| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৩. ততিযৰগ্গো
3. Tatiyavaggo
(২৯) ৯. যথাকম্মূপগতঞাণকথা
(29) 9. Yathākammūpagatañāṇakathā
৩৭৭. যথাকম্মূপগতং ঞাণং 1 দিব্বচক্খুন্তি? আমন্তা। যথাকম্মূপগতঞ্চ মনসি করোতি, দিব্বেন চক্খুনা রূপং পস্সতীতি? ন হেৰং ৰত্তব্বে…পে॰…।
377. Yathākammūpagataṃ ñāṇaṃ 2 dibbacakkhunti? Āmantā. Yathākammūpagatañca manasi karoti, dibbena cakkhunā rūpaṃ passatīti? Na hevaṃ vattabbe…pe….
যথাকম্মূপগতঞ্চ মনসি করোতি, দিব্বেন চক্খুনা রূপং পস্সতীতি? আমন্তা। দ্ৰিন্নং ফস্সানং দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে॰…।
Yathākammūpagatañca manasi karoti, dibbena cakkhunā rūpaṃ passatīti? Āmantā. Dvinnaṃ phassānaṃ dvinnaṃ cittānaṃ samodhānaṃ hotīti? Na hevaṃ vattabbe…pe….
যথাকম্মূপগতং ঞাণং দিব্বচক্খুন্তি? আমন্তা। ‘‘ইমে ৰত ভোন্তো সত্তা’’তি চ মনসি করোতি, ‘‘কাযদুচ্চরিতেন সমন্নাগতা’’তি চ মনসি করোতি, ‘‘ৰচীদুচ্চরিতেন সমন্নাগতা’’তি চ মনসি করোতি, ‘‘মনোদুচ্চরিতেন সমন্নাগতা’’তি চ মনসি করোতি, ‘‘অরিযানং উপৰাদকা’’তি চ মনসি করোতি, ‘‘মিচ্ছাদিট্ঠিকা’’তি চ মনসি করোতি, ‘‘মিচ্ছাদিট্ঠিকম্মসমাদানা’’তি চ মনসি করোতি, ‘‘তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না’’তি চ মনসি করোতি, ‘‘ইমে ৰা পন ভোন্তো সত্তা’’তি চ মনসি করোতি, ‘‘কাযসুচরিতেন সমন্নাগতা’’তি চ মনসি করোতি, ‘‘ৰচীসুচরিতেন সমন্নাগতা’’তি চ মনসি করোতি, ‘‘মনোসুচরিতেন সমন্নাগতা’’তি চ মনসি করোতি, ‘‘অরিযানং অনুপৰাদকা’’তি চ মনসি করোতি, ‘‘সম্মাদিট্ঠিকা’’তি চ মনসি করোতি, ‘‘সম্মাদিট্ঠিকম্মসম্মাদানা’’তি চ মনসি করোতি, ‘‘তে কাযস্স ভেদা পরং মরণা সুগতিং সগ্গং লোকং উপপন্না’’তি চ মনসি করোতি, দিব্বেন চক্খুনা রূপং পস্সতীতি? ন হেৰং ৰত্তব্বে…পে॰…।
Yathākammūpagataṃ ñāṇaṃ dibbacakkhunti? Āmantā. ‘‘Ime vata bhonto sattā’’ti ca manasi karoti, ‘‘kāyaduccaritena samannāgatā’’ti ca manasi karoti, ‘‘vacīduccaritena samannāgatā’’ti ca manasi karoti, ‘‘manoduccaritena samannāgatā’’ti ca manasi karoti, ‘‘ariyānaṃ upavādakā’’ti ca manasi karoti, ‘‘micchādiṭṭhikā’’ti ca manasi karoti, ‘‘micchādiṭṭhikammasamādānā’’ti ca manasi karoti, ‘‘te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā’’ti ca manasi karoti, ‘‘ime vā pana bhonto sattā’’ti ca manasi karoti, ‘‘kāyasucaritena samannāgatā’’ti ca manasi karoti, ‘‘vacīsucaritena samannāgatā’’ti ca manasi karoti, ‘‘manosucaritena samannāgatā’’ti ca manasi karoti, ‘‘ariyānaṃ anupavādakā’’ti ca manasi karoti, ‘‘sammādiṭṭhikā’’ti ca manasi karoti, ‘‘sammādiṭṭhikammasammādānā’’ti ca manasi karoti, ‘‘te kāyassa bhedā paraṃ maraṇā sugatiṃ saggaṃ lokaṃ upapannā’’ti ca manasi karoti, dibbena cakkhunā rūpaṃ passatīti? Na hevaṃ vattabbe…pe….
