| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
4. яассам̣д̣̇исам̣суд̇д̇аван̣н̣анаа
4. Yassaṃdisaṃsuttavaṇṇanā
134. жад̇уд̇т̇з ‘‘убхад̇о суж̇аад̇о’’д̇и зд̇д̇агз вуд̇д̇з язхи гзхижи д̣̇вийхи бхааг̇зхи суж̇аад̇ад̇аа бан̃н̃аабзяяа, суж̇аад̇а-сад̣̇д̣̇о жа ‘‘суж̇аад̇о жааруд̣̇ассано’’д̇иаад̣̇ийсу (ма. ни. 2.399; су. ни. 553; т̇зраг̇аа. 818) аарохасамбад̇д̇ибарияааяод̇и ж̇аад̇ивасзна суж̇аад̇ад̇ам̣ вибхаавзд̇ум̣ ‘‘маад̇ид̇о жа бид̇ид̇о жаа’’д̇и вуд̇д̇ам̣. анорасабуд̇д̇авасзнаби логз маад̇убид̇усаман̃н̃аа д̣̇иссад̇и, ид̇ха бана саа орасабуд̇д̇авасзна ижчид̇аад̇и д̣̇ассзд̇ум̣ ‘‘сам̣суд̣̇д̇хаг̇г̇ахан̣иго’’д̇и вуд̇д̇ам̣. г̇аб̣бхам̣ г̇ан̣хаад̇и д̇хаарзд̇ийд̇и г̇ахан̣ий, г̇аб̣бхаасаяасан̃н̃ид̇о маад̇угужчиббад̣̇зсо. д̇знааха ‘‘сам̣суд̣̇д̇хааяа маад̇угужчияаа саманнааг̇ад̇о’’д̇и. яат̇аабхуд̇д̇асса аахаарасса вибаажанавасзна г̇ан̣ханад̇о ачад̣д̣анад̇о г̇ахан̣ий, д̇зж̇од̇хаад̇у. бид̇аа жа маад̇аа жа бид̇аро. бид̇уунам̣ бид̇аро бид̇аамахаа. д̇зсам̣ яуг̇о бид̇аамахаяуг̇о, д̇асмаа яаава сад̇д̇амаа бид̇аамахаяуг̇аа, бид̇аамахад̣̇ванд̣̇аад̇и звамзд̇т̇а ад̇т̇о д̣̇адтаб̣б̣о. зван̃хи бид̇аамахаг̇г̇ахан̣знзва маад̇аамахоби г̇ахид̇од̇и со адтагат̇ааяам̣ висум̣ на уд̣̇д̇хад̇о. яуг̇а-сад̣̇д̣̇о жзд̇т̇а згасзсанаязна д̣̇адтаб̣б̣о ‘‘яуг̇о жа яуг̇о жа яуг̇о’’д̇и. зван̃хи д̇ад̇т̇а д̇ад̇т̇а д̣̇виннам̣ г̇ахид̇амзва ход̇и. д̇знааха ‘‘д̇ад̇о уд̣̇д̇хам̣ саб̣б̣зби буб̣б̣абурисаа бид̇аамахаг̇г̇ахан̣знзва г̇ахид̇аа’’д̇и. бурисаг̇г̇ахан̣ан̃жзд̇т̇а уггадтанид̣̇д̣̇зсавасзна гад̇анд̇и д̣̇адтаб̣б̣ам̣. зван̃хи ‘‘маад̇ид̇о’’д̇и баал̣иважанам̣ самад̇т̇ид̇ам̣ ход̇и.
134. Catutthe ‘‘ubhato sujāto’’ti ettake vutte yehi kehici dvīhi bhāgehi sujātatā paññāpeyya, sujāta-saddo ca ‘‘sujāto cārudassano’’tiādīsu (ma. ni. 2.399; su. ni. 553; theragā. 818) ārohasampattipariyāyoti jātivasena sujātataṃ vibhāvetuṃ ‘‘mātito ca pitito cā’’ti vuttaṃ. Anorasaputtavasenapi loke mātupitusamaññā dissati, idha pana sā orasaputtavasena icchitāti dassetuṃ ‘‘saṃsuddhaggahaṇiko’’ti vuttaṃ. Gabbhaṃ gaṇhāti dhāretīti gahaṇī, gabbhāsayasaññito mātukucchippadeso. Tenāha ‘‘saṃsuddhāya mātukucchiyā samannāgato’’ti. Yathābhuttassa āhārassa vipācanavasena gaṇhanato achaḍḍanato gahaṇī, tejodhātu. Pitā ca mātā ca pitaro. Pitūnaṃ pitaro pitāmahā. Tesaṃ yugo pitāmahayugo, tasmā yāva sattamā pitāmahayugā, pitāmahadvandāti evamettha attho daṭṭhabbo. Evañhi pitāmahaggahaṇeneva mātāmahopi gahitoti so aṭṭhakathāyaṃ visuṃ na uddhato. Yuga-saddo cettha ekasesanayena daṭṭhabbo ‘‘yugo ca yugo ca yugo’’ti. Evañhi tattha tattha dvinnaṃ gahitameva hoti. Tenāha ‘‘tato uddhaṃ sabbepi pubbapurisā pitāmahaggahaṇeneva gahitā’’ti. Purisaggahaṇañcettha ukkaṭṭhaniddesavasena katanti daṭṭhabbaṃ. Evañhi ‘‘mātito’’ti pāḷivacanaṃ samatthitaṃ hoti.
агкид̇д̇од̇и аббад̇д̇агкзбо. анавагкид̇д̇од̇и самбад̇д̇авиваад̣̇аад̣̇ийсу на авагкид̇д̇о на чад̣д̣ид̇о. ж̇аад̇иваад̣̇знаад̇и хзд̇умхи гаран̣аважананд̇и д̣̇ассзд̇ум̣ ‘‘гзна гааран̣знаа’’д̇иаад̣̇и вуд̇д̇ам̣. зд̇т̇а жа ‘‘убхад̇о…бз… бид̇аамахаяуг̇аа’’д̇и зд̇зна кад̇д̇ияасса яонид̣̇осаабхааво д̣̇ассид̇о сам̣суд̣̇д̇хаг̇г̇ахан̣игабхаавагид̇д̇анад̇о. ‘‘агкид̇д̇о’’д̇и иминаа гирияаабараад̇хаабхааво. гирияаабараад̇хзна хи сад̇д̇аа кзбам̣ баабун̣анд̇и. ‘‘анубаггудто’’д̇и иминаа аяуд̇д̇асам̣саг̇г̇аабхааво. аяуд̇д̇асам̣саг̇г̇ан̃хи бадижжа сад̇д̇аа аггосам̣ лабханд̇и.
Akkhittoti appattakkhepo. Anavakkhittoti sampattavivādādīsu na avakkhitto na chaḍḍito. Jātivādenāti hetumhi karaṇavacananti dassetuṃ ‘‘kena kāraṇenā’’tiādi vuttaṃ. Ettha ca ‘‘ubhato…pe… pitāmahayugā’’ti etena khattiyassa yonidosābhāvo dassito saṃsuddhaggahaṇikabhāvakittanato. ‘‘Akkhitto’’ti iminā kiriyāparādhābhāvo. Kiriyāparādhena hi sattā khepaṃ pāpuṇanti. ‘‘Anupakkuṭṭho’’ti iminā ayuttasaṃsaggābhāvo. Ayuttasaṃsaggañhi paṭicca sattā akkosaṃ labhanti.
ад̣дхад̇аа наама вибхавасамбаннад̇аа, саа д̇ам̣ д̇ам̣ убаад̣̇ааяубаад̣̇ааяа вужжад̇ийд̇и ааха ‘‘яо гожи ад̇д̇ано санд̇агзна вибхавзна ад̣дхо ход̇ий’’д̇и. д̇ат̇аа махад̣̇д̇ханад̇аабийд̇и д̇ам̣ уггам̣саг̇ад̇ам̣ д̣̇ассзд̇ум̣ ‘‘махад̇аа абаримаан̣асан̇кзна д̇ханзна саманнааг̇ад̇о’’д̇и вуд̇д̇ам̣. бхун̃ж̇ид̇аб̣б̣ад̇о барибхун̃ж̇ид̇аб̣б̣ад̇о висзсад̇о гаамаа бхог̇аа наамаад̇и ааха ‘‘бан̃жагаамаг̇ун̣авасзнаа’’д̇и. годтам̣ вужжад̇и д̇хан̃н̃асса аавасанадтаанам̣, годтабхууд̇ам̣ аг̇аарам̣ годтааг̇аарам̣. д̇знааха ‘‘д̇хан̃н̃зна жа барибун̣н̣агодтааг̇ааро’’д̇и. звам̣ саараг̇аб̣бхам̣ госо, д̇хан̃н̃абаридтабанадтаанан̃жа годтааг̇ааранд̇и д̣̇ассзд̇ваа ид̣̇аани д̇ад̇о ан̃н̃ат̇аа д̇ам̣ д̣̇ассзд̇ум̣ ‘‘ат̇а ваа’’д̇иаад̣̇и вуд̇д̇ам̣. д̇ад̇т̇а яат̇аа асино д̇игкабхаавабарихаараго бадижчад̣̇о ‘‘госо’’д̇и вужжад̇и. звам̣ ран̃н̃о д̇игкабхаавабарихаарам̣ гад̇ваа жад̇уран̇г̇иний сзнаа госод̇и ааха ‘‘жад̇уб̣б̣ид̇хо госо хад̇т̇ий ассаа рат̇аа бад̇д̇ий’’д̇и. вад̇т̇агодтааг̇аараг̇г̇ахан̣знзва саб̣б̣ассаби бхан̣д̣адтабанадтаанасса г̇ахид̇ад̇д̇аа ‘‘д̇ивид̇хам̣ годтааг̇аара’’нд̇и вуд̇д̇ам̣.
Aḍḍhatā nāma vibhavasampannatā, sā taṃ taṃ upādāyupādāya vuccatīti āha ‘‘yo koci attano santakena vibhavena aḍḍho hotī’’ti. Tathā mahaddhanatāpīti taṃ ukkaṃsagataṃ dassetuṃ ‘‘mahatā aparimāṇasaṅkhena dhanena samannāgato’’ti vuttaṃ. Bhuñjitabbato paribhuñjitabbato visesato kāmā bhogā nāmāti āha ‘‘pañcakāmaguṇavasenā’’ti. Koṭṭhaṃ vuccati dhaññassa āvasanaṭṭhānaṃ, koṭṭhabhūtaṃ agāraṃ koṭṭhāgāraṃ. Tenāha ‘‘dhaññena ca paripuṇṇakoṭṭhāgāro’’ti. Evaṃ sāragabbhaṃ koso, dhaññapariṭṭhapanaṭṭhānañca koṭṭhāgāranti dassetvā idāni tato aññathā taṃ dassetuṃ ‘‘atha vā’’tiādi vuttaṃ. Tattha yathā asino tikkhabhāvaparihārako paṭicchado ‘‘koso’’ti vuccati. Evaṃ rañño tikkhabhāvaparihāraṃ katvā caturaṅginī senā kosoti āha ‘‘catubbidho koso hatthī assā rathā pattī’’ti. Vatthakoṭṭhāgāraggahaṇeneva sabbassapi bhaṇḍaṭṭhapanaṭṭhānassa gahitattā ‘‘tividhaṃ koṭṭhāgāra’’nti vuttaṃ.
яассаа бан̃н̃ааяа васзна бурисо ‘‘бан̣д̣ид̇о’’д̇и вужжад̇и, д̇ам̣ бан̣д̣ижжанд̇и ааха ‘‘бан̣д̣ижжзна саманнааг̇ад̇о’’д̇и. д̇ам̣д̇ам̣ид̇игад̇д̇аб̣б̣ад̇аасу чзгабхааво б̣яад̇д̇абхааво взяяад̇д̇ияам̣. саммохам̣ хим̣сад̇и вид̇хамад̇ийд̇и мзд̇хаа, саа зд̇асса ад̇т̇ийд̇и мзд̇хаавий. таанз таанз уббад̇д̇и зд̇иссаа ад̇т̇ийд̇и таануббад̇д̇и, таанасо уббаж̇ж̇анабан̃н̃аа. вад̣дхиад̇т̇зд̇и вад̣дхисан̇каад̇з ад̇т̇з.
Yassā paññāya vasena puriso ‘‘paṇḍito’’ti vuccati, taṃ paṇḍiccanti āha ‘‘paṇḍiccena samannāgato’’ti. Taṃtaṃitikattabbatāsu chekabhāvo byattabhāvo veyyattiyaṃ. Sammohaṃ hiṃsati vidhamatīti medhā, sā etassa atthīti medhāvī. Ṭhāne ṭhāne uppatti etissā atthīti ṭhānuppatti, ṭhānaso uppajjanapaññā. Vaḍḍhiattheti vaḍḍhisaṅkhāte atthe.
яассам̣д̣̇исам̣суд̇д̇аван̣н̣анаа нидтид̇аа.
Yassaṃdisaṃsuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 4. яассам̣д̣̇исам̣суд̇д̇ам̣ • 4. Yassaṃdisaṃsuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 4. яассам̣д̣̇исам̣суд̇д̇аван̣н̣анаа • 4. Yassaṃdisaṃsuttavaṇṇanā
