| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. যৰকলাপিসুত্তং
11. Yavakalāpisuttaṃ
২৪৮. ‘‘সেয্যথাপি , ভিক্খৰে, যৰকলাপী চাতুমহাপথে নিক্খিত্তা অস্স। অথ ছ পুরিসা আগচ্ছেয্যুং ব্যাভঙ্গিহত্থা। তে যৰকলাপিং ছহি ব্যাভঙ্গীহি হনেয্যুং। এৰঞ্হি সা, ভিক্খৰে, যৰকলাপী সুহতা অস্স ছহি ব্যাভঙ্গীহি হঞ্ঞমানা। অথ সত্তমো পুরিসো আগচ্ছেয্য ব্যাভঙ্গিহত্থো। সো তং যৰকলাপিং সত্তমায ব্যাভঙ্গিযা হনেয্য। এৰঞ্হি সা ভিক্খৰে, যৰকলাপী সুহততরা অস্স, সত্তমায ব্যাভঙ্গিযা হঞ্ঞমানা। এৰমেৰ খো, ভিক্খৰে, অস্সুতৰা পুথুজ্জনো চক্খুস্মিং হঞ্ঞতি মনাপামনাপেহি রূপেহি…পে॰… জিৰ্হায হঞ্ঞতি মনাপামনাপেহি রসেহি…পে॰… মনস্মিং হঞ্ঞতি মনাপামনাপেহি ধম্মেহি। সচে সো, ভিক্খৰে, অস্সুতৰা পুথুজ্জনো আযতিং পুনব্ভৰায চেতেতি, এৰঞ্হি সো, ভিক্খৰে, মোঘপুরিসো সুহততরো হোতি, সেয্যথাপি সা যৰকলাপী সত্তমায ব্যাভঙ্গিযা হঞ্ঞমানা।
248. ‘‘Seyyathāpi , bhikkhave, yavakalāpī cātumahāpathe nikkhittā assa. Atha cha purisā āgaccheyyuṃ byābhaṅgihatthā. Te yavakalāpiṃ chahi byābhaṅgīhi haneyyuṃ. Evañhi sā, bhikkhave, yavakalāpī suhatā assa chahi byābhaṅgīhi haññamānā. Atha sattamo puriso āgaccheyya byābhaṅgihattho. So taṃ yavakalāpiṃ sattamāya byābhaṅgiyā haneyya. Evañhi sā bhikkhave, yavakalāpī suhatatarā assa, sattamāya byābhaṅgiyā haññamānā. Evameva kho, bhikkhave, assutavā puthujjano cakkhusmiṃ haññati manāpāmanāpehi rūpehi…pe… jivhāya haññati manāpāmanāpehi rasehi…pe… manasmiṃ haññati manāpāmanāpehi dhammehi. Sace so, bhikkhave, assutavā puthujjano āyatiṃ punabbhavāya ceteti, evañhi so, bhikkhave, moghapuriso suhatataro hoti, seyyathāpi sā yavakalāpī sattamāya byābhaṅgiyā haññamānā.
‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো 1 অহোসি। অথ খো, ভিক্খৰে, ৰেপচিত্তি অসুরিন্দো অসুরে আমন্তেসি – ‘সচে, মারিসা, দেৰাসুরসঙ্গামে সমুপব্যূল়্হে অসুরা জিনেয্যুং দেৰা পরাজিনেয্যুং, যেন নং সক্কং দেৰানমিন্দং কণ্ঠপঞ্চমেহি বন্ধনেহি বন্ধিত্ৰা মম সন্তিকে আনেয্যাথ অসুরপুর’ন্তি। সক্কোপি খো, ভিক্খৰে, দেৰানমিন্দো দেৰে তাৰতিংসে আমন্তেসি – ‘সচে, মারিসা, দেৰাসুরসঙ্গামে সমুপব্যূল়্হে দেৰা জিনেয্যুং অসুরা পরাজিনেয্যুং, যেন নং ৰেপচিত্তিং অসুরিন্দং কণ্ঠপঞ্চমেহি বন্ধনেহি বন্ধিত্ৰা মম সন্তিকে আনেয্যাথ সুধম্মং দেৰসভ’ন্তি। তস্মিং খো পন, ভিক্খৰে, সঙ্গামে দেৰা জিনিংসু, অসুরা পরাজিনিংসু । অথ খো, ভিক্খৰে, দেৰা তাৰতিংসা ৰেপচিত্তিং অসুরিন্দং কণ্ঠপঞ্চমেহি বন্ধনেহি বন্ধিত্ৰা সক্কস্স দেৰানমিন্দস্স সন্তিকে আনেসুং সুধম্মং দেৰসভং। তত্র সুদং, ভিক্খৰে, ৰেপচিত্তি অসুরিন্দো কণ্ঠপঞ্চমেহি বন্ধনেহি বদ্ধো 2 হোতি। যদা খো, ভিক্খৰে, ৰেপচিত্তিস্স অসুরিন্দস্স এৰং হোতি – ‘ধম্মিকা খো দেৰা, অধম্মিকা অসুরা , ইধেৰ দানাহং দেৰপুরং গচ্ছামী’তি। অথ কণ্ঠপঞ্চমেহি বন্ধনেহি মুত্তং অত্তানং সমনুপস্সতি, দিব্বেহি চ পঞ্চহি কামগুণেহি সমপ্পিতো সমঙ্গীভূতো পরিচারেতি। যদা চ খো, ভিক্খৰে, ৰেপচিত্তিস্স অসুরিন্দস্স এৰং হোতি – ‘ধম্মিকা খো অসুরা, অধম্মিকা দেৰা, তত্থেৰ দানাহং অসুরপুরং গমিস্সামী’তি, অথ কণ্ঠপঞ্চমেহি বন্ধনেহি বদ্ধং অত্তানং সমনুপস্সতি। দিব্বেহি চ পঞ্চহি কামগুণেহি পরিহাযতি। এৰং সুখুমং খো, ভিক্খৰে, ৰেপচিত্তিবন্ধনং। ততো সুখুমতরং মারবন্ধনং। মঞ্ঞমানো খো, ভিক্খৰে, বদ্ধো মারস্স, অমঞ্ঞমানো মুত্তো পাপিমতো।
‘‘Bhūtapubbaṃ, bhikkhave, devāsurasaṅgāmo samupabyūḷho 3 ahosi. Atha kho, bhikkhave, vepacitti asurindo asure āmantesi – ‘sace, mārisā, devāsurasaṅgāme samupabyūḷhe asurā jineyyuṃ devā parājineyyuṃ, yena naṃ sakkaṃ devānamindaṃ kaṇṭhapañcamehi bandhanehi bandhitvā mama santike āneyyātha asurapura’nti. Sakkopi kho, bhikkhave, devānamindo deve tāvatiṃse āmantesi – ‘sace, mārisā, devāsurasaṅgāme samupabyūḷhe devā jineyyuṃ asurā parājineyyuṃ, yena naṃ vepacittiṃ asurindaṃ kaṇṭhapañcamehi bandhanehi bandhitvā mama santike āneyyātha sudhammaṃ devasabha’nti. Tasmiṃ kho pana, bhikkhave, saṅgāme devā jiniṃsu, asurā parājiniṃsu . Atha kho, bhikkhave, devā tāvatiṃsā vepacittiṃ asurindaṃ kaṇṭhapañcamehi bandhanehi bandhitvā sakkassa devānamindassa santike ānesuṃ sudhammaṃ devasabhaṃ. Tatra sudaṃ, bhikkhave, vepacitti asurindo kaṇṭhapañcamehi bandhanehi baddho 4 hoti. Yadā kho, bhikkhave, vepacittissa asurindassa evaṃ hoti – ‘dhammikā kho devā, adhammikā asurā , idheva dānāhaṃ devapuraṃ gacchāmī’ti. Atha kaṇṭhapañcamehi bandhanehi muttaṃ attānaṃ samanupassati, dibbehi ca pañcahi kāmaguṇehi samappito samaṅgībhūto paricāreti. Yadā ca kho, bhikkhave, vepacittissa asurindassa evaṃ hoti – ‘dhammikā kho asurā, adhammikā devā, tattheva dānāhaṃ asurapuraṃ gamissāmī’ti, atha kaṇṭhapañcamehi bandhanehi baddhaṃ attānaṃ samanupassati. Dibbehi ca pañcahi kāmaguṇehi parihāyati. Evaṃ sukhumaṃ kho, bhikkhave, vepacittibandhanaṃ. Tato sukhumataraṃ mārabandhanaṃ. Maññamāno kho, bhikkhave, baddho mārassa, amaññamāno mutto pāpimato.
‘‘‘অস্মী’তি, ভিক্খৰে, মঞ্ঞিতমেতং, ‘অযমহমস্মী’তি মঞ্ঞিতমেতং, ‘ভৰিস্স’ন্তি মঞ্ঞিতমেতং, ‘ন ভৰিস্স’ন্তি মঞ্ঞিতমেতং, ‘রূপী ভৰিস্স’ন্তি মঞ্ঞিতমেতং, ‘অরূপী ভৰিস্স’ন্তি মঞ্ঞিতমেতং, ‘সঞ্ঞী ভৰিস্স’ন্তি মঞ্ঞিতমেতং, ‘অসঞ্ঞী ভৰিস্স’ন্তি মঞ্ঞিতমেতং, ‘নেৰসঞ্ঞীনাসঞ্ঞী ভৰিস্স’ন্তি মঞ্ঞিতমেতং। মঞ্ঞিতং, ভিক্খৰে, রোগো, মঞ্ঞিতং গণ্ডো, মঞ্ঞিতং সল্লং। তস্মাতিহ, ভিক্খৰে, ‘অমঞ্ঞমানেন 5 চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং।
‘‘‘Asmī’ti, bhikkhave, maññitametaṃ, ‘ayamahamasmī’ti maññitametaṃ, ‘bhavissa’nti maññitametaṃ, ‘na bhavissa’nti maññitametaṃ, ‘rūpī bhavissa’nti maññitametaṃ, ‘arūpī bhavissa’nti maññitametaṃ, ‘saññī bhavissa’nti maññitametaṃ, ‘asaññī bhavissa’nti maññitametaṃ, ‘nevasaññīnāsaññī bhavissa’nti maññitametaṃ. Maññitaṃ, bhikkhave, rogo, maññitaṃ gaṇḍo, maññitaṃ sallaṃ. Tasmātiha, bhikkhave, ‘amaññamānena 6 cetasā viharissāmā’ti – evañhi vo, bhikkhave, sikkhitabbaṃ.
‘‘‘অস্মী’তি, ভিক্খৰে, ইঞ্জিতমেতং, ‘অযমহমস্মী’তি ইঞ্জিতমেতং, ‘ভৰিস্স’ন্তি ইঞ্জিতমেতং, ‘ন ভৰিস্স’ন্তি ইঞ্জিতমেতং, ‘রূপী ভৰিস্স’ন্তি ইঞ্জিতমেতং, ‘অরূপী ভৰিস্স’ন্তি ইঞ্জিতমেতং, ‘সঞ্ঞী ভৰিস্স’ন্তি ইঞ্জিতমেতং, ‘অসঞ্ঞী ভৰিস্স’ন্তি ইঞ্জিতমেতং, ‘নেৰসঞ্ঞীনাসঞ্ঞী ভৰিস্স’ন্তি ইঞ্জিতমেতং। ইঞ্জিতং, ভিক্খৰে , রোগো, ইঞ্জিতং গণ্ডো, ইঞ্জিতং সল্লং। তস্মাতিহ, ভিক্খৰে, ‘অনিঞ্জমানেন 7 চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং।
‘‘‘Asmī’ti, bhikkhave, iñjitametaṃ, ‘ayamahamasmī’ti iñjitametaṃ, ‘bhavissa’nti iñjitametaṃ, ‘na bhavissa’nti iñjitametaṃ, ‘rūpī bhavissa’nti iñjitametaṃ, ‘arūpī bhavissa’nti iñjitametaṃ, ‘saññī bhavissa’nti iñjitametaṃ, ‘asaññī bhavissa’nti iñjitametaṃ, ‘nevasaññīnāsaññī bhavissa’nti iñjitametaṃ. Iñjitaṃ, bhikkhave , rogo, iñjitaṃ gaṇḍo, iñjitaṃ sallaṃ. Tasmātiha, bhikkhave, ‘aniñjamānena 8 cetasā viharissāmā’ti – evañhi vo, bhikkhave, sikkhitabbaṃ.
‘‘‘অস্মী’তি , ভিক্খৰে, ফন্দিতমেতং, ‘অযমহমস্মী’তি ফন্দিতমেতং, ‘ভৰিস্স’ন্তি…পে॰… ‘ন ভৰিস্স’ন্তি… ‘রূপী ভৰিস্স’ন্তি… ‘অরূপী ভৰিস্স’ন্তি… ‘সঞ্ঞী ভৰিস্স’ন্তি… ‘অসঞ্ঞী ভৰিস্স’ন্তি… ‘নেৰসঞ্ঞীনাসঞ্ঞী ভৰিস্স’ন্তি ফন্দিতমেতং। ফন্দিতং, ভিক্খৰে, রোগো, ফন্দিতং গণ্ডো, ফন্দিতং সল্লং। তস্মাতিহ, ভিক্খৰে, ‘অফন্দমানেন 9 চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং।
‘‘‘Asmī’ti , bhikkhave, phanditametaṃ, ‘ayamahamasmī’ti phanditametaṃ, ‘bhavissa’nti…pe… ‘na bhavissa’nti… ‘rūpī bhavissa’nti… ‘arūpī bhavissa’nti… ‘saññī bhavissa’nti… ‘asaññī bhavissa’nti… ‘nevasaññīnāsaññī bhavissa’nti phanditametaṃ. Phanditaṃ, bhikkhave, rogo, phanditaṃ gaṇḍo, phanditaṃ sallaṃ. Tasmātiha, bhikkhave, ‘aphandamānena 10 cetasā viharissāmā’ti – evañhi vo, bhikkhave, sikkhitabbaṃ.
‘‘‘অস্মী’তি, ভিক্খৰে, পপঞ্চিতমেতং, ‘অযমহমস্মী’তি পপঞ্চিতমেতং, ‘ভৰিস্স’ন্তি…পে॰… ‘ন ভৰিস্স’ন্তি… ‘রূপী ভৰিস্স’ন্তি… ‘অরূপী ভৰিস্স’ন্তি… ‘সঞ্ঞী ভৰিস্স’ন্তি… ‘অসঞ্ঞী ভৰিস্স’ন্তি… ‘নেৰসঞ্ঞীনাসঞ্ঞী ভৰিস্স’ন্তি পপঞ্চিতমেতং । পপঞ্চিতং, ভিক্খৰে, রোগো, পপঞ্চিতং গণ্ডো, পপঞ্চিতং সল্লং। তস্মাতিহ, ভিক্খৰে, ‘নিপ্পপঞ্চেন চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং।
‘‘‘Asmī’ti, bhikkhave, papañcitametaṃ, ‘ayamahamasmī’ti papañcitametaṃ, ‘bhavissa’nti…pe… ‘na bhavissa’nti… ‘rūpī bhavissa’nti… ‘arūpī bhavissa’nti… ‘saññī bhavissa’nti… ‘asaññī bhavissa’nti… ‘nevasaññīnāsaññī bhavissa’nti papañcitametaṃ . Papañcitaṃ, bhikkhave, rogo, papañcitaṃ gaṇḍo, papañcitaṃ sallaṃ. Tasmātiha, bhikkhave, ‘nippapañcena cetasā viharissāmā’ti – evañhi vo, bhikkhave, sikkhitabbaṃ.
‘‘‘অস্মী’তি, ভিক্খৰে, মানগতমেতং, ‘অযমহমস্মী’তি মানগতমেতং, ‘ভৰিস্স’ন্তি মানগতমেতং, ‘ন ভৰিস্স’ন্তি মানগতমেতং, ‘রূপী ভৰিস্স’ন্তি মানগতমেতং, ‘অরূপী ভৰিস্স’ন্তি মানগতমেতং, ‘সঞ্ঞী ভৰিস্স’ন্তি মানগতমেতং, ‘অসঞ্ঞী ভৰিস্স’ন্তি মানগতমেতং, ‘নেৰসঞ্ঞীনাসঞ্ঞী ভৰিস্স’ন্তি মানগতমেতং। মানগতং, ভিক্খৰে, রোগো, মানগতং গণ্ডো, মানগতং সল্লং। তস্মাতিহ, ভিক্খৰে, ‘নিহতমানেন চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্ব’’ন্তি। একাদসমং।
‘‘‘Asmī’ti, bhikkhave, mānagatametaṃ, ‘ayamahamasmī’ti mānagatametaṃ, ‘bhavissa’nti mānagatametaṃ, ‘na bhavissa’nti mānagatametaṃ, ‘rūpī bhavissa’nti mānagatametaṃ, ‘arūpī bhavissa’nti mānagatametaṃ, ‘saññī bhavissa’nti mānagatametaṃ, ‘asaññī bhavissa’nti mānagatametaṃ, ‘nevasaññīnāsaññī bhavissa’nti mānagatametaṃ. Mānagataṃ, bhikkhave, rogo, mānagataṃ gaṇḍo, mānagataṃ sallaṃ. Tasmātiha, bhikkhave, ‘nihatamānena cetasā viharissāmā’ti – evañhi vo, bhikkhave, sikkhitabba’’nti. Ekādasamaṃ.
আসীৰিসৰগ্গো একূনৰীসতিমো।
Āsīvisavaggo ekūnavīsatimo.
তস্সুদ্দানং –
Tassuddānaṃ –
আসীৰিসো রথো কুম্মো, দ্ৰে দারুক্খন্ধা অৰস্সুতো।
Āsīviso ratho kummo, dve dārukkhandhā avassuto;
দুক্খধম্মা কিংসুকা ৰীণা, ছপ্পাণা যৰকলাপীতি॥
Dukkhadhammā kiṃsukā vīṇā, chappāṇā yavakalāpīti.
সল়াযতনৰগ্গে চতুত্থপণ্ণাসকো সমত্তো।
Saḷāyatanavagge catutthapaṇṇāsako samatto.
তস্স ৰগ্গুদ্দানং –
Tassa vagguddānaṃ –
নন্দিক্খযো সট্ঠিনযো, সমুদ্দো উরগেন চ।
Nandikkhayo saṭṭhinayo, samuddo uragena ca;
চতুপণ্ণাসকা এতে, নিপাতেসু পকাসিতাতি॥
Catupaṇṇāsakā ete, nipātesu pakāsitāti.
সল়াযতনসংযুত্তং সমত্তং।
Saḷāyatanasaṃyuttaṃ samattaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১১. যৰকলাপিসুত্তৰণ্ণনা • 11. Yavakalāpisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১১. যৰকলাপিসুত্তৰণ্ণনা • 11. Yavakalāpisuttavaṇṇanā