‘‘তে কাযস্স ভেদা পরং মরণা সুগতিং সগ্গং লোকং উপপন্না’’তি চ মনসি করোতি, দিব্বেন চক্খুনা রূপং পস্সতীতি? আমন্তা। দ্ৰিন্নং ফস্সানং দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে॰…।
‘‘Te kāyassa bhedā paraṃ maraṇā sugatiṃ saggaṃ lokaṃ upapannā’’ti ca manasi karoti, dibbena cakkhunā rūpaṃ passatīti? Āmantā. Dvinnaṃ phassānaṃ dvinnaṃ cittānaṃ samodhānaṃ hotīti? Na hevaṃ vattabbe…pe….
৩৭৮. যথাকম্মূপগতং ঞাণং দিব্বচক্খুন্তি? আমন্তা। অত্থি কোচি অদিব্বচক্খুকো দিব্বচক্খুং অপ্পটিলদ্ধো অনধিগতো অসচ্ছিকতো যথাকম্মূপগতং জানাতীতি? আমন্তা। হঞ্চি অত্থি কোচি অদিব্বচক্খুকো দিব্বচক্খুং অপ্পটিলদ্ধো অনধিগতো অসচ্ছিকতো যথাকম্মূপগতং জানাতি, নো চ ৰত রে ৰত্তব্বে – ‘‘যথাকম্মূপগতং ঞাণং দিব্বচক্খু’’ন্তি।
378. Yathākammūpagataṃ ñāṇaṃ dibbacakkhunti? Āmantā. Atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānātīti? Āmantā. Hañci atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānāti, no ca vata re vattabbe – ‘‘yathākammūpagataṃ ñāṇaṃ dibbacakkhu’’nti.
যথাকম্মূপগতং ঞাণং দিব্বচক্খুন্তি? আমন্তা। আযস্মা সারিপুত্তো যথাকম্মূপগতং ঞাণং জানাতীতি? আমন্তা। হঞ্চি আযস্মা সারিপুত্তো যথাকম্মূপগতং ঞাণং জানাতি, নো চ ৰত রে ৰত্তব্বে – ‘‘যথাকম্মূপগতং ঞাণং দিব্বচক্খু’’ন্তি।
Yathākammūpagataṃ ñāṇaṃ dibbacakkhunti? Āmantā. Āyasmā sāriputto yathākammūpagataṃ ñāṇaṃ jānātīti? Āmantā. Hañci āyasmā sāriputto yathākammūpagataṃ ñāṇaṃ jānāti, no ca vata re vattabbe – ‘‘yathākammūpagataṃ ñāṇaṃ dibbacakkhu’’nti.
যথাকম্মূপগতং ঞাণং দিব্বচক্খুন্তি? আমন্তা। আযস্মা সারিপুত্তো যথাকম্মূপগতং ঞাণং জানাতীতি? আমন্তা। অত্থাযস্মতো সারিপুত্তস্স দিব্বচক্খুন্তি? ন হেৰং ৰত্তব্বে…পে॰…।
Yathākammūpagataṃ ñāṇaṃ dibbacakkhunti? Āmantā. Āyasmā sāriputto yathākammūpagataṃ ñāṇaṃ jānātīti? Āmantā. Atthāyasmato sāriputtassa dibbacakkhunti? Na hevaṃ vattabbe…pe….
অত্থাযস্মতো সারিপুত্তস্স দিব্বচক্খুন্তি? আমন্তা। ননু আযস্মা সারিপুত্তো এতদৰোচ –
Atthāyasmato sāriputtassa dibbacakkhunti? Āmantā. Nanu āyasmā sāriputto etadavoca –
‘‘নেৰ পুব্বেনিৰাসায, নপি দিব্বস্স চক্খুনো।
‘‘Neva pubbenivāsāya, napi dibbassa cakkhuno;
চেতোপরিযায ইদ্ধিযা, সোতধাতুৰিসুদ্ধিযা।
Cetopariyāya iddhiyā, sotadhātuvisuddhiyā;
অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘যথাকম্মূপগতং ঞাণং দিব্বচক্খু’’ন্তি।
Attheva suttantoti? Āmantā. Tena hi na vattabbaṃ – ‘‘yathākammūpagataṃ ñāṇaṃ dibbacakkhu’’nti.
যথাকম্মূপগতঞাণকথা নিট্ঠিতা।
Yathākammūpagatañāṇakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৯. যথাকম্মূপগতঞাণকথাৰণ্ণনা • 9. Yathākammūpagatañāṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. যথাকম্মূপগতঞাণকথাৰণ্ণনা • 9. Yathākammūpagatañāṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. যথাকম্মূপগতঞাণকথাৰণ্ণনা • 9. Yathākammūpagatañāṇakathāvaṇṇanā
