| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. යඤ්‌ඤසුත්‌තං
9. Yaññasuttaṃ
120. සාවත්‌ථිනිදානං. තෙන ඛො පන සමයෙන රඤ්‌ඤො පසෙනදිස්‌ස කොසලස්‌ස මහායඤ්‌ඤො පච්‌චුපට්‌ඨිතො හොති, පඤ්‌ච ච උසභසතානි පඤ්‌ච ච වච්‌ඡතරසතානි පඤ්‌ච ච වච්‌ඡතරිසතානි පඤ්‌ච ච අජසතානි පඤ්‌ච ච උරබ්‌භසතානි ථූණූපනීතානි හොන්‌ති යඤ්‌ඤත්‌ථාය. යෙපිස්‌ස තෙ හොන්‌ති දාසාති වා පෙස්‌සාති වා කම්‌මකරාති වා, තෙපි දණ්‌ඩතජ්‌ජිතා භයතජ්‌ජිතා අස්‌සුමුඛා රුදමානා පරිකම්‌මානි කරොන්‌ති.
120. Sāvatthinidānaṃ. Tena kho pana samayena rañño pasenadissa kosalassa mahāyañño paccupaṭṭhito hoti, pañca ca usabhasatāni pañca ca vacchatarasatāni pañca ca vacchatarisatāni pañca ca ajasatāni pañca ca urabbhasatāni thūṇūpanītāni honti yaññatthāya. Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karonti.
අථ ඛො සම්‌බහුලා භික්‌ඛූ පුබ්‌බණ්‌හසමයං නිවාසෙත්‌වා පත්‌තචීවරමාදාය සාවත්‌ථිං පිණ්‌ඩාය පවිසිංසු. සාවත්‌ථියං පිණ්‌ඩාය චරිත්‌වා පච්‌ඡාභත්‌තං පිණ්‌ඩපාතපටික්‌කන්‌තා යෙන භගවා තෙනුපසඞ්‌කමිංසු; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නො ඛො තෙ භික්‌ඛූ භගවන්‌තං එතදවොචුං – ‘‘ඉධ, භන්‌තෙ, රඤ්‌ඤො පසෙනදිස්‌ස කොසලස්‌ස මහායඤ්‌ඤො පච්‌චුපට්‌ඨිතො හොති, පඤ්‌ච ච උසභසතානි පඤ්‌ච ච වච්‌ඡතරසතානි පඤ්‌ච ච වච්‌ඡතරිසතානි පඤ්‌ච ච අජසතානි පඤ්‌ච ච උරබ්‌භසතානි ථූණූපනීතානි හොන්‌ති යඤ්‌ඤත්‌ථාය . යෙපිස්‌ස තෙ හොන්‌ති දාසාති වා පෙස්‌සාති වා කම්‌මකරාති වා, තෙපි දණ්‌ඩතජ්‌ජිතා භයතජ්‌ජිතා අස්‌සුමුඛා රුදමානා පරිකම්‌මානි කරොන්‌තී’’ති.
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho te bhikkhū bhagavantaṃ etadavocuṃ – ‘‘idha, bhante, rañño pasenadissa kosalassa mahāyañño paccupaṭṭhito hoti, pañca ca usabhasatāni pañca ca vacchatarasatāni pañca ca vacchatarisatāni pañca ca ajasatāni pañca ca urabbhasatāni thūṇūpanītāni honti yaññatthāya . Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karontī’’ti.
අථ ඛො භගවා එතමත්‌ථං විදිත්‌වා තායං වෙලායං ඉමා ගාථායො අභාසි –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘අස්‌සමෙධං පුරිසමෙධං, සම්‌මාපාසං වාජපෙය්‍යං නිරග්‌ගළ්‌හං;
‘‘Assamedhaṃ purisamedhaṃ, sammāpāsaṃ vājapeyyaṃ niraggaḷhaṃ;
‘‘අජෙළකා ච ගාවො ච, විවිධා යත්‌ථ හඤ්‌ඤරෙ;
‘‘Ajeḷakā ca gāvo ca, vividhā yattha haññare;
න තං සම්‌මග්‌ගතා යඤ්‌ඤං, උපයන්‌ති මහෙසිනො.
Na taṃ sammaggatā yaññaṃ, upayanti mahesino.
‘‘යෙ ච යඤ්‌ඤා නිරාරම්‌භා, යජන්‌ති අනුකුලං සදා;
‘‘Ye ca yaññā nirārambhā, yajanti anukulaṃ sadā;
අජෙළකා ච ගාවො ච, විවිධා නෙත්‌ථ හඤ්‌ඤරෙ;
Ajeḷakā ca gāvo ca, vividhā nettha haññare;
එතං සම්‌මග්‌ගතා යඤ්‌ඤං, උපයන්‌ති මහෙසිනො.
Etaṃ sammaggatā yaññaṃ, upayanti mahesino.
‘‘එතං යජෙථ මෙධාවී, එසො යඤ්‌ඤො මහප්‌ඵලො;
‘‘Etaṃ yajetha medhāvī, eso yañño mahapphalo;
එතඤ්‌හි යජමානස්‌ස, සෙය්‍යො හොති න පාපියො;
Etañhi yajamānassa, seyyo hoti na pāpiyo;
යඤ්‌ඤො ච විපුලො හොති, පසීදන්‌ති ච දෙවතා’’ති.
Yañño ca vipulo hoti, pasīdanti ca devatā’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. යඤ්‌ඤසුත්‌තවණ්‌ණනා • 9. Yaññasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. යඤ්‌ඤසුත්‌තවණ්‌ණනා • 9. Yaññasuttavaṇṇanā
