| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๔. ขตฺติยาวโคฺค
4. Khattiyāvaggo
๑. ยสวตีปมุขอฎฺฐารสภิกฺขุนีสหสฺสอปทานํ
1. Yasavatīpamukhaaṭṭhārasabhikkhunīsahassaapadānaṃ
๑.
1.
‘‘ภวา สเพฺพ ปริกฺขีณา, ภวา สนฺติ วิโมจิตา;
‘‘Bhavā sabbe parikkhīṇā, bhavā santi vimocitā;
สพฺพาสวา จ โน นตฺถิ, อาโรเจม มหามุเนฯ
Sabbāsavā ca no natthi, ārocema mahāmune.
๒.
2.
‘‘ปุริมํ กุสลํ กมฺมํ 1, ยํ กิญฺจิ สาธุปตฺถิตํ;
‘‘Purimaṃ kusalaṃ kammaṃ 2, yaṃ kiñci sādhupatthitaṃ;
ปริโภคมยํ ทินฺนํ, ตุยฺหตฺถาย มหามุเนฯ
Paribhogamayaṃ dinnaṃ, tuyhatthāya mahāmune.
๓.
3.
ปริโภคมยํ ทินฺนํ, ตุยฺหตฺถาย มหามุเนฯ
Paribhogamayaṃ dinnaṃ, tuyhatthāya mahāmune.
๔.
4.
‘‘อุจฺจนีจมยํ กมฺมํ, ภิกฺขูนํ สาธุปตฺถิตํ;
‘‘Uccanīcamayaṃ kammaṃ, bhikkhūnaṃ sādhupatthitaṃ;
๕.
5.
‘‘เตเนว สุกฺกมูเลน, โจทิตา กมฺมสมฺปทา;
‘‘Teneva sukkamūlena, coditā kammasampadā;
มานุสิกมติกฺกนฺตา, ชายิํสุ ขตฺติเย กุเลฯ
Mānusikamatikkantā, jāyiṃsu khattiye kule.
๖.
6.
‘‘อุปฺปเตฺต จ กเต กเมฺม, ชาติยา วาปิ เอกโต;
‘‘Uppatte ca kate kamme, jātiyā vāpi ekato;
ปจฺฉิเม เอกโต ชาตา, ขตฺติยา กุลสมฺภวาฯ
Pacchime ekato jātā, khattiyā kulasambhavā.
๗.
7.
‘‘รูปวตี โภควตี, ลาภสกฺการปูชิตา;
‘‘Rūpavatī bhogavatī, lābhasakkārapūjitā;
อเนฺตปุเร มหาวีร, เทวานํ วิย นนฺทเนฯ
Antepure mahāvīra, devānaṃ viya nandane.
๘.
8.
‘‘นิพฺพินฺทิตฺวา อคารมฺหา, ปพฺพชิมฺหนคาริยํ;
‘‘Nibbinditvā agāramhā, pabbajimhanagāriyaṃ;
กติปาหํ อุปาทาย, สพฺพา ปตฺตามฺห นิพฺพุติํฯ
Katipāhaṃ upādāya, sabbā pattāmha nibbutiṃ.
๙.
9.
‘‘จีวรํ ปิณฺฑปาตญฺจ, ปจฺจยํ สยนาสนํ;
‘‘Cīvaraṃ piṇḍapātañca, paccayaṃ sayanāsanaṃ;
อุปเนนฺติ พหู อเมฺห, สทา สกฺกตปูชิตาฯ
Upanenti bahū amhe, sadā sakkatapūjitā.
๑๐.
10.
‘‘กิเลสา ฌาปิตา อมฺหํ, ภวา สเพฺพ สมูหตา;
‘‘Kilesā jhāpitā amhaṃ, bhavā sabbe samūhatā;
นาคีว พนฺธนํ เฉตฺวา, วิหราม อนาสวาฯ
Nāgīva bandhanaṃ chetvā, viharāma anāsavā.
๑๑.
11.
‘‘สฺวาคตํ วต โน อาสิ, มม พุทฺธสฺส สนฺติเก;
‘‘Svāgataṃ vata no āsi, mama buddhassa santike;
ติโสฺส วิชฺชา อนุปฺปตฺตา, กตํ พุทฺธสฺส สาสนํฯ
Tisso vijjā anuppattā, kataṃ buddhassa sāsanaṃ.
๑๒.
12.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ ยสวตีปมุขานิ ขตฺติยกญฺญาภิกฺขุนิโย อฎฺฐารสสหสฺสานิ ภควโต สมฺมุขา อิมา คาถาโย อภาสิตฺถาติฯ
Itthaṃ sudaṃ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.
ยสวตีปมุขอฎฺฐารสภิกฺขุนีสหสฺสาปทานํ ปฐมํฯ
Yasavatīpamukhaaṭṭhārasabhikkhunīsahassāpadānaṃ paṭhamaṃ.
Footnotes:
