| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
யானாதி³படிக்கே²பகதா²
Yānādipaṭikkhepakathā
253. இத்தி²யுத்தேனாதி தே⁴னுயுத்தேன. புரிஸந்தரேனாதி புரிஸஸாரதி²னா. புரிஸயுத்தேனாதி கோ³ணயுத்தேன. இத்த²ந்தரேனாதி இத்தி²ஸாரதி²னா. க³ங்கா³மஹியாயாதி க³ங்கா³மஹகீளிகாய. புரிஸயுத்தங் ஹத்த²வட்டகந்தி எத்த² புரிஸயுத்தங் இத்தி²ஸாரதி² வா ஹோது, புரிஸஸாரதி² வா வட்டதி. ஹத்த²வட்டகங் பன இத்தி²யோ வா வட்டெந்து புரிஸா வா, வட்டதியேவ. யானுக்³கா⁴தேனாதி யானங் அபி⁴ருஹந்தஸ்ஸ ஸப்³போ³ காயோ சலதி தப்பச்சயா. ஸிவிகந்தி பீட²கஸிவிகங். பாடங்கிந்தி வங்ஸே லக்³கெ³த்வா கதங் படபோதலிகங்.
253.Itthiyuttenāti dhenuyuttena. Purisantarenāti purisasārathinā. Purisayuttenāti goṇayuttena. Itthantarenāti itthisārathinā. Gaṅgāmahiyāyāti gaṅgāmahakīḷikāya. Purisayuttaṃ hatthavaṭṭakanti ettha purisayuttaṃ itthisārathi vā hotu, purisasārathi vā vaṭṭati. Hatthavaṭṭakaṃ pana itthiyo vā vaṭṭentu purisā vā, vaṭṭatiyeva. Yānugghātenāti yānaṃ abhiruhantassa sabbo kāyo calati tappaccayā. Sivikanti pīṭhakasivikaṃ. Pāṭaṅkinti vaṃse laggetvā kataṃ paṭapotalikaṃ.
254. உச்சாஸயனமஹாஸயனநானீதி எத்த² உச்சாஸயனந்தி பமாணாதிக்கந்தங் மஞ்சங். மஹாஸயனந்தி அகப்பியத்த²ரணங், ஆஸந்தீ³ஆதீ³ஸு ஆஸந்தீ³தி பமாணாதிக்கந்தாஸனங். பல்லங்கோதி பாதே³ஸு வாளரூபானி ட²பெத்வா கதோ. கோ³னகோதி தீ³க⁴லோமகோ மஹாகோஜவோ; சதுரங்கு³லாதி⁴கானி கிர தஸ்ஸ லோமானி. சித்தகாதி வானசித்ரோ உண்ணாமயத்த²ரணோ. படிகாதி உண்ணாமயோ ஸேதத்த²ரணோ. படலிகாதி க⁴னபுப்ப²கோ உண்ணாமயலோஹிதத்த²ரணோ; யோ ஆமலகபட்டோதிபி வுச்சதி. தூலிகாதி பகதிதூலிகாயேவ. விகதிகாதி ஸீஹப்³யக்³கா⁴தி³ரூபவிசித்ரோ உண்ணாமயத்த²ரணோ. உத்³த³லோமீதி ஏகதோ உக்³க³தலோமங் உண்ணாமயத்த²ரணங்; ‘‘உத்³த⁴லோமீ’’திபி பாடோ². ஏகந்தலோமீதி உப⁴தோ உக்³க³தலோமங் உண்ணாமயத்த²ரணங். கட்டிஸ்ஸந்தி ரதனபரிஸிப்³பி³தங் கோஸெய்யகட்டிஸ்ஸமயங் பச்சத்த²ரணங் . கோஸெய்யந்தி ரதனபரிஸிப்³பி³தங் கோஸியஸுத்தமயங் பச்சத்த²ரணங்; ஸுத்³த⁴கோஸெய்யங் பன வட்டதி.
254.Uccāsayanamahāsayananānīti ettha uccāsayananti pamāṇātikkantaṃ mañcaṃ. Mahāsayananti akappiyattharaṇaṃ, āsandīādīsu āsandīti pamāṇātikkantāsanaṃ. Pallaṅkoti pādesu vāḷarūpāni ṭhapetvā kato. Gonakoti dīghalomako mahākojavo; caturaṅgulādhikāni kira tassa lomāni. Cittakāti vānacitro uṇṇāmayattharaṇo. Paṭikāti uṇṇāmayo setattharaṇo. Paṭalikāti ghanapupphako uṇṇāmayalohitattharaṇo; yo āmalakapaṭṭotipi vuccati. Tūlikāti pakatitūlikāyeva. Vikatikāti sīhabyagghādirūpavicitro uṇṇāmayattharaṇo. Uddalomīti ekato uggatalomaṃ uṇṇāmayattharaṇaṃ; ‘‘uddhalomī’’tipi pāṭho. Ekantalomīti ubhato uggatalomaṃ uṇṇāmayattharaṇaṃ. Kaṭṭissanti ratanaparisibbitaṃ koseyyakaṭṭissamayaṃ paccattharaṇaṃ . Koseyyanti ratanaparisibbitaṃ kosiyasuttamayaṃ paccattharaṇaṃ; suddhakoseyyaṃ pana vaṭṭati.
