| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
3. යමකසුත්‌තවණ්‌ණනා
3. Yamakasuttavaṇṇanā
85. දිට්‌ඨි එව දිට්‌ඨිගතං ‘‘ගූථගතං මුත්‌තගත’’න්‌ති (ම. නි. 2.119; අ. නි. 9.11) යථා. දිට්‌ඨිගතං නාම ජාතං ඛන්‌ධවිනිමුත්‌තස්‌ස සත්‌තස්‌ස ගහිතත්‌තා.
85. Diṭṭhi eva diṭṭhigataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Diṭṭhigataṃ nāma jātaṃ khandhavinimuttassa sattassa gahitattā.
කුපිතෙති දිට්‌ඨිසඞ්‌ඛාතරොගෙන කුපිතෙ. පග්‌ගය්‌හාති තෙසං භික්‌ඛූනං සන්‌තිකෙ විය ථෙරස්‌ස සාරිපුත්‌තස්‌ස සම්‌මුඛා අත්‌තනො ලද්‌ධිං පග්‌ගය්‌හ ‘‘එවං ඛ්‌වාහ’’න්‌ති එවං නිච්‌ඡයෙන වත්‌තුං අසක්‌කොන්‌තො.
Kupiteti diṭṭhisaṅkhātarogena kupite. Paggayhāti tesaṃ bhikkhūnaṃ santike viya therassa sāriputtassa sammukhā attano laddhiṃ paggayha ‘‘evaṃ khvāha’’nti evaṃ nicchayena vattuṃ asakkonto.
අනුයොගවත්‌තං නාම යෙන යුත්‌තො, තස්‌ස අත්‌තනො ගාහං නිජ්‌ඣානක්‌ඛන්‌තියාව යාථාවතො පවෙදනං. ථෙරස්‌ස අනුයොගෙ භුම්‌මන්‌ති ‘‘තං කිං මඤ්‌ඤසි, ආවුසො යමකා’’තිආදිනා ථෙරෙන කථිතපුච්‌ඡාය භුම්‌මනිද්‌දෙසො. සචෙ තං ආවුසොති ඉදන්‌ති ‘‘සචෙ තං, ආවුසො’’ති එවමාදිකං ඉදං වචනං. එතන්‌ති යමකත්‌ථෙරං. අඤ්‌ඤන්‌ති අරහත්‌තං. වත්‌තබ්‌බාකාරෙන වදන්‌තො අත්‌ථතො අරහත්‌තං බ්‍යාකරොන්‌තො නාම හොතීති අධිප්‌පායෙන වදති.
Anuyogavattaṃ nāma yena yutto, tassa attano gāhaṃ nijjhānakkhantiyāva yāthāvato pavedanaṃ. Therassa anuyoge bhummanti ‘‘taṃ kiṃ maññasi, āvuso yamakā’’tiādinā therena kathitapucchāya bhummaniddeso. Sace taṃ āvusoti idanti ‘‘sace taṃ, āvuso’’ti evamādikaṃ idaṃ vacanaṃ. Etanti yamakattheraṃ. Aññanti arahattaṃ. Vattabbākārena vadanto atthato arahattaṃ byākaronto nāma hotīti adhippāyena vadati.
එතස්‌ස පඨමමග්‌ගස්‌සාති එතස්‌ස ඉදානියෙව තිපරිවට්‌ටදෙසනාවසානෙ තයා අධිගතස්‌ස පඨමමග්‌ගස්‌ස . චතූහි යොගෙහීති අත්‌තතො පියතො උදාසිනතො වෙරිතොති චතූහිපි උප්‌පජ්‌ජනඅනත්‌ථයොගෙහි.
Etassa paṭhamamaggassāti etassa idāniyeva tiparivaṭṭadesanāvasāne tayā adhigatassa paṭhamamaggassa . Catūhi yogehīti attato piyato udāsinato veritoti catūhipi uppajjanaanatthayogehi.
උපෙතීති තණ්‌හුපයදිට්‌ඨුපයෙහි උපාදියති තණ්‌හාදිට්‌ඨිවත්‌ථුං පප්‌පොති. උපාදියතීති දළ්‌හග්‌ගාහං ගණ්‌හාති. අධිතිට්‌ඨතීති අභිනිවිස්‌ස තිට්‌ඨති. කින්‌ති? ‘‘අත්‌තා මෙ’’ති. පච්‌චත්‌ථිකා මෙ එතෙති එතෙ රූපවෙදනාදයො පඤ්‌චුපාදානක්‌ඛන්‌ධා මය්‌හං පච්‌චත්‌ථිකා අනත්‌ථාවහත්‌තාති විපස්‌සනාඤාණෙන ඤත්‌වා. විපස්‌සනාය යොජෙත්‌වාති විපස්‌සනාය ඛන්‌ධෙ යොජෙත්‌වා.
Upetīti taṇhupayadiṭṭhupayehi upādiyati taṇhādiṭṭhivatthuṃ pappoti. Upādiyatīti daḷhaggāhaṃ gaṇhāti. Adhitiṭṭhatīti abhinivissa tiṭṭhati. Kinti? ‘‘Attā me’’ti. Paccatthikā me eteti ete rūpavedanādayo pañcupādānakkhandhā mayhaṃ paccatthikā anatthāvahattāti vipassanāñāṇena ñatvā. Vipassanāya yojetvāti vipassanāya khandhe yojetvā.
යමකසුත්‌තවණ්‌ණනා නිට්‌ඨිතා.
Yamakasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. යමකසුත්‌තං • 3. Yamakasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. යමකසුත්‌තවණ්‌ණනා • 3. Yamakasuttavaṇṇanā
