| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༣. ཏཏིཡཝགྒོ
3. Tatiyavaggo
(༢༩) ༩. ཡཐཱཀམྨཱུཔགཏཉཱཎཀཐཱ
(29) 9. Yathākammūpagatañāṇakathā
༣༧༧. ཡཐཱཀམྨཱུཔགཏཾ ཉཱཎཾ 1 དིབྦཙཀྑུནྟི? ཨཱམནྟཱ། ཡཐཱཀམྨཱུཔགཏཉྩ མནསི ཀརོཏི, དིབྦེན ཙཀྑུནཱ རཱུཔཾ པསྶཏཱིཏི? ན ཧེཝཾ ཝཏྟབྦེ…པེ॰…།
377. Yathākammūpagataṃ ñāṇaṃ 2 dibbacakkhunti? Āmantā. Yathākammūpagatañca manasi karoti, dibbena cakkhunā rūpaṃ passatīti? Na hevaṃ vattabbe…pe….
ཡཐཱཀམྨཱུཔགཏཉྩ མནསི ཀརོཏི, དིབྦེན ཙཀྑུནཱ རཱུཔཾ པསྶཏཱིཏི? ཨཱམནྟཱ། དྭིནྣཾ ཕསྶཱནཾ དྭིནྣཾ ཙིཏྟཱནཾ སམོདྷཱནཾ ཧོཏཱིཏི? ན ཧེཝཾ ཝཏྟབྦེ…པེ॰…།
Yathākammūpagatañca manasi karoti, dibbena cakkhunā rūpaṃ passatīti? Āmantā. Dvinnaṃ phassānaṃ dvinnaṃ cittānaṃ samodhānaṃ hotīti? Na hevaṃ vattabbe…pe….
ཡཐཱཀམྨཱུཔགཏཾ ཉཱཎཾ དིབྦཙཀྑུནྟི? ཨཱམནྟཱ། ‘‘ཨིམེ ཝཏ བྷོནྟོ སཏྟཱ’’ཏི ཙ མནསི ཀརོཏི, ‘‘ཀཱཡདུཙྩརིཏེན སམནྣཱགཏཱ’’ཏི ཙ མནསི ཀརོཏི, ‘‘ཝཙཱིདུཙྩརིཏེན སམནྣཱགཏཱ’’ཏི ཙ མནསི ཀརོཏི, ‘‘མནོདུཙྩརིཏེན སམནྣཱགཏཱ’’ཏི ཙ མནསི ཀརོཏི, ‘‘ཨརིཡཱནཾ ཨུཔཝཱདཀཱ’’ཏི ཙ མནསི ཀརོཏི, ‘‘མིཙྪཱདིཊྛིཀཱ’’ཏི ཙ མནསི ཀརོཏི, ‘‘མིཙྪཱདིཊྛིཀམྨསམཱདཱནཱ’’ཏི ཙ མནསི ཀརོཏི, ‘‘ཏེ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔནྣཱ’’ཏི ཙ མནསི ཀརོཏི, ‘‘ཨིམེ ཝཱ པན བྷོནྟོ སཏྟཱ’’ཏི ཙ མནསི ཀརོཏི, ‘‘ཀཱཡསུཙརིཏེན སམནྣཱགཏཱ’’ཏི ཙ མནསི ཀརོཏི, ‘‘ཝཙཱིསུཙརིཏེན སམནྣཱགཏཱ’’ཏི ཙ མནསི ཀརོཏི, ‘‘མནོསུཙརིཏེན སམནྣཱགཏཱ’’ཏི ཙ མནསི ཀརོཏི, ‘‘ཨརིཡཱནཾ ཨནུཔཝཱདཀཱ’’ཏི ཙ མནསི ཀརོཏི, ‘‘སམྨཱདིཊྛིཀཱ’’ཏི ཙ མནསི ཀརོཏི, ‘‘སམྨཱདིཊྛིཀམྨསམྨཱདཱནཱ’’ཏི ཙ མནསི ཀརོཏི, ‘‘ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔནྣཱ’’ཏི ཙ མནསི ཀརོཏི, དིབྦེན ཙཀྑུནཱ རཱུཔཾ པསྶཏཱིཏི? ན ཧེཝཾ ཝཏྟབྦེ…པེ॰…།
Yathākammūpagataṃ ñāṇaṃ dibbacakkhunti? Āmantā. ‘‘Ime vata bhonto sattā’’ti ca manasi karoti, ‘‘kāyaduccaritena samannāgatā’’ti ca manasi karoti, ‘‘vacīduccaritena samannāgatā’’ti ca manasi karoti, ‘‘manoduccaritena samannāgatā’’ti ca manasi karoti, ‘‘ariyānaṃ upavādakā’’ti ca manasi karoti, ‘‘micchādiṭṭhikā’’ti ca manasi karoti, ‘‘micchādiṭṭhikammasamādānā’’ti ca manasi karoti, ‘‘te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā’’ti ca manasi karoti, ‘‘ime vā pana bhonto sattā’’ti ca manasi karoti, ‘‘kāyasucaritena samannāgatā’’ti ca manasi karoti, ‘‘vacīsucaritena samannāgatā’’ti ca manasi karoti, ‘‘manosucaritena samannāgatā’’ti ca manasi karoti, ‘‘ariyānaṃ anupavādakā’’ti ca manasi karoti, ‘‘sammādiṭṭhikā’’ti ca manasi karoti, ‘‘sammādiṭṭhikammasammādānā’’ti ca manasi karoti, ‘‘te kāyassa bhedā paraṃ maraṇā sugatiṃ saggaṃ lokaṃ upapannā’’ti ca manasi karoti, dibbena cakkhunā rūpaṃ passatīti? Na hevaṃ vattabbe…pe….
‘‘ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔནྣཱ’’ཏི ཙ མནསི ཀརོཏི, དིབྦེན ཙཀྑུནཱ རཱུཔཾ པསྶཏཱིཏི? ཨཱམནྟཱ། དྭིནྣཾ ཕསྶཱནཾ དྭིནྣཾ ཙིཏྟཱནཾ སམོདྷཱནཾ ཧོཏཱིཏི? ན ཧེཝཾ ཝཏྟབྦེ…པེ॰…།
‘‘Te kāyassa bhedā paraṃ maraṇā sugatiṃ saggaṃ lokaṃ upapannā’’ti ca manasi karoti, dibbena cakkhunā rūpaṃ passatīti? Āmantā. Dvinnaṃ phassānaṃ dvinnaṃ cittānaṃ samodhānaṃ hotīti? Na hevaṃ vattabbe…pe….
༣༧༨. ཡཐཱཀམྨཱུཔགཏཾ ཉཱཎཾ དིབྦཙཀྑུནྟི? ཨཱམནྟཱ། ཨཏྠི ཀོཙི ཨདིབྦཙཀྑུཀོ དིབྦཙཀྑུཾ ཨཔྤཊིལདྡྷོ ཨནདྷིགཏོ ཨསཙྪིཀཏོ ཡཐཱཀམྨཱུཔགཏཾ ཛཱནཱཏཱིཏི? ཨཱམནྟཱ། ཧཉྩི ཨཏྠི ཀོཙི ཨདིབྦཙཀྑུཀོ དིབྦཙཀྑུཾ ཨཔྤཊིལདྡྷོ ཨནདྷིགཏོ ཨསཙྪིཀཏོ ཡཐཱཀམྨཱུཔགཏཾ ཛཱནཱཏི, ནོ ཙ ཝཏ རེ ཝཏྟབྦེ – ‘‘ཡཐཱཀམྨཱུཔགཏཾ ཉཱཎཾ དིབྦཙཀྑུ’’ནྟི།
378. Yathākammūpagataṃ ñāṇaṃ dibbacakkhunti? Āmantā. Atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānātīti? Āmantā. Hañci atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānāti, no ca vata re vattabbe – ‘‘yathākammūpagataṃ ñāṇaṃ dibbacakkhu’’nti.
ཡཐཱཀམྨཱུཔགཏཾ ཉཱཎཾ དིབྦཙཀྑུནྟི? ཨཱམནྟཱ། ཨཱཡསྨཱ སཱརིཔུཏྟོ ཡཐཱཀམྨཱུཔགཏཾ ཉཱཎཾ ཛཱནཱཏཱིཏི? ཨཱམནྟཱ། ཧཉྩི ཨཱཡསྨཱ སཱརིཔུཏྟོ ཡཐཱཀམྨཱུཔགཏཾ ཉཱཎཾ ཛཱནཱཏི, ནོ ཙ ཝཏ རེ ཝཏྟབྦེ – ‘‘ཡཐཱཀམྨཱུཔགཏཾ ཉཱཎཾ དིབྦཙཀྑུ’’ནྟི།
Yathākammūpagataṃ ñāṇaṃ dibbacakkhunti? Āmantā. Āyasmā sāriputto yathākammūpagataṃ ñāṇaṃ jānātīti? Āmantā. Hañci āyasmā sāriputto yathākammūpagataṃ ñāṇaṃ jānāti, no ca vata re vattabbe – ‘‘yathākammūpagataṃ ñāṇaṃ dibbacakkhu’’nti.
ཡཐཱཀམྨཱུཔགཏཾ ཉཱཎཾ དིབྦཙཀྑུནྟི? ཨཱམནྟཱ། ཨཱཡསྨཱ སཱརིཔུཏྟོ ཡཐཱཀམྨཱུཔགཏཾ ཉཱཎཾ ཛཱནཱཏཱིཏི? ཨཱམནྟཱ། ཨཏྠཱཡསྨཏོ སཱརིཔུཏྟསྶ དིབྦཙཀྑུནྟི? ན ཧེཝཾ ཝཏྟབྦེ…པེ॰…།
Yathākammūpagataṃ ñāṇaṃ dibbacakkhunti? Āmantā. Āyasmā sāriputto yathākammūpagataṃ ñāṇaṃ jānātīti? Āmantā. Atthāyasmato sāriputtassa dibbacakkhunti? Na hevaṃ vattabbe…pe….
ཨཏྠཱཡསྨཏོ སཱརིཔུཏྟསྶ དིབྦཙཀྑུནྟི? ཨཱམནྟཱ། ནནུ ཨཱཡསྨཱ སཱརིཔུཏྟོ ཨེཏདཝོཙ –
Atthāyasmato sāriputtassa dibbacakkhunti? Āmantā. Nanu āyasmā sāriputto etadavoca –
‘‘ནེཝ པུབྦེནིཝཱསཱཡ, ནཔི དིབྦསྶ ཙཀྑུནོ།
‘‘Neva pubbenivāsāya, napi dibbassa cakkhuno;
ཙེཏོཔརིཡཱཡ ཨིདྡྷིཡཱ, སོཏདྷཱཏུཝིསུདྡྷིཡཱ།
Cetopariyāya iddhiyā, sotadhātuvisuddhiyā;
ཨཏྠེཝ སུཏྟནྟོཏི? ཨཱམནྟཱ། ཏེན ཧི ན ཝཏྟབྦཾ – ‘‘ཡཐཱཀམྨཱུཔགཏཾ ཉཱཎཾ དིབྦཙཀྑུ’’ནྟི།
Attheva suttantoti? Āmantā. Tena hi na vattabbaṃ – ‘‘yathākammūpagataṃ ñāṇaṃ dibbacakkhu’’nti.
ཡཐཱཀམྨཱུཔགཏཉཱཎཀཐཱ ནིཊྛིཏཱ།
Yathākammūpagatañāṇakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༩. ཡཐཱཀམྨཱུཔགཏཉཱཎཀཐཱཝཎྞནཱ • 9. Yathākammūpagatañāṇakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༩. ཡཐཱཀམྨཱུཔགཏཉཱཎཀཐཱཝཎྞནཱ • 9. Yathākammūpagatañāṇakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༩. ཡཐཱཀམྨཱུཔགཏཉཱཎཀཐཱཝཎྞནཱ • 9. Yathākammūpagatañāṇakathāvaṇṇanā
