| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
யேவாபனகவண்ணனா
Yevāpanakavaṇṇanā
யே வா பன தஸ்மிங் ஸமயே அஞ்ஞேபி அத்தி² படிச்சஸமுப்பன்னா அரூபினோ த⁴ம்மா, இமே த⁴ம்மா குஸலாதி ‘ப²ஸ்ஸோ ஹோதி…பே॰… அவிக்கே²போ ஹோதீ’தி ந கேவலங் பத³படிபாடியா உத்³தி³ட்டா² இமே பரோபண்ணாஸத⁴ம்மா ஏவ, அத² கோ² யஸ்மிங் ஸமயே காமாவசரங் திஹேதுகங் ஸோமனஸ்ஸஸஹக³தங் பட²மங் அஸங்கா²ரிகங் மஹாசித்தங் உப்பன்னங் ஹோதி, தஸ்மிங் ஸமயே யே வா பன அஞ்ஞேபி தேஹியேவ ப²ஸ்ஸாதீ³ஹி ஸம்பயுத்தா ஹுத்வா பவத்தமானா அத்தி², அத்தனோ அத்தனோ அனுரூபங் பச்சயங் படிச்ச ஸமுப்பன்னா ரூபாபா⁴வேன அரூபினோ, ஸபா⁴வதோ உபலப்³ப⁴மானா த⁴ம்மா ஸப்³பே³பி இமே த⁴ம்மா குஸலா.
Ye vā pana tasmiṃ samaye aññepi atthi paṭiccasamuppannā arūpino dhammā, ime dhammā kusalāti ‘phasso hoti…pe… avikkhepo hotī’ti na kevalaṃ padapaṭipāṭiyā uddiṭṭhā ime paropaṇṇāsadhammā eva, atha kho yasmiṃ samaye kāmāvacaraṃ tihetukaṃ somanassasahagataṃ paṭhamaṃ asaṅkhārikaṃ mahācittaṃ uppannaṃ hoti, tasmiṃ samaye ye vā pana aññepi tehiyeva phassādīhi sampayuttā hutvā pavattamānā atthi, attano attano anurūpaṃ paccayaṃ paṭicca samuppannā rūpābhāvena arūpino, sabhāvato upalabbhamānā dhammā sabbepi ime dhammā kusalā.
எத்தாவதா சித்தங்க³வஸேன பாளியங் ஆருள்ஹே பரோபண்ணாஸத⁴ம்மே தீ³பெத்வா யேவாபனகவஸேன அபரேபி நவ த⁴ம்மே த⁴ம்மராஜா தீ³பேதி. தேஸு தேஸு ஹி ஸுத்தபதே³ஸு ‘ச²ந்தோ³ அதி⁴மொக்கோ² மனஸிகாரோ தத்ரமஜ்ஜ²த்ததா கருணா முதி³தா காயது³ச்சரிதவிரதி வசீது³ச்சரிதவிரதி மிச்சா²ஜீவவிரதீ’தி இமே நவ த⁴ம்மா பஞ்ஞாயந்தி. இமஸ்மிஞ்சாபி மஹாசித்தே கத்துகம்யதாகுஸலத⁴ம்மச்ச²ந்தோ³ அத்தி², சித்தங்க³வஸேன பன பாளியங் ந ஆருள்ஹோ. ஸோ இத⁴ யேவாபனகவஸேன க³ஹிதோ.
Ettāvatā cittaṅgavasena pāḷiyaṃ āruḷhe paropaṇṇāsadhamme dīpetvā yevāpanakavasena aparepi nava dhamme dhammarājā dīpeti. Tesu tesu hi suttapadesu ‘chando adhimokkho manasikāro tatramajjhattatā karuṇā muditā kāyaduccaritavirati vacīduccaritavirati micchājīvaviratī’ti ime nava dhammā paññāyanti. Imasmiñcāpi mahācitte kattukamyatākusaladhammacchando atthi, cittaṅgavasena pana pāḷiyaṃ na āruḷho. So idha yevāpanakavasena gahito.
