| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
யானட்ட²கதா²வண்ணனா
Yānaṭṭhakathāvaṇṇanā
100. யானட்ட²கதா²யங் உபோ⁴ஸு பஸ்ஸேஸூதி சதுன்னங் த²ம்பா⁴னங் உபரி சதுரஸ்ஸங் தா³ருஸங்கா⁴டங் ஆரோபெத்வா தஸ்ஸ வாமத³க்கி²ணபஸ்ஸேஸு உபோ⁴ஸு வாதாதபாதி³பரிஸ்ஸயவினோத³னத்த²ங் க³ருளபக்கி²னோ உபோ⁴ பக்கா² விய கதா ஸந்த³மானிகா. து³கயுத்தஸ்ஸாதி த்³வீஹி கோ³ணேஹி யுத்தஸ்ஸ. அயுத்தகந்தி கோ³ணேஹி அயுத்தங். கப்பகதாதி த்³வின்னங் ஸிகா²னங் ஸந்தி⁴ட்டா²னே கோ³ஸிங்கா³னி விய த்³வே கோடியோ ட²பெத்வா உபத்த²ம்ப⁴னீ கப்பகதா நாம, ஸா த்³வீஹிபி கோடீஹி பூ⁴மியங் பதிட்டா²தி, தேனாஹ ‘‘ச² டா²னானீ’’தி. தீணி வா சத்தாரி வா டா²னானீதி அகப்பகதாய உபத்த²ம்ப⁴னியா ச த்³வின்னங் சக்கானஞ்ச வஸேன தீணி டா²னானி, கப்பகதாய வஸேன சத்தாரி டா²னானி, ததா² பத²வியங் ட²பிதஸ்ஸ தீணி டா²னானீதி ஸம்ப³ந்தோ⁴. அக்க²ஸீஸேஹீதி அக்க²தா³ருனோ த்³வீஹி கோடீஹி. அக்கு²த்³தீ⁴ஹீதி அக்க²தா³ருனா ஸம்படிச்ச²கா ஹெட்டி²மபா⁴கே³ கப்பகதா த்³வே தா³ருக²ண்டா³ அக்கு²த்³தி⁴யோ நாம, தாஸங் கப்பகதானங் த்³வின்னங் கப்பஸீஸானி சத்தாரி இத⁴ ‘‘அக்கு²த்³தி⁴யோ’’தி வுச்சந்தி, தேனாஹ ‘‘சதூஹி ச அக்கு²த்³தீ⁴ஹீ’’தி. தாஹி பதிட்டி²தாஹி பதிட்டி²தட்டா²னானி சத்தாரி து⁴ரேன பதிட்டி²தட்டா²னங் ஏகந்தி பஞ்ச டா²னானி ஹொந்தி. உத்³தி⁴யோவ ‘‘உத்³தி⁴கா²ணுகா’’தி வுத்தா, உத்³தி⁴கா²ணுகானங் அபா⁴வே அக்க²ஸீஸானங் பதிட்டா²னோகாஸங் த³ஸ்ஸெந்தோ ஆஹ ஸமமேவ பா³ஹங் கத்வாதிஆதி³. தத்த² ஸமமேவாதி உத்³தி⁴யோ ஹெட்டா² அனோலம்பெ³த்வா பா³ஹுனோ ஹெட்டி²மபா⁴க³ங் ஸமங் கத்வா த்³வின்னங் பா³ஹுதா³ரூனங் மஜ்ஜே² அக்க²ஸீஸப்பமாணேன சி²த்³த³ங் கத்வா தத்த² அக்க²ஸீஸானி பவேஸிதானி ஹொந்தி, தேன பா³ஹானங் ஹெட்டா²பா⁴க³ங் ஸப்³ப³ங் பூ⁴மிங் பு²ஸித்வா திட்ட²தி, தேனாஹ ‘‘ஸப்³ப³ங் பத²விங் பு²ஸித்வா திட்ட²தீ’’தி. ஸேஸங் நாவாயங் வுத்தஸதி³ஸந்தி இமினா யதி³ பன தங் ஏவங் க³ச்ச²ந்தங் பகதிக³மனங் பச்சி²ந்தி³த்வா அஞ்ஞங் தி³ஸாபா⁴க³ங் நேதி, பாராஜிகங். ஸயமேவ யங் கிஞ்சி டா²னங் ஸம்பத்தங் டா²னா அசாலெந்தோவ விக்கிணித்வா க³ச்ச²தி, நேவத்தி² அவஹாரோ, ப⁴ண்ட³தெ³ய்யங் பன ஹோதீதி இமங் நயங் அதிதி³ஸதி.
