| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. யஸ்ஸங்தி³ஸங்ஸுத்தவண்ணனா
4. Yassaṃdisaṃsuttavaṇṇanā
134. சதுத்தே² ‘‘உப⁴தோ ஸுஜாதோ’’தி எத்தகே வுத்தே யேஹி கேஹிசி த்³வீஹி பா⁴கே³ஹி ஸுஜாததா பஞ்ஞாபெய்ய, ஸுஜாத-ஸத்³தோ³ ச ‘‘ஸுஜாதோ சாருத³ஸ்ஸனோ’’திஆதீ³ஸு (ம॰ நி॰ 2.399; ஸு॰ நி॰ 553; தே²ரகா³॰ 818) ஆரோஹஸம்பத்திபரியாயோதி ஜாதிவஸேன ஸுஜாததங் விபா⁴வேதுங் ‘‘மாதிதோ ச பிதிதோ சா’’தி வுத்தங். அனோரஸபுத்தவஸேனபி லோகே மாதுபிதுஸமஞ்ஞா தி³ஸ்ஸதி, இத⁴ பன ஸா ஓரஸபுத்தவஸேன இச்சி²தாதி த³ஸ்ஸேதுங் ‘‘ஸங்ஸுத்³த⁴க்³க³ஹணிகோ’’தி வுத்தங். க³ப்³ப⁴ங் க³ண்ஹாதி தா⁴ரேதீதி க³ஹணீ, க³ப்³பா⁴ஸயஸஞ்ஞிதோ மாதுகுச்சி²ப்பதே³ஸோ. தேனாஹ ‘‘ஸங்ஸுத்³தா⁴ய மாதுகுச்சி²யா ஸமன்னாக³தோ’’தி. யதா²பு⁴த்தஸ்ஸ ஆஹாரஸ்ஸ விபாசனவஸேன க³ண்ஹனதோ அச²ட்³ட³னதோ க³ஹணீ, தேஜோதா⁴து. பிதா ச மாதா ச பிதரோ. பிதூனங் பிதரோ பிதாமஹா. தேஸங் யுகோ³ பிதாமஹயுகோ³, தஸ்மா யாவ ஸத்தமா பிதாமஹயுகா³, பிதாமஹத்³வந்தா³தி ஏவமெத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேனேவ மாதாமஹோபி க³ஹிதோதி ஸோ அட்ட²கதா²யங் விஸுங் ந உத்³த⁴தோ. யுக³-ஸத்³தோ³ செத்த² ஏகஸேஸனயேன த³ட்ட²ப்³போ³ ‘‘யுகோ³ ச யுகோ³ ச யுகோ³’’தி. ஏவஞ்ஹி தத்த² தத்த² த்³வின்னங் க³ஹிதமேவ ஹோதி. தேனாஹ ‘‘ததோ உத்³த⁴ங் ஸப்³பே³பி புப்³ப³புரிஸா பிதாமஹக்³க³ஹணேனேவ க³ஹிதா’’தி. புரிஸக்³க³ஹணஞ்செத்த² உக்கட்ட²னித்³தே³ஸவஸேன கதந்தி த³ட்ட²ப்³ப³ங். ஏவஞ்ஹி ‘‘மாதிதோ’’தி பாளிவசனங் ஸமத்தி²தங் ஹோதி.
134. Catutthe ‘‘ubhato sujāto’’ti ettake vutte yehi kehici dvīhi bhāgehi sujātatā paññāpeyya, sujāta-saddo ca ‘‘sujāto cārudassano’’tiādīsu (ma. ni. 2.399; su. ni. 553; theragā. 818) ārohasampattipariyāyoti jātivasena sujātataṃ vibhāvetuṃ ‘‘mātito ca pitito cā’’ti vuttaṃ. Anorasaputtavasenapi loke mātupitusamaññā dissati, idha pana sā orasaputtavasena icchitāti dassetuṃ ‘‘saṃsuddhaggahaṇiko’’ti vuttaṃ. Gabbhaṃ gaṇhāti dhāretīti gahaṇī, gabbhāsayasaññito mātukucchippadeso. Tenāha ‘‘saṃsuddhāya mātukucchiyā samannāgato’’ti. Yathābhuttassa āhārassa vipācanavasena gaṇhanato achaḍḍanato gahaṇī, tejodhātu. Pitā ca mātā ca pitaro. Pitūnaṃ pitaro pitāmahā. Tesaṃ yugo pitāmahayugo, tasmā yāva sattamā pitāmahayugā, pitāmahadvandāti evamettha attho daṭṭhabbo. Evañhi pitāmahaggahaṇeneva mātāmahopi gahitoti so aṭṭhakathāyaṃ visuṃ na uddhato. Yuga-saddo cettha ekasesanayena daṭṭhabbo ‘‘yugo ca yugo ca yugo’’ti. Evañhi tattha tattha dvinnaṃ gahitameva hoti. Tenāha ‘‘tato uddhaṃ sabbepi pubbapurisā pitāmahaggahaṇeneva gahitā’’ti. Purisaggahaṇañcettha ukkaṭṭhaniddesavasena katanti daṭṭhabbaṃ. Evañhi ‘‘mātito’’ti pāḷivacanaṃ samatthitaṃ hoti.
