| Library / Tipiṭaka / တိပိဋက • Tipiṭaka / စူဠဝဂ္ဂ-အဋ္ဌကထာ • Cūḷavagga-aṭṭhakathā |
ယေဘုယ္ယသိကာကထာ
Yebhuyyasikākathā
၂၀၂. ယေဘုယ္ယသိကာယ ဝူပသမေတုန္တိ ဧတ္ထ ယသ္သာ ကိရိယာယ ဓမ္မဝာဒိနော ဗဟုတရာ, ဧသာ ယေဘုယ္ယသိကာ နာမ။
202.Yebhuyyasikāya vūpasametunti ettha yassā kiriyāya dhammavādino bahutarā, esā yebhuyyasikā nāma.
၂၀၄. အဓမ္မိကသလာကဂ္ဂာဟေသု ဩရမတ္တကန္တိ ပရိတ္တံ အပ္ပမတ္တကံ ဘဏ္ဍနမတ္တမေဝ။ န စ ဂတိဂတန္တိ ဒ္ဝေ တယော အာဝာသေ န ဂတံ, တတ္ထ တတ္ထေဝ ဝာ ဒ္ဝတ္တိက္ခတ္တုံ အဝိနိစ္ဆိတံ။ န စ သရိတသာရိတန္တိ ဒ္ဝတ္တိက္ခတ္တုံ တေဟိ ဘိက္ခူဟိ သယံ သရိတံ ဝာ အညေဟိ သာရိတံ ဝာ န ဟောတိ။ ဇာနာတီတိ သလာကံ ဂာဟေန္တော ဇာနာတိ ‘‘အဓမ္မဝာဒီ ဗဟုတရာ’’တိ။ အပ္ပေဝ နာမာတိ ဣမိနာ နီဟာရေန သလာကာယ ဂာဟိယမာနာယ ‘‘အပိ နာမ အဓမ္မဝာဒိနော ဗဟုတရာ အသ္သူ’’တိ အယမသ္သ အဇ္ဈာသယော ဟောတိ။ အပရေသုပိ ဒ္ဝီသု ဧသေဝ နယော။
204. Adhammikasalākaggāhesu oramattakanti parittaṃ appamattakaṃ bhaṇḍanamattameva. Na ca gatigatanti dve tayo āvāse na gataṃ, tattha tattheva vā dvattikkhattuṃ avinicchitaṃ. Na ca saritasāritanti dvattikkhattuṃ tehi bhikkhūhi sayaṃ saritaṃ vā aññehi sāritaṃ vā na hoti. Jānātīti salākaṃ gāhento jānāti ‘‘adhammavādī bahutarā’’ti. Appeva nāmāti iminā nīhārena salākāya gāhiyamānāya ‘‘api nāma adhammavādino bahutarā assū’’ti ayamassa ajjhāsayo hoti. Aparesupi dvīsu eseva nayo.
အဓမ္မေန ဂဏ္ဟန္တီတိ အဓမ္မဝာဒိနော ‘‘ဧဝံ မယံ ဗဟူ ဘဝိသ္သာမာ’’တိ ဒ္ဝေ ဒ္ဝေ သလာကာယော ဂဏ္ဟန္တိ။ ဝဂ္ဂာ ဂဏ္ဟန္တီတိ ဒ္ဝေ ဓမ္မဝာဒိနော ဧကံ ဓမ္မဝာဒိသလာကံ ဂဏ္ဟန္တိ ‘‘ဧဝံ ဓမ္မဝာဒိနော န ဗဟူ ဘဝိသ္သန္တီ’’တိ မညမာနာ။ န စ ယထာဒိဋ္ဌိယာ ဂဏ္ဟန္တီတိ ဓမ္မဝာဒိနော ဟုတ္ဝာ ‘‘ဗလဝပက္ခံ ဘဇိသ္သာမာ’’တိ အဓမ္မဝာဒိသလာကံ ဂဏ္ဟန္တိ။ ဓမ္မိကသလာကဂ္ဂာဟေသု အယမေဝတ္ထော ပရိဝတ္တေတ္ဝာ ဝေဒိတဗ္ဗော။ ဧဝံ သလာကံ ဂာဟေတ္ဝာ သစေ ဗဟုတရာ ဓမ္မဝာဒိနော ဟောန္တိ; ယထာ တေ ဝဒန္တိ, ဧဝံ တံ အဓိကရဏံ ဝူပသမေတဗ္ဗံ, ဧဝံ ယေဘုယ္ယသိကာယ ဝူပသန္တံ ဟောတိ။ အယမေတ္ထ သင္ခေပော။ ဝိတ္ထာရော ပန ပရတောပိ အာဂမိသ္သတိ။
Adhammenagaṇhantīti adhammavādino ‘‘evaṃ mayaṃ bahū bhavissāmā’’ti dve dve salākāyo gaṇhanti. Vaggā gaṇhantīti dve dhammavādino ekaṃ dhammavādisalākaṃ gaṇhanti ‘‘evaṃ dhammavādino na bahū bhavissantī’’ti maññamānā. Na ca yathādiṭṭhiyā gaṇhantīti dhammavādino hutvā ‘‘balavapakkhaṃ bhajissāmā’’ti adhammavādisalākaṃ gaṇhanti. Dhammikasalākaggāhesu ayamevattho parivattetvā veditabbo. Evaṃ salākaṃ gāhetvā sace bahutarā dhammavādino honti; yathā te vadanti, evaṃ taṃ adhikaraṇaṃ vūpasametabbaṃ, evaṃ yebhuyyasikāya vūpasantaṃ hoti. Ayamettha saṅkhepo. Vitthāro pana paratopi āgamissati.
ယေဘုယ္ယသိကာကထာ နိဋ္ဌိတာ။
Yebhuyyasikākathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / ၅. ယေဘုယ္ယသိကာ • 5. Yebhuyyasikā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / သတိဝိနယကထာဒိဝဏ္ဏနာ • Sativinayakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၅. ယေဘုယ္ယသိကာကထာ • 5. Yebhuyyasikākathā
