| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
යෙභුය්‍යසිකාකථා
Yebhuyyasikākathā
202. යෙභුය්‍යසිකාය වූපසමෙතුන්‌ති එත්‌ථ යස්‌සා කිරියාය ධම්‌මවාදිනො බහුතරා, එසා යෙභුය්‍යසිකා නාම.
202.Yebhuyyasikāya vūpasametunti ettha yassā kiriyāya dhammavādino bahutarā, esā yebhuyyasikā nāma.
204. අධම්‌මිකසලාකග්‌ගාහෙසු ඔරමත්‌තකන්‌ති පරිත්‌තං අප්‌පමත්‌තකං භණ්‌ඩනමත්‌තමෙව. න ච ගතිගතන්‌ති ද්‌වෙ තයො ආවාසෙ න ගතං, තත්‌ථ තත්‌ථෙව වා ද්‌වත්‌තික්‌ඛත්‌තුං අවිනිච්‌ඡිතං. න ච සරිතසාරිතන්‌ති ද්‌වත්‌තික්‌ඛත්‌තුං තෙහි භික්‌ඛූහි සයං සරිතං වා අඤ්‌ඤෙහි සාරිතං වා න හොති. ජානාතීති සලාකං ගාහෙන්‌තො ජානාති ‘‘අධම්‌මවාදී බහුතරා’’ති. අප්‌පෙව නාමාති ඉමිනා නීහාරෙන සලාකාය ගාහියමානාය ‘‘අපි නාම අධම්‌මවාදිනො බහුතරා අස්‌සූ’’ති අයමස්‌ස අජ්‌ඣාසයො හොති. අපරෙසුපි ද්‌වීසු එසෙව නයො.
204. Adhammikasalākaggāhesu oramattakanti parittaṃ appamattakaṃ bhaṇḍanamattameva. Na ca gatigatanti dve tayo āvāse na gataṃ, tattha tattheva vā dvattikkhattuṃ avinicchitaṃ. Na ca saritasāritanti dvattikkhattuṃ tehi bhikkhūhi sayaṃ saritaṃ vā aññehi sāritaṃ vā na hoti. Jānātīti salākaṃ gāhento jānāti ‘‘adhammavādī bahutarā’’ti. Appeva nāmāti iminā nīhārena salākāya gāhiyamānāya ‘‘api nāma adhammavādino bahutarā assū’’ti ayamassa ajjhāsayo hoti. Aparesupi dvīsu eseva nayo.
අධම්‌මෙන ගණ්‌හන්‌තීති අධම්‌මවාදිනො ‘‘එවං මයං බහූ භවිස්‌සාමා’’ති ද්‌වෙ ද්‌වෙ සලාකායො ගණ්‌හන්‌ති. වග්‌ගා ගණ්‌හන්‌තීති ද්‌වෙ ධම්‌මවාදිනො එකං ධම්‌මවාදිසලාකං ගණ්‌හන්‌ති ‘‘එවං ධම්‌මවාදිනො න බහූ භවිස්‌සන්‌තී’’ති මඤ්‌ඤමානා. න ච යථාදිට්‌ඨියා ගණ්‌හන්‌තීති ධම්‌මවාදිනො හුත්‌වා ‘‘බලවපක්‌ඛං භජිස්‌සාමා’’ති අධම්‌මවාදිසලාකං ගණ්‌හන්‌ති. ධම්‌මිකසලාකග්‌ගාහෙසු අයමෙවත්‌ථො පරිවත්‌තෙත්‌වා වෙදිතබ්‌බො. එවං සලාකං ගාහෙත්‌වා සචෙ බහුතරා ධම්‌මවාදිනො හොන්‌ති; යථා තෙ වදන්‌ති, එවං තං අධිකරණං වූපසමෙතබ්‌බං, එවං යෙභුය්‍යසිකාය වූපසන්‌තං හොති. අයමෙත්‌ථ සඞ්‌ඛෙපො. විත්‌ථාරො පන පරතොපි ආගමිස්‌සති.
Adhammenagaṇhantīti adhammavādino ‘‘evaṃ mayaṃ bahū bhavissāmā’’ti dve dve salākāyo gaṇhanti. Vaggā gaṇhantīti dve dhammavādino ekaṃ dhammavādisalākaṃ gaṇhanti ‘‘evaṃ dhammavādino na bahū bhavissantī’’ti maññamānā. Na ca yathādiṭṭhiyā gaṇhantīti dhammavādino hutvā ‘‘balavapakkhaṃ bhajissāmā’’ti adhammavādisalākaṃ gaṇhanti. Dhammikasalākaggāhesu ayamevattho parivattetvā veditabbo. Evaṃ salākaṃ gāhetvā sace bahutarā dhammavādino honti; yathā te vadanti, evaṃ taṃ adhikaraṇaṃ vūpasametabbaṃ, evaṃ yebhuyyasikāya vūpasantaṃ hoti. Ayamettha saṅkhepo. Vitthāro pana paratopi āgamissati.
යෙභුය්‍යසිකාකථා නිට්‌ඨිතා.
Yebhuyyasikākathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / 5. යෙභුය්‍යසිකා • 5. Yebhuyyasikā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සතිවිනයකථාදිවණ්‌ණනා • Sativinayakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. යෙභුය්‍යසිකාකථා • 5. Yebhuyyasikākathā
