Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༦. ཡསསུཏྟཾ

    6. Yasasuttaṃ

    ༨༦. ཨེཀཾ སམཡཾ བྷགཝཱ ཀོསལེསུ ཙཱརིཀཾ ཙརམཱནོ མཧཏཱ བྷིཀྑུསངྒྷེན སདྡྷིཾ ཡེན ཨིཙྪཱནངྒལཾ ནཱམ ཀོསལཱནཾ བྲཱཧྨཎགཱམོ ཏདཝསརི། ཏཏྲ སུདཾ བྷགཝཱ ཨིཙྪཱནངྒལེ ཝིཧརཏི ཨིཙྪཱནངྒལཝནསཎྜེ། ཨསྶོསུཾ ཁོ ཨིཙྪཱནངྒལཀཱ བྲཱཧྨཎགཧཔཏིཀཱ – ‘‘སམཎོ ཁལུ བྷོ གོཏམོ སཀྱཔུཏྟོ སཀྱཀུལཱ པབྦཛིཏོ ཨིཙྪཱནངྒལཾ ཨནུཔྤཏྟོ ཨིཙྪཱནངྒལེ ཝིཧརཏི ཨིཙྪཱནངྒལཝནསཎྜེ ། ཏཾ ཁོ པན བྷཝནྟཾ གོཏམཾ ཨེཝཾ ཀལྱཱཎོ ཀིཏྟིསདྡོ ཨབྦྷུགྒཏོ – ‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ…པེ॰… སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’’ཏི།

    86. Ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena icchānaṅgalaṃ nāma kosalānaṃ brāhmaṇagāmo tadavasari. Tatra sudaṃ bhagavā icchānaṅgale viharati icchānaṅgalavanasaṇḍe. Assosuṃ kho icchānaṅgalakā brāhmaṇagahapatikā – ‘‘samaṇo khalu bho gotamo sakyaputto sakyakulā pabbajito icchānaṅgalaṃ anuppatto icchānaṅgale viharati icchānaṅgalavanasaṇḍe . Taṃ kho pana bhavantaṃ gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho…pe… sādhu kho pana tathārūpānaṃ arahataṃ dassanaṃ hotī’’’ti.

    ཨཐ ཁོ ཨིཙྪཱནངྒལཀཱ བྲཱཧྨཎགཧཔཏིཀཱ ཏསྶཱ རཏྟིཡཱ ཨཙྩཡེན པཧུཏཾ ཁཱདནཱིཡཾ བྷོཛནཱིཡཾ ཨཱདཱཡ ཡེན ཨིཙྪཱནངྒལཝནསཎྜོ ཏེནུཔསངྐམིཾསུ; ཨུཔསངྐམིཏྭཱ བཧིདྭཱརཀོཊྛཀེ ཨཊྛཾསུ ཨུཙྩཱསདྡཱ མཧཱསདྡཱ། ཏེན ཁོ པན སམཡེན ཨཱཡསྨཱ ནཱགིཏོ བྷགཝཏོ ཨུཔཊྛཱཀོ ཧོཏི། ཨཐ ཁོ བྷགཝཱ ཨཱཡསྨནྟཾ ནཱགིཏཾ ཨཱམནྟེསི – ‘‘ཀེ པན ཏེ, ནཱགིཏ, ཨུཙྩཱསདྡཱ མཧཱསདྡཱ ཀེཝཊྚཱ མཉྙེ མཙྪཝིལོཔེ’’ཏི? ‘‘ཨེཏེ, བྷནྟེ, ཨིཙྪཱནངྒལཀཱ བྲཱཧྨཎགཧཔཏིཀཱ པཧུཏཾ ཁཱདནཱིཡཾ བྷོཛནཱིཡཾ ཨཱདཱཡ བཧིདྭཱརཀོཊྛཀེ ཋིཏཱ བྷགཝནྟཾཡེཝ ཨུདྡིསྶ བྷིཀྑུསངྒྷཉྩཱ’’ཏི། ‘‘མཱཧཾ, ནཱགིཏ, ཡསེན སམཱགམཾ, མཱ ཙ མཡཱ ཡསོ། ཡོ ཁོ, ནཱགིཏ, ནཡིམསྶ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨསྶ ཨཀིཙྪལཱབྷཱི ཨཀསིརལཱབྷཱི། ཡསྶཱཧཾ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི 1 ཨཀིཙྪལཱབྷཱི ཨཀསིརལཱབྷཱི, སོ ཏཾ མཱིལ༹ྷསུཁཾ མིདྡྷསུཁཾ ལཱབྷསཀྐཱརསིལོཀསུཁཾ སཱདིཡེཡྻཱ’’ཏི།

    Atha kho icchānaṅgalakā brāhmaṇagahapatikā tassā rattiyā accayena pahutaṃ khādanīyaṃ bhojanīyaṃ ādāya yena icchānaṅgalavanasaṇḍo tenupasaṅkamiṃsu; upasaṅkamitvā bahidvārakoṭṭhake aṭṭhaṃsu uccāsaddā mahāsaddā. Tena kho pana samayena āyasmā nāgito bhagavato upaṭṭhāko hoti. Atha kho bhagavā āyasmantaṃ nāgitaṃ āmantesi – ‘‘ke pana te, nāgita, uccāsaddā mahāsaddā kevaṭṭā maññe macchavilope’’ti? ‘‘Ete, bhante, icchānaṅgalakā brāhmaṇagahapatikā pahutaṃ khādanīyaṃ bhojanīyaṃ ādāya bahidvārakoṭṭhake ṭhitā bhagavantaṃyeva uddissa bhikkhusaṅghañcā’’ti. ‘‘Māhaṃ, nāgita, yasena samāgamaṃ, mā ca mayā yaso. Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī. Yassāhaṃ nekkhammasukhassa pavivekasukhassa upasamasukhassa sambodhasukhassa nikāmalābhī 2 akicchalābhī akasiralābhī, so taṃ mīḷhasukhaṃ middhasukhaṃ lābhasakkārasilokasukhaṃ sādiyeyyā’’ti.

    ‘‘ཨདྷིཝཱསེཏུ དཱནི, བྷནྟེ, བྷགཝཱ། ཨདྷིཝཱསེཏུ སུགཏོ། ཨདྷིཝཱསནཀཱལོ དཱནི, བྷནྟེ, བྷགཝཏོ། ཡེན ཡེནེཝ དཱནི, བྷནྟེ, བྷགཝཱ གམིསྶཏི ཏནྣིནྣཱཝ བྷཝིསྶནྟི བྲཱཧྨཎགཧཔཏིཀཱ ནེགམཱ ཙེཝ ཛཱནཔདཱ ཙ། སེཡྻཐཱཔི , བྷནྟེ, ཐུལླཕུསིཏཀེ དེཝེ ཝསྶནྟེ ཡཐཱནིནྣཾ ཨུདཀཱནི པཝཏྟནྟི; ཨེཝམེཝཾ ཁོ, བྷནྟེ, ཡེན ཡེནེཝ དཱནི བྷགཝཱ གམིསྶཏི ཏནྣིནྣཱཝ བྷཝིསྶནྟི བྲཱཧྨཎགཧཔཏིཀཱ ནེགམཱ ཙེཝ ཛཱནཔདཱ ཙ། ཏཾ ཀིསྶ ཧེཏུ? ཏཐཱ ཧི, བྷནྟེ, བྷགཝཏོ སཱིལཔཉྙཱཎ’’ནྟི།

    ‘‘Adhivāsetu dāni, bhante, bhagavā. Adhivāsetu sugato. Adhivāsanakālo dāni, bhante, bhagavato. Yena yeneva dāni, bhante, bhagavā gamissati tanninnāva bhavissanti brāhmaṇagahapatikā negamā ceva jānapadā ca. Seyyathāpi , bhante, thullaphusitake deve vassante yathāninnaṃ udakāni pavattanti; evamevaṃ kho, bhante, yena yeneva dāni bhagavā gamissati tanninnāva bhavissanti brāhmaṇagahapatikā negamā ceva jānapadā ca. Taṃ kissa hetu? Tathā hi, bhante, bhagavato sīlapaññāṇa’’nti.

