| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
யேபு⁴ய்யஸிகாகதா²
Yebhuyyasikākathā
202. யேபு⁴ய்யஸிகாய வூபஸமேதுந்தி எத்த² யஸ்ஸா கிரியாய த⁴ம்மவாதி³னோ ப³ஹுதரா, ஏஸா யேபு⁴ய்யஸிகா நாம.
202.Yebhuyyasikāya vūpasametunti ettha yassā kiriyāya dhammavādino bahutarā, esā yebhuyyasikā nāma.
204. அத⁴ம்மிகஸலாகக்³கா³ஹேஸு ஓரமத்தகந்தி பரித்தங் அப்பமத்தகங் ப⁴ண்ட³னமத்தமேவ. ந ச க³திக³தந்தி த்³வே தயோ ஆவாஸே ந க³தங், தத்த² தத்தே²வ வா த்³வத்திக்க²த்துங் அவினிச்சி²தங். ந ச ஸரிதஸாரிதந்தி த்³வத்திக்க²த்துங் தேஹி பி⁴க்கூ²ஹி ஸயங் ஸரிதங் வா அஞ்ஞேஹி ஸாரிதங் வா ந ஹோதி. ஜானாதீதி ஸலாகங் கா³ஹெந்தோ ஜானாதி ‘‘அத⁴ம்மவாதீ³ ப³ஹுதரா’’தி. அப்பேவ நாமாதி இமினா நீஹாரேன ஸலாகாய கா³ஹியமானாய ‘‘அபி நாம அத⁴ம்மவாதி³னோ ப³ஹுதரா அஸ்ஸூ’’தி அயமஸ்ஸ அஜ்ஜா²ஸயோ ஹோதி. அபரேஸுபி த்³வீஸு ஏஸேவ நயோ.
204. Adhammikasalākaggāhesu oramattakanti parittaṃ appamattakaṃ bhaṇḍanamattameva. Na ca gatigatanti dve tayo āvāse na gataṃ, tattha tattheva vā dvattikkhattuṃ avinicchitaṃ. Na ca saritasāritanti dvattikkhattuṃ tehi bhikkhūhi sayaṃ saritaṃ vā aññehi sāritaṃ vā na hoti. Jānātīti salākaṃ gāhento jānāti ‘‘adhammavādī bahutarā’’ti. Appeva nāmāti iminā nīhārena salākāya gāhiyamānāya ‘‘api nāma adhammavādino bahutarā assū’’ti ayamassa ajjhāsayo hoti. Aparesupi dvīsu eseva nayo.
அத⁴ம்மேன க³ண்ஹந்தீதி அத⁴ம்மவாதி³னோ ‘‘ஏவங் மயங் ப³ஹூ ப⁴விஸ்ஸாமா’’தி த்³வே த்³வே ஸலாகாயோ க³ண்ஹந்தி. வக்³கா³ க³ண்ஹந்தீதி த்³வே த⁴ம்மவாதி³னோ ஏகங் த⁴ம்மவாதி³ஸலாகங் க³ண்ஹந்தி ‘‘ஏவங் த⁴ம்மவாதி³னோ ந ப³ஹூ ப⁴விஸ்ஸந்தீ’’தி மஞ்ஞமானா. ந ச யதா²தி³ட்டி²யா க³ண்ஹந்தீதி த⁴ம்மவாதி³னோ ஹுத்வா ‘‘ப³லவபக்க²ங் ப⁴ஜிஸ்ஸாமா’’தி அத⁴ம்மவாதி³ஸலாகங் க³ண்ஹந்தி. த⁴ம்மிகஸலாகக்³கா³ஹேஸு அயமேவத்தோ² பரிவத்தெத்வா வேதி³தப்³போ³. ஏவங் ஸலாகங் கா³ஹெத்வா ஸசே ப³ஹுதரா த⁴ம்மவாதி³னோ ஹொந்தி; யதா² தே வத³ந்தி, ஏவங் தங் அதி⁴கரணங் வூபஸமேதப்³ப³ங், ஏவங் யேபு⁴ய்யஸிகாய வூபஸந்தங் ஹோதி. அயமெத்த² ஸங்கே²போ. வித்தா²ரோ பன பரதோபி ஆக³மிஸ்ஸதி.
Adhammenagaṇhantīti adhammavādino ‘‘evaṃ mayaṃ bahū bhavissāmā’’ti dve dve salākāyo gaṇhanti. Vaggā gaṇhantīti dve dhammavādino ekaṃ dhammavādisalākaṃ gaṇhanti ‘‘evaṃ dhammavādino na bahū bhavissantī’’ti maññamānā. Na ca yathādiṭṭhiyā gaṇhantīti dhammavādino hutvā ‘‘balavapakkhaṃ bhajissāmā’’ti adhammavādisalākaṃ gaṇhanti. Dhammikasalākaggāhesu ayamevattho parivattetvā veditabbo. Evaṃ salākaṃ gāhetvā sace bahutarā dhammavādino honti; yathā te vadanti, evaṃ taṃ adhikaraṇaṃ vūpasametabbaṃ, evaṃ yebhuyyasikāya vūpasantaṃ hoti. Ayamettha saṅkhepo. Vitthāro pana paratopi āgamissati.
யேபு⁴ய்யஸிகாகதா² நிட்டி²தா.
Yebhuyyasikākathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 5. யேபு⁴ய்யஸிகா • 5. Yebhuyyasikā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸதிவினயகதா²தி³வண்ணனா • Sativinayakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. யேபு⁴ய்யஸிகாகதா² • 5. Yebhuyyasikākathā
