| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
9. яан̃н̃асуд̇д̇аван̣н̣анаа
9. Yaññasuttavaṇṇanā
120. навамз т̇уун̣уубанийд̇аанийд̇и т̇уун̣ам̣ убанийд̇аани, т̇уун̣ааяа б̣ад̣̇д̇хаани хонд̇и. баригаммаани гаронд̇ийд̇и зд̇д̇аавад̇аа д̇зхи бхигкуухи ран̃н̃о аарад̣̇д̇хаяан̃н̃о д̇ат̇ааг̇ад̇асса аарожид̇о. гасмаа бана ран̃н̃аа аяам̣ яан̃н̃о аарад̣̇д̇хо? д̣̇уссубинабадигхаад̇ааяа. згад̣̇ивасам̣ гира рааж̇аа саб̣б̣аалан̇гаараббадиман̣д̣ид̇о хад̇т̇игканд̇хавараг̇ад̇о наг̇арам̣ анусан̃жаранд̇о ваад̇абаанам̣ виварид̇ваа ологаяамаанам̣ згам̣ ид̇т̇им̣ д̣̇исваа д̇ассаа бадиб̣ад̣̇д̇хажид̇д̇о д̇ад̇ова бадинивад̇д̇ид̇ваа анд̇збурам̣ бависид̇ваа згасса бурисасса д̇амад̇т̇ам̣ аарожзд̇ваа ‘‘г̇ажча д̇ассаа сассаамигабхаавам̣ ваа ассаамигабхаавам̣ ваа ж̇аанаахий’’д̇и бзсзси. со г̇анд̇ваа бужчи. саа ‘‘зсо мз саамиго аабан̣з нисинно’’д̇и д̣̇ассзси. рааж̇абурисо ран̃н̃о д̇амад̇т̇ам̣ аажигки. рааж̇аа д̇ам̣ бурисам̣ баггосаабзд̇ваа ‘‘мам̣ убадтахаа’’д̇и ааха. ‘‘наахам̣, д̣̇зва, убадтахид̇ум̣ ж̇аанаамий’’д̇и жа вуд̇д̇з ‘‘убадтаанам̣ наама на аажарияасса санд̇игз уг̇г̇ахзд̇аб̣б̣а’’нд̇и б̣алаггаарзна аавуд̇хапалагам̣ г̇аахаабзд̇ваа убадтаагам̣ агааси. убадтахид̇ваа г̇зхам̣ г̇ад̇амад̇д̇амзва жа нам̣ буна баггосаабзд̇ваа ‘‘убадтаагзна наама ран̃н̃о важанам̣ гад̇д̇аб̣б̣ам̣, г̇ажча ид̇о яож̇анамад̇д̇з амхаагам̣ сийсад̇хованабогкаран̣ий ад̇т̇и, д̇ад̇о арун̣амад̇д̇иган̃жа лохид̇уббаламаалан̃жа г̇ан̣хид̇ваа зхи. сажз аж̇ж̇зва нааг̇ажчаси, рааж̇ад̣̇ан̣д̣ам̣ гариссаамий’’д̇и вад̇ваа бзсзси. со рааж̇абхаязна нигкамид̇ваа г̇ад̇о.
120. Navame thūṇūpanītānīti thūṇaṃ upanītāni, thūṇāya baddhāni honti. Parikammāni karontīti ettāvatā tehi bhikkhūhi rañño āraddhayañño tathāgatassa ārocito. Kasmā pana raññā ayaṃ yañño āraddho? Dussupinapaṭighātāya. Ekadivasaṃ kira rājā sabbālaṅkārappaṭimaṇḍito hatthikkhandhavaragato nagaraṃ anusañcaranto vātapānaṃ vivaritvā olokayamānaṃ ekaṃ itthiṃ disvā tassā paṭibaddhacitto tatova paṭinivattitvā antepuraṃ pavisitvā ekassa purisassa tamatthaṃ ārocetvā ‘‘gaccha tassā sassāmikabhāvaṃ vā assāmikabhāvaṃ vā jānāhī’’ti pesesi. So gantvā pucchi. Sā ‘‘eso me sāmiko āpaṇe nisinno’’ti dassesi. Rājapuriso rañño tamatthaṃ ācikkhi. Rājā taṃ purisaṃ pakkosāpetvā ‘‘maṃ upaṭṭhahā’’ti āha. ‘‘Nāhaṃ, deva, upaṭṭhahituṃ jānāmī’’ti ca vutte ‘‘upaṭṭhānaṃ nāma na ācariyassa santike uggahetabba’’nti balakkārena āvudhaphalakaṃ gāhāpetvā upaṭṭhākaṃ akāsi. Upaṭṭhahitvā gehaṃ gatamattameva ca naṃ puna pakkosāpetvā ‘‘upaṭṭhākena nāma rañño vacanaṃ kattabbaṃ, gaccha ito yojanamatte amhākaṃ sīsadhovanapokkharaṇī atthi, tato aruṇamattikañca lohituppalamālañca gaṇhitvā ehi. Sace ajjeva nāgacchasi, rājadaṇḍaṃ karissāmī’’ti vatvā pesesi. So rājabhayena nikkhamitvā gato.