    ‘‘མཱཧཾ, ནཱགིཏ, ཡསེན སམཱགམཾ, མཱ ཙ མཡཱ ཡསོ། ཡོ ཁོ, ནཱགིཏ, ནཡིམསྶ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨསྶ ཨཀིཙྪལཱབྷཱི ཨཀསིརལཱབྷཱི། ཡསྶཱཧཾ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨཀིཙྪལཱབྷཱི ཨཀསིརལཱབྷཱི, སོ ཏཾ མཱིལ༹ྷསུཁཾ མིདྡྷསུཁཾ ལཱབྷསཀྐཱརསིལོཀསུཁཾ སཱདིཡེཡྻ།

    ‘‘Māhaṃ, nāgita, yasena samāgamaṃ, mā ca mayā yaso. Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī. Yassāhaṃ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī, so taṃ mīḷhasukhaṃ middhasukhaṃ lābhasakkārasilokasukhaṃ sādiyeyya.

    ‘‘དེཝཏཱཔི ཁོ, ནཱགིཏ, ཨེཀཙྩཱ ནཡིམསྶ 3 ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷིནིཡོ ཨསྶུ 4 ཨཀིཙྪལཱབྷིནིཡོ 5 ཨཀསིརལཱབྷིནིཡོ, ཡསྶཱཧཾ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨཀིཙྪལཱབྷཱི ཨཀསིརལཱབྷཱི། ཏུམྷཱཀམྤི 6 ཁོ, ནཱགིཏ, སངྒམྨ སམཱགམྨ སངྒཎིཀཝིཧཱརཾ ཨནུཡུཏྟཱནཾ ཝིཧརཏཾ 7 ཨེཝཾ ཧོཏི – ‘ན ཧི ནཱུནམེ 8 ཨཱཡསྨནྟོ ཨིམསྶ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷིནོ ཨསྶུ 9 ཨཀིཙྪལཱབྷིནོ ཨཀསིརལཱབྷིནོ། ཡསྶཱཧཾ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨཀིཙྪལཱབྷཱི ཨཀསིརལཱབྷཱི། ཏཐཱ ཧི པན མེ ཨཱཡསྨནྟོ སངྒམྨ སམཱགམྨ སངྒཎིཀཝིཧཱརཾ ཨནུཡུཏྟཱ ཝིཧརནྟི’’’།

    ‘‘Devatāpi kho, nāgita, ekaccā nayimassa 10 nekkhammasukhassa pavivekasukhassa upasamasukhassa sambodhasukhassa nikāmalābhiniyo assu 11 akicchalābhiniyo 12 akasiralābhiniyo, yassāhaṃ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī. Tumhākampi 13 kho, nāgita, saṅgamma samāgamma saṅgaṇikavihāraṃ anuyuttānaṃ viharataṃ 14 evaṃ hoti – ‘na hi nūname 15 āyasmanto imassa nekkhammasukhassa pavivekasukhassa upasamasukhassa sambodhasukhassa nikāmalābhino assu 16 akicchalābhino akasiralābhino. Yassāhaṃ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī. Tathā hi pana me āyasmanto saṅgamma samāgamma saṅgaṇikavihāraṃ anuyuttā viharanti’’’.

