| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
5. යෙභුය්‍යසිකා
5. Yebhuyyasikā
202. තෙන ඛො පන සමයෙන භික්‌ඛූ සඞ්‌ඝමජ්‌ඣෙ භණ්‌ඩනජාතා කලහජාතා විවාදාපන්‌නා අඤ්‌ඤමඤ්‌ඤං මුඛසත්‌තීහි විතුදන්‌තා විහරන්‌ති, න සක්‌කොන්‌ති තං අධිකරණං වූපසමෙතුං. භගවතො එතමත්‌ථං ආරොචෙසුං. ‘‘අනුජානාමි, භික්‌ඛවෙ, එවරූපං අධිකරණං යෙභුය්‍යසිකාය වූපසමෙතුං. පඤ්‌චහඞ්‌ගෙහි සමන්‌නාගතො භික්‌ඛු සලාකග්‌ගාහාපකො සම්‌මන්‌නිතබ්‌බො – යො න ඡන්‌දාගතිං ගච්‌ඡෙය්‍ය, න දොසාගතිං ගච්‌ඡෙය්‍ය, න මොහාගතිං ගච්‌ඡෙය්‍ය, න භයාගතිං ගච්‌ඡෙය්‍ය, ගහිතාගහිතුඤ්‌ච ජානෙය්‍ය. එවඤ්‌ච පන, භික්‌ඛවෙ, සම්‌මන්‌නිතබ්‌බො. පඨමං භික්‌ඛු යාචිතබ්‌බො, යාචිත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
202. Tena kho pana samayena bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, na sakkonti taṃ adhikaraṇaṃ vūpasametuṃ. Bhagavato etamatthaṃ ārocesuṃ. ‘‘Anujānāmi, bhikkhave, evarūpaṃ adhikaraṇaṃ yebhuyyasikāya vūpasametuṃ. Pañcahaṅgehi samannāgato bhikkhu salākaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gahitāgahituñca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –
203. ‘‘සුණාතු මෙ, භන්‌තෙ, සඞ්‌ඝො. යදි සඞ්‌ඝස්‌ස පත්‌තකල්‌ලං, සඞ්‌ඝො ඉත්‌ථන්‌නාමං භික්‌ඛුං සලාකග්‌ගාහාපකං සම්‌මන්‌නෙය්‍ය. එසා ඤත්‌ති.
203. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ salākaggāhāpakaṃ sammanneyya. Esā ñatti.
‘‘සුණාතු මෙ, භන්‌තෙ, සඞ්‌ඝො. සඞ්‌ඝො ඉත්‌ථන්‌නාමං භික්‌ඛුං සලාකග්‌ගාහාපකං සම්‌මන්‌නති. යස්‌සායස්‌මතො ඛමති ඉත්‌ථන්‌නාමස්‌ස භික්‌ඛුනො සලාකග්‌ගාහාපකස්‌ස සම්‌මුති, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Saṅgho itthannāmaṃ bhikkhuṃ salākaggāhāpakaṃ sammannati. Yassāyasmato khamati itthannāmassa bhikkhuno salākaggāhāpakassa sammuti, so tuṇhassa; yassa nakkhamati, so bhāseyya.
‘‘සම්‌මතො සඞ්‌ඝෙන ඉත්‌ථන්‌නාමො භික්‌ඛු සලාකග්‌ගාහාපකො. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Sammato saṅghena itthannāmo bhikkhu salākaggāhāpako. Khamati saṅghassa, tasmā tuṇhī, evametaṃ dhārayāmī’’ti.
204. ‘‘දසයිමෙ , භික්‌ඛවෙ, අධම්‌මිකා සලාකග්‌ගාහා, දස ධම්‌මිකා 1. කතමෙ දස අධම්‌මිකා සලාකග්‌ගාහා? ඔරමත්‌තකඤ්‌ච අධිකරණං හොති, න ච ගතිගතං හොති, න ච සරිතසාරිතං හොති, ජානාති අධම්‌මවාදී බහුතරාති, අප්‌පෙව නාම අධම්‌මවාදී බහුතරා අස්‌සූති, ජානාති සඞ්‌ඝො භිජ්‌ජිස්‌සතීති, අප්‌පෙව නාම සඞ්‌ඝො භිජ්‌ජෙය්‍යාති, අධම්‌මෙන ගණ්‌හන්‌ති, වග්‌ගා ගණ්‌හන්‌ති, න ච යථාදිට්‌ඨියා ගණ්‌හන්‌ති – ඉමෙ දස අධම්‌මිකා සලාකග්‌ගාහා.
204. ‘‘Dasayime , bhikkhave, adhammikā salākaggāhā, dasa dhammikā 2. Katame dasa adhammikā salākaggāhā? Oramattakañca adhikaraṇaṃ hoti, na ca gatigataṃ hoti, na ca saritasāritaṃ hoti, jānāti adhammavādī bahutarāti, appeva nāma adhammavādī bahutarā assūti, jānāti saṅgho bhijjissatīti, appeva nāma saṅgho bhijjeyyāti, adhammena gaṇhanti, vaggā gaṇhanti, na ca yathādiṭṭhiyā gaṇhanti – ime dasa adhammikā salākaggāhā.
‘‘කතමෙ දස ධම්‌මිකා සලාකග්‌ගාහා? න ච ඔරමත්‌තකං අධිකරණං හොති, ගතිගතඤ්‌ච හොති, සරිතසාරිතඤ්‌ච හොති, ජානාති ධම්‌මවාදී බහුතරාති, අප්‌පෙව නාම ධම්‌මවාදී බහුතරා අස්‌සූති, ජානාති සඞ්‌ඝො න භිජ්‌ජිස්‌සතීති, අප්‌පෙව නාම සඞ්‌ඝො න භිජ්‌ජෙය්‍යාති, ධම්‌මෙන ගණ්‌හන්‌ති, සමග්‌ගා ගණ්‌හන්‌ති, යථාදිට්‌ඨියා ච ගණ්‌හන්‌ති – ඉමෙ දස ධම්‌මිකා සලාකග්‌ගාහා’’ති.
‘‘Katame dasa dhammikā salākaggāhā? Na ca oramattakaṃ adhikaraṇaṃ hoti, gatigatañca hoti, saritasāritañca hoti, jānāti dhammavādī bahutarāti, appeva nāma dhammavādī bahutarā assūti, jānāti saṅgho na bhijjissatīti, appeva nāma saṅgho na bhijjeyyāti, dhammena gaṇhanti, samaggā gaṇhanti, yathādiṭṭhiyā ca gaṇhanti – ime dasa dhammikā salākaggāhā’’ti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / යෙභුය්‍යසිකාකථා • Yebhuyyasikākathā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සතිවිනයකථාදිවණ්‌ණනා • Sativinayakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. යෙභුය්‍යසිකාකථා • 5. Yebhuyyasikākathā
