| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১১. যৰকলাপিসুত্তৰণ্ণনা
11. Yavakalāpisuttavaṇṇanā
২৪৮. একাদসমে যৰকলাপীতি লাযিত্ৰা ঠপিতযৰপুঞ্জো। ব্যাভঙ্গিহত্থাতি কাজহত্থা। ছহি ব্যাভঙ্গীহি হনেয্যুন্তি ছহি পুথুলকাজদণ্ডকেহি পোথেয্যুং। সত্তমোতি তেসু ছসু জনেসু যৰে পোথেত্ৰা পসিব্বকে পূরেত্ৰা আদায গতেসু অঞ্ঞো সত্তমো আগচ্ছেয্য। সুহততরা অস্সাতি যং তত্থ অৰসিট্ঠং অত্থি ভুসপলাপমত্তম্পি, তস্স গহণত্থং সুট্ঠুতরং হতা।
248. Ekādasame yavakalāpīti lāyitvā ṭhapitayavapuñjo. Byābhaṅgihatthāti kājahatthā. Chahi byābhaṅgīhi haneyyunti chahi puthulakājadaṇḍakehi potheyyuṃ. Sattamoti tesu chasu janesu yave pothetvā pasibbake pūretvā ādāya gatesu añño sattamo āgaccheyya. Suhatatarā assāti yaṃ tattha avasiṭṭhaṃ atthi bhusapalāpamattampi, tassa gahaṇatthaṃ suṭṭhutaraṃ hatā.
এৰমেৰ খোতি এত্থ চতুমহাপথো ৰিয ছ আযতনানি দট্ঠব্বানি, চতুমহাপথে নিক্খিত্তযৰকলাপী ৰিয সত্তো, ছ ব্যাভঙ্গিযো ৰিয ইট্ঠানিট্ঠমজ্ঝত্তৰসেন অট্ঠারস আরম্মণানি, সত্তমা ব্যাভঙ্গী ৰিয ভৰপত্থনা কিলেসা। যথা চতুমহাপথে ঠপিতা যৰকলাপী ছহি ব্যাভঙ্গীহি হঞ্ঞতি, এৰমিমে সত্তা অট্ঠারসহি আরম্মণদণ্ডকেহি ছসু আযতনেসু হঞ্ঞন্তি। যথা সত্তমেন সুহততরা হোন্তি, এৰং সত্তা ভৰপত্থনকিলেসেহি সুহততরা হোন্তি ভৰেমূলকং দুক্খং অনুভৰমানা।
Evameva khoti ettha catumahāpatho viya cha āyatanāni daṭṭhabbāni, catumahāpathe nikkhittayavakalāpī viya satto, cha byābhaṅgiyo viya iṭṭhāniṭṭhamajjhattavasena aṭṭhārasa ārammaṇāni, sattamā byābhaṅgī viya bhavapatthanā kilesā. Yathā catumahāpathe ṭhapitā yavakalāpī chahi byābhaṅgīhi haññati, evamime sattā aṭṭhārasahi ārammaṇadaṇḍakehi chasu āyatanesu haññanti. Yathā sattamena suhatatarā honti, evaṃ sattā bhavapatthanakilesehi suhatatarā honti bhavemūlakaṃ dukkhaṃ anubhavamānā.
ইদানি নেসং তং ভৰপত্থনকিলেসং দস্সেতুং ভূতপুব্বং, ভিক্খৰেতিআদিমাহ। তত্রাতি সুধম্মাযং ভুম্মং, সুধম্মায দেৰসভায দ্ৰারেতি অত্থো। ধম্মিকা খো দেৰাতি ধম্মিকা এতে দেৰা নাম, যেহি মাদিসং অসুরাধিপতিং গহেত্ৰা ময্হং ভেদনমত্তম্পি ন কতন্তি সন্ধায ৰদতি। অধম্মিকা দেৰাতি অধম্মিকা এতে দেৰা নাম, যে মাদিসং অসুরাধিপতিং নৰগূথসূকরং ৰিয কণ্ঠপঞ্চমেহি বন্ধনেহি বন্ধিত্ৰা নিসীদাপেন্তি। এৰং সুখুমং খো, ভিক্খৰে, ৰেপচিত্তিবন্ধনন্তি তং কির পদুমনাল়সুত্তং ৰিয মক্কটজালসুত্তং ৰিয চ সুখুমং হোতি, ছেত্তুং পন নেৰ ৰাসিযা ন ফরসুনা সক্কা। যস্মা পন চিত্তেনেৰ বজ্ঝতি, চিত্তেন মুচ্চতি, তস্মা ‘‘ৰেপচিত্তিবন্ধন’’ন্তি ৰুত্তং।
Idāni nesaṃ taṃ bhavapatthanakilesaṃ dassetuṃ bhūtapubbaṃ, bhikkhavetiādimāha. Tatrāti sudhammāyaṃ bhummaṃ, sudhammāya devasabhāya dvāreti attho. Dhammikā kho devāti dhammikā ete devā nāma, yehi mādisaṃ asurādhipatiṃ gahetvā mayhaṃ bhedanamattampi na katanti sandhāya vadati. Adhammikā devāti adhammikā ete devā nāma, ye mādisaṃ asurādhipatiṃ navagūthasūkaraṃ viya kaṇṭhapañcamehi bandhanehi bandhitvā nisīdāpenti. Evaṃ sukhumaṃ kho, bhikkhave, vepacittibandhananti taṃ kira padumanāḷasuttaṃ viya makkaṭajālasuttaṃ viya ca sukhumaṃ hoti, chettuṃ pana neva vāsiyā na pharasunā sakkā. Yasmā pana citteneva bajjhati, cittena muccati, tasmā ‘‘vepacittibandhana’’nti vuttaṃ.