அக்கி²த்தோதி அப்பத்தக்கே²போ. அனவக்கி²த்தோதி ஸம்பத்தவிவாதா³தீ³ஸு ந அவக்கி²த்தோ ந ச²ட்³டி³தோ. ஜாதிவாதே³னாதி ஹேதும்ஹி கரணவசனந்தி த³ஸ்ஸேதுங் ‘‘கேன காரணேனா’’திஆதி³ வுத்தங். எத்த² ச ‘‘உப⁴தோ…பே॰… பிதாமஹயுகா³’’தி ஏதேன க²த்தியஸ்ஸ யோனிதோ³ஸாபா⁴வோ த³ஸ்ஸிதோ ஸங்ஸுத்³த⁴க்³க³ஹணிகபா⁴வகித்தனதோ. ‘‘அக்கி²த்தோ’’தி இமினா கிரியாபராதா⁴பா⁴வோ. கிரியாபராதே⁴ன ஹி ஸத்தா கே²பங் பாபுணந்தி. ‘‘அனுபக்குட்டோ²’’தி இமினா அயுத்தஸங்ஸக்³கா³பா⁴வோ. அயுத்தஸங்ஸக்³க³ஞ்ஹி படிச்ச ஸத்தா அக்கோஸங் லப⁴ந்தி.
Akkhittoti appattakkhepo. Anavakkhittoti sampattavivādādīsu na avakkhitto na chaḍḍito. Jātivādenāti hetumhi karaṇavacananti dassetuṃ ‘‘kena kāraṇenā’’tiādi vuttaṃ. Ettha ca ‘‘ubhato…pe… pitāmahayugā’’ti etena khattiyassa yonidosābhāvo dassito saṃsuddhaggahaṇikabhāvakittanato. ‘‘Akkhitto’’ti iminā kiriyāparādhābhāvo. Kiriyāparādhena hi sattā khepaṃ pāpuṇanti. ‘‘Anupakkuṭṭho’’ti iminā ayuttasaṃsaggābhāvo. Ayuttasaṃsaggañhi paṭicca sattā akkosaṃ labhanti.
அட்³ட⁴தா நாம விப⁴வஸம்பன்னதா, ஸா தங் தங் உபாதா³யுபாதா³ய வுச்சதீதி ஆஹ ‘‘யோ கோசி அத்தனோ ஸந்தகேன விப⁴வேன அட்³டோ⁴ ஹோதீ’’தி. ததா² மஹத்³த⁴னதாபீதி தங் உக்கங்ஸக³தங் த³ஸ்ஸேதுங் ‘‘மஹதா அபரிமாணஸங்கே²ன த⁴னேன ஸமன்னாக³தோ’’தி வுத்தங். பு⁴ஞ்ஜிதப்³ப³தோ பரிபு⁴ஞ்ஜிதப்³ப³தோ விஸேஸதோ காமா போ⁴கா³ நாமாதி ஆஹ ‘‘பஞ்சகாமகு³ணவஸேனா’’தி. கொட்ட²ங் வுச்சதி த⁴ஞ்ஞஸ்ஸ ஆவஸனட்டா²னங், கொட்ட²பூ⁴தங் அகா³ரங் கொட்டா²கா³ரங். தேனாஹ ‘‘த⁴ஞ்ஞேன ச பரிபுண்ணகொட்டா²கா³ரோ’’தி. ஏவங் ஸாரக³ப்³ப⁴ங் கோஸோ, த⁴ஞ்ஞபரிட்ட²பனட்டா²னஞ்ச கொட்டா²கா³ரந்தி த³ஸ்ஸெத்வா இதா³னி ததோ அஞ்ஞதா² தங் த³ஸ்ஸேதுங் ‘‘அத² வா’’திஆதி³ வுத்தங். தத்த² யதா² அஸினோ திக்க²பா⁴வபரிஹாரகோ படிச்ச²தோ³ ‘‘கோஸோ’’தி வுச்சதி. ஏவங் ரஞ்ஞோ திக்க²பா⁴வபரிஹாரங் கத்வா சதுரங்கி³னீ ஸேனா கோஸோதி ஆஹ ‘‘சதுப்³பி³தோ⁴ கோஸோ ஹத்தீ² அஸ்ஸா ரதா² பத்தீ’’தி. வத்த²கொட்டா²கா³ரக்³க³ஹணேனேவ ஸப்³ப³ஸ்ஸபி ப⁴ண்ட³ட்ட²பனட்டா²னஸ்ஸ க³ஹிதத்தா ‘‘திவித⁴ங் கொட்டா²கா³ர’’ந்தி வுத்தங்.