அதி⁴மொக்கோ² அத்தி², மனஸிகாரோ அத்தி², தத்ரமஜ்ஜ²த்ததா அத்தி². மெத்தாபுப்³ப³பா⁴கோ³ அத்தி²; ஸோ அதோ³ஸே க³ஹிதே க³ஹிதோ ஏவ ஹோதி. கருணாபுப்³ப³பா⁴கோ³ அத்தி², முதி³தாபுப்³ப³பா⁴கோ³ அத்தி². உபெக்கா²புப்³ப³பா⁴கோ³ அத்தி²; ஸோ பன தத்ரமஜ்ஜ²த்ததாய க³ஹிதாய க³ஹிதோவ ஹோதி. ஸம்மாவாசா அத்தி², ஸம்மாகம்மந்தோ அத்தி². ஸம்மாஆஜீவோ அத்தி²; சித்தங்க³வஸேன பன பாளியங் ந ஆருள்ஹோ. ஸோபி இத⁴ யேவாபனகவஸேன க³ஹிதோ.
Adhimokkho atthi, manasikāro atthi, tatramajjhattatā atthi. Mettāpubbabhāgo atthi; so adose gahite gahito eva hoti. Karuṇāpubbabhāgo atthi, muditāpubbabhāgo atthi. Upekkhāpubbabhāgo atthi; so pana tatramajjhattatāya gahitāya gahitova hoti. Sammāvācā atthi, sammākammanto atthi. Sammāājīvo atthi; cittaṅgavasena pana pāḷiyaṃ na āruḷho. Sopi idha yevāpanakavasena gahito.
இமேஸு பன நவஸு ச²ந்தோ³ அதி⁴மொக்கோ² மனஸிகாரோ தத்ரமஜ்ஜ²த்ததாதி இமே சத்தாரோவ ஏகக்க²ணே லப்³ப⁴ந்தி, ஸேஸா நானாக்க²ணே. யதா³ ஹி இமினா சித்தேன மிச்சா²வாசங் பஜஹதி, விரதிவஸேன ஸம்மாவாசங் பூரேதி, ததா³ ச²ந்தா³த³யோ சத்தாரோ, ஸம்மாவாசா சாதி இமே பஞ்ச ஏகக்க²ணே லப்³ப⁴ந்தி. யதா³ மிச்சா²கம்மந்தங் பஜஹதி, விரதிவஸேன ஸம்மாகம்மந்தங் பூரேதி…பே॰… மிச்சா²ஆஜீவங் பஜஹதி, விரதிவஸேன ஸம்மாஆஜீவங் பூரேதி…பே॰… யதா³ கருணாய பரிகம்மங் கரோதி…பே॰… யதா³ முதி³தாய பரிகம்மங் கரோதி, ததா³ ச²ந்தா³த³யோ சத்தாரோ, முதி³தாபுப்³ப³பா⁴கோ³ சாதி இமே பஞ்ச ஏகக்க²ணே லப்³ப⁴ந்தி. இதோ பன முஞ்சித்வா, தா³னங் தெ³ந்தஸ்ஸ ஸீலங் பூரெந்தஸ்ஸ யோகே³ கம்மங் கரொந்தஸ்ஸ சத்தாரி அபண்ணகங்கா³னேவ லப்³ப⁴ந்தி.
Imesu pana navasu chando adhimokkho manasikāro tatramajjhattatāti ime cattārova ekakkhaṇe labbhanti, sesā nānākkhaṇe. Yadā hi iminā cittena micchāvācaṃ pajahati, virativasena sammāvācaṃ pūreti, tadā chandādayo cattāro, sammāvācā cāti ime pañca ekakkhaṇe labbhanti. Yadā micchākammantaṃ pajahati, virativasena sammākammantaṃ pūreti…pe… micchāājīvaṃ pajahati, virativasena sammāājīvaṃ pūreti…pe… yadā karuṇāya parikammaṃ karoti…pe… yadā muditāya parikammaṃ karoti, tadā chandādayo cattāro, muditāpubbabhāgo cāti ime pañca ekakkhaṇe labbhanti. Ito pana muñcitvā, dānaṃ dentassa sīlaṃ pūrentassa yoge kammaṃ karontassa cattāri apaṇṇakaṅgāneva labbhanti.
ஏவமேதேஸு நவஸு யேவாபனகத⁴ம்மேஸு ‘ச²ந்தோ³’தி கத்துகம்யதாயேதங் அதி⁴வசனங். தஸ்மா ஸோ கத்துகம்யதாலக்க²ணோ ச²ந்தோ³, ஆரம்மணபரியேஸனரஸோ, ஆரம்மணேன அத்தி²கதாபச்சுபட்டா²னோ . ததே³வஸ்ஸ பத³ட்டா²னங் . ஆரம்மணஸ்ஸ க³ஹணே சாயங் சேதஸோ ஹத்த²ப்பஸாரணங் விய த³ட்ட²ப்³போ³.
Evametesu navasu yevāpanakadhammesu ‘chando’ti kattukamyatāyetaṃ adhivacanaṃ. Tasmā so kattukamyatālakkhaṇo chando, ārammaṇapariyesanaraso, ārammaṇena atthikatāpaccupaṭṭhāno . Tadevassa padaṭṭhānaṃ . Ārammaṇassa gahaṇe cāyaṃ cetaso hatthappasāraṇaṃ viya daṭṭhabbo.
அதி⁴முச்சனங் ‘அதி⁴மொக்கோ²’. ஸோ ஸன்னிட்டா²னலக்க²ணோ, அஸங்ஸப்பனரஸோ, நிச்ச²யபச்சுபட்டா²னோ ஸன்னிட்டா²தப்³ப³த⁴ம்மபத³ட்டா²னோ. ஆரம்மணே நிச்சலபா⁴வேன இந்த³கீ²லோ விய த³ட்ட²ப்³போ³.
Adhimuccanaṃ ‘adhimokkho’. So sanniṭṭhānalakkhaṇo, asaṃsappanaraso, nicchayapaccupaṭṭhāno sanniṭṭhātabbadhammapadaṭṭhāno. Ārammaṇe niccalabhāvena indakhīlo viya daṭṭhabbo.
கிரியா காரோ, மனஸ்மிங் காரோ ‘மனஸிகாரோ’. புரிமமனதோ விஸதி³ஸங் மனங் கரோதீதிபி மனஸிகாரோ. ஸ்வாயங் ஆரம்மணபடிபாத³கோ வீதி²படிபாத³கோ ஜவனபடிபாத³கோதி திப்பகாரோ. தத்த² ஆரம்மணபடிபாத³கோ மனஸ்மிங் காரோதி மனஸிகாரோ. ஸோ ஸாரணலக்க²ணோ, ஸம்பயுத்தானங் ஆரம்மணே ஸம்பயோஜனரஸோ, ஆரம்மணாபி⁴முக²பா⁴வபச்சுபட்டா²னோ, ஸங்கா²ரக்க²ந்த⁴பரியாபன்னோ. ஆரம்மணபடிபாத³கத்தேன ஸம்பயுத்தானங் ஸாரதி² விய த³ட்ட²ப்³போ³. வீதி²படிபாத³கோதி பன பஞ்சத்³வாராவஜ்ஜனஸ்ஸேதங் அதி⁴வசனங். ஜவனபடிபாத³கோதி மனொத்³வாராவஜ்ஜனஸ்ஸ. ந தே இத⁴ அதி⁴ப்பேதா.
Kiriyā kāro, manasmiṃ kāro ‘manasikāro’. Purimamanato visadisaṃ manaṃ karotītipi manasikāro. Svāyaṃ ārammaṇapaṭipādako vīthipaṭipādako javanapaṭipādakoti tippakāro. Tattha ārammaṇapaṭipādako manasmiṃ kāroti manasikāro. So sāraṇalakkhaṇo, sampayuttānaṃ ārammaṇe sampayojanaraso, ārammaṇābhimukhabhāvapaccupaṭṭhāno, saṅkhārakkhandhapariyāpanno. Ārammaṇapaṭipādakattena sampayuttānaṃ sārathi viya daṭṭhabbo. Vīthipaṭipādakoti pana pañcadvārāvajjanassetaṃ adhivacanaṃ. Javanapaṭipādakoti manodvārāvajjanassa. Na te idha adhippetā.
தேஸு த⁴ம்மேஸு மஜ்ஜ²த்ததா ‘தத்ரமஜ்ஜ²த்ததா’. ஸா சித்தசேதஸிகானங் ஸமவாஹிதலக்க²ணா, ஊனாதி⁴கனிவாரணரஸா, பக்க²பாதுபச்சே²த³னரஸா வா; மஜ்ஜ²த்தபா⁴வபச்சுபட்டா²னா. சித்தசேதஸிகானங் அஜ்ஜு²பெக்க²னவஸேன ஸமப்பவத்தானங் ஆஜானெய்யானங் அஜ்ஜு²பெக்க²னஸாரதி² விய த³ட்ட²ப்³பா³.
Tesu dhammesu majjhattatā ‘tatramajjhattatā’. Sā cittacetasikānaṃ samavāhitalakkhaṇā, ūnādhikanivāraṇarasā, pakkhapātupacchedanarasā vā; majjhattabhāvapaccupaṭṭhānā. Cittacetasikānaṃ ajjhupekkhanavasena samappavattānaṃ ājāneyyānaṃ ajjhupekkhanasārathi viya daṭṭhabbā.
‘கருணாமுதி³தா’ ப்³ரஹ்மவிஹாரனித்³தே³ஸே ஆவி ப⁴விஸ்ஸந்தி. கேவலஞ்ஹி தா அப்பனப்பத்தா ரூபாவசரா, இத⁴ காமாவசராதி அயமேவ விஸேஸோ.
‘Karuṇāmuditā’ brahmavihāraniddese āvi bhavissanti. Kevalañhi tā appanappattā rūpāvacarā, idha kāmāvacarāti ayameva viseso.
காயது³ச்சரிததோ விரதி ‘காயது³ச்சரிதவிரதி’. ஸேஸபத³த்³வயேபி ஏஸேவ நயோ. லக்க²ணாதி³தோ பனேதா திஸ்ஸோபி காயது³ச்சரிதாதி³வத்தூ²னங் அவீதிக்கமலக்க²ணா; அமத்³த³னலக்க²ணாதி வுத்தங் ஹோதி. காயது³ச்சரிதாதி³வத்து²தோ ஸங்கோசனரஸா, அகிரியபச்சுபட்டா²னா, ஸத்³தா⁴ஹிரொத்தப்பஅப்பிச்ச²தாதி³கு³ணபத³ட்டா²னா. பாபகிரியதோ சித்தஸ்ஸ விமுகீ²பா⁴வபூ⁴தாதி த³ட்ட²ப்³பா³.
Kāyaduccaritato virati ‘kāyaduccaritavirati’. Sesapadadvayepi eseva nayo. Lakkhaṇādito panetā tissopi kāyaduccaritādivatthūnaṃ avītikkamalakkhaṇā; amaddanalakkhaṇāti vuttaṃ hoti. Kāyaduccaritādivatthuto saṅkocanarasā, akiriyapaccupaṭṭhānā, saddhāhirottappaappicchatādiguṇapadaṭṭhānā. Pāpakiriyato cittassa vimukhībhāvabhūtāti daṭṭhabbā.
இதி ப²ஸ்ஸாதீ³னி ச²ப்பஞ்ஞாஸ யேவாபனகவஸேன வுத்தானி நவாதி ஸப்³பா³னிபி இமஸ்மிங் த⁴ம்முத்³தே³ஸவாரே பஞ்சஸட்டி² த⁴ம்மபதா³னி ப⁴வந்தி. தேஸு ஏகக்க²ணே கதா³சி ஏகஸட்டி² ப⁴வந்தி, கதா³சி ஸமஸட்டி². தானி ஹி ஸம்மாவாசாபூரணாதி³வஸேன. உப்பத்தியங் பஞ்சஸு டா²னேஸு ஏகஸட்டி² ப⁴வந்தி. தேஹி முத்தே ஏகஸ்மிங் டா²னே ஸமஸட்டி² ப⁴வந்தி. ட²பெத்வா பன யேவாபனகே பாளியங் யதா²ருதவஸேன க³ய்ஹமானானி ச²ப்பஞ்ஞாஸாவ ஹொந்தி. அக்³க³ஹிதக்³க³ஹணேன பனெத்த² ப²ஸ்ஸபஞ்சகங், விதக்கோ விசாரோ பீதி சித்தேகக்³க³தா, பஞ்சிந்த்³ரியானி, ஹிரிப³லங் ஒத்தப்பப³லந்தி த்³வே ப³லானி, அலோபோ⁴ அதோ³ஸோதி த்³வே மூலானி, காயபஸ்ஸத்³தி⁴சித்தபஸ்ஸத்³தி⁴ஆத³யோ த்³வாத³ஸ த⁴ம்மாதி ஸமதிங்ஸ த⁴ம்மா ஹொந்தி.
Iti phassādīni chappaññāsa yevāpanakavasena vuttāni navāti sabbānipi imasmiṃ dhammuddesavāre pañcasaṭṭhi dhammapadāni bhavanti. Tesu ekakkhaṇe kadāci ekasaṭṭhi bhavanti, kadāci samasaṭṭhi. Tāni hi sammāvācāpūraṇādivasena. Uppattiyaṃ pañcasu ṭhānesu ekasaṭṭhi bhavanti. Tehi mutte ekasmiṃ ṭhāne samasaṭṭhi bhavanti. Ṭhapetvā pana yevāpanake pāḷiyaṃ yathārutavasena gayhamānāni chappaññāsāva honti. Aggahitaggahaṇena panettha phassapañcakaṃ, vitakko vicāro pīti cittekaggatā, pañcindriyāni, hiribalaṃ ottappabalanti dve balāni, alobho adosoti dve mūlāni, kāyapassaddhicittapassaddhiādayo dvādasa dhammāti samatiṃsa dhammā honti.
தேஸு ஸமதிங்ஸாய த⁴ம்மேஸு அட்டா²ரஸ த⁴ம்மா அவிப⁴த்திகா ஹொந்தி, த்³வாத³ஸ ஸவிப⁴த்திகா. கதமே அட்டா²ரஸ? ப²ஸ்ஸோ ஸஞ்ஞா சேதனா விசாரோ பீதி ஜீவிதிந்த்³ரியங், காயபஸ்ஸத்³தி⁴ஆத³யோ த்³வாத³ஸ த⁴ம்மாதி இமே அட்டா²ரஸ அவிப⁴த்திகா. வேத³னா சித்தங் விதக்கோ சித்தேகக்³க³தா, ஸத்³தி⁴ந்த்³ரியங் வீரியிந்த்³ரியங் ஸதிந்த்³ரியங் பஞ்ஞிந்த்³ரியங், ஹிரிப³லங் ஒத்தப்பப³லங், அலோபோ⁴ அதோ³ஸோதி இமே த்³வாத³ஸ த⁴ம்மா ஸவிப⁴த்திகா. தேஸு ஸத்த த⁴ம்மா த்³வீஸு டா²னேஸு விப⁴த்தா, ஏகோ தீஸு, த்³வே சதூஸு, ஏகோ ச²ஸு, ஏகோ ஸத்தஸு டா²னேஸு விப⁴த்தோ.
Tesu samatiṃsāya dhammesu aṭṭhārasa dhammā avibhattikā honti, dvādasa savibhattikā. Katame aṭṭhārasa? Phasso saññā cetanā vicāro pīti jīvitindriyaṃ, kāyapassaddhiādayo dvādasa dhammāti ime aṭṭhārasa avibhattikā. Vedanā cittaṃ vitakko cittekaggatā, saddhindriyaṃ vīriyindriyaṃ satindriyaṃ paññindriyaṃ, hiribalaṃ ottappabalaṃ, alobho adosoti ime dvādasa dhammā savibhattikā. Tesu satta dhammā dvīsu ṭhānesu vibhattā, eko tīsu, dve catūsu, eko chasu, eko sattasu ṭhānesu vibhatto.
கத²ங்? சித்தங் விதக்கோ ஸத்³தா⁴ ஹிரீ ஒத்தப்பங் அலோபோ⁴ அதோ³ஸோதி இமே ஸத்த த்³வீஸு டா²னேஸு விப⁴த்தா.
Kathaṃ? Cittaṃ vitakko saddhā hirī ottappaṃ alobho adosoti ime satta dvīsu ṭhānesu vibhattā.
ஏதேஸு ஹி சித்தங் தாவ ப²ஸ்ஸபஞ்சகங் பத்வா சித்தங் ஹோதீதி வுத்தங், இந்த்³ரியானி பத்வா மனிந்த்³ரியந்தி. விதக்கோ ஜா²னங்கா³னி பத்வா விதக்கோ ஹோதீதி வுத்தோ, மக்³க³ங்கா³னி பத்வா ஸம்மாஸங்கப்போதி. ஸத்³தா⁴ இந்த்³ரியானி பத்வா ஸத்³தி⁴ந்த்³ரியங் ஹோதீதி வுத்தா, ப³லானி பத்வா ஸத்³தா⁴ப³லந்தி. ஹிரீ ப³லானி பத்வா ஹிரிப³லங் ஹோதீதி வுத்தா, லோகபாலது³கங் பத்வா ஹிரீதி. ஒத்தப்பேபி ஏஸேவ நயோ. அலோபோ⁴ மூலங் பத்வா அலோபோ⁴ ஹோதீதி வுத்தோ, கம்மபத²ங் பத்வா அனபி⁴ஜ்ஜா²தி. அதோ³ஸோ மூலங் பத்வா அதோ³ஸோ ஹோதீதி வுத்தோ, கம்மபத²ங் பத்வா அப்³யாபாதோ³தி. இமே ஸத்த த்³வீஸு டா²னேஸு விப⁴த்தா.
Etesu hi cittaṃ tāva phassapañcakaṃ patvā cittaṃ hotīti vuttaṃ, indriyāni patvā manindriyanti. Vitakko jhānaṅgāni patvā vitakko hotīti vutto, maggaṅgāni patvā sammāsaṅkappoti. Saddhā indriyāni patvā saddhindriyaṃ hotīti vuttā, balāni patvā saddhābalanti. Hirī balāni patvā hiribalaṃ hotīti vuttā, lokapāladukaṃ patvā hirīti. Ottappepi eseva nayo. Alobho mūlaṃ patvā alobho hotīti vutto, kammapathaṃ patvā anabhijjhāti. Adoso mūlaṃ patvā adoso hotīti vutto, kammapathaṃ patvā abyāpādoti. Ime satta dvīsu ṭhānesu vibhattā.
வேத³னா பன ப²ஸ்ஸபஞ்சகங் பத்வா வேத³னா ஹோதீதி வுத்தா, ஜா²னங்கா³னி பத்வா ஸுக²ந்தி, இந்த்³ரியானி பத்வா ஸோமனஸ்ஸிந்த்³ரியந்தி. ஏவங் ஏகோ த⁴ம்மோ தீஸு டா²னேஸு விப⁴த்தோ.
Vedanā pana phassapañcakaṃ patvā vedanā hotīti vuttā, jhānaṅgāni patvā sukhanti, indriyāni patvā somanassindriyanti. Evaṃ eko dhammo tīsu ṭhānesu vibhatto.
வீரியங் பன இந்த்³ரியானி பத்வா வீரியிந்த்³ரியங் ஹோதீதி வுத்தங், மக்³க³ங்கா³னி பத்வா ஸம்மாவாயாமோதி, ப³லானி பத்வா வீரியப³லந்தி, பிட்டி²து³கங் பத்வா பக்³கா³ஹோதி. ஸதிபி இந்த்³ரியானி பத்வா ஸதிந்த்³ரியங் ஹோதீதி வுத்தா, மக்³க³ங்கா³னி பத்வா ஸம்மாஸதீதி, ப³லானி பத்வா ஸதிப³லந்தி, பிட்டி²து³கங் பத்வா ஸதி ஹோதீதி வுத்தா. ஏவங் இமே த்³வே த⁴ம்மா சதூஸு டா²னேஸு விப⁴த்தா.
Vīriyaṃ pana indriyāni patvā vīriyindriyaṃ hotīti vuttaṃ, maggaṅgāni patvā sammāvāyāmoti, balāni patvā vīriyabalanti, piṭṭhidukaṃ patvā paggāhoti. Satipi indriyāni patvā satindriyaṃ hotīti vuttā, maggaṅgāni patvā sammāsatīti, balāni patvā satibalanti, piṭṭhidukaṃ patvā sati hotīti vuttā. Evaṃ ime dve dhammā catūsu ṭhānesu vibhattā.
ஸமாதி⁴ பன ஜா²னங்கா³னி பத்வா சித்தஸ்ஸேகக்³க³தா ஹோதீதி வுத்தோ, இந்த்³ரியானி பத்வா ஸமாதி⁴ந்த்³ரியந்தி, மக்³க³ங்கா³னி பத்வா ஸம்மாஸமாதீ⁴தி. ப³லானி பத்வா ஸமாதி⁴ப³லந்தி, பிட்டி²து³கங் பத்வா ஸமதோ² அவிக்கே²போதி. ஏவமயங் ஏகோ த⁴ம்மோ ச²ஸு டா²னேஸு விப⁴த்தோ.
Samādhi pana jhānaṅgāni patvā cittassekaggatā hotīti vutto, indriyāni patvā samādhindriyanti, maggaṅgāni patvā sammāsamādhīti. Balāni patvā samādhibalanti, piṭṭhidukaṃ patvā samatho avikkhepoti. Evamayaṃ eko dhammo chasu ṭhānesu vibhatto.
பஞ்ஞா பன இந்த்³ரியானி பத்வா பஞ்ஞிந்த்³ரியங் ஹோதீதி வுத்தா, மக்³க³ங்கா³னி பத்வா ஸம்மாதி³ட்டீ²தி, ப³லானி பத்வா பஞ்ஞாப³லந்தி, மூலானி பத்வா அமோஹோதி, கம்மபத²ங் பத்வா ஸம்மாதி³ட்டீ²தி, பிட்டி²து³கங் பத்வா ஸம்பஜஞ்ஞங் விபஸ்ஸனாதி. ஏவங் ஏகோ த⁴ம்மோ ஸத்தஸு டா²னேஸு விப⁴த்தோ.
Paññā pana indriyāni patvā paññindriyaṃ hotīti vuttā, maggaṅgāni patvā sammādiṭṭhīti, balāni patvā paññābalanti, mūlāni patvā amohoti, kammapathaṃ patvā sammādiṭṭhīti, piṭṭhidukaṃ patvā sampajaññaṃ vipassanāti. Evaṃ eko dhammo sattasu ṭhānesu vibhatto.
ஸசே பன கோசி வதெ³ய்ய – ‘எத்த² அபுப்³ப³ங் நாம நத்தி², ஹெட்டா² க³ஹிதமேவ க³ண்ஹித்வா தஸ்மிங் தஸ்மிங் டா²னே பத³ங் பூரிதங், அனநுஸந்தி⁴கா கதா² உப்படிபாடியா சோரேஹி ஆப⁴தப⁴ண்ட³ஸதி³ஸா, கோ³யூதே²ன க³தமக்³கே³ ஆலுலிததிணஸதி³ஸா அஜானித்வா கதி²தா’தி, ஸோ ‘மாஹேவ’ந்தி படிஸேதெ⁴த்வா வத்தப்³போ³ – ‘பு³த்³தா⁴னங் தே³ஸனா அனநுஸந்தி⁴கா நாம நத்தி², ஸானுஸந்தி⁴கா வ ஹோதி. அஜானித்வா கதி²தாபி நத்தி², ஸப்³பா³ ஜானித்வா கதி²தாயேவ. ஸம்மாஸம்பு³த்³தோ⁴ ஹி தேஸங் தேஸங் த⁴ம்மானங் கிச்சங் ஜானாதி, தங் ஞத்வா கிச்சவஸேன விப⁴த்திங் ஆரோபெந்தோ அட்டா²ரஸ த⁴ம்மா ஏகேககிச்சாதி ஞத்வா ஏகேகஸ்மிங் டா²னே விப⁴த்திங் ஆரோபேஸி. ஸத்த த⁴ம்மா த்³வெத்³வேகிச்சாதி ஞத்வா த்³வீஸு த்³வீஸு டா²னேஸு விப⁴த்திங் ஆரோபேஸி. வேத³னா திகிச்சாதி ஞத்வா தீஸு டா²னேஸு விப⁴த்திங் ஆரோபேஸி. வீரியஸதீனங் சத்தாரி சத்தாரி கிச்சானீதி ஞத்வா சதூஸு சதூஸு டா²னேஸு விப⁴த்திங் ஆரோபேஸி. ஸமாதி⁴ ச²கிச்சோதி ஞத்வா ச²ஸு டா²னேஸு விப⁴த்திங் ஆரோபேஸி. பஞ்ஞா ஸத்தகிச்சாதி ஞத்வா ஸத்தஸு டா²னேஸு விப⁴த்திங் ஆரோபேஸி’.
Sace pana koci vadeyya – ‘ettha apubbaṃ nāma natthi, heṭṭhā gahitameva gaṇhitvā tasmiṃ tasmiṃ ṭhāne padaṃ pūritaṃ, ananusandhikā kathā uppaṭipāṭiyā corehi ābhatabhaṇḍasadisā, goyūthena gatamagge ālulitatiṇasadisā ajānitvā kathitā’ti, so ‘māheva’nti paṭisedhetvā vattabbo – ‘buddhānaṃ desanā ananusandhikā nāma natthi, sānusandhikā va hoti. Ajānitvā kathitāpi natthi, sabbā jānitvā kathitāyeva. Sammāsambuddho hi tesaṃ tesaṃ dhammānaṃ kiccaṃ jānāti, taṃ ñatvā kiccavasena vibhattiṃ āropento aṭṭhārasa dhammā ekekakiccāti ñatvā ekekasmiṃ ṭhāne vibhattiṃ āropesi. Satta dhammā dvedvekiccāti ñatvā dvīsu dvīsu ṭhānesu vibhattiṃ āropesi. Vedanā tikiccāti ñatvā tīsu ṭhānesu vibhattiṃ āropesi. Vīriyasatīnaṃ cattāri cattāri kiccānīti ñatvā catūsu catūsu ṭhānesu vibhattiṃ āropesi. Samādhi chakiccoti ñatvā chasu ṭhānesu vibhattiṃ āropesi. Paññā sattakiccāti ñatvā sattasu ṭhānesu vibhattiṃ āropesi’.
தத்ரித³ங் ஓபம்மங் – ஏகோ கிர பண்டி³தோ ராஜா ரஹோக³தோ சிந்தேஸி – ‘இமங் ராஜகுலஸந்தகங் ந யதா² வா ததா² வா கா²தி³தப்³ப³ங், ஸிப்பானுச்ச²விகங் வேதனங் வட்³டெ⁴ஸ்ஸாமீ’தி. ஸோ ஸப்³பே³ ஸிப்பிகே ஸன்னிபாதாபெத்வா ‘ஏகேகஸிப்பஜானநகே பக்கோஸதா²’தி ஆஹ. ஏவங் பக்கோஸியமானா அட்டா²ரஸ ஜனா உட்ட²ஹிங்ஸு. தேஸங் ஏகேகங் படிவீஸங