рааж̇ааби д̇асмим̣ г̇ад̇з д̣̇овааригам̣ баггосаабзд̇ваа, ‘‘аж̇ж̇а сааяанхзязва д̣̇ваарам̣ бид̣̇ахид̇ваа ‘ахам̣ рааж̇ад̣̇ууд̇о’д̇и ваа ‘убарааж̇ад̣̇ууд̇о’д̇и ваа бхан̣анд̇аанамби маа виварий’’д̇и ааха. со бурисо мад̇д̇иган̃жа уббалаани жа г̇ахзд̇ваа д̣̇ваарз бихид̇амад̇д̇з ааг̇анд̇ваа б̣ахум̣ вад̣̇анд̇оби д̣̇ваарам̣ алабхид̇ваа бариссаяабхаязна ж̇зд̇аванам̣ г̇ад̇о. рааж̇ааби рааг̇абарил̣аахзна абхибхууд̇о гаалз нисийд̣̇ад̇и, гаалз д̇идтад̇и, гаалз нибаж̇ж̇ад̇и, саннидтаанам̣ алабханд̇о яад̇т̇а гад̇т̇ажи нисиннагова маггаданид̣̇д̣̇ааяа нид̣̇д̣̇ааяад̇и.
Rājāpi tasmiṃ gate dovārikaṃ pakkosāpetvā, ‘‘ajja sāyanheyeva dvāraṃ pidahitvā ‘ahaṃ rājadūto’ti vā ‘uparājadūto’ti vā bhaṇantānampi mā vivarī’’ti āha. So puriso mattikañca uppalāni ca gahetvā dvāre pihitamatte āgantvā bahuṃ vadantopi dvāraṃ alabhitvā parissayabhayena jetavanaṃ gato. Rājāpi rāgapariḷāhena abhibhūto kāle nisīdati, kāle tiṭṭhati, kāle nipajjati, sanniṭṭhānaṃ alabhanto yattha katthaci nisinnakova makkaṭaniddāya niddāyati.
буб̣б̣з жа д̇асмим̣язва наг̇арз жад̇д̇ааро сздтибуд̇д̇аа барад̣̇ааригагаммам̣ гад̇ваа нанд̣̇обананд̣̇ааяа наама лохагумбхияаа ниб̣б̣ад̇д̇им̣су. д̇з пзн̣уд̣̇д̣̇зхагам̣ бажжамаанаа д̇им̣савассасахассаани хздтаа г̇ажчанд̇аа гумбхияаа д̇алам̣ баабун̣анд̇и, д̇им̣савассасахассаани убари г̇ажчанд̇аа мад̇т̇агам̣ баабун̣анд̇и. д̇з д̇ам̣ д̣̇ивасам̣ аалогам̣ ологзд̇ваа ад̇д̇ано д̣̇уггадабхаязна згзгам̣ г̇аат̇ам̣ вад̇д̇угаамаа вад̇д̇ум̣ асаггонд̇аа згзгам̣ агкарамзва аахам̣су. зго са-гаарам̣, зго со-гаарам̣, зго на-гаарам̣, зго д̣̇у-гаарам̣ ааха. рааж̇аа д̇зсам̣ нзраяигасад̇д̇аанам̣ сад̣̇д̣̇ам̣ суд̇агаалад̇о бадтааяа сукам̣ авинд̣̇амаанова д̇ам̣рад̇д̇аавасзсам̣ вийд̇инаамзси.
Pubbe ca tasmiṃyeva nagare cattāro seṭṭhiputtā paradārikakammaṃ katvā nandopanandāya nāma lohakumbhiyā nibbattiṃsu. Te pheṇuddehakaṃ paccamānā tiṃsavassasahassāni heṭṭhā gacchantā kumbhiyā talaṃ pāpuṇanti, tiṃsavassasahassāni upari gacchantā matthakaṃ pāpuṇanti. Te taṃ divasaṃ ālokaṃ oloketvā attano dukkaṭabhayena ekekaṃ gāthaṃ vattukāmā vattuṃ asakkontā ekekaṃ akkharameva āhaṃsu. Eko sa-kāraṃ, eko so-kāraṃ, eko na-kāraṃ, eko du-kāraṃ āha. Rājā tesaṃ nerayikasattānaṃ saddaṃ sutakālato paṭṭhāya sukhaṃ avindamānova taṃrattāvasesaṃ vītināmesi.
арун̣з удтид̇з бурохид̇о ааг̇анд̇ваа д̇ам̣ сукасзяяам̣ бужчи. со ‘‘гуд̇о мз, аажарияа, сука’’нд̇и ? вад̇ваа, ‘‘субинз зваруубз сад̣̇д̣̇з ассоси’’нд̇и аажигки. б̣раахман̣о – ‘‘имасса ран̃н̃о иминаа субинзна вуд̣дхи ваа хаани ваа над̇т̇и, абижа ко бана яам̣ имасса г̇зхз ад̇т̇и, д̇ам̣ саман̣асса г̇од̇амасса ход̇и, г̇од̇амасаавагаанам̣ ход̇и, б̣раахман̣аа гин̃жи на лабханд̇и, б̣раахман̣аанам̣ бхигкам̣ уббаад̣̇зссаамий’’д̇и, ‘‘бхаарияо аяам̣, махаарааж̇а, субино д̇ийсу ж̇аанийсу згаа бан̃н̃ааяад̇и, раж̇ж̇анд̇арааяо ваа бхависсад̇и ж̇ийвид̇анд̇арааяо ваа, д̣̇зво ваа на вассиссад̇ий’’д̇и ааха. гат̇ам̣ сод̇т̇и бхавзяяа аажарияаад̇и? ‘‘манд̇зд̇ваа н̃аад̇ум̣ саггаа, махаарааж̇аад̇и. г̇ажчат̇а аажариязхи сад̣̇д̇хим̣ манд̇зд̇ваа амхаагам̣ сод̇т̇им̣ гарот̇аа’’д̇и.
Aruṇe uṭṭhite purohito āgantvā taṃ sukhaseyyaṃ pucchi. So ‘‘kuto me, ācariya, sukha’’nti ? Vatvā, ‘‘supine evarūpe sadde assosi’’nti ācikkhi. Brāhmaṇo – ‘‘imassa rañño iminā supinena vuḍḍhi vā hāni vā natthi, apica kho pana yaṃ imassa gehe atthi, taṃ samaṇassa gotamassa hoti, gotamasāvakānaṃ hoti, brāhmaṇā kiñci na labhanti, brāhmaṇānaṃ bhikkhaṃ uppādessāmī’’ti, ‘‘bhāriyo ayaṃ, mahārāja, supino tīsu jānīsu ekā paññāyati, rajjantarāyo vā bhavissati jīvitantarāyo vā, devo vā na vassissatī’’ti āha. Kathaṃ sotthi bhaveyya ācariyāti? ‘‘Mantetvā ñātuṃ sakkā, mahārājāti. Gacchatha ācariyehi saddhiṃ mantetvā amhākaṃ sotthiṃ karothā’’ti.
со сивигасаалааяам̣ б̣раахман̣з саннибаад̇зд̇ваа д̇амад̇т̇ам̣ аарожзд̇ваа, ‘‘висум̣ висум̣ г̇анд̇ваа звам̣ вад̣̇ат̇аа’’д̇и д̇аяо ваг̇г̇з агааси . б̣раахман̣аа бависид̇ваа рааж̇аанам̣ сукасзяяам̣ бужчим̣су. рааж̇аа бурохид̇асса гат̇ид̇анияаамзнзва гат̇зд̇ваа ‘‘гат̇ам̣ сод̇т̇и бхавзяяаа’’д̇и бужчи. махааб̣раахман̣аа – ‘‘саб̣б̣абан̃жасад̇ам̣ яан̃н̃ам̣ яаж̇ид̇ваа зд̇асса гаммасса сод̇т̇и бхавзяяа, звам̣, махаарааж̇а, аажарияаа гат̇знд̇ий’’д̇и аахам̣су. рааж̇аа д̇зсам̣ суд̇ваа анабхинанд̣̇ид̇ваа аббадиггосид̇ваа д̇ун̣хий ахоси. ат̇а д̣̇уд̇ияаваг̇г̇аб̣раахман̣ааби ааг̇анд̇ваа д̇ад̇т̇зва гат̇зсум̣. д̇ат̇аа д̇ад̇ияаваг̇г̇аб̣раахман̣ааби. ат̇а рааж̇аа ‘‘яан̃н̃ам̣ гаронд̇уу’’д̇и аан̣аабзси. д̇ад̇о бадтааяа б̣раахман̣аа усабхаад̣̇аяо баан̣з аахараабзсум̣. наг̇арз махаасад̣̇д̣̇о уд̣̇абаад̣̇и . д̇ам̣ бавад̇д̇им̣ н̃ад̇ваа маллигаа рааж̇аанам̣ д̇ат̇ааг̇ад̇асса санд̇игам̣ бзсзси. со г̇анд̇ваа бхаг̇аванд̇ам̣ ванд̣̇ид̇ваа згаманд̇ам̣ нисийд̣̇и. ат̇а нам̣ бхаг̇аваа – ‘‘ханд̣̇а гуд̇о ну д̇вам̣, махаарааж̇а, ааг̇ажчаси д̣̇иваад̣̇ивассаа’’д̇и ааха. рааж̇аа – ‘‘аж̇ж̇а мз, бханд̇з, субинагз жад̇д̇ааро сад̣̇д̣̇аа суд̇аа, сохам̣ б̣раахман̣з бужчим̣. б̣раахман̣аа ‘бхаарияо, махаарааж̇а, субино, саб̣б̣абан̃жасад̇ам̣ яан̃н̃ам̣ яаж̇ид̇ваа бадигаммам̣ гаромаад̇и аарад̣̇д̇хаа’’’д̇и ааха. гинд̇и д̇з, махаарааж̇а, сад̣̇д̣̇аа суд̇аад̇и. со яат̇аасуд̇ам̣ аарожзси. ат̇а нам̣ бхаг̇аваа ааха – буб̣б̣з, махаарааж̇а, имасмим̣язва наг̇арз жад̇д̇ааро сздтибуд̇д̇аа барад̣̇ааригаа худ̇ваа нанд̣̇обананд̣̇ааяа лохагумбхияаа ниб̣б̣ад̇д̇аа садтивассасахассамад̇т̇агз уг̇г̇ажчим̣су.
So sivikasālāyaṃ brāhmaṇe sannipātetvā tamatthaṃ ārocetvā, ‘‘visuṃ visuṃ gantvā evaṃ vadathā’’ti tayo vagge akāsi . Brāhmaṇā pavisitvā rājānaṃ sukhaseyyaṃ pucchiṃsu. Rājā purohitassa kathitaniyāmeneva kathetvā ‘‘kathaṃ sotthi bhaveyyā’’ti pucchi. Mahābrāhmaṇā – ‘‘sabbapañcasataṃ yaññaṃ yajitvā etassa kammassa sotthi bhaveyya, evaṃ, mahārāja, ācariyā kathentī’’ti āhaṃsu. Rājā tesaṃ sutvā anabhinanditvā appaṭikkositvā tuṇhī ahosi. Atha dutiyavaggabrāhmaṇāpi āgantvā tattheva kathesuṃ. Tathā tatiyavaggabrāhmaṇāpi. Atha rājā ‘‘yaññaṃ karontū’’ti āṇāpesi. Tato paṭṭhāya brāhmaṇā usabhādayo pāṇe āharāpesuṃ. Nagare mahāsaddo udapādi . Taṃ pavattiṃ ñatvā mallikā rājānaṃ tathāgatassa santikaṃ pesesi. So gantvā bhagavantaṃ vanditvā ekamantaṃ nisīdi. Atha naṃ bhagavā – ‘‘handa kuto nu tvaṃ, mahārāja, āgacchasi divādivassā’’ti āha. Rājā – ‘‘ajja me, bhante, supinake cattāro saddā sutā, sohaṃ brāhmaṇe pucchiṃ. Brāhmaṇā ‘bhāriyo, mahārāja, supino, sabbapañcasataṃ yaññaṃ yajitvā paṭikammaṃ karomāti āraddhā’’’ti āha. Kinti te, mahārāja, saddā sutāti. So yathāsutaṃ ārocesi. Atha naṃ bhagavā āha – pubbe, mahārāja, imasmiṃyeva nagare cattāro seṭṭhiputtā paradārikā hutvā nandopanandāya lohakumbhiyā nibbattā saṭṭhivassasahassamatthake uggacchiṃsu.
