| Library / Tipiṭaka / තිපිටක • Tipiṭaka / අපදානපාළි • Apadānapāḷi |
4. ඛත්‌තියාවග්‌ගො
4. Khattiyāvaggo
1. යසවතීපමුඛඅට්‌ඨාරසභික්‌ඛුනීසහස්‌සඅපදානං
1. Yasavatīpamukhaaṭṭhārasabhikkhunīsahassaapadānaṃ
1.
1.
‘‘භවා සබ්‌බෙ පරික්‌ඛීණා, භවා සන්‌ති විමොචිතා;
‘‘Bhavā sabbe parikkhīṇā, bhavā santi vimocitā;
සබ්‌බාසවා ච නො නත්‌ථි, ආරොචෙම මහාමුනෙ.
Sabbāsavā ca no natthi, ārocema mahāmune.
2.
2.
‘‘පුරිමං කුසලං කම්‌මං 1, යං කිඤ්‌චි සාධුපත්‌ථිතං;
‘‘Purimaṃ kusalaṃ kammaṃ 2, yaṃ kiñci sādhupatthitaṃ;
පරිභොගමයං දින්‌නං, තුය්‌හත්‌ථාය මහාමුනෙ.
Paribhogamayaṃ dinnaṃ, tuyhatthāya mahāmune.
3.
3.
පරිභොගමයං දින්‌නං, තුය්‌හත්‌ථාය මහාමුනෙ.
Paribhogamayaṃ dinnaṃ, tuyhatthāya mahāmune.
4.
4.
‘‘උච්‌චනීචමයං කම්‌මං, භික්‌ඛූනං සාධුපත්‌ථිතං;
‘‘Uccanīcamayaṃ kammaṃ, bhikkhūnaṃ sādhupatthitaṃ;
5.
5.
‘‘තෙනෙව සුක්‌කමූලෙන, චොදිතා කම්‌මසම්‌පදා;
‘‘Teneva sukkamūlena, coditā kammasampadā;
මානුසිකමතික්‌කන්‌තා, ජායිංසු ඛත්‌තියෙ කුලෙ.
Mānusikamatikkantā, jāyiṃsu khattiye kule.
6.
6.
‘‘උප්‌පත්‌තෙ ච කතෙ කම්‌මෙ, ජාතියා වාපි එකතො;
‘‘Uppatte ca kate kamme, jātiyā vāpi ekato;
පච්‌ඡිමෙ එකතො ජාතා, ඛත්‌තියා කුලසම්‌භවා.
Pacchime ekato jātā, khattiyā kulasambhavā.
7.
7.
‘‘රූපවතී භොගවතී, ලාභසක්‌කාරපූජිතා;
‘‘Rūpavatī bhogavatī, lābhasakkārapūjitā;
අන්‌තෙපුරෙ මහාවීර, දෙවානං විය නන්‌දනෙ.
Antepure mahāvīra, devānaṃ viya nandane.
8.
8.
‘‘නිබ්‌බින්‌දිත්‌වා අගාරම්‌හා, පබ්‌බජිම්‌හනගාරියං;
‘‘Nibbinditvā agāramhā, pabbajimhanagāriyaṃ;
කතිපාහං උපාදාය, සබ්‌බා පත්‌තාම්‌හ නිබ්‌බුතිං.
Katipāhaṃ upādāya, sabbā pattāmha nibbutiṃ.
9.
9.
‘‘චීවරං පිණ්‌ඩපාතඤ්‌ච, පච්‌චයං සයනාසනං;
‘‘Cīvaraṃ piṇḍapātañca, paccayaṃ sayanāsanaṃ;
උපනෙන්‌ති බහූ අම්‌හෙ, සදා සක්‌කතපූජිතා.
Upanenti bahū amhe, sadā sakkatapūjitā.
10.
10.
‘‘කිලෙසා ඣාපිතා අම්‌හං, භවා සබ්‌බෙ සමූහතා;
‘‘Kilesā jhāpitā amhaṃ, bhavā sabbe samūhatā;
නාගීව බන්‌ධනං ඡෙත්‌වා, විහරාම අනාසවා.
Nāgīva bandhanaṃ chetvā, viharāma anāsavā.
11.
11.
‘‘ස්‌වාගතං වත නො ආසි, මම බුද්‌ධස්‌ස සන්‌තිකෙ;
‘‘Svāgataṃ vata no āsi, mama buddhassa santike;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
12.
12.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං යසවතීපමුඛානි ඛත්‌තියකඤ්‌ඤාභික්‌ඛුනියො අට්‌ඨාරසසහස්‌සානි භගවතො සම්‌මුඛා ඉමා ගාථායො අභාසිත්‌ථාති.
Itthaṃ sudaṃ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.
යසවතීපමුඛඅට්‌ඨාරසභික්‌ඛුනීසහස්‌සාපදානං පඨමං.
Yasavatīpamukhaaṭṭhārasabhikkhunīsahassāpadānaṃ paṭhamaṃ.
Footnotes:
