| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
11. யவகலாபிஸுத்தவண்ணனா
11. Yavakalāpisuttavaṇṇanā
248. ஏகாத³ஸமே யவகலாபீதி லாயித்வா ட²பிதயவபுஞ்ஜோ. ப்³யாப⁴ங்கி³ஹத்தா²தி காஜஹத்தா². ச²ஹி ப்³யாப⁴ங்கீ³ஹி ஹனெய்யுந்தி ச²ஹி புது²லகாஜத³ண்ட³கேஹி போதெ²ய்யுங். ஸத்தமோதி தேஸு ச²ஸு ஜனேஸு யவே போதெ²த்வா பஸிப்³ப³கே பூரெத்வா ஆதா³ய க³தேஸு அஞ்ஞோ ஸத்தமோ ஆக³ச்செ²ய்ய. ஸுஹததரா அஸ்ஸாதி யங் தத்த² அவஸிட்ட²ங் அத்தி² பு⁴ஸபலாபமத்தம்பி, தஸ்ஸ க³ஹணத்த²ங் ஸுட்டு²தரங் ஹதா.
248. Ekādasame yavakalāpīti lāyitvā ṭhapitayavapuñjo. Byābhaṅgihatthāti kājahatthā. Chahi byābhaṅgīhi haneyyunti chahi puthulakājadaṇḍakehi potheyyuṃ. Sattamoti tesu chasu janesu yave pothetvā pasibbake pūretvā ādāya gatesu añño sattamo āgaccheyya. Suhatatarā assāti yaṃ tattha avasiṭṭhaṃ atthi bhusapalāpamattampi, tassa gahaṇatthaṃ suṭṭhutaraṃ hatā.
ஏவமேவ கோ²தி எத்த² சதுமஹாபதோ² விய ச² ஆயதனானி த³ட்ட²ப்³பா³னி, சதுமஹாபதே² நிக்கி²த்தயவகலாபீ விய ஸத்தோ, ச² ப்³யாப⁴ங்கி³யோ விய இட்டா²னிட்ட²மஜ்ஜ²த்தவஸேன அட்டா²ரஸ ஆரம்மணானி, ஸத்தமா ப்³யாப⁴ங்கீ³ விய ப⁴வபத்த²னா கிலேஸா. யதா² சதுமஹாபதே² ட²பிதா யவகலாபீ ச²ஹி ப்³யாப⁴ங்கீ³ஹி ஹஞ்ஞதி, ஏவமிமே ஸத்தா அட்டா²ரஸஹி ஆரம்மணத³ண்ட³கேஹி ச²ஸு ஆயதனேஸு ஹஞ்ஞந்தி. யதா² ஸத்தமேன ஸுஹததரா ஹொந்தி, ஏவங் ஸத்தா ப⁴வபத்த²னகிலேஸேஹி ஸுஹததரா ஹொந்தி ப⁴வேமூலகங் து³க்க²ங் அனுப⁴வமானா.
Evameva khoti ettha catumahāpatho viya cha āyatanāni daṭṭhabbāni, catumahāpathe nikkhittayavakalāpī viya satto, cha byābhaṅgiyo viya iṭṭhāniṭṭhamajjhattavasena aṭṭhārasa ārammaṇāni, sattamā byābhaṅgī viya bhavapatthanā kilesā. Yathā catumahāpathe ṭhapitā yavakalāpī chahi byābhaṅgīhi haññati, evamime sattā aṭṭhārasahi ārammaṇadaṇḍakehi chasu āyatanesu haññanti. Yathā sattamena suhatatarā honti, evaṃ sattā bhavapatthanakilesehi suhatatarā honti bhavemūlakaṃ dukkhaṃ anubhavamānā.
இதா³னி நேஸங் தங் ப⁴வபத்த²னகிலேஸங் த³ஸ்ஸேதுங் பூ⁴தபுப்³ப³ங், பி⁴க்க²வேதிஆதி³மாஹ. தத்ராதி ஸுத⁴ம்மாயங் பு⁴ம்மங், ஸுத⁴ம்மாய தே³வஸபா⁴ய த்³வாரேதி அத்தோ². த⁴ம்மிகா கோ² தே³வாதி த⁴ம்மிகா ஏதே தே³வா நாம, யேஹி மாதி³ஸங் அஸுராதி⁴பதிங் க³ஹெத்வா மய்ஹங் பே⁴த³னமத்தம்பி ந கதந்தி ஸந்தா⁴ய வத³தி. அத⁴ம்மிகா தே³வாதி அத⁴ம்மிகா ஏதே தே³வா நாம, யே மாதி³ஸங் அஸுராதி⁴பதிங் நவகூ³த²ஸூகரங் விய கண்ட²பஞ்சமேஹி ப³ந்த⁴னேஹி ப³ந்தி⁴த்வா நிஸீதா³பெந்தி. ஏவங் ஸுகு²மங் கோ², பி⁴க்க²வே, வேபசித்திப³ந்த⁴னந்தி தங் கிர பது³மனாளஸுத்தங் விய மக்கடஜாலஸுத்தங் விய ச ஸுகு²மங் ஹோதி, செ²த்துங் பன நேவ வாஸியா ந ப²ரஸுனா ஸக்கா. யஸ்மா பன சித்தேனேவ ப³ஜ்ஜ²தி, சித்தேன முச்சதி, தஸ்மா ‘‘வேபசித்திப³ந்த⁴ன’’ந்தி வுத்தங்.
Idāni nesaṃ taṃ bhavapatthanakilesaṃ dassetuṃ bhūtapubbaṃ, bhikkhavetiādimāha. Tatrāti sudhammāyaṃ bhummaṃ, sudhammāya devasabhāya dvāreti attho. Dhammikā kho devāti dhammikā ete devā nāma, yehi mādisaṃ asurādhipatiṃ gahetvā mayhaṃ bhedanamattampi na katanti sandhāya vadati. Adhammikā devāti adhammikā ete devā nāma, ye mādisaṃ asurādhipatiṃ navagūthasūkaraṃ viya kaṇṭhapañcamehi bandhanehi bandhitvā nisīdāpenti. Evaṃ sukhumaṃ kho, bhikkhave, vepacittibandhananti taṃ kira padumanāḷasuttaṃ viya makkaṭajālasuttaṃ viya ca sukhumaṃ hoti, chettuṃ pana neva vāsiyā na pharasunā sakkā. Yasmā pana citteneva bajjhati, cittena muccati, tasmā ‘‘vepacittibandhana’’nti vuttaṃ.
ததோ ஸுகு²மதரங் மாரப³ந்த⁴னந்தி கிலேஸப³ந்த⁴னங் பனேஸங் ததோபி ஸுகு²மதரங், நேவ சக்கு²ஸ்ஸ ஆபாத²ங் க³ச்ச²தி, ந இரியாபத²ங் நிவாரேதி. தேன ஹி ப³த்³தா⁴ ஸத்தா பத²விதலேபி ஆகாஸேபி யோஜனஸதம்பி யோஜனஸஹஸ்ஸம்பி க³ச்ச²ந்திபி ஆக³ச்ச²ந்திபி. சி²ஜ்ஜமானங் பனேதங் ஞாணேனேவ சி²ஜ்ஜதி, ந அஞ்ஞேனாதி ‘‘ஞாணமொக்க²ங் ப³ந்த⁴ன’’ந்திபி வுச்சதி.
Tato sukhumataraṃ mārabandhananti kilesabandhanaṃ panesaṃ tatopi sukhumataraṃ, neva cakkhussa āpāthaṃ gacchati, na iriyāpathaṃ nivāreti. Tena hi baddhā sattā pathavitalepi ākāsepi yojanasatampi yojanasahassampi gacchantipi āgacchantipi. Chijjamānaṃ panetaṃ ñāṇeneva chijjati, na aññenāti ‘‘ñāṇamokkhaṃ bandhana’’ntipi vuccati.
மஞ்ஞமானோதி தண்ஹாதி³ட்டி²மானானங் வஸேன க²ந்தே⁴ மஞ்ஞந்தோ. ப³த்³தோ⁴ மாரஸ்ஸாதி மாரப³ந்த⁴னேன ப³த்³தோ⁴. கரணத்தே² வா ஏதங் ஸாமிவசனங், கிலேஸமாரேன ப³த்³தோ⁴தி அத்தோ². முத்தோ பாபிமதோதி மாரஸ்ஸ ப³ந்த⁴னேன முத்தோ. கரணத்தே²யேவ வா இத³ங் ஸாமிவசனங், பாபிமதா கிலேஸப³ந்த⁴னேன முத்தோதி அத்தோ².
Maññamānoti taṇhādiṭṭhimānānaṃ vasena khandhe maññanto. Baddho mārassāti mārabandhanena baddho. Karaṇatthe vā etaṃ sāmivacanaṃ, kilesamārena baddhoti attho. Mutto pāpimatoti mārassa bandhanena mutto. Karaṇattheyeva vā idaṃ sāmivacanaṃ, pāpimatā kilesabandhanena muttoti attho.
அஸ்மீதி பதே³ன தண்ஹாமஞ்ஞிதங் வுத்தங். அயமஹஸ்மீதி தி³ட்டி²மஞ்ஞிதங். ப⁴விஸ்ஸந்தி ஸஸ்ஸதவஸேன தி³ட்டி²மஞ்ஞிதமேவ. ந ப⁴விஸ்ஸந்தி உச்சே²த³வஸேன. ரூபீதிஆதீ³னி ஸஸ்ஸதஸ்ஸேவ பபே⁴த³தீ³பனானி. தஸ்மாதி யஸ்மா மஞ்ஞிதங் ஆபா³த⁴ங் அந்தோதோ³ஸனிகந்தனவஸேன ரோகோ³ சேவ க³ண்டோ³ ச ஸல்லஞ்ச, தஸ்மா. இஞ்ஜிதந்திஆதீ³னி யஸ்மா இமேஹி கிலேஸேஹி ஸத்தா இஞ்ஜந்தி சேவ ப²ந்த³ந்தி ச பபஞ்சிதா ச ஹொந்தி பமத்தாகாரபத்தா, தஸ்மா தேஸங் ஆகாரத³ஸ்ஸனத்த²ங் வுத்தானி.
Asmīti padena taṇhāmaññitaṃ vuttaṃ. Ayamahasmīti diṭṭhimaññitaṃ. Bhavissanti sassatavasena diṭṭhimaññitameva. Na bhavissanti ucchedavasena. Rūpītiādīni sassatasseva pabhedadīpanāni. Tasmāti yasmā maññitaṃ ābādhaṃ antodosanikantanavasena rogo ceva gaṇḍo ca sallañca, tasmā. Iñjitantiādīni yasmā imehi kilesehi sattā iñjanti ceva phandanti ca papañcitā ca honti pamattākārapattā, tasmā tesaṃ ākāradassanatthaṃ vuttāni.
மானக³தவாரே பன மானஸ்ஸ க³தங் மானக³தங், மானபவத்தீதி அத்தோ². மானோயேவ மானக³தங் கூ³த²க³தங் முத்தக³தங் விய. தத்த² அஸ்மீதி இத³ங் தண்ஹாய ஸம்பயுத்தமானவஸேன வுத்தங். அயமஹமஸ்மீதி தி³ட்டி²வஸேன. நனு ச தி³ட்டி²ஸம்பயுத்தோ நாம மானோ நத்தீ²தி? ஆம நத்தி², மானஸ்ஸ பன அப்பஹீனத்தா தி³ட்டி² நாம ஹோதி. மானமூலகங் தி³ட்டி²ங் ஸந்தா⁴யேதங் வுத்தங். ஸேஸங் ஸப்³ப³த்த² உத்தானமேவாதி.
Mānagatavāre pana mānassa gataṃ mānagataṃ, mānapavattīti attho. Mānoyeva mānagataṃ gūthagataṃ muttagataṃ viya. Tattha asmīti idaṃ taṇhāya sampayuttamānavasena vuttaṃ. Ayamahamasmīti diṭṭhivasena. Nanu ca diṭṭhisampayutto nāma māno natthīti? Āma natthi, mānassa pana appahīnattā diṭṭhi nāma hoti. Mānamūlakaṃ diṭṭhiṃ sandhāyetaṃ vuttaṃ. Sesaṃ sabbattha uttānamevāti.
ஆஸீவிஸவக்³கோ³.
Āsīvisavaggo.
சதுத்தோ² பண்ணாஸகோ.
Catuttho paṇṇāsako.
ஸளாயதனஸங்யுத்தவண்ணனா நிட்டி²தா.
Saḷāyatanasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 11. யவகலாபிஸுத்தங் • 11. Yavakalāpisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 11. யவகலாபிஸுத்தவண்ணனா • 11. Yavakalāpisuttavaṇṇanā
