| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. யஞ்ஞஸுத்தங்
9. Yaññasuttaṃ
120. ஸாவத்தி²னிதா³னங். தேன கோ² பன ஸமயேன ரஞ்ஞோ பஸேனதி³ஸ்ஸ கோஸலஸ்ஸ மஹாயஞ்ஞோ பச்சுபட்டி²தோ ஹோதி, பஞ்ச ச உஸப⁴ஸதானி பஞ்ச ச வச்ச²தரஸதானி பஞ்ச ச வச்ச²தரிஸதானி பஞ்ச ச அஜஸதானி பஞ்ச ச உரப்³ப⁴ஸதானி தூ²ணூபனீதானி ஹொந்தி யஞ்ஞத்தா²ய. யேபிஸ்ஸ தே ஹொந்தி தா³ஸாதி வா பெஸ்ஸாதி வா கம்மகராதி வா, தேபி த³ண்ட³தஜ்ஜிதா ப⁴யதஜ்ஜிதா அஸ்ஸுமுகா² ருத³மானா பரிகம்மானி கரொந்தி.
120. Sāvatthinidānaṃ. Tena kho pana samayena rañño pasenadissa kosalassa mahāyañño paccupaṭṭhito hoti, pañca ca usabhasatāni pañca ca vacchatarasatāni pañca ca vacchatarisatāni pañca ca ajasatāni pañca ca urabbhasatāni thūṇūpanītāni honti yaññatthāya. Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karonti.
அத² கோ² ஸம்ப³ஹுலா பி⁴க்கூ² புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பவிஸிங்ஸு. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² தே பி⁴க்கூ² ப⁴க³வந்தங் ஏதத³வோசுங் – ‘‘இத⁴, ப⁴ந்தே, ரஞ்ஞோ பஸேனதி³ஸ்ஸ கோஸலஸ்ஸ மஹாயஞ்ஞோ பச்சுபட்டி²தோ ஹோதி, பஞ்ச ச உஸப⁴ஸதானி பஞ்ச ச வச்ச²தரஸதானி பஞ்ச ச வச்ச²தரிஸதானி பஞ்ச ச அஜஸதானி பஞ்ச ச உரப்³ப⁴ஸதானி தூ²ணூபனீதானி ஹொந்தி யஞ்ஞத்தா²ய . யேபிஸ்ஸ தே ஹொந்தி தா³ஸாதி வா பெஸ்ஸாதி வா கம்மகராதி வா, தேபி த³ண்ட³தஜ்ஜிதா ப⁴யதஜ்ஜிதா அஸ்ஸுமுகா² ருத³மானா பரிகம்மானி கரொந்தீ’’தி.
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho te bhikkhū bhagavantaṃ etadavocuṃ – ‘‘idha, bhante, rañño pasenadissa kosalassa mahāyañño paccupaṭṭhito hoti, pañca ca usabhasatāni pañca ca vacchatarasatāni pañca ca vacchatarisatāni pañca ca ajasatāni pañca ca urabbhasatāni thūṇūpanītāni honti yaññatthāya . Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karontī’’ti.
அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமா கா³தா²யோ அபா⁴ஸி –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘அஸ்ஸமேத⁴ங் புரிஸமேத⁴ங், ஸம்மாபாஸங் வாஜபெய்யங் நிரக்³க³ள்ஹங்;
‘‘Assamedhaṃ purisamedhaṃ, sammāpāsaṃ vājapeyyaṃ niraggaḷhaṃ;
‘‘அஜேளகா ச கா³வோ ச, விவிதா⁴ யத்த² ஹஞ்ஞரே;
‘‘Ajeḷakā ca gāvo ca, vividhā yattha haññare;
ந தங் ஸம்மக்³க³தா யஞ்ஞங், உபயந்தி மஹேஸினோ.
Na taṃ sammaggatā yaññaṃ, upayanti mahesino.
‘‘யே ச யஞ்ஞா நிராரம்பா⁴, யஜந்தி அனுகுலங் ஸதா³;
‘‘Ye ca yaññā nirārambhā, yajanti anukulaṃ sadā;
அஜேளகா ச கா³வோ ச, விவிதா⁴ நெத்த² ஹஞ்ஞரே;
Ajeḷakā ca gāvo ca, vividhā nettha haññare;
ஏதங் ஸம்மக்³க³தா யஞ்ஞங், உபயந்தி மஹேஸினோ.
Etaṃ sammaggatā yaññaṃ, upayanti mahesino.
‘‘ஏதங் யஜேத² மேதா⁴வீ, ஏஸோ யஞ்ஞோ மஹப்ப²லோ;
‘‘Etaṃ yajetha medhāvī, eso yañño mahapphalo;
ஏதஞ்ஹி யஜமானஸ்ஸ, ஸெய்யோ ஹோதி ந பாபியோ;
Etañhi yajamānassa, seyyo hoti na pāpiyo;
யஞ்ஞோ ச விபுலோ ஹோதி, பஸீத³ந்தி ச தே³வதா’’தி.
Yañño ca vipulo hoti, pasīdanti ca devatā’’ti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. யஞ்ஞஸுத்தவண்ணனா • 9. Yaññasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. யஞ்ஞஸுத்தவண்ணனா • 9. Yaññasuttavaṇṇanā