ততো সুখুমতরং মারবন্ধনন্তি কিলেসবন্ধনং পনেসং ততোপি সুখুমতরং, নেৰ চক্খুস্স আপাথং গচ্ছতি, ন ইরিযাপথং নিৰারেতি। তেন হি বদ্ধা সত্তা পথৰিতলেপি আকাসেপি যোজনসতম্পি যোজনসহস্সম্পি গচ্ছন্তিপি আগচ্ছন্তিপি। ছিজ্জমানং পনেতং ঞাণেনেৰ ছিজ্জতি, ন অঞ্ঞেনাতি ‘‘ঞাণমোক্খং বন্ধন’’ন্তিপি ৰুচ্চতি।
Tato sukhumataraṃ mārabandhananti kilesabandhanaṃ panesaṃ tatopi sukhumataraṃ, neva cakkhussa āpāthaṃ gacchati, na iriyāpathaṃ nivāreti. Tena hi baddhā sattā pathavitalepi ākāsepi yojanasatampi yojanasahassampi gacchantipi āgacchantipi. Chijjamānaṃ panetaṃ ñāṇeneva chijjati, na aññenāti ‘‘ñāṇamokkhaṃ bandhana’’ntipi vuccati.
মঞ্ঞমানোতি তণ্হাদিট্ঠিমানানং ৰসেন খন্ধে মঞ্ঞন্তো। বদ্ধো মারস্সাতি মারবন্ধনেন বদ্ধো। করণত্থে ৰা এতং সামিৰচনং, কিলেসমারেন বদ্ধোতি অত্থো। মুত্তো পাপিমতোতি মারস্স বন্ধনেন মুত্তো। করণত্থেযেৰ ৰা ইদং সামিৰচনং, পাপিমতা কিলেসবন্ধনেন মুত্তোতি অত্থো।
Maññamānoti taṇhādiṭṭhimānānaṃ vasena khandhe maññanto. Baddho mārassāti mārabandhanena baddho. Karaṇatthe vā etaṃ sāmivacanaṃ, kilesamārena baddhoti attho. Mutto pāpimatoti mārassa bandhanena mutto. Karaṇattheyeva vā idaṃ sāmivacanaṃ, pāpimatā kilesabandhanena muttoti attho.
অস্মীতি পদেন তণ্হামঞ্ঞিতং ৰুত্তং। অযমহস্মীতি দিট্ঠিমঞ্ঞিতং। ভৰিস্সন্তি সস্সতৰসেন দিট্ঠিমঞ্ঞিতমেৰ। ন ভৰিস্সন্তি উচ্ছেদৰসেন। রূপীতিআদীনি সস্সতস্সেৰ পভেদদীপনানি। তস্মাতি যস্মা মঞ্ঞিতং আবাধং অন্তোদোসনিকন্তনৰসেন রোগো চেৰ গণ্ডো চ সল্লঞ্চ, তস্মা। ইঞ্জিতন্তিআদীনি যস্মা ইমেহি কিলেসেহি সত্তা ইঞ্জন্তি চেৰ ফন্দন্তি চ পপঞ্চিতা চ হোন্তি পমত্তাকারপত্তা, তস্মা তেসং আকারদস্সনত্থং ৰুত্তানি।
Asmīti padena taṇhāmaññitaṃ vuttaṃ. Ayamahasmīti diṭṭhimaññitaṃ. Bhavissanti sassatavasena diṭṭhimaññitameva. Na bhavissanti ucchedavasena. Rūpītiādīni sassatasseva pabhedadīpanāni. Tasmāti yasmā maññitaṃ ābādhaṃ antodosanikantanavasena rogo ceva gaṇḍo ca sallañca, tasmā. Iñjitantiādīni yasmā imehi kilesehi sattā iñjanti ceva phandanti ca papañcitā ca honti pamattākārapattā, tasmā tesaṃ ākāradassanatthaṃ vuttāni.
মানগতৰারে পন মানস্স গতং মানগতং, মানপৰত্তীতি অত্থো। মানোযেৰ মানগতং গূথগতং মুত্তগতং ৰিয। তত্থ অস্মীতি ইদং তণ্হায সম্পযুত্তমানৰসেন ৰুত্তং। অযমহমস্মীতি দিট্ঠিৰসেন। ননু চ দিট্ঠিসম্পযুত্তো নাম মানো নত্থীতি? আম নত্থি, মানস্স পন অপ্পহীনত্তা দিট্ঠি নাম হোতি। মানমূলকং দিট্ঠিং সন্ধাযেতং ৰুত্তং। সেসং সব্বত্থ উত্তানমেৰাতি।
Mānagatavāre pana mānassa gataṃ mānagataṃ, mānapavattīti attho. Mānoyeva mānagataṃ gūthagataṃ muttagataṃ viya. Tattha asmīti idaṃ taṇhāya sampayuttamānavasena vuttaṃ. Ayamahamasmīti diṭṭhivasena. Nanu ca diṭṭhisampayutto nāma māno natthīti? Āma natthi, mānassa pana appahīnattā diṭṭhi nāma hoti. Mānamūlakaṃ diṭṭhiṃ sandhāyetaṃ vuttaṃ. Sesaṃ sabbattha uttānamevāti.
আসীৰিসৰগ্গো।
Āsīvisavaggo.
চতুত্থো পণ্ণাসকো।
Catuttho paṇṇāsako.
সল়াযতনসংযুত্তৰণ্ণনা নিট্ঠিতা।
Saḷāyatanasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১১. যৰকলাপিসুত্তং • 11. Yavakalāpisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১১. যৰকলাপিসুত্তৰণ্ণনা • 11. Yavakalāpisuttavaṇṇanā
