| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
যেভুয্যসিকাকথা
Yebhuyyasikākathā
২০২. যেভুয্যসিকায ৰূপসমেতুন্তি এত্থ যস্সা কিরিযায ধম্মৰাদিনো বহুতরা, এসা যেভুয্যসিকা নাম।
202.Yebhuyyasikāya vūpasametunti ettha yassā kiriyāya dhammavādino bahutarā, esā yebhuyyasikā nāma.
২০৪. অধম্মিকসলাকগ্গাহেসু ওরমত্তকন্তি পরিত্তং অপ্পমত্তকং ভণ্ডনমত্তমেৰ। ন চ গতিগতন্তি দ্ৰে তযো আৰাসে ন গতং, তত্থ তত্থেৰ ৰা দ্ৰত্তিক্খত্তুং অৰিনিচ্ছিতং। ন চ সরিতসারিতন্তি দ্ৰত্তিক্খত্তুং তেহি ভিক্খূহি সযং সরিতং ৰা অঞ্ঞেহি সারিতং ৰা ন হোতি। জানাতীতি সলাকং গাহেন্তো জানাতি ‘‘অধম্মৰাদী বহুতরা’’তি। অপ্পেৰ নামাতি ইমিনা নীহারেন সলাকায গাহিযমানায ‘‘অপি নাম অধম্মৰাদিনো বহুতরা অস্সূ’’তি অযমস্স অজ্ঝাসযো হোতি। অপরেসুপি দ্ৰীসু এসেৰ নযো।
204. Adhammikasalākaggāhesu oramattakanti parittaṃ appamattakaṃ bhaṇḍanamattameva. Na ca gatigatanti dve tayo āvāse na gataṃ, tattha tattheva vā dvattikkhattuṃ avinicchitaṃ. Na ca saritasāritanti dvattikkhattuṃ tehi bhikkhūhi sayaṃ saritaṃ vā aññehi sāritaṃ vā na hoti. Jānātīti salākaṃ gāhento jānāti ‘‘adhammavādī bahutarā’’ti. Appeva nāmāti iminā nīhārena salākāya gāhiyamānāya ‘‘api nāma adhammavādino bahutarā assū’’ti ayamassa ajjhāsayo hoti. Aparesupi dvīsu eseva nayo.
অধম্মেন গণ্হন্তীতি অধম্মৰাদিনো ‘‘এৰং মযং বহূ ভৰিস্সামা’’তি দ্ৰে দ্ৰে সলাকাযো গণ্হন্তি। ৰগ্গা গণ্হন্তীতি দ্ৰে ধম্মৰাদিনো একং ধম্মৰাদিসলাকং গণ্হন্তি ‘‘এৰং ধম্মৰাদিনো ন বহূ ভৰিস্সন্তী’’তি মঞ্ঞমানা। ন চ যথাদিট্ঠিযা গণ্হন্তীতি ধম্মৰাদিনো হুত্ৰা ‘‘বলৰপক্খং ভজিস্সামা’’তি অধম্মৰাদিসলাকং গণ্হন্তি। ধম্মিকসলাকগ্গাহেসু অযমেৰত্থো পরিৰত্তেত্ৰা ৰেদিতব্বো। এৰং সলাকং গাহেত্ৰা সচে বহুতরা ধম্মৰাদিনো হোন্তি; যথা তে ৰদন্তি, এৰং তং অধিকরণং ৰূপসমেতব্বং, এৰং যেভুয্যসিকায ৰূপসন্তং হোতি। অযমেত্থ সঙ্খেপো। ৰিত্থারো পন পরতোপি আগমিস্সতি।
Adhammenagaṇhantīti adhammavādino ‘‘evaṃ mayaṃ bahū bhavissāmā’’ti dve dve salākāyo gaṇhanti. Vaggā gaṇhantīti dve dhammavādino ekaṃ dhammavādisalākaṃ gaṇhanti ‘‘evaṃ dhammavādino na bahū bhavissantī’’ti maññamānā. Na ca yathādiṭṭhiyā gaṇhantīti dhammavādino hutvā ‘‘balavapakkhaṃ bhajissāmā’’ti adhammavādisalākaṃ gaṇhanti. Dhammikasalākaggāhesu ayamevattho parivattetvā veditabbo. Evaṃ salākaṃ gāhetvā sace bahutarā dhammavādino honti; yathā te vadanti, evaṃ taṃ adhikaraṇaṃ vūpasametabbaṃ, evaṃ yebhuyyasikāya vūpasantaṃ hoti. Ayamettha saṅkhepo. Vitthāro pana paratopi āgamissati.
যেভুয্যসিকাকথা নিট্ঠিতা।
Yebhuyyasikākathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৫. যেভুয্যসিকা • 5. Yebhuyyasikā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সতিৰিনযকথাদিৰণ্ণনা • Sativinayakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. যেভুয্যসিকাকথা • 5. Yebhuyyasikākathā
