| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. যস্সংদিসংসুত্তং
4. Yassaṃdisaṃsuttaṃ
১৩৪. ‘‘পঞ্চহি, ভিক্খৰে, অঙ্গেহি সমন্নাগতো রাজা খত্তিযো মুদ্ধাৰসিত্তো যস্সং যস্সং দিসাযং ৰিহরতি, সকস্মিংযেৰ ৰিজিতে ৰিহরতি।
134. ‘‘Pañcahi, bhikkhave, aṅgehi samannāgato rājā khattiyo muddhāvasitto yassaṃ yassaṃ disāyaṃ viharati, sakasmiṃyeva vijite viharati.
‘‘কতমেহি পঞ্চহি? ইধ, ভিক্খৰে, রাজা খত্তিযো মুদ্ধাৰসিত্তো উভতো সুজাতো হোতি মাতিতো চ পিতিতো চ, সংসুদ্ধগহণিকো, যাৰ সত্তমা পিতামহযুগা অক্খিত্তো অনুপক্কুট্ঠো জাতিৰাদেন; অড্ঢো হোতি মহদ্ধনো মহাভোগো পরিপুণ্ণকোসকোট্ঠাগারো; বলৰা খো পন হোতি চতুরঙ্গিনিযা সেনায সমন্নাগতো অস্সৰায ওৰাদপটিকরায; পরিণাযকো খো পনস্স হোতি পণ্ডিতো ৰিযত্তো মেধাৰী পটিবলো অতীতানাগতপচ্চুপ্পন্নে অত্থে চিন্তেতুং; তস্সিমে চত্তারো ধম্মা যসং পরিপাচেন্তি। সো ইমিনা যসপঞ্চমেন 1 ধম্মেন সমন্নাগতো যস্সং যস্সং দিসাযং ৰিহরতি, সকস্মিংযেৰ ৰিজিতে ৰিহরতি। তং কিস্স হেতু? এৰঞ্হেতং, ভিক্খৰে, হোতি ৰিজিতাৰীনং।
‘‘Katamehi pañcahi? Idha, bhikkhave, rājā khattiyo muddhāvasitto ubhato sujāto hoti mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena; aḍḍho hoti mahaddhano mahābhogo paripuṇṇakosakoṭṭhāgāro; balavā kho pana hoti caturaṅginiyā senāya samannāgato assavāya ovādapaṭikarāya; pariṇāyako kho panassa hoti paṇḍito viyatto medhāvī paṭibalo atītānāgatapaccuppanne atthe cintetuṃ; tassime cattāro dhammā yasaṃ paripācenti. So iminā yasapañcamena 2 dhammena samannāgato yassaṃ yassaṃ disāyaṃ viharati, sakasmiṃyeva vijite viharati. Taṃ kissa hetu? Evañhetaṃ, bhikkhave, hoti vijitāvīnaṃ.
‘‘এৰমেৰং খো, ভিক্খৰে, পঞ্চহি ধম্মেহি সমন্নাগতো ভিক্খু যস্সং যস্সং দিসাযং ৰিহরতি, ৰিমুত্তচিত্তোৰ 3 ৰিহরতি। কতমেহি পঞ্চহি? ইধ, ভিক্খৰে, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু – রাজাৰ খত্তিযো মুদ্ধাৰসিত্তো জাতিসম্পন্নো; বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা – রাজাৰ খত্তিযো মুদ্ধাৰসিত্তো অড্ঢো মহদ্ধনো মহাভোগো পরিপুণ্ণকোসকোট্ঠাগারো; আরদ্ধৰীরিযো ৰিহরতি অকুসলানং ধম্মানং পহানায কুসলানং ধম্মানং উপসম্পদায থামৰা দল়্হপরক্কমো অনিক্খিত্তধুরো কুসলেসু ধম্মেসু – রাজাৰ খত্তিযো মুদ্ধাৰসিত্তো বলসম্পন্নো; পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা – রাজাৰ খত্তিযো মুদ্ধাৰসিত্তো পরিণাযকসম্পন্নো; তস্সিমে চত্তারো ধম্মা ৰিমুত্তিং পরিপাচেন্তি । সো ইমিনা ৰিমুত্তিপঞ্চমেন ধম্মেন সমন্নাগতো যস্সং যস্সং দিসাযং ৰিহরতি ৰিমুত্তচিত্তোৰ ৰিহরতি। তং কিস্স হেতু? এৰঞ্হেতং, ভিক্খৰে, হোতি ৰিমুত্তচিত্তান’’ন্তি। চতুত্থং।
‘‘Evamevaṃ kho, bhikkhave, pañcahi dhammehi samannāgato bhikkhu yassaṃ yassaṃ disāyaṃ viharati, vimuttacittova 4 viharati. Katamehi pañcahi? Idha, bhikkhave, bhikkhu sīlavā hoti, pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu – rājāva khattiyo muddhāvasitto jātisampanno; bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā – rājāva khattiyo muddhāvasitto aḍḍho mahaddhano mahābhogo paripuṇṇakosakoṭṭhāgāro; āraddhavīriyo viharati akusalānaṃ dhammānaṃ pahānāya kusalānaṃ dhammānaṃ upasampadāya thāmavā daḷhaparakkamo anikkhittadhuro kusalesu dhammesu – rājāva khattiyo muddhāvasitto balasampanno; paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā – rājāva khattiyo muddhāvasitto pariṇāyakasampanno; tassime cattāro dhammā vimuttiṃ paripācenti . So iminā vimuttipañcamena dhammena samannāgato yassaṃ yassaṃ disāyaṃ viharati vimuttacittova viharati. Taṃ kissa hetu? Evañhetaṃ, bhikkhave, hoti vimuttacittāna’’nti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. যস্সংদিসংসুত্তৰণ্ণনা • 4. Yassaṃdisaṃsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৪. যস্সংদিসংসুত্তৰণ্ণনা • 4. Yassaṃdisaṃsuttavaṇṇanā
