| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೧೧. ಯವಕಲಾಪಿಸುತ್ತವಣ್ಣನಾ
11. Yavakalāpisuttavaṇṇanā
೨೪೮. ಏಕಾದಸಮೇ ಯವಕಲಾಪೀತಿ ಲಾಯಿತ್ವಾ ಠಪಿತಯವಪುಞ್ಜೋ। ಬ್ಯಾಭಙ್ಗಿಹತ್ಥಾತಿ ಕಾಜಹತ್ಥಾ। ಛಹಿ ಬ್ಯಾಭಙ್ಗೀಹಿ ಹನೇಯ್ಯುನ್ತಿ ಛಹಿ ಪುಥುಲಕಾಜದಣ್ಡಕೇಹಿ ಪೋಥೇಯ್ಯುಂ। ಸತ್ತಮೋತಿ ತೇಸು ಛಸು ಜನೇಸು ಯವೇ ಪೋಥೇತ್ವಾ ಪಸಿಬ್ಬಕೇ ಪೂರೇತ್ವಾ ಆದಾಯ ಗತೇಸು ಅಞ್ಞೋ ಸತ್ತಮೋ ಆಗಚ್ಛೇಯ್ಯ। ಸುಹತತರಾ ಅಸ್ಸಾತಿ ಯಂ ತತ್ಥ ಅವಸಿಟ್ಠಂ ಅತ್ಥಿ ಭುಸಪಲಾಪಮತ್ತಮ್ಪಿ, ತಸ್ಸ ಗಹಣತ್ಥಂ ಸುಟ್ಠುತರಂ ಹತಾ।
248. Ekādasame yavakalāpīti lāyitvā ṭhapitayavapuñjo. Byābhaṅgihatthāti kājahatthā. Chahi byābhaṅgīhi haneyyunti chahi puthulakājadaṇḍakehi potheyyuṃ. Sattamoti tesu chasu janesu yave pothetvā pasibbake pūretvā ādāya gatesu añño sattamo āgaccheyya. Suhatatarā assāti yaṃ tattha avasiṭṭhaṃ atthi bhusapalāpamattampi, tassa gahaṇatthaṃ suṭṭhutaraṃ hatā.
ಏವಮೇವ ಖೋತಿ ಏತ್ಥ ಚತುಮಹಾಪಥೋ ವಿಯ ಛ ಆಯತನಾನಿ ದಟ್ಠಬ್ಬಾನಿ, ಚತುಮಹಾಪಥೇ ನಿಕ್ಖಿತ್ತಯವಕಲಾಪೀ ವಿಯ ಸತ್ತೋ, ಛ ಬ್ಯಾಭಙ್ಗಿಯೋ ವಿಯ ಇಟ್ಠಾನಿಟ್ಠಮಜ್ಝತ್ತವಸೇನ ಅಟ್ಠಾರಸ ಆರಮ್ಮಣಾನಿ, ಸತ್ತಮಾ ಬ್ಯಾಭಙ್ಗೀ ವಿಯ ಭವಪತ್ಥನಾ ಕಿಲೇಸಾ। ಯಥಾ ಚತುಮಹಾಪಥೇ ಠಪಿತಾ ಯವಕಲಾಪೀ ಛಹಿ ಬ್ಯಾಭಙ್ಗೀಹಿ ಹಞ್ಞತಿ, ಏವಮಿಮೇ ಸತ್ತಾ ಅಟ್ಠಾರಸಹಿ ಆರಮ್ಮಣದಣ್ಡಕೇಹಿ ಛಸು ಆಯತನೇಸು ಹಞ್ಞನ್ತಿ। ಯಥಾ ಸತ್ತಮೇನ ಸುಹತತರಾ ಹೋನ್ತಿ, ಏವಂ ಸತ್ತಾ ಭವಪತ್ಥನಕಿಲೇಸೇಹಿ ಸುಹತತರಾ ಹೋನ್ತಿ ಭವೇಮೂಲಕಂ ದುಕ್ಖಂ ಅನುಭವಮಾನಾ।
Evameva khoti ettha catumahāpatho viya cha āyatanāni daṭṭhabbāni, catumahāpathe nikkhittayavakalāpī viya satto, cha byābhaṅgiyo viya iṭṭhāniṭṭhamajjhattavasena aṭṭhārasa ārammaṇāni, sattamā byābhaṅgī viya bhavapatthanā kilesā. Yathā catumahāpathe ṭhapitā yavakalāpī chahi byābhaṅgīhi haññati, evamime sattā aṭṭhārasahi ārammaṇadaṇḍakehi chasu āyatanesu haññanti. Yathā sattamena suhatatarā honti, evaṃ sattā bhavapatthanakilesehi suhatatarā honti bhavemūlakaṃ dukkhaṃ anubhavamānā.