Aḍḍhatā nāma vibhavasampannatā, sā taṃ taṃ upādāyupādāya vuccatīti āha ‘‘yo koci attano santakena vibhavena aḍḍho hotī’’ti. Tathā mahaddhanatāpīti taṃ ukkaṃsagataṃ dassetuṃ ‘‘mahatā aparimāṇasaṅkhena dhanena samannāgato’’ti vuttaṃ. Bhuñjitabbato paribhuñjitabbato visesato kāmā bhogā nāmāti āha ‘‘pañcakāmaguṇavasenā’’ti. Koṭṭhaṃ vuccati dhaññassa āvasanaṭṭhānaṃ, koṭṭhabhūtaṃ agāraṃ koṭṭhāgāraṃ. Tenāha ‘‘dhaññena ca paripuṇṇakoṭṭhāgāro’’ti. Evaṃ sāragabbhaṃ koso, dhaññapariṭṭhapanaṭṭhānañca koṭṭhāgāranti dassetvā idāni tato aññathā taṃ dassetuṃ ‘‘atha vā’’tiādi vuttaṃ. Tattha yathā asino tikkhabhāvaparihārako paṭicchado ‘‘koso’’ti vuccati. Evaṃ rañño tikkhabhāvaparihāraṃ katvā caturaṅginī senā kosoti āha ‘‘catubbidho koso hatthī assā rathā pattī’’ti. Vatthakoṭṭhāgāraggahaṇeneva sabbassapi bhaṇḍaṭṭhapanaṭṭhānassa gahitattā ‘‘tividhaṃ koṭṭhāgāra’’nti vuttaṃ.
யஸ்ஸா பஞ்ஞாய வஸேன புரிஸோ ‘‘பண்டி³தோ’’தி வுச்சதி, தங் பண்டி³ச்சந்தி ஆஹ ‘‘பண்டி³ச்சேன ஸமன்னாக³தோ’’தி. தங்தங்இதிகத்தப்³ப³தாஸு சே²கபா⁴வோ ப்³யத்தபா⁴வோ வெய்யத்தியங். ஸம்மோஹங் ஹிங்ஸதி வித⁴மதீதி மேதா⁴, ஸா ஏதஸ்ஸ அத்தீ²தி மேதா⁴வீ. டா²னே டா²னே உப்பத்தி ஏதிஸ்ஸா அத்தீ²தி டா²னுப்பத்தி, டா²னஸோ உப்பஜ்ஜனபஞ்ஞா. வட்³டி⁴அத்தே²தி வட்³டி⁴ஸங்கா²தே அத்தே².
Yassā paññāya vasena puriso ‘‘paṇḍito’’ti vuccati, taṃ paṇḍiccanti āha ‘‘paṇḍiccena samannāgato’’ti. Taṃtaṃitikattabbatāsu chekabhāvo byattabhāvo veyyattiyaṃ. Sammohaṃ hiṃsati vidhamatīti medhā, sā etassa atthīti medhāvī. Ṭhāne ṭhāne uppatti etissā atthīti ṭhānuppatti, ṭhānaso uppajjanapaññā. Vaḍḍhiattheti vaḍḍhisaṅkhāte atthe.
யஸ்ஸங்தி³ஸங்ஸுத்தவண்ணனா நிட்டி²தா.
Yassaṃdisaṃsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. யஸ்ஸங்தி³ஸங்ஸுத்தங் • 4. Yassaṃdisaṃsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. யஸ்ஸங்தி³ஸங்ஸுத்தவண்ணனா • 4. Yassaṃdisaṃsuttavaṇṇanā
