| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
যানাদিপটিক্খেপকথা
Yānādipaṭikkhepakathā
২৫৩. ইত্থিযুত্তেনাতি ধেনুযুত্তেন। পুরিসন্তরেনাতি পুরিসসারথিনা। পুরিসযুত্তেনাতি গোণযুত্তেন। ইত্থন্তরেনাতি ইত্থিসারথিনা। গঙ্গামহিযাযাতি গঙ্গামহকীল়িকায। পুরিসযুত্তং হত্থৰট্টকন্তি এত্থ পুরিসযুত্তং ইত্থিসারথি ৰা হোতু, পুরিসসারথি ৰা ৰট্টতি। হত্থৰট্টকং পন ইত্থিযো ৰা ৰট্টেন্তু পুরিসা ৰা, ৰট্টতিযেৰ। যানুগ্ঘাতেনাতি যানং অভিরুহন্তস্স সব্বো কাযো চলতি তপ্পচ্চযা। সিৰিকন্তি পীঠকসিৰিকং। পাটঙ্কিন্তি ৰংসে লগ্গেত্ৰা কতং পটপোতলিকং।
253.Itthiyuttenāti dhenuyuttena. Purisantarenāti purisasārathinā. Purisayuttenāti goṇayuttena. Itthantarenāti itthisārathinā. Gaṅgāmahiyāyāti gaṅgāmahakīḷikāya. Purisayuttaṃ hatthavaṭṭakanti ettha purisayuttaṃ itthisārathi vā hotu, purisasārathi vā vaṭṭati. Hatthavaṭṭakaṃ pana itthiyo vā vaṭṭentu purisā vā, vaṭṭatiyeva. Yānugghātenāti yānaṃ abhiruhantassa sabbo kāyo calati tappaccayā. Sivikanti pīṭhakasivikaṃ. Pāṭaṅkinti vaṃse laggetvā kataṃ paṭapotalikaṃ.
২৫৪. উচ্চাসযনমহাসযননানীতি এত্থ উচ্চাসযনন্তি পমাণাতিক্কন্তং মঞ্চং। মহাসযনন্তি অকপ্পিযত্থরণং, আসন্দীআদীসু আসন্দীতি পমাণাতিক্কন্তাসনং। পল্লঙ্কোতি পাদেসু ৰাল়রূপানি ঠপেত্ৰা কতো। গোনকোতি দীঘলোমকো মহাকোজৰো; চতুরঙ্গুলাধিকানি কির তস্স লোমানি। চিত্তকাতি ৰানচিত্রো উণ্ণামযত্থরণো। পটিকাতি উণ্ণামযো সেতত্থরণো। পটলিকাতি ঘনপুপ্ফকো উণ্ণামযলোহিতত্থরণো; যো আমলকপট্টোতিপি ৰুচ্চতি। তূলিকাতি পকতিতূলিকাযেৰ। ৰিকতিকাতি সীহব্যগ্ঘাদিরূপৰিচিত্রো উণ্ণামযত্থরণো। উদ্দলোমীতি একতো উগ্গতলোমং উণ্ণামযত্থরণং; ‘‘উদ্ধলোমী’’তিপি পাঠো। একন্তলোমীতি উভতো উগ্গতলোমং উণ্ণামযত্থরণং। কট্টিস্সন্তি রতনপরিসিব্বিতং কোসেয্যকট্টিস্সমযং পচ্চত্থরণং । কোসেয্যন্তি রতনপরিসিব্বিতং কোসিযসুত্তমযং পচ্চত্থরণং; সুদ্ধকোসেয্যং পন ৰট্টতি।
254.Uccāsayanamahāsayananānīti ettha uccāsayananti pamāṇātikkantaṃ mañcaṃ. Mahāsayananti akappiyattharaṇaṃ, āsandīādīsu āsandīti pamāṇātikkantāsanaṃ. Pallaṅkoti pādesu vāḷarūpāni ṭhapetvā kato. Gonakoti dīghalomako mahākojavo; caturaṅgulādhikāni kira tassa lomāni. Cittakāti vānacitro uṇṇāmayattharaṇo. Paṭikāti uṇṇāmayo setattharaṇo. Paṭalikāti ghanapupphako uṇṇāmayalohitattharaṇo; yo āmalakapaṭṭotipi vuccati. Tūlikāti pakatitūlikāyeva. Vikatikāti sīhabyagghādirūpavicitro uṇṇāmayattharaṇo. Uddalomīti ekato uggatalomaṃ uṇṇāmayattharaṇaṃ; ‘‘uddhalomī’’tipi pāṭho. Ekantalomīti ubhato uggatalomaṃ uṇṇāmayattharaṇaṃ. Kaṭṭissanti ratanaparisibbitaṃ koseyyakaṭṭissamayaṃ paccattharaṇaṃ . Koseyyanti ratanaparisibbitaṃ kosiyasuttamayaṃ paccattharaṇaṃ; suddhakoseyyaṃ pana vaṭṭati.
কুত্তকন্তি সোল়সন্নং নাটকিত্থীনং ঠত্ৰা নচ্চনযোগ্গং উণ্ণামযঅত্থরণং। হত্থত্থরঅস্সত্থরাতি হত্থিঅস্সপিট্ঠীসু অত্থরণকঅত্থরণা এৰ। রথত্থরেপি এসেৰ নযো। অজিনপ্পৰেণীতি অজিনচম্মেহি মঞ্চপ্পমাণেন সিব্বিত্ৰা কতা পৰেণী। কদলীমিগপৰরপচ্চত্থরণন্তি কদলীমিগচম্মং নাম অত্থি, তেন কতং পৰরপচ্চত্থরণং, উত্তমপচ্চত্থরণন্তি অত্থো। তং কির সেতৰত্থস্স উপরি কদলীমিগচম্মং পত্থরিত্ৰা সিব্বিত্ৰা করোন্তি। সউত্তরচ্ছদন্তি সহ উত্তরচ্ছদনেন; উপরিবদ্ধেন রত্তৰিতানেন সদ্ধিন্তি অত্থো । সেতৰিতানম্পি হেট্ঠা অকপ্পিযপচ্চত্থরণে সতি ন ৰট্টতি, অসতি পন ৰট্টতি। উভতোলোহিতকূপধানন্তি সীসূপধানঞ্চ পাদূপধানঞ্চাতি মঞ্চস্স উভতোলোহিতকূপধানং, এতং ন কপ্পতি। যং পন একমেৰ উপধানং উভোসু পস্সেসু রত্তং ৰা হোতি, পদুমৰণ্ণং ৰা চিত্রং ৰা, সচে পমাণযুত্তং, ৰট্টতি। মহাউপধানং পন পটিক্খিত্তং।
Kuttakanti soḷasannaṃ nāṭakitthīnaṃ ṭhatvā naccanayoggaṃ uṇṇāmayaattharaṇaṃ. Hatthattharaassattharāti hatthiassapiṭṭhīsu attharaṇakaattharaṇā eva. Rathattharepi eseva nayo. Ajinappaveṇīti ajinacammehi mañcappamāṇena sibbitvā katā paveṇī. Kadalīmigapavarapaccattharaṇanti kadalīmigacammaṃ nāma atthi, tena kataṃ pavarapaccattharaṇaṃ, uttamapaccattharaṇanti attho. Taṃ kira setavatthassa upari kadalīmigacammaṃ pattharitvā sibbitvā karonti. Sauttaracchadanti saha uttaracchadanena; uparibaddhena rattavitānena saddhinti attho . Setavitānampi heṭṭhā akappiyapaccattharaṇe sati na vaṭṭati, asati pana vaṭṭati. Ubhatolohitakūpadhānanti sīsūpadhānañca pādūpadhānañcāti mañcassa ubhatolohitakūpadhānaṃ, etaṃ na kappati. Yaṃ pana ekameva upadhānaṃ ubhosu passesu rattaṃ vā hoti, padumavaṇṇaṃ vā citraṃ vā, sace pamāṇayuttaṃ, vaṭṭati. Mahāupadhānaṃ pana paṭikkhittaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৫৩. যানাদিপটিক্খেপো • 153. Yānādipaṭikkhepo
১৫৪. উচ্চাসযনমহাসযনপটিক্খেপো • 154. Uccāsayanamahāsayanapaṭikkhepo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
যানাদিপটিক্খেপকথাৰণ্ণনা • Yānādipaṭikkhepakathāvaṇṇanā
উচ্চাসযনমহাসযনপটিক্খেপকথাৰণ্ণনা • Uccāsayanamahāsayanapaṭikkhepakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / যানাদিপটিক্খেপকথাৰণ্ণনা • Yānādipaṭikkhepakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অজ্ঝারামেউপাহনপটিক্খেপকথাদিৰণ্ণনা • Ajjhārāmeupāhanapaṭikkhepakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
১৫৩. যানাদিপটিক্খেপকথা • 153. Yānādipaṭikkhepakathā
১৫৪. উচ্চাসযনমহাসযনপটিক্খেপকথা • 154. Uccāsayanamahāsayanapaṭikkhepakathā