ಇದಾನಿ ನೇಸಂ ತಂ ಭವಪತ್ಥನಕಿಲೇಸಂ ದಸ್ಸೇತುಂ ಭೂತಪುಬ್ಬಂ, ಭಿಕ್ಖವೇತಿಆದಿಮಾಹ। ತತ್ರಾತಿ ಸುಧಮ್ಮಾಯಂ ಭುಮ್ಮಂ, ಸುಧಮ್ಮಾಯ ದೇವಸಭಾಯ ದ್ವಾರೇತಿ ಅತ್ಥೋ। ಧಮ್ಮಿಕಾ ಖೋ ದೇವಾತಿ ಧಮ್ಮಿಕಾ ಏತೇ ದೇವಾ ನಾಮ, ಯೇಹಿ ಮಾದಿಸಂ ಅಸುರಾಧಿಪತಿಂ ಗಹೇತ್ವಾ ಮಯ್ಹಂ ಭೇದನಮತ್ತಮ್ಪಿ ನ ಕತನ್ತಿ ಸನ್ಧಾಯ ವದತಿ। ಅಧಮ್ಮಿಕಾ ದೇವಾತಿ ಅಧಮ್ಮಿಕಾ ಏತೇ ದೇವಾ ನಾಮ, ಯೇ ಮಾದಿಸಂ ಅಸುರಾಧಿಪತಿಂ ನವಗೂಥಸೂಕರಂ ವಿಯ ಕಣ್ಠಪಞ್ಚಮೇಹಿ ಬನ್ಧನೇಹಿ ಬನ್ಧಿತ್ವಾ ನಿಸೀದಾಪೇನ್ತಿ। ಏವಂ ಸುಖುಮಂ ಖೋ, ಭಿಕ್ಖವೇ, ವೇಪಚಿತ್ತಿಬನ್ಧನನ್ತಿ ತಂ ಕಿರ ಪದುಮನಾಳಸುತ್ತಂ ವಿಯ ಮಕ್ಕಟಜಾಲಸುತ್ತಂ ವಿಯ ಚ ಸುಖುಮಂ ಹೋತಿ, ಛೇತ್ತುಂ ಪನ ನೇವ ವಾಸಿಯಾ ನ ಫರಸುನಾ ಸಕ್ಕಾ। ಯಸ್ಮಾ ಪನ ಚಿತ್ತೇನೇವ ಬಜ್ಝತಿ, ಚಿತ್ತೇನ ಮುಚ್ಚತಿ, ತಸ್ಮಾ ‘‘ವೇಪಚಿತ್ತಿಬನ್ಧನ’’ನ್ತಿ ವುತ್ತಂ।
Idāni nesaṃ taṃ bhavapatthanakilesaṃ dassetuṃ bhūtapubbaṃ, bhikkhavetiādimāha. Tatrāti sudhammāyaṃ bhummaṃ, sudhammāya devasabhāya dvāreti attho. Dhammikā kho devāti dhammikā ete devā nāma, yehi mādisaṃ asurādhipatiṃ gahetvā mayhaṃ bhedanamattampi na katanti sandhāya vadati. Adhammikā devāti adhammikā ete devā nāma, ye mādisaṃ asurādhipatiṃ navagūthasūkaraṃ viya kaṇṭhapañcamehi bandhanehi bandhitvā nisīdāpenti. Evaṃ sukhumaṃ kho, bhikkhave, vepacittibandhananti taṃ kira padumanāḷasuttaṃ viya makkaṭajālasuttaṃ viya ca sukhumaṃ hoti, chettuṃ pana neva vāsiyā na pharasunā sakkā. Yasmā pana citteneva bajjhati, cittena muccati, tasmā ‘‘vepacittibandhana’’nti vuttaṃ.