    ‘‘ཨིདྷཱཧཾ , ནཱགིཏ, བྷིཀྑཱུ པསྶཱམི ཨཉྙམཉྙཾ ཨངྒུལིཔཏོདཀེན 17 སཉྫགྒྷནྟེ སངྐཱིལ༹ནྟེ། ཏསྶ མཡ྄ཧཾ, ནཱགིཏ, ཨེཝཾ ཧོཏི – ‘ན ཧི ནཱུནམེ ཨཱཡསྨནྟོ ཨིམསྶ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷིནོ ཨསྶུ ཨཀིཙྪལཱབྷིནོ ཨཀསིརལཱབྷིནོ། ཡསྶཱཧཾ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨཀིཙྪལཱབྷཱི ཨཀསིརལཱབྷཱི། ཏཐཱ ཧི པན མེ ཨཱཡསྨནྟོ ཨཉྙམཉྙཾ ཨངྒུལིཔཏོདཀེན སཉྫགྒྷནྟི སངྐཱིལ༹ནྟི’’’།

    ‘‘Idhāhaṃ , nāgita, bhikkhū passāmi aññamaññaṃ aṅgulipatodakena 18 sañjagghante saṅkīḷante. Tassa mayhaṃ, nāgita, evaṃ hoti – ‘na hi nūname āyasmanto imassa nekkhammasukhassa pavivekasukhassa upasamasukhassa sambodhasukhassa nikāmalābhino assu akicchalābhino akasiralābhino. Yassāhaṃ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī. Tathā hi pana me āyasmanto aññamaññaṃ aṅgulipatodakena sañjagghanti saṅkīḷanti’’’.

    ‘‘ཨིདྷ པནཱཧཾ 19, ནཱགིཏ, བྷིཀྑཱུ པསྶཱམི ཡཱཝདཏྠཾ ཨུདརཱཝདེཧཀཾ བྷུཉྫིཏྭཱ སེཡྻསུཁཾ པསྶསུཁཾ མིདྡྷསུཁཾ ཨནུཡུཏྟེ ཝིཧརནྟེ། ཏསྶ མཡ྄ཧཾ, ནཱགིཏ, ཨེཝཾ ཧོཏི – ‘ན ཧི ནཱུནམེ ཨཱཡསྨནྟོ ཨིམསྶ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷིནོ ཨསྶུ ཨཀིཙྪལཱབྷིནོ ཨཀསིརལཱབྷིནོ། ཡསྶཱཧཾ ནེཀྑམྨསུཁསྶ པཝིཝེཀསུཁསྶ ཨུཔསམསུཁསྶ སམྦོདྷསུཁསྶ ནིཀཱམལཱབྷཱི ཨཀིཙྪལཱབྷཱི ཨཀསིརལཱབྷཱི། ཏཐཱ ཧི པན མེ ཨཱཡསྨནྟོ ཡཱཝདཏྠཾ ཨུདརཱཝདེཧཀཾ བྷུཉྫིཏྭཱ སེཡྻསུཁཾ པསྶསུཁཾ མིདྡྷསུཁཾ ཨནུཡུཏྟཱ ཝིཧརནྟི’’’།

    ‘‘Idha panāhaṃ 20, nāgita, bhikkhū passāmi yāvadatthaṃ udarāvadehakaṃ bhuñjitvā seyyasukhaṃ passasukhaṃ middhasukhaṃ anuyutte viharante. Tassa mayhaṃ, nāgita, evaṃ hoti – ‘na hi nūname āyasmanto imassa nekkhammasukhassa pavivekasukhassa upasamasukhassa sambodhasukhassa nikāmalābhino assu akicchalābhino akasiralābhino. Yassāhaṃ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī. Tathā hi pana me āyasmanto yāvadatthaṃ udarāvadehakaṃ bhuñjitvā seyyasukhaṃ passasukhaṃ middhasukhaṃ anuyuttā viharanti’’’.

    ‘‘ཨིདྷཱཧཾ 21, ནཱགིཏ, བྷིཀྑུཾ པསྶཱམི གཱམནྟཝིཧཱརིཾ སམཱཧིཏཾ ནིསིནྣཾ། ཏསྶ མཡ྄ཧཾ, ནཱགིཏ, ཨེཝཾ ཧོཏི – ‘ཨིདཱནི ཨིམཾ 22 ཨཱཡསྨནྟཾ ཨཱརཱམིཀོ ཝཱ ཨུཔཊྛཧིསྶཏི 23 སམཎུདྡེསོ ཝཱ ། ཏཾ ཏམྷཱ 24 སམཱདྷིམྷཱ ཙཱཝེསྶཏཱི’ཏི། ཏེནཱཧཾ , ནཱགིཏ, ཏསྶ བྷིཀྑུནོ ན ཨཏྟམནོ ཧོམི གཱམནྟཝིཧཱརེན།

