| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. யஸ்ஸங்தி³ஸங்ஸுத்தவண்ணனா
4. Yassaṃdisaṃsuttavaṇṇanā
134. சதுத்தே² உப⁴தோதி த்³வீஹிபி பக்கே²ஹி. மாதிதோ ச பிதிதோ சாதி யஸ்ஸ ஹி மாதா க²த்தியா, மாதுமாதா க²த்தியா, தஸ்ஸாபி மாதா க²த்தியா. பிதா க²த்தியோ, பிதுபிதா க²த்தியோ, தஸ்ஸபி பிதா க²த்தியோ. ஸோ உப⁴தோ ஸுஜாதோ மாதிதோ ச பிதிதோ ச. ஸங்ஸுத்³த⁴க³ஹணிகோதி ஸங்ஸுத்³தா⁴ய மாதுகுச்சி²யா ஸமன்னாக³தோ. ‘‘ஸமவேபாகினியா க³ஹணியா’’தி எத்த² பன கம்மஜதேஜோதா⁴து க³ஹணீதி வுச்சதி. யாவ ஸத்தமா பிதாமஹயுகா³தி எத்த² பிதுபிதா பிதாமஹோ, பிதாமஹஸ்ஸ யுக³ங் பிதாமஹயுக³ங். யுக³ந்தி ஆயுப்பமாணங் வுச்சதி. அபி⁴லாபமத்தமேவ சேதங், அத்த²தோ பன பிதாமஹோயேவ பிதாமஹயுக³ங். ததோ உத்³த⁴ங் ஸப்³பே³பி புப்³ப³புரிஸா பிதாமஹக்³க³ஹணேனேவ க³ஹிதா. ஏவங் யாவ ஸத்தமோ புரிஸோ, தாவ ஸங்ஸுத்³த⁴க³ஹணிகோ, அத² வா அக்கி²த்தோ அனுபக்குட்டோ² ஜாதிவாதே³னாதி த³ஸ்ஸேதி. அக்கி²த்தோதி ‘‘அபனேத² ஏதங், கிங் இமினா’’தி ஏவங் அக்கி²த்தோ அனவக்கி²த்தோ. அனுபக்குட்டோ²தி ந உபக்குட்டோ² ந அக்கோஸங் வா நிந்த³ங் வா பத்தபுப்³போ³. கேன காரணேனாதி? ஜாதிவாதே³ன, ‘‘இதிபி ஹீனஜாதிகோ ஏஸோ’’தி ஏவரூபேன வசனேனாதி அத்தோ².
134. Catutthe ubhatoti dvīhipi pakkhehi. Mātito ca pitito cāti yassa hi mātā khattiyā, mātumātā khattiyā, tassāpi mātā khattiyā. Pitā khattiyo, pitupitā khattiyo, tassapi pitā khattiyo. So ubhato sujāto mātito ca pitito ca. Saṃsuddhagahaṇikoti saṃsuddhāya mātukucchiyā samannāgato. ‘‘Samavepākiniyā gahaṇiyā’’ti ettha pana kammajatejodhātu gahaṇīti vuccati. Yāva sattamā pitāmahayugāti ettha pitupitā pitāmaho, pitāmahassa yugaṃ pitāmahayugaṃ. Yuganti āyuppamāṇaṃ vuccati. Abhilāpamattameva cetaṃ, atthato pana pitāmahoyeva pitāmahayugaṃ. Tato uddhaṃ sabbepi pubbapurisā pitāmahaggahaṇeneva gahitā. Evaṃ yāva sattamo puriso, tāva saṃsuddhagahaṇiko, atha vā akkhitto anupakkuṭṭho jātivādenāti dasseti. Akkhittoti ‘‘apanetha etaṃ, kiṃ iminā’’ti evaṃ akkhitto anavakkhitto. Anupakkuṭṭhoti na upakkuṭṭho na akkosaṃ vā nindaṃ vā pattapubbo. Kena kāraṇenāti? Jātivādena, ‘‘itipi hīnajātiko eso’’ti evarūpena vacanenāti attho.