ತತೋ ಸುಖುಮತರಂ ಮಾರಬನ್ಧನನ್ತಿ ಕಿಲೇಸಬನ್ಧನಂ ಪನೇಸಂ ತತೋಪಿ ಸುಖುಮತರಂ, ನೇವ ಚಕ್ಖುಸ್ಸ ಆಪಾಥಂ ಗಚ್ಛತಿ, ನ ಇರಿಯಾಪಥಂ ನಿವಾರೇತಿ। ತೇನ ಹಿ ಬದ್ಧಾ ಸತ್ತಾ ಪಥವಿತಲೇಪಿ ಆಕಾಸೇಪಿ ಯೋಜನಸತಮ್ಪಿ ಯೋಜನಸಹಸ್ಸಮ್ಪಿ ಗಚ್ಛನ್ತಿಪಿ ಆಗಚ್ಛನ್ತಿಪಿ। ಛಿಜ್ಜಮಾನಂ ಪನೇತಂ ಞಾಣೇನೇವ ಛಿಜ್ಜತಿ, ನ ಅಞ್ಞೇನಾತಿ ‘‘ಞಾಣಮೋಕ್ಖಂ ಬನ್ಧನ’’ನ್ತಿಪಿ ವುಚ್ಚತಿ।
Tato sukhumataraṃ mārabandhananti kilesabandhanaṃ panesaṃ tatopi sukhumataraṃ, neva cakkhussa āpāthaṃ gacchati, na iriyāpathaṃ nivāreti. Tena hi baddhā sattā pathavitalepi ākāsepi yojanasatampi yojanasahassampi gacchantipi āgacchantipi. Chijjamānaṃ panetaṃ ñāṇeneva chijjati, na aññenāti ‘‘ñāṇamokkhaṃ bandhana’’ntipi vuccati.
ಮಞ್ಞಮಾನೋತಿ ತಣ್ಹಾದಿಟ್ಠಿಮಾನಾನಂ ವಸೇನ ಖನ್ಧೇ ಮಞ್ಞನ್ತೋ। ಬದ್ಧೋ ಮಾರಸ್ಸಾತಿ ಮಾರಬನ್ಧನೇನ ಬದ್ಧೋ। ಕರಣತ್ಥೇ ವಾ ಏತಂ ಸಾಮಿವಚನಂ, ಕಿಲೇಸಮಾರೇನ ಬದ್ಧೋತಿ ಅತ್ಥೋ। ಮುತ್ತೋ ಪಾಪಿಮತೋತಿ ಮಾರಸ್ಸ ಬನ್ಧನೇನ ಮುತ್ತೋ। ಕರಣತ್ಥೇಯೇವ ವಾ ಇದಂ ಸಾಮಿವಚನಂ, ಪಾಪಿಮತಾ ಕಿಲೇಸಬನ್ಧನೇನ ಮುತ್ತೋತಿ ಅತ್ಥೋ।
Maññamānoti taṇhādiṭṭhimānānaṃ vasena khandhe maññanto. Baddho mārassāti mārabandhanena baddho. Karaṇatthe vā etaṃ sāmivacanaṃ, kilesamārena baddhoti attho. Mutto pāpimatoti mārassa bandhanena mutto. Karaṇattheyeva vā idaṃ sāmivacanaṃ, pāpimatā kilesabandhanena muttoti attho.