100. Yānaṭṭhakathāyaṃ ubhosu passesūti catunnaṃ thambhānaṃ upari caturassaṃ dārusaṅghāṭaṃ āropetvā tassa vāmadakkhiṇapassesu ubhosu vātātapādiparissayavinodanatthaṃ garuḷapakkhino ubho pakkhā viya katā sandamānikā. Dukayuttassāti dvīhi goṇehi yuttassa. Ayuttakanti goṇehi ayuttaṃ. Kappakatāti dvinnaṃ sikhānaṃ sandhiṭṭhāne gosiṅgāni viya dve koṭiyo ṭhapetvā upatthambhanī kappakatā nāma, sā dvīhipi koṭīhi bhūmiyaṃ patiṭṭhāti, tenāha ‘‘cha ṭhānānī’’ti. Tīṇi vā cattāri vā ṭhānānīti akappakatāya upatthambhaniyā ca dvinnaṃ cakkānañca vasena tīṇi ṭhānāni, kappakatāya vasena cattāri ṭhānāni, tathā pathaviyaṃ ṭhapitassa tīṇi ṭhānānīti sambandho. Akkhasīsehīti akkhadāruno dvīhi koṭīhi. Akkhuddhīhīti akkhadārunā sampaṭicchakā heṭṭhimabhāge kappakatā dve dārukhaṇḍā akkhuddhiyo nāma, tāsaṃ kappakatānaṃ dvinnaṃ kappasīsāni cattāri idha ‘‘akkhuddhiyo’’ti vuccanti, tenāha ‘‘catūhi ca akkhuddhīhī’’ti. Tāhi patiṭṭhitāhi patiṭṭhitaṭṭhānāni cattāri dhurena patiṭṭhitaṭṭhānaṃ ekanti pañca ṭhānāni honti. Uddhiyova ‘‘uddhikhāṇukā’’ti vuttā, uddhikhāṇukānaṃ abhāve akkhasīsānaṃ patiṭṭhānokāsaṃ dassento āha samameva bāhaṃ katvātiādi. Tattha samamevāti uddhiyo heṭṭhā anolambetvā bāhuno heṭṭhimabhāgaṃ samaṃ katvā dvinnaṃ bāhudārūnaṃ majjhe akkhasīsappamāṇena chiddaṃ katvā tattha akkhasīsāni pavesitāni honti, tena bāhānaṃ heṭṭhābhāgaṃ sabbaṃ bhūmiṃ phusitvā tiṭṭhati, tenāha ‘‘sabbaṃ pathaviṃ phusitvā tiṭṭhatī’’ti. Sesaṃ nāvāyaṃ vuttasadisanti iminā yadi pana taṃ evaṃ gacchantaṃ pakatigamanaṃ pacchinditvā aññaṃ disābhāgaṃ neti, pārājikaṃ. Sayameva yaṃ kiñci ṭhānaṃ sampattaṃ ṭhānā acālentova vikkiṇitvā gacchati, nevatthi avahāro, bhaṇḍadeyyaṃ pana hotīti imaṃ nayaṃ atidisati.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / யானட்ட²கதா²வண்ணனா • Yānaṭṭhakathāvaṇṇanā
