந்தா⁴, தஸ்ஸ ஹி ‘‘ந மே அயங் ஸஹாயோ, வத⁴கபச்சத்தி²கோ அய’’ந்தி அஜானநகாலோ விய வட்டனிஸ்ஸிதபுது²ஜ்ஜனஸ்ஸ பஞ்சக்க²ந்தே⁴ ‘‘ந இமே மய்ஹ’’ந்தி அக³ஹெத்வா ‘‘மம ரூபங், மம வேத³னா, மம ஸஞ்ஞா, மம ஸங்கா²ரா, மம விஞ்ஞாண’’ந்தி க³ஹிதகாலோ, வத⁴கபச்சத்தி²கஸ்ஸ ‘‘மித்தோ மே அய’’ந்தி க³ஹெத்வா ஸக்காரகரணகாலோ விய ‘‘மம இமே’’தி க³ஹெத்வா பஞ்சன்னங் க²ந்தா⁴னங் ந்ஹாபனபோ⁴ஜனாதீ³ஹி ஸக்காரகரணகாலோ, ‘‘அதிவிஸ்ஸத்தோ² மே அய’’ந்தி ஞத்வா ஸக்காரங் கரொந்தஸ்ஸேவ அஸினா ஸீஸச்சி²ந்த³னங் விய விஸ்ஸத்த²ஸ்ஸ பா³லபுது²ஜ்ஜனஸ்ஸ திகி²ணேஹி பி⁴ஜ்ஜமானேஹி க²ந்தே⁴ஹி ஜீவிதபரியாதா³னங் வேதி³தப்³ப³ங்.
Evameva khoti ettha idaṃ opammasaṃsandanaṃ – bālagahapatiputto viya hi vaṭṭasannissitakāle assutavā puthujjano , vadhakapaccāmitto viya abaladubbalā pañcakkhandhā, vadhakapaccāmittassa ‘‘bālagahapatiputtaṃ upaṭṭhahissāmī’’ti upagatakālo viya paṭisandhikkhaṇe upagatā pañcakkhandhā, tassa hi ‘‘na me ayaṃ sahāyo, vadhakapaccatthiko aya’’nti ajānanakālo viya vaṭṭanissitaputhujjanassa pañcakkhandhe ‘‘na ime mayha’’nti agahetvā ‘‘mama rūpaṃ, mama vedanā, mama saññā, mama saṅkhārā, mama viññāṇa’’nti gahitakālo, vadhakapaccatthikassa ‘‘mitto me aya’’nti gahetvā sakkārakaraṇakālo viya ‘‘mama ime’’ti gahetvā pañcannaṃ khandhānaṃ nhāpanabhojanādīhi sakkārakaraṇakālo, ‘‘ativissattho me aya’’nti ñatvā sakkāraṃ karontasseva asinā sīsacchindanaṃ viya vissatthassa bālaputhujjanassa tikhiṇehi bhijjamānehi khandhehi jīvitapariyādānaṃ veditabbaṃ.
உபேதீதி உபக³ச்ச²தி. உபாதி³யதீதி க³ண்ஹாதி. அதி⁴ட்டா²தீதி அதி⁴திட்ட²தி. அத்தா மேதி அயங் மே அத்தாதி. ஸுதவா ச கோ², ஆவுஸோ, அரியஸாவகோதி யதா² பன பண்டி³தோ க³ஹபதிபுத்தோ ஏவங் உபக³தங் பச்சத்தி²கங் ‘‘பச்சத்தி²கோ மே அய’’ந்தி ஞத்வா அப்பமத்தோ தானி தானி கம்மானி காரெத்வா அனத்த²ங் பரிஹரதி, அத்த²ங் பாபுணாதி, ஏவங் ஸுதவா அரியஸாவகோபி ‘‘ந ரூபங் அத்ததோ ஸமனுபஸ்ஸதீ’’திஆதி³னா நயேன பஞ்சக்க²ந்தே⁴ அஹந்தி வா மமந்தி வா அக³ஹெத்வா, ‘‘பச்சத்தி²கா மே ஏதே’’தி ஞத்வா ரூபஸத்தகஅரூபஸத்தகாதி³வஸேன விபஸ்ஸனாய யோஜெத்வாவ ததோனிதா³னங் து³க்க²ங் பரிவஜ்ஜெத்வா அக்³க³ப²லங் அரஹத்தங் பாபுணாதி. ஸேஸமெத்த² உத்தானமேவ. ததியங்.
Upetīti upagacchati. Upādiyatīti gaṇhāti. Adhiṭṭhātīti adhitiṭṭhati. Attā meti ayaṃ me attāti. Sutavā ca kho, āvuso, ariyasāvakoti yathā pana paṇḍito gahapatiputto evaṃ upagataṃ paccatthikaṃ ‘‘paccatthiko me aya’’nti ñatvā appamatto tāni tāni kammāni kāretvā anatthaṃ pariharati, atthaṃ pāpuṇāti, evaṃ sutavā ariyasāvakopi ‘‘na rūpaṃ attato samanupassatī’’tiādinā nayena pañcakkhandhe ahanti vā mamanti vā agahetvā, ‘‘paccatthikā me ete’’ti ñatvā rūpasattakaarūpasattakādivasena vipassanāya yojetvāva tatonidānaṃ dukkhaṃ parivajjetvā aggaphalaṃ arahattaṃ pāpuṇāti. Sesamettha uttānameva. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. யமகஸுத்தங் • 3. Yamakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. யமகஸுத்தவண்ணனா • 3. Yamakasuttavaṇṇanā