ಅಸ್ಮೀತಿ ಪದೇನ ತಣ್ಹಾಮಞ್ಞಿತಂ ವುತ್ತಂ। ಅಯಮಹಸ್ಮೀತಿ ದಿಟ್ಠಿಮಞ್ಞಿತಂ। ಭವಿಸ್ಸನ್ತಿ ಸಸ್ಸತವಸೇನ ದಿಟ್ಠಿಮಞ್ಞಿತಮೇವ। ನ ಭವಿಸ್ಸನ್ತಿ ಉಚ್ಛೇದವಸೇನ। ರೂಪೀತಿಆದೀನಿ ಸಸ್ಸತಸ್ಸೇವ ಪಭೇದದೀಪನಾನಿ। ತಸ್ಮಾತಿ ಯಸ್ಮಾ ಮಞ್ಞಿತಂ ಆಬಾಧಂ ಅನ್ತೋದೋಸನಿಕನ್ತನವಸೇನ ರೋಗೋ ಚೇವ ಗಣ್ಡೋ ಚ ಸಲ್ಲಞ್ಚ, ತಸ್ಮಾ। ಇಞ್ಜಿತನ್ತಿಆದೀನಿ ಯಸ್ಮಾ ಇಮೇಹಿ ಕಿಲೇಸೇಹಿ ಸತ್ತಾ ಇಞ್ಜನ್ತಿ ಚೇವ ಫನ್ದನ್ತಿ ಚ ಪಪಞ್ಚಿತಾ ಚ ಹೋನ್ತಿ ಪಮತ್ತಾಕಾರಪತ್ತಾ, ತಸ್ಮಾ ತೇಸಂ ಆಕಾರದಸ್ಸನತ್ಥಂ ವುತ್ತಾನಿ।
Asmīti padena taṇhāmaññitaṃ vuttaṃ. Ayamahasmīti diṭṭhimaññitaṃ. Bhavissanti sassatavasena diṭṭhimaññitameva. Na bhavissanti ucchedavasena. Rūpītiādīni sassatasseva pabhedadīpanāni. Tasmāti yasmā maññitaṃ ābādhaṃ antodosanikantanavasena rogo ceva gaṇḍo ca sallañca, tasmā. Iñjitantiādīni yasmā imehi kilesehi sattā iñjanti ceva phandanti ca papañcitā ca honti pamattākārapattā, tasmā tesaṃ ākāradassanatthaṃ vuttāni.
ಮಾನಗತವಾರೇ ಪನ ಮಾನಸ್ಸ ಗತಂ ಮಾನಗತಂ, ಮಾನಪವತ್ತೀತಿ ಅತ್ಥೋ। ಮಾನೋಯೇವ ಮಾನಗತಂ ಗೂಥಗತಂ ಮುತ್ತಗತಂ ವಿಯ। ತತ್ಥ ಅಸ್ಮೀತಿ ಇದಂ ತಣ್ಹಾಯ ಸಮ್ಪಯುತ್ತಮಾನವಸೇನ ವುತ್ತಂ। ಅಯಮಹಮಸ್ಮೀತಿ ದಿಟ್ಠಿವಸೇನ। ನನು ಚ ದಿಟ್ಠಿಸಮ್ಪಯುತ್ತೋ ನಾಮ ಮಾನೋ ನತ್ಥೀತಿ? ಆಮ ನತ್ಥಿ, ಮಾನಸ್ಸ ಪನ ಅಪ್ಪಹೀನತ್ತಾ ದಿಟ್ಠಿ ನಾಮ ಹೋತಿ। ಮಾನಮೂಲಕಂ ದಿಟ್ಠಿಂ ಸನ್ಧಾಯೇತಂ ವುತ್ತಂ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
Mānagatavāre pana mānassa gataṃ mānagataṃ, mānapavattīti attho. Mānoyeva mānagataṃ gūthagataṃ muttagataṃ viya. Tattha asmīti idaṃ taṇhāya sampayuttamānavasena vuttaṃ. Ayamahamasmīti diṭṭhivasena. Nanu ca diṭṭhisampayutto nāma māno natthīti? Āma natthi, mānassa pana appahīnattā diṭṭhi nāma hoti. Mānamūlakaṃ diṭṭhiṃ sandhāyetaṃ vuttaṃ. Sesaṃ sabbattha uttānamevāti.
ಆಸೀವಿಸವಗ್ಗೋ।
Āsīvisavaggo.
ಚತುತ್ಥೋ ಪಣ್ಣಾಸಕೋ।
Catuttho paṇṇāsako.
ಸಳಾಯತನಸಂಯುತ್ತವಣ್ಣನಾ ನಿಟ್ಠಿತಾ।
Saḷāyatanasaṃyuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೧. ಯವಕಲಾಪಿಸುತ್ತಂ • 11. Yavakalāpisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧೧. ಯವಕಲಾಪಿಸುತ್ತವಣ್ಣನಾ • 11. Yavakalāpisuttavaṇṇanā