அட்³டோ⁴திஆதீ³ஸு யோ கோசி அத்தனோ ஸந்தகேன விப⁴வேன அட்³டோ⁴ ஹோதி. இத⁴ பன ந கேவலங் அட்³டோ⁴யேவ, மஹத்³த⁴னோ மஹதா அபரிமாணஸங்கே²ன த⁴னேன ஸமன்னாக³தோதி அத்தோ². பஞ்சகாமகு³ணவஸேன மஹந்தா உளாரா போ⁴கா³ அஸ்ஸாதி மஹாபோ⁴கோ³. பரிபுண்ணகோஸகொட்டா²கா³ரோதி கோஸோ வுச்சதி ப⁴ண்டா³கா³ரங், நித³ஹித்வா ட²பிதேன த⁴னேன பரிபுண்ணகோஸோ, த⁴ஞ்ஞேன ச பரிபுண்ணகொட்டா²கா³ரோதி அத்தோ². அத² வா சதுப்³பி³தோ⁴ கோஸோ ஹத்தீ² அஸ்ஸா ரதா² ரட்ட²ந்தி, திவித⁴ங் கொட்டா²கா³ரங் த⁴னகொட்டா²கா³ரங் த⁴ஞ்ஞகொட்டா²கா³ரங் வத்த²கொட்டா²கா³ரந்தி. தங் ஸப்³ப³ம்பி பரிபுண்ணமஸ்ஸாதி பரிபுண்ணகோஸகொட்டா²கா³ரோ. அஸ்ஸவாயாதி கஸ்ஸசி ப³ஹும்பி த⁴னங் தெ³ந்தஸ்ஸ ஸேனா ந ஸுணாதி, ஸா அனஸ்ஸவா நாம ஹோதி. கஸ்ஸசி அதெ³ந்தஸ்ஸாபி ஸுணாதியேவ, அயங் அஸ்ஸவா நாம. ஓவாத³படிகராயாதி ‘‘இத³ங் வோ கத்தப்³ப³, இத³ங் ந கத்தப்³ப³’’ந்தி தி³ன்னஓவாத³கராய. பண்டி³தோதி பண்டி³ச்சேன ஸமன்னாக³தோ. ப்³யத்தோதி பஞ்ஞாவெய்யத்தியேன யுத்தோ. மேதா⁴வீதி டா²னுப்பத்திகபஞ்ஞாய ஸமன்னாக³தோ. படிப³லோதி ஸமத்தோ². அத்தே² சிந்தேதுந்தி வட்³டி⁴அத்தே² சிந்தேதுங். ஸோ ஹி பச்சுப்பன்னஅத்த²வஸேனேவ ‘‘அதீதேபி ஏவங் அஹேஸுங், அனாக³தேபி ஏவங் ப⁴விஸ்ஸந்தீ’’தி சிந்தேதி. விஜிதாவீனந்தி விஜிதவிஜயானங், மஹந்தேன வா விஜயேன ஸமன்னாக³தானங். விமுத்தசித்தானந்தி பஞ்சஹி விமுத்தீஹி விமுத்தமானஸானங்.
Aḍḍhotiādīsu yo koci attano santakena vibhavena aḍḍho hoti. Idha pana na kevalaṃ aḍḍhoyeva, mahaddhano mahatā aparimāṇasaṅkhena dhanena samannāgatoti attho. Pañcakāmaguṇavasena mahantā uḷārā bhogā assāti mahābhogo. Paripuṇṇakosakoṭṭhāgāroti koso vuccati bhaṇḍāgāraṃ, nidahitvā ṭhapitena dhanena paripuṇṇakoso, dhaññena ca paripuṇṇakoṭṭhāgāroti attho. Atha vā catubbidho koso hatthī assā rathā raṭṭhanti, tividhaṃ koṭṭhāgāraṃ dhanakoṭṭhāgāraṃ dhaññakoṭṭhāgāraṃ vatthakoṭṭhāgāranti. Taṃ sabbampi paripuṇṇamassāti paripuṇṇakosakoṭṭhāgāro. Assavāyāti kassaci bahumpi dhanaṃ dentassa senā na suṇāti, sā anassavā nāma hoti. Kassaci adentassāpi suṇātiyeva, ayaṃ assavā nāma. Ovādapaṭikarāyāti ‘‘idaṃ vo kattabba, idaṃ na kattabba’’nti dinnaovādakarāya. Paṇḍitoti paṇḍiccena samannāgato. Byattoti paññāveyyattiyena yutto. Medhāvīti ṭhānuppattikapaññāya samannāgato. Paṭibaloti samattho. Atthe cintetunti vaḍḍhiatthe cintetuṃ. So hi paccuppannaatthavaseneva ‘‘atītepi evaṃ ahesuṃ, anāgatepi evaṃ bhavissantī’’ti cinteti. Vijitāvīnanti vijitavijayānaṃ, mahantena vā vijayena samannāgatānaṃ. Vimuttacittānanti pañcahi vimuttīhi vimuttamānasānaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. யஸ்ஸங்தி³ஸங்ஸுத்தங் • 4. Yassaṃdisaṃsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. யஸ்ஸங்தி³ஸங்ஸுத்தவண்ணனா • 4. Yassaṃdisaṃsuttavaṇṇanā
