| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
ཡཱནཊྛཀཐཱཝཎྞནཱ
Yānaṭṭhakathāvaṇṇanā
༡༠༠. ཡཱནཊྛཀཐཱཡཾ དུཀཡུཏྟསྶཱཏི དྭཱིཧི གོཎེཧི ཡུཏྟསྶ། ཨཡུཏྟཀནྟི གོཎེཧི ཨཡུཏྟཾ། ཀཔྤཀཏཱཏི ཡཐཱ དྭཱིཧི བྷཱགེཧི ཧེཊྛཱ པཏིཊྛཱཏི, ཨེཝཾ ཀཏཱ། ཏཱིཎི ཝཱ ཙཏྟཱརི ཝཱ ཋཱནཱནཱིཏི ཨཀཔྤཀཏཱཡ ཨུཔཏྠམྦྷནིཡཱ ཝསེན ཏཱིཎི ཋཱནཱནི, ཀཔྤཀཏཱཡ ཝསེན ཙཏྟཱརི ཋཱནཱནཱིཏི། ཏཐཱ པཐཝིཡཾ ཋཔིཏསྶ ཏཱིཎི ཋཱནཱནཱིཏི སམྦནྡྷོ། ཏནྟི ཕལཀསྶ ཝཱ དཱརུཀསྶ ཝཱ ཨུཔརི ཋཔིཏཾ པཐཝིཡཾ ཋཔིཏཉྩ། དྭཱིཧི ཨཀྑསཱིསེཧཱིཏི དྭཱིཧི ཨཀྑཀོཊཱིཧི། དཱརཱུནཾ ཨུཔརི ཋཔིཏསྶཱཏི དྭིནྣཾ དཱརཱུནཾ ཨུཔརི དྭཱིཧི ཨཀྑཀོཊཱིཧི ཨོལམྦེཏྭཱ སཀཊསཱལཱཡཾ ཋཔིཏསྶ། ཧེཊྛིམཏལསྶཱཏི སཀཊབཱཧཱཡ བྷཱུམིཾ ཕུསིཏྭཱ ཋིཏསྶ ཧེཊྛིམབྷཱགསྶ། སེསཾ ནཱཝཱཡཾ ཝུཏྟསདིསནྟི ཨིམིནཱ ‘‘ཡདི པན ཏཾ ཨེཝཾ གཙྪནྟཾ པཀཏིགམནཾ ཨུཔཙྪིནྡིཏྭཱ ཨཉྙཾ དིསཱབྷཱགཾ ནེཏི, པཱརཱཛིཀཾ། སཡམེཝ ཡཾ ཀཉྩི གཱམཾ སམྤཏྟཾ ཋཱནཱ ཨཙཱཝེནྟོཝ ཝིཀྐིཎིཏྭཱ གཙྪཏི, ནེཝཏྠི ཨཝཧཱརོ, བྷཎྜདེཡྻཾ པན ཧོཏཱི’’ཏི ཨིམཾ ནཡཾ ཨཏིདིསྶཏི།
100. Yānaṭṭhakathāyaṃ dukayuttassāti dvīhi goṇehi yuttassa. Ayuttakanti goṇehi ayuttaṃ. Kappakatāti yathā dvīhi bhāgehi heṭṭhā patiṭṭhāti, evaṃ katā. Tīṇi vā cattāri vā ṭhānānīti akappakatāya upatthambhaniyā vasena tīṇi ṭhānāni, kappakatāya vasena cattāri ṭhānānīti. Tathā pathaviyaṃ ṭhapitassa tīṇi ṭhānānīti sambandho. Tanti phalakassa vā dārukassa vā upari ṭhapitaṃ pathaviyaṃ ṭhapitañca. Dvīhi akkhasīsehīti dvīhi akkhakoṭīhi. Dārūnaṃ upari ṭhapitassāti dvinnaṃ dārūnaṃ upari dvīhi akkhakoṭīhi olambetvā sakaṭasālāyaṃ ṭhapitassa. Heṭṭhimatalassāti sakaṭabāhāya bhūmiṃ phusitvā ṭhitassa heṭṭhimabhāgassa. Sesaṃ nāvāyaṃ vuttasadisanti iminā ‘‘yadi pana taṃ evaṃ gacchantaṃ pakatigamanaṃ upacchinditvā aññaṃ disābhāgaṃ neti, pārājikaṃ. Sayameva yaṃ kañci gāmaṃ sampattaṃ ṭhānā acāventova vikkiṇitvā gacchati, nevatthi avahāro, bhaṇḍadeyyaṃ pana hotī’’ti imaṃ nayaṃ atidissati.
ཡཱནཊྛཀཐཱཝཎྞནཱ ནིཊྛིཏཱ།
Yānaṭṭhakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༢. དུཏིཡཔཱརཱཛིཀཾ • 2. Dutiyapārājikaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. དུཏིཡཔཱརཱཛིཀཾ • 2. Dutiyapārājikaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཡཱནཊྛཀཐཱཝཎྞནཱ • Yānaṭṭhakathāvaṇṇanā
