| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៣. តតិយវគ្គោ
3. Tatiyavaggo
(២៩) ៩. យថាកម្មូបគតញាណកថា
(29) 9. Yathākammūpagatañāṇakathā
៣៧៧. យថាកម្មូបគតំ ញាណំ 1 ទិព្ពចក្ខុន្តិ? អាមន្តា។ យថាកម្មូបគតញ្ច មនសិ ករោតិ, ទិព្ពេន ចក្ខុនា រូបំ បស្សតីតិ? ន ហេវំ វត្តព្ពេ…បេ.…។
377. Yathākammūpagataṃ ñāṇaṃ 2 dibbacakkhunti? Āmantā. Yathākammūpagatañca manasi karoti, dibbena cakkhunā rūpaṃ passatīti? Na hevaṃ vattabbe…pe….
យថាកម្មូបគតញ្ច មនសិ ករោតិ, ទិព្ពេន ចក្ខុនា រូបំ បស្សតីតិ? អាមន្តា។ ទ្វិន្នំ ផស្សានំ ទ្វិន្នំ ចិត្តានំ សមោធានំ ហោតីតិ? ន ហេវំ វត្តព្ពេ…បេ.…។
Yathākammūpagatañca manasi karoti, dibbena cakkhunā rūpaṃ passatīti? Āmantā. Dvinnaṃ phassānaṃ dvinnaṃ cittānaṃ samodhānaṃ hotīti? Na hevaṃ vattabbe…pe….
យថាកម្មូបគតំ ញាណំ ទិព្ពចក្ខុន្តិ? អាមន្តា។ ‘‘ឥមេ វត ភោន្តោ សត្តា’’តិ ច មនសិ ករោតិ, ‘‘កាយទុច្ចរិតេន សមន្នាគតា’’តិ ច មនសិ ករោតិ, ‘‘វចីទុច្ចរិតេន សមន្នាគតា’’តិ ច មនសិ ករោតិ, ‘‘មនោទុច្ចរិតេន សមន្នាគតា’’តិ ច មនសិ ករោតិ, ‘‘អរិយានំ ឧបវាទកា’’តិ ច មនសិ ករោតិ, ‘‘មិច្ឆាទិដ្ឋិកា’’តិ ច មនសិ ករោតិ, ‘‘មិច្ឆាទិដ្ឋិកម្មសមាទានា’’តិ ច មនសិ ករោតិ, ‘‘តេ កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា’’តិ ច មនសិ ករោតិ, ‘‘ឥមេ វា បន ភោន្តោ សត្តា’’តិ ច មនសិ ករោតិ, ‘‘កាយសុចរិតេន សមន្នាគតា’’តិ ច មនសិ ករោតិ, ‘‘វចីសុចរិតេន សមន្នាគតា’’តិ ច មនសិ ករោតិ, ‘‘មនោសុចរិតេន សមន្នាគតា’’តិ ច មនសិ ករោតិ, ‘‘អរិយានំ អនុបវាទកា’’តិ ច មនសិ ករោតិ, ‘‘សម្មាទិដ្ឋិកា’’តិ ច មនសិ ករោតិ, ‘‘សម្មាទិដ្ឋិកម្មសម្មាទានា’’តិ ច មនសិ ករោតិ, ‘‘តេ កាយស្ស ភេទា បរំ មរណា សុគតិំ សគ្គំ លោកំ ឧបបន្នា’’តិ ច មនសិ ករោតិ, ទិព្ពេន ចក្ខុនា រូបំ បស្សតីតិ? ន ហេវំ វត្តព្ពេ…បេ.…។
Yathākammūpagataṃ ñāṇaṃ dibbacakkhunti? Āmantā. ‘‘Ime vata bhonto sattā’’ti ca manasi karoti, ‘‘kāyaduccaritena samannāgatā’’ti ca manasi karoti, ‘‘vacīduccaritena samannāgatā’’ti ca manasi karoti, ‘‘manoduccaritena samannāgatā’’ti ca manasi karoti, ‘‘ariyānaṃ upavādakā’’ti ca manasi karoti, ‘‘micchādiṭṭhikā’’ti ca manasi karoti, ‘‘micchādiṭṭhikammasamādānā’’ti ca manasi karoti, ‘‘te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā’’ti ca manasi karoti, ‘‘ime vā pana bhonto sattā’’ti ca manasi karoti, ‘‘kāyasucaritena samannāgatā’’ti ca manasi karoti, ‘‘vacīsucaritena samannāgatā’’ti ca manasi karoti, ‘‘manosucaritena samannāgatā’’ti ca manasi karoti, ‘‘ariyānaṃ anupavādakā’’ti ca manasi karoti, ‘‘sammādiṭṭhikā’’ti ca manasi karoti, ‘‘sammādiṭṭhikammasammādānā’’ti ca manasi karoti, ‘‘te kāyassa bhedā paraṃ maraṇā sugatiṃ saggaṃ lokaṃ upapannā’’ti ca manasi karoti, dibbena cakkhunā rūpaṃ passatīti? Na hevaṃ vattabbe…pe….