    ‘‘Idhāhaṃ 25, nāgita, bhikkhuṃ passāmi gāmantavihāriṃ samāhitaṃ nisinnaṃ. Tassa mayhaṃ, nāgita, evaṃ hoti – ‘idāni imaṃ 26 āyasmantaṃ ārāmiko vā upaṭṭhahissati 27 samaṇuddeso vā . Taṃ tamhā 28 samādhimhā cāvessatī’ti. Tenāhaṃ , nāgita, tassa bhikkhuno na attamano homi gāmantavihārena.

    ‘‘ཨིདྷ པནཱཧཾ, ནཱགིཏ, བྷིཀྑུཾ པསྶཱམི ཨཱརཉྙིཀཾ ཨརཉྙེ པཙལཱཡམཱནཾ ནིསིནྣཾ། ཏསྶ མཡ྄ཧཾ, ནཱགིཏ, ཨེཝཾ ཧོཏི – ‘ཨིདཱནི ཨཡམཱཡསྨཱ ཨིམཾ ནིདྡཱཀིལམཐཾ པཊིཝིནོདེཏྭཱ ཨརཉྙསཉྙཾཡེཝ མནསི ཀརིསྶཏི ཨེཀཏྟ’ནྟི ། ཏེནཱཧཾ , ནཱགིཏ, ཏསྶ བྷིཀྑུནོ ཨཏྟམནོ ཧོམི ཨརཉྙཝིཧཱརེན།

    ‘‘Idha panāhaṃ, nāgita, bhikkhuṃ passāmi āraññikaṃ araññe pacalāyamānaṃ nisinnaṃ. Tassa mayhaṃ, nāgita, evaṃ hoti – ‘idāni ayamāyasmā imaṃ niddākilamathaṃ paṭivinodetvā araññasaññaṃyeva manasi karissati ekatta’nti . Tenāhaṃ , nāgita, tassa bhikkhuno attamano homi araññavihārena.

    ‘‘ཨིདྷ པནཱཧཾ, ནཱགིཏ, བྷིཀྑུཾ པསྶཱམི ཨཱརཉྙིཀཾ ཨརཉྙེ ཨསམཱཧིཏཾ ནིསིནྣཾ། ཏསྶ མཡ྄ཧཾ, ནཱགིཏ, ཨེཝཾ ཧོཏི – ‘ཨིདཱནི ཨཡམཱཡསྨཱ ཨསམཱཧིཏཾ ཝཱ ཙིཏྟཾ སམཱདཧིསྶཏི 29, སམཱཧིཏཾ ཝཱ ཙིཏྟཾ ཨནུརཀྑིསྶཏཱི’ཏི། ཏེནཱཧཾ, ནཱགིཏ, ཏསྶ བྷིཀྑུནོ ཨཏྟམནོ ཧོམི ཨརཉྙཝིཧཱརེན།

    ‘‘Idha panāhaṃ, nāgita, bhikkhuṃ passāmi āraññikaṃ araññe asamāhitaṃ nisinnaṃ. Tassa mayhaṃ, nāgita, evaṃ hoti – ‘idāni ayamāyasmā asamāhitaṃ vā cittaṃ samādahissati 30, samāhitaṃ vā cittaṃ anurakkhissatī’ti. Tenāhaṃ, nāgita, tassa bhikkhuno attamano homi araññavihārena.

