| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
ယာနဋ္ဌကထာဝဏ္ဏနာ
Yānaṭṭhakathāvaṇṇanā
၁၀၀. ယာနဋ္ဌကထာယံ ဒုကယုတ္တသ္သာတိ ဒ္ဝီဟိ ဂောဏေဟိ ယုတ္တသ္သ။ အယုတ္တကန္တိ ဂောဏေဟိ အယုတ္တံ။ ကပ္ပကတာတိ ယထာ ဒ္ဝီဟိ ဘာဂေဟိ ဟေဋ္ဌာ ပတိဋ္ဌာတိ, ဧဝံ ကတာ။ တီဏိ ဝာ စတ္တာရိ ဝာ ဌာနာနီတိ အကပ္ပကတာယ ဥပတ္ထမ္ဘနိယာ ဝသေန တီဏိ ဌာနာနိ, ကပ္ပကတာယ ဝသေန စတ္တာရိ ဌာနာနီတိ။ တထာ ပထဝိယံ ဌပိတသ္သ တီဏိ ဌာနာနီတိ သမ္ဗန္ဓော။ တန္တိ ဖလကသ္သ ဝာ ဒာရုကသ္သ ဝာ ဥပရိ ဌပိတံ ပထဝိယံ ဌပိတဉ္စ။ ဒ္ဝီဟိ အက္ခသီသေဟီတိ ဒ္ဝီဟိ အက္ခကောဋီဟိ။ ဒာရူနံ ဥပရိ ဌပိတသ္သာတိ ဒ္ဝိန္နံ ဒာရူနံ ဥပရိ ဒ္ဝီဟိ အက္ခကောဋီဟိ ဩလမ္ဗေတ္ဝာ သကဋသာလာယံ ဌပိတသ္သ။ ဟေဋ္ဌိမတလသ္သာတိ သကဋဗာဟာယ ဘူမိံ ဖုသိတ္ဝာ ဌိတသ္သ ဟေဋ္ဌိမဘာဂသ္သ။ သေသံ နာဝာယံ ဝုတ္တသဒိသန္တိ ဣမိနာ ‘‘ယဒိ ပန တံ ဧဝံ ဂစ္ဆန္တံ ပကတိဂမနံ ဥပစ္ဆိန္ဒိတ္ဝာ အညံ ဒိသာဘာဂံ နေတိ, ပာရာဇိကံ။ သယမေဝ ယံ ကဉ္စိ ဂာမံ သမ္ပတ္တံ ဌာနာ အစာဝေန္တောဝ ဝိက္ကိဏိတ္ဝာ ဂစ္ဆတိ, နေဝတ္ထိ အဝဟာရော, ဘဏ္ဍဒေယ္ယံ ပန ဟောတီ’’တိ ဣမံ နယံ အတိဒိသ္သတိ။
100. Yānaṭṭhakathāyaṃ dukayuttassāti dvīhi goṇehi yuttassa. Ayuttakanti goṇehi ayuttaṃ. Kappakatāti yathā dvīhi bhāgehi heṭṭhā patiṭṭhāti, evaṃ katā. Tīṇi vā cattāri vā ṭhānānīti akappakatāya upatthambhaniyā vasena tīṇi ṭhānāni, kappakatāya vasena cattāri ṭhānānīti. Tathā pathaviyaṃ ṭhapitassa tīṇi ṭhānānīti sambandho. Tanti phalakassa vā dārukassa vā upari ṭhapitaṃ pathaviyaṃ ṭhapitañca. Dvīhi akkhasīsehīti dvīhi akkhakoṭīhi. Dārūnaṃ upari ṭhapitassāti dvinnaṃ dārūnaṃ upari dvīhi akkhakoṭīhi olambetvā sakaṭasālāyaṃ ṭhapitassa. Heṭṭhimatalassāti sakaṭabāhāya bhūmiṃ phusitvā ṭhitassa heṭṭhimabhāgassa. Sesaṃ nāvāyaṃ vuttasadisanti iminā ‘‘yadi pana taṃ evaṃ gacchantaṃ pakatigamanaṃ upacchinditvā aññaṃ disābhāgaṃ neti, pārājikaṃ. Sayameva yaṃ kañci gāmaṃ sampattaṃ ṭhānā acāventova vikkiṇitvā gacchati, nevatthi avahāro, bhaṇḍadeyyaṃ pana hotī’’ti imaṃ nayaṃ atidissati.
ယာနဋ္ဌကထာဝဏ္ဏနာ နိဋ္ဌိတာ။
Yānaṭṭhakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဒုတိယပာရာဇိကံ • 2. Dutiyapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဒုတိယပာရာဇိကံ • 2. Dutiyapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ယာနဋ္ဌကထာဝဏ္ဏနာ • Yānaṭṭhakathāvaṇṇanā