குத்தகந்தி ஸோளஸன்னங் நாடகித்தீ²னங் ட²த்வா நச்சனயொக்³க³ங் உண்ணாமயஅத்த²ரணங். ஹத்த²த்த²ரஅஸ்ஸத்த²ராதி ஹத்தி²அஸ்ஸபிட்டீ²ஸு அத்த²ரணகஅத்த²ரணா ஏவ. ரத²த்த²ரேபி ஏஸேவ நயோ. அஜினப்பவேணீதி அஜினசம்மேஹி மஞ்சப்பமாணேன ஸிப்³பி³த்வா கதா பவேணீ. கத³லீமிக³பவரபச்சத்த²ரணந்தி கத³லீமிக³சம்மங் நாம அத்தி², தேன கதங் பவரபச்சத்த²ரணங், உத்தமபச்சத்த²ரணந்தி அத்தோ². தங் கிர ஸேதவத்த²ஸ்ஸ உபரி கத³லீமிக³சம்மங் பத்த²ரித்வா ஸிப்³பி³த்வா கரொந்தி. ஸஉத்தரச்ச²த³ந்தி ஸஹ உத்தரச்ச²த³னேன; உபரிப³த்³தே⁴ன ரத்தவிதானேன ஸத்³தி⁴ந்தி அத்தோ² . ஸேதவிதானம்பி ஹெட்டா² அகப்பியபச்சத்த²ரணே ஸதி ந வட்டதி, அஸதி பன வட்டதி. உப⁴தோலோஹிதகூபதா⁴னந்தி ஸீஸூபதா⁴னஞ்ச பாதூ³பதா⁴னஞ்சாதி மஞ்சஸ்ஸ உப⁴தோலோஹிதகூபதா⁴னங், ஏதங் ந கப்பதி. யங் பன ஏகமேவ உபதா⁴னங் உபோ⁴ஸு பஸ்ஸேஸு ரத்தங் வா ஹோதி, பது³மவண்ணங் வா சித்ரங் வா, ஸசே பமாணயுத்தங், வட்டதி. மஹாஉபதா⁴னங் பன படிக்கி²த்தங்.
Kuttakanti soḷasannaṃ nāṭakitthīnaṃ ṭhatvā naccanayoggaṃ uṇṇāmayaattharaṇaṃ. Hatthattharaassattharāti hatthiassapiṭṭhīsu attharaṇakaattharaṇā eva. Rathattharepi eseva nayo. Ajinappaveṇīti ajinacammehi mañcappamāṇena sibbitvā katā paveṇī. Kadalīmigapavarapaccattharaṇanti kadalīmigacammaṃ nāma atthi, tena kataṃ pavarapaccattharaṇaṃ, uttamapaccattharaṇanti attho. Taṃ kira setavatthassa upari kadalīmigacammaṃ pattharitvā sibbitvā karonti. Sauttaracchadanti saha uttaracchadanena; uparibaddhena rattavitānena saddhinti attho . Setavitānampi heṭṭhā akappiyapaccattharaṇe sati na vaṭṭati, asati pana vaṭṭati. Ubhatolohitakūpadhānanti sīsūpadhānañca pādūpadhānañcāti mañcassa ubhatolohitakūpadhānaṃ, etaṃ na kappati. Yaṃ pana ekameva upadhānaṃ ubhosu passesu rattaṃ vā hoti, padumavaṇṇaṃ vā citraṃ vā, sace pamāṇayuttaṃ, vaṭṭati. Mahāupadhānaṃ pana paṭikkhittaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
153. யானாதி³படிக்கே²போ • 153. Yānādipaṭikkhepo
154. உச்சாஸயனமஹாஸயனபடிக்கே²போ • 154. Uccāsayanamahāsayanapaṭikkhepo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
யானாதி³படிக்கே²பகதா²வண்ணனா • Yānādipaṭikkhepakathāvaṇṇanā
உச்சாஸயனமஹாஸயனபடிக்கே²பகதா²வண்ணனா • Uccāsayanamahāsayanapaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / யானாதி³படிக்கே²பகதா²வண்ணனா • Yānādipaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அஜ்ஜா²ராமேஉபாஹனபடிக்கே²பகதா²தி³வண்ணனா • Ajjhārāmeupāhanapaṭikkhepakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
153. யானாதி³படிக்கே²பகதா² • 153. Yānādipaṭikkhepakathā
154. உச்சாஸயனமஹாஸயனபடிக்கே²பகதா² • 154. Uccāsayanamahāsayanapaṭikkhepakathā