    ‘‘ཨིདྷ པནཱཧཾ, ནཱགིཏ, བྷིཀྑུཾ པསྶཱམི ཨཱརཉྙིཀཾ ཨརཉྙེ སམཱཧིཏཾ ནིསིནྣཾ། ཏསྶ མཡ྄ཧཾ, ནཱགིཏ, ཨེཝཾ ཧོཏི – ‘ཨིདཱནི ཨཡམཱཡསྨཱ ཨཝིམུཏྟཾ ཝཱ ཙིཏྟཾ ཝིམུཙྩིསྶཏི, ཝིམུཏྟཾ ཝཱ ཙིཏྟཾ ཨནུརཀྑིསྶཏཱི’ཏི། ཏེནཱཧཾ, ནཱགིཏ, ཏསྶ བྷིཀྑུནོ ཨཏྟམནོ ཧོམི ཨརཉྙཝིཧཱརེན།

    ‘‘Idha panāhaṃ, nāgita, bhikkhuṃ passāmi āraññikaṃ araññe samāhitaṃ nisinnaṃ. Tassa mayhaṃ, nāgita, evaṃ hoti – ‘idāni ayamāyasmā avimuttaṃ vā cittaṃ vimuccissati, vimuttaṃ vā cittaṃ anurakkhissatī’ti. Tenāhaṃ, nāgita, tassa bhikkhuno attamano homi araññavihārena.

    ‘‘ཨིདྷ པནཱཧཾ, ནཱགིཏ, བྷིཀྑུཾ པསྶཱམི གཱམནྟཝིཧཱརིཾ ལཱབྷིཾ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱནཾ། སོ ཏཾ ལཱབྷསཀྐཱརསིལོཀཾ ནིཀཱམཡམཱནོ རིཉྩཏི པཊིསལླཱནཾ, རིཉྩཏི ཨརཉྙཝནཔཏྠཱནི པནྟཱནི སེནཱསནཱནི; གཱམནིགམརཱཛདྷཱནིཾ ཨོསརིཏྭཱ ཝཱསཾ ཀཔྤེཏི། ཏེནཱཧཾ, ནཱགིཏ, ཏསྶ བྷིཀྑུནོ ན ཨཏྟམནོ ཧོམི གཱམནྟཝིཧཱརེན།

    ‘‘Idha panāhaṃ, nāgita, bhikkhuṃ passāmi gāmantavihāriṃ lābhiṃ cīvarapiṇḍapātasenāsanagilānapaccayabhesajjaparikkhārānaṃ. So taṃ lābhasakkārasilokaṃ nikāmayamāno riñcati paṭisallānaṃ, riñcati araññavanapatthāni pantāni senāsanāni; gāmanigamarājadhāniṃ osaritvā vāsaṃ kappeti. Tenāhaṃ, nāgita, tassa bhikkhuno na attamano homi gāmantavihārena.

    ‘‘ཨིདྷ པནཱཧཾ, ནཱགིཏ, བྷིཀྑུཾ པསྶཱམི ཨཱརཉྙིཀཾ ལཱབྷིཾ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱནཾ། སོ ཏཾ ལཱབྷསཀྐཱརསིལོཀཾ པཊིཔཎཱམེཏྭཱ ན རིཉྩཏི པཊིསལླཱནཾ, ན རིཉྩཏི ཨརཉྙཝནཔཏྠཱནི པནྟཱནི སེནཱསནཱནི། ཏེནཱཧཾ, ནཱགིཏ, ཏསྶ བྷིཀྑུནོ ཨཏྟམནོ ཧོམི ཨརཉྙཝིཧཱརེན། 31

    ‘‘Idha panāhaṃ, nāgita, bhikkhuṃ passāmi āraññikaṃ lābhiṃ cīvarapiṇḍapātasenāsanagilānapaccayabhesajjaparikkhārānaṃ. So taṃ lābhasakkārasilokaṃ paṭipaṇāmetvā na riñcati paṭisallānaṃ, na riñcati araññavanapatthāni pantāni senāsanāni. Tenāhaṃ, nāgita, tassa bhikkhuno attamano homi araññavihārena. 32

    ‘‘ཡསྨཱཧཾ 33, ནཱགིཏ, སམཡེ ཨདྡྷཱནམགྒཔྤཊིཔནྣོ ན ཀཉྩི པསྶཱམི པུརཏོ ཝཱ པཙྪཏོ ཝཱ, ཕཱསུ མེ, ནཱགིཏ, ཏསྨིཾ སམཡེ ཧོཏི ཨནྟམསོ ཨུཙྩཱརཔསྶཱཝཀམྨཱཡཱ’’ཏི། ཚཊྛཾ།

    ‘‘Yasmāhaṃ 34, nāgita, samaye addhānamaggappaṭipanno na kañci passāmi purato vā pacchato vā, phāsu me, nāgita, tasmiṃ samaye hoti antamaso uccārapassāvakammāyā’’ti. Chaṭṭhaṃ.