д̇ад̇т̇а зго –
Tattha eko –
‘‘садтивассасахассаани, барибун̣н̣аани саб̣б̣асо;
‘‘Saṭṭhivassasahassāni, paripuṇṇāni sabbaso;
нираяз бажжамаанаанам̣, гад̣̇аа анд̇о бхависсад̇ий’’д̇и.(бз. ва. 802; ж̇аа. 1.4.54) –
Niraye paccamānānaṃ, kadā anto bhavissatī’’ti.(pe. va. 802; jā. 1.4.54) –
имам̣ г̇аат̇ам̣ вад̇т̇угаамо ахоси. д̣̇уд̇ияо –
Imaṃ gāthaṃ vatthukāmo ahosi. Dutiyo –
‘‘сохам̣ нууна ид̇о г̇анд̇ваа, яоним̣ лад̣̇д̇хаана маанусим̣;
‘‘Sohaṃ nūna ito gantvā, yoniṃ laddhāna mānusiṃ;
вад̣̇ан̃н̃уу сийласамбанно, гаахаами гусалам̣ б̣аху’’нд̇и. (бз. ва. 805; ж̇аа. 1.4.56) –
Vadaññū sīlasampanno, kāhāmi kusalaṃ bahu’’nti. (pe. va. 805; jā. 1.4.56) –
имам̣ г̇аат̇ам̣ вад̇т̇угаамо ахоси. д̇ад̇ияо –
Imaṃ gāthaṃ vatthukāmo ahosi. Tatiyo –
‘‘над̇т̇и анд̇о гуд̇о анд̇о, на анд̇о бадид̣̇иссад̇и;
‘‘Natthi anto kuto anto, na anto paṭidissati;
д̇ад̣̇аа хи багад̇ам̣ баабам̣, мама д̇уяхан̃жа маарисаа’’д̇и. (бз. ва. 803; ж̇аа. 1.4.55) –
Tadā hi pakataṃ pāpaṃ, mama tuyhañca mārisā’’ti. (pe. va. 803; jā. 1.4.55) –
имам̣ г̇аат̇ам̣ вад̇т̇угаамо ахоси. жад̇уд̇т̇о –
Imaṃ gāthaṃ vatthukāmo ahosi. Catuttho –
‘‘д̣̇уж̇ж̇ийвид̇амаж̇ийвимхаа, яз санд̇з на д̣̇ад̣̇амхасз;
‘‘Dujjīvitamajīvimhā, ye sante na dadamhase;
виж̇ж̇амаанзсу бхог̇зсу, д̣̇ийбам̣ наагамха ад̇д̇ано’’д̇и. (бз. ва. 804; ж̇аа. 1.4.53) –
Vijjamānesu bhogesu, dīpaṃ nākamha attano’’ti. (pe. va. 804; jā. 1.4.53) –
имам̣ . д̇з имаа г̇аат̇аа вад̇д̇ум̣ асаггонд̇аа згзгам̣ агкарам̣ вад̇ваа д̇ад̇т̇зва нимуг̇г̇аа. ид̇и, махаарааж̇а, д̇з нзраяигасад̇д̇аа яат̇аагаммзна виравим̣су. д̇асса сад̣̇д̣̇асса суд̇абажжаяаа д̇уяхам̣ хаани ваа вуд̣дхи ваа над̇т̇и. зд̇д̇агаанам̣ бана басуунам̣ гхаад̇анагаммам̣ наама бхаарияанд̇и нираяабхаязна д̇аж̇ж̇зд̇ваа д̇хаммагат̇ам̣ гат̇зси. рааж̇аа д̣̇асаб̣алз басийд̣̇ид̇ваа, ‘‘мун̃жаами, нзсам̣ ж̇ийвид̇ам̣ д̣̇ад̣̇аами, харид̇аани жзва д̇ин̣аани каад̣̇анд̇у, сийд̇алаани жа баанийяаани биванд̇у, сийд̇о жа нзсам̣ ваад̇о убавааяад̇уу’’д̇и вад̇ваа, ‘‘г̇ажчат̇а хаарзт̇аа’’д̇и мануссз аан̣аабзси. д̇з г̇анд̇ваа б̣раахман̣з балаабзд̇ваа д̇ам̣ баан̣асан̇гхам̣ б̣анд̇ханад̇о можзд̇ваа наг̇арз д̇хаммабхзрим̣ жараабзсум̣.
Imaṃ . Te imā gāthā vattuṃ asakkontā ekekaṃ akkharaṃ vatvā tattheva nimuggā. Iti, mahārāja, te nerayikasattā yathākammena viraviṃsu. Tassa saddassa sutapaccayā tuyhaṃ hāni vā vuḍḍhi vā natthi. Ettakānaṃ pana pasūnaṃ ghātanakammaṃ nāma bhāriyanti nirayabhayena tajjetvā dhammakathaṃ kathesi. Rājā dasabale pasīditvā, ‘‘muñcāmi, nesaṃ jīvitaṃ dadāmi, haritāni ceva tiṇāni khādantu, sītalāni ca pānīyāni pivantu, sīto ca nesaṃ vāto upavāyatū’’ti vatvā, ‘‘gacchatha hārethā’’ti manusse āṇāpesi. Te gantvā brāhmaṇe palāpetvā taṃ pāṇasaṅghaṃ bandhanato mocetvā nagare dhammabheriṃ carāpesuṃ.
ат̇а рааж̇аа д̣̇асаб̣аласса санд̇игз нисинно ааха – ‘‘бханд̇з, згарад̇д̇и наама д̇ияаамаа ход̇и, маяхам̣ бана аж̇ж̇а д̣̇вз рад̇д̇ияо згад̇о гхадид̇аа вияа ахзсу’’нд̇и. соби бурисо д̇ад̇т̇зва нисинно ааха – ‘‘бханд̇з, яож̇анам̣ наама жад̇уг̇аавуд̇ам̣ ход̇и, маяхам̣ бана аж̇ж̇а д̣̇вз яож̇анаани згад̇о гад̇аани вияа ахзсу’’нд̇и. ат̇а бхаг̇аваа – ‘‘ж̇ааг̇арасса д̇аава рад̇д̇ияаа д̣̇ийгхабхааво баагадо, санд̇асса яож̇анасса д̣̇ийгхабхааво баагадо, ваддабад̇ид̇асса бана б̣аалабут̇уж̇ж̇анасса анамад̇аг̇г̇асам̣саараваддам̣ зганд̇ад̣̇ийгхамзваа’’д̇и рааж̇аанан̃жа д̇ан̃жа бурисам̣ нзраяигасад̇д̇з жа аараб̣бха д̇хаммабад̣̇з имам̣ г̇аат̇ам̣ абхааси –
Atha rājā dasabalassa santike nisinno āha – ‘‘bhante, ekaratti nāma tiyāmā hoti, mayhaṃ pana ajja dve rattiyo ekato ghaṭitā viya ahesu’’nti. Sopi puriso tattheva nisinno āha – ‘‘bhante, yojanaṃ nāma catugāvutaṃ hoti, mayhaṃ pana ajja dve yojanāni ekato katāni viya ahesu’’nti. Atha bhagavā – ‘‘jāgarassa tāva rattiyā dīghabhāvo pākaṭo, santassa yojanassa dīghabhāvo pākaṭo, vaṭṭapatitassa pana bālaputhujjanassa anamataggasaṃsāravaṭṭaṃ ekantadīghamevā’’ti rājānañca tañca purisaṃ nerayikasatte ca ārabbha dhammapade imaṃ gāthaṃ abhāsi –
‘‘д̣̇ийгхаа ж̇ааг̇арад̇о рад̇д̇и, д̣̇ийгхам̣ санд̇асса яож̇анам̣;
‘‘Dīghā jāgarato ratti, dīghaṃ santassa yojanaṃ;
д̣̇ийгхо б̣аалаанам̣ сам̣сааро, сад̣̇д̇хаммам̣ авиж̇аанад̇а’’нд̇и. (д̇ха. ба. 60);
Dīgho bālānaṃ saṃsāro, saddhammaṃ avijānata’’nti. (dha. pa. 60);
г̇аат̇аабарияосаанз со ид̇т̇исаамиго бурисо сод̇аабад̇д̇ипалз бад̇идтахи. зд̇амад̇т̇ам̣ вид̣̇ид̇ваад̇и зд̇ам̣ гааран̣ам̣ ж̇аанид̇ваа.
Gāthāpariyosāne so itthisāmiko puriso sotāpattiphale patiṭṭhahi. Etamatthaṃ viditvāti etaṃ kāraṇaṃ jānitvā.
ассамзд̇ханд̇иаад̣̇ийсу – бораан̣арааж̇агаалз гира сассамзд̇хам̣ бурисамзд̇хам̣ саммаабаасам̣ ваажаабзяяанд̇и жад̇д̇аари сан̇г̇ахавад̇т̇ууни ахзсум̣, язхи рааж̇аано логам̣ сан̇г̇ан̣хим̣су. д̇ад̇т̇а нибпаннасассад̇о д̣̇асамабхааг̇аг̇г̇ахан̣ам̣ сассамзд̇хам̣ наама, сассасамбаад̣̇анз мзд̇хаавид̇аад̇и ад̇т̇о. махааяод̇хаанам̣ чамаасигам̣ бхад̇д̇а-взд̇анаануббад̣̇аанам̣ бурисамзд̇хам̣ наама, бурисасан̇г̇ан̣ханз мзд̇хаавид̇аад̇и ад̇т̇о. д̣̇алид̣̇д̣̇амануссаанам̣ хад̇т̇ад̇о лзкам̣ г̇ахзд̇ваа д̇ийн̣и вассаани винаава вад̣дхияаа сахассад̣̇висахассамад̇д̇ад̇ханаануббад̣̇аанам̣ саммаабаасам̣ наама. д̇ан̃хи саммаа мануссз баасзд̇и, хад̣̇аяз б̣анд̇хид̇ваа вияа табзд̇и, д̇асмаа саммаабаасанд̇и вужжад̇и. ‘‘д̇аад̇а маад̇улаа’’д̇иаад̣̇инаа наязна сан̣хаваажаабхан̣анам̣ ваажаабзяяам̣ наама, бияаваажаад̇и ад̇т̇о. звам̣ жад̇уухи сан̇г̇ахавад̇т̇уухи сан̇г̇ахид̇ам̣ радтам̣ ид̣̇д̇хан̃жзва ход̇и пийд̇ан̃жа бахууд̇ааннабаанам̣ кзмам̣ нираб̣б̣уд̣̇ам̣. мануссаа муд̣̇аа мод̣̇амаанаа урз буд̇д̇з нажжзнд̇аа абааруд̇агхарад̣̇ваараа вихаранд̇и. ид̣̇ам̣ гхарад̣̇ваарзсу аг̇г̇ал̣аанам̣ абхаавад̇о нираг̇г̇ал̣анд̇и вужжад̇и. аяам̣ бораан̣игаа бавзн̣ий.
Assamedhantiādīsu – porāṇarājakāle kira sassamedhaṃ purisamedhaṃ sammāpāsaṃ vācāpeyyanti cattāri saṅgahavatthūni ahesuṃ, yehi rājāno lokaṃ saṅgaṇhiṃsu. Tattha nipphannasassato dasamabhāgaggahaṇaṃ sassamedhaṃ nāma, sassasampādane medhāvitāti attho. Mahāyodhānaṃ chamāsikaṃ bhatta-vetanānuppadānaṃ purisamedhaṃ nāma, purisasaṅgaṇhane medhāvitāti attho. Daliddamanussānaṃ hatthato lekhaṃ gahetvā tīṇi vassāni vināva vaḍḍhiyā sahassadvisahassamattadhanānuppadānaṃ sammāpāsaṃ nāma. Tañhi sammā manusse pāseti, hadaye bandhitvā viya ṭhapeti, tasmā sammāpāsanti vuccati. ‘‘Tāta mātulā’’tiādinā nayena saṇhavācābhaṇanaṃ vācāpeyyaṃ nāma, piyavācāti attho. Evaṃ catūhi saṅgahavatthūhi saṅgahitaṃ raṭṭhaṃ iddhañceva hoti phītañca pahūtaannapānaṃ khemaṃ nirabbudaṃ. Manussā mudā modamānā ure putte naccentā apārutagharadvārā viharanti. Idaṃ gharadvāresu aggaḷānaṃ abhāvato niraggaḷanti vuccati. Ayaṃ porāṇikā paveṇī.
абарабхааг̇з бана оггаагарааж̇агаалз б̣раахман̣аа имаани жад̇д̇аари сан̇г̇ахавад̇т̇ууни иман̃жа радтасамбад̇д̇им̣ баривад̇д̇зд̇ваа уд̣̇д̇хам̣муулагам̣ гад̇ваа ассамзд̇хам̣ бурисамзд̇ханд̇и аад̣̇игз бан̃жа яан̃н̃з наама агам̣су. д̇зсу ассамзд̇т̇а мзд̇ханд̇и вад̇ханд̇ийд̇и ассамзд̇хо. д̣̇вийхи барияан̃н̃зхи яаж̇ид̇аб̣б̣асса згавийсад̇ияуубасса згасмим̣ маж̇жхимад̣̇ивасзязва сад̇д̇анавуд̇ибан̃жабасусад̇агхаад̇абхим̣санасса табзд̇ваа бхуумин̃жа бурисз жа авасзсасаб̣б̣авибхавад̣̇агкин̣асса яан̃н̃ассзд̇ам̣ ад̇хиважанам̣. бурисамзд̇т̇а мзд̇ханд̇ийд̇и бурисамзд̇хо. жад̇уухи барияан̃н̃зхи яаж̇ид̇аб̣б̣асса сад̣̇д̇хим̣ бхуумияаа ассамзд̇хз вуд̇д̇авибхавад̣̇агкин̣асса яан̃н̃ассзд̇ам̣ ад̇хиважанам̣. саммамзд̇т̇а баасзнд̇ийд̇и саммаабаасо. д̣̇ивасз д̣̇ивасз саммам̣ кибид̇ваа д̇асса бад̇ид̇огаасз взд̣̇им̣ гад̇ваа сам̣хааримзхи яуубаад̣̇ийхи сарассад̇инад̣̇ияаа нимуг̇г̇огаасад̇о бабхуд̇и бадиломам̣ г̇ажчанд̇зна яаж̇ид̇аб̣б̣асса сад̇раяааг̇ассзд̇ам̣ ад̇хиважанам̣. вааж̇амзд̇т̇а биванд̇ийд̇и вааж̇абзяяо. згзна барияан̃н̃зна сад̇д̇арасахи басуухи яаж̇ид̇аб̣б̣асса б̣злуваяуубасса сад̇д̇арасагад̣̇агкин̣асса яан̃н̃ассзд̇ам̣ ад̇хиважанам̣. над̇т̇и зд̇т̇а аг̇г̇ал̣аад̇и нираг̇г̇ал̣о. навахи барияан̃н̃зхи яаж̇ид̇аб̣б̣асса сад̣̇д̇хим̣ бхуумияаа жа бурисзхи жа ассамзд̇хз вуд̇д̇авибхавад̣̇агкин̣асса саб̣б̣амзд̇хабарияааяанаамасса ассамзд̇хавигаббассзвзд̇ам̣ ад̇хиважанам̣. махаарамбхаад̇и махаагижжаа махаагаран̣ийяаа. саммаг̇г̇ад̇аад̇и саммаа бадибаннаа б̣уд̣̇д̇хаад̣̇аяо. нираарамбхаад̇и аббад̇т̇аа аббагижжаа. яаж̇анд̇и анугуланд̇и анугулзсу яаж̇анд̇и, яам̣ нижжабхад̇д̇аад̣̇и буб̣б̣абурисзхи бадтабид̇ам̣, д̇ам̣ абараабарам̣ анубажчиннад̇д̇аа мануссаа д̣̇ад̣̇анд̇ийд̇и ад̇т̇о. навамам̣.
Aparabhāge pana okkākarājakāle brāhmaṇā imāni cattāri saṅgahavatthūni imañca raṭṭhasampattiṃ parivattetvā uddhaṃmūlakaṃ katvā assamedhaṃ purisamedhanti ādike pañca yaññe nāma akaṃsu. Tesu assamettha medhanti vadhantīti assamedho. Dvīhi pariyaññehi yajitabbassa ekavīsatiyūpassa ekasmiṃ majjhimadivaseyeva sattanavutipañcapasusataghātabhiṃsanassa ṭhapetvā bhūmiñca purise ca avasesasabbavibhavadakkhiṇassa yaññassetaṃ adhivacanaṃ. Purisamettha medhantīti purisamedho. Catūhi pariyaññehi yajitabbassa saddhiṃ bhūmiyā assamedhe vuttavibhavadakkhiṇassa yaññassetaṃ adhivacanaṃ. Sammamettha pāsentīti sammāpāso. Divase divase sammaṃ khipitvā tassa patitokāse vediṃ katvā saṃhārimehi yūpādīhi sarassatinadiyā nimuggokāsato pabhuti paṭilomaṃ gacchantena yajitabbassa satrayāgassetaṃ adhivacanaṃ. Vājamettha pivantīti vājapeyyo. Ekena pariyaññena sattarasahi pasūhi yajitabbassa beluvayūpassa sattarasakadakkhiṇassa yaññassetaṃ adhivacanaṃ. Natthi ettha aggaḷāti niraggaḷo. Navahi pariyaññehi yajitabbassa saddhiṃ bhūmiyā ca purisehi ca assamedhe vuttavibhavadakkhiṇassa sabbamedhapariyāyanāmassa assamedhavikappassevetaṃ adhivacanaṃ. Mahārambhāti mahākiccā mahākaraṇīyā. Sammaggatāti sammā paṭipannā buddhādayo. Nirārambhāti appatthā appakiccā. Yajanti anukulanti anukulesu yajanti, yaṃ niccabhattādi pubbapurisehi paṭṭhapitaṃ, taṃ aparāparaṃ anupacchinnattā manussā dadantīti attho. Navamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 9. яан̃н̃асуд̇д̇ам̣ • 9. Yaññasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 9. яан̃н̃асуд̇д̇аван̣н̣анаа • 9. Yaññasuttavaṇṇanā