‘‘តេ កាយស្ស ភេទា បរំ មរណា សុគតិំ សគ្គំ លោកំ ឧបបន្នា’’តិ ច មនសិ ករោតិ, ទិព្ពេន ចក្ខុនា រូបំ បស្សតីតិ? អាមន្តា។ ទ្វិន្នំ ផស្សានំ ទ្វិន្នំ ចិត្តានំ សមោធានំ ហោតីតិ? ន ហេវំ វត្តព្ពេ…បេ.…។
‘‘Te kāyassa bhedā paraṃ maraṇā sugatiṃ saggaṃ lokaṃ upapannā’’ti ca manasi karoti, dibbena cakkhunā rūpaṃ passatīti? Āmantā. Dvinnaṃ phassānaṃ dvinnaṃ cittānaṃ samodhānaṃ hotīti? Na hevaṃ vattabbe…pe….
៣៧៨. យថាកម្មូបគតំ ញាណំ ទិព្ពចក្ខុន្តិ? អាមន្តា។ អត្ថិ កោចិ អទិព្ពចក្ខុកោ ទិព្ពចក្ខុំ អប្បដិលទ្ធោ អនធិគតោ អសច្ឆិកតោ យថាកម្មូបគតំ ជានាតីតិ? អាមន្តា។ ហញ្ចិ អត្ថិ កោចិ អទិព្ពចក្ខុកោ ទិព្ពចក្ខុំ អប្បដិលទ្ធោ អនធិគតោ អសច្ឆិកតោ យថាកម្មូបគតំ ជានាតិ, នោ ច វត រេ វត្តព្ពេ – ‘‘យថាកម្មូបគតំ ញាណំ ទិព្ពចក្ខុ’’ន្តិ។
378. Yathākammūpagataṃ ñāṇaṃ dibbacakkhunti? Āmantā. Atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānātīti? Āmantā. Hañci atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānāti, no ca vata re vattabbe – ‘‘yathākammūpagataṃ ñāṇaṃ dibbacakkhu’’nti.
យថាកម្មូបគតំ ញាណំ ទិព្ពចក្ខុន្តិ? អាមន្តា។ អាយស្មា សារិបុត្តោ យថាកម្មូបគតំ ញាណំ ជានាតីតិ? អាមន្តា។ ហញ្ចិ អាយស្មា សារិបុត្តោ យថាកម្មូបគតំ ញាណំ ជានាតិ, នោ ច វត រេ វត្តព្ពេ – ‘‘យថាកម្មូបគតំ ញាណំ ទិព្ពចក្ខុ’’ន្តិ។
Yathākammūpagataṃ ñāṇaṃ dibbacakkhunti? Āmantā. Āyasmā sāriputto yathākammūpagataṃ ñāṇaṃ jānātīti? Āmantā. Hañci āyasmā sāriputto yathākammūpagataṃ ñāṇaṃ jānāti, no ca vata re vattabbe – ‘‘yathākammūpagataṃ ñāṇaṃ dibbacakkhu’’nti.
យថាកម្មូបគតំ ញាណំ ទិព្ពចក្ខុន្តិ? អាមន្តា។ អាយស្មា សារិបុត្តោ យថាកម្មូបគតំ ញាណំ ជានាតីតិ? អាមន្តា។ អត្ថាយស្មតោ សារិបុត្តស្ស ទិព្ពចក្ខុន្តិ? ន ហេវំ វត្តព្ពេ…បេ.…។
Yathākammūpagataṃ ñāṇaṃ dibbacakkhunti? Āmantā. Āyasmā sāriputto yathākammūpagataṃ ñāṇaṃ jānātīti? Āmantā. Atthāyasmato sāriputtassa dibbacakkhunti? Na hevaṃ vattabbe…pe….
អត្ថាយស្មតោ សារិបុត្តស្ស ទិព្ពចក្ខុន្តិ? អាមន្តា។ ននុ អាយស្មា សារិបុត្តោ ឯតទវោច –
Atthāyasmato sāriputtassa dibbacakkhunti? Āmantā. Nanu āyasmā sāriputto etadavoca –
‘‘នេវ បុព្ពេនិវាសាយ, នបិ ទិព្ពស្ស ចក្ខុនោ;
‘‘Neva pubbenivāsāya, napi dibbassa cakkhuno;
ចេតោបរិយាយ ឥទ្ធិយា, សោតធាតុវិសុទ្ធិយា;
Cetopariyāya iddhiyā, sotadhātuvisuddhiyā;
អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘យថាកម្មូបគតំ ញាណំ ទិព្ពចក្ខុ’’ន្តិ។
Attheva suttantoti? Āmantā. Tena hi na vattabbaṃ – ‘‘yathākammūpagataṃ ñāṇaṃ dibbacakkhu’’nti.
យថាកម្មូបគតញាណកថា និដ្ឋិតា។
Yathākammūpagatañāṇakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៩. យថាកម្មូបគតញាណកថាវណ្ណនា • 9. Yathākammūpagatañāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៩. យថាកម្មូបគតញាណកថាវណ្ណនា • 9. Yathākammūpagatañāṇakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៩. យថាកម្មូបគតញាណកថាវណ្ណនា • 9. Yathākammūpagatañāṇakathāvaṇṇanā