    Next: ༧. པཏྟནིཀུཛྫནསུཏྟཾ • 7. Pattanikujjanasuttaṃ




    Footnotes:
    1. ནིཀཱམལཱབྷཱི ཨསྶཾ (བཧཱུསུ) ཨ॰ ནི॰ ༥.༣༠ པསྶིཏབྦཾ། ཏཏྠ ཧི ཨཡཾ པཱཋབྷེདཱ ནཏྠི
    2. nikāmalābhī assaṃ (bahūsu) a. ni. 5.30 passitabbaṃ. tattha hi ayaṃ pāṭhabhedā natthi
    3. ཨེཀཙྩཱ ཨིམསྶ (?)
    4. ཨིདཾ པདཾ ཀཏྠཙི ནཏྠི
    5. ནིཀཱམལཱབྷིནིཡོ ཨཀིཙྪལཱབྷིནིཡོ (?)
    6. ཏཱསམྤི (?)
    7. ཨནུཡུཏྟེ ཝིཧརནྟེ དིསྭཱ (?)
    8. ན ཧནཱུནམེ (སཱི॰ སྱཱ॰ པཱི॰)
    9. ཨིདཾ པདཾ ཀཏྠཙི ནཏྠི
    10. ekaccā imassa (?)
    11. idaṃ padaṃ katthaci natthi
    12. nikāmalābhiniyo akicchalābhiniyo (?)
    13. tāsampi (?)
    14. anuyutte viharante disvā (?)
    15. na hanūname (sī. syā. pī.)
    16. idaṃ padaṃ katthaci natthi
    17. ཨངྒུལིཔཏོདཀེཧི (སཱི॰ པཱི॰ ཀ॰)
    18. aṅgulipatodakehi (sī. pī. ka.)
    19. ཨིདྷཱཧཾ (སཱི॰ པཱི॰ ཀ॰)
    20. idhāhaṃ (sī. pī. ka.)
    21. ཨིདྷ པནཱཧཾ (?)
    22. ཨིདཱནིམཾ (ཀཏྠཙི) ཨ॰ ནི॰ ༦.༤༢
    23. པཙྩེསྶཏི (སཱི॰ པཱི॰), ཨུཔཊྛཧཏི (ཀ॰)
    24. སོ ཏམྷཱ (ཀ॰ སཱི॰), སོ ཏཾ ཏམྷཱ (?)
    25. idha panāhaṃ (?)
    26. idānimaṃ (katthaci) a. ni. 6.42
    27. paccessati (sī. pī.), upaṭṭhahati (ka.)
    28. so tamhā (ka. sī.), so taṃ tamhā (?)
    29. སམཱདཧེསྶཏི (ཀཏྠཙི)
    30. samādahessati (katthaci)
    31. [ ] ཨེཏྠནྟརེ པཱཋོ ཨ॰ ནི॰ ༦.༤༢ ཚཀྐནིཔཱཏེཡེཝ དིསྶཏི, ན ཨེཏྠ ཨཊྛཀནིཔཱཏེ
    32. [ ] etthantare pāṭho a. ni. 6.42 chakkanipāteyeva dissati, na ettha aṭṭhakanipāte
    33. ཡསྨིཾཧཾ (ཀཏྠཙི)
    34. yasmiṃhaṃ (katthaci)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཡསསུཏྟཝཎྞནཱ • 6. Yasasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སདྡྷཱསུཏྟཱདིཝཎྞནཱ • 1-10. Saddhāsuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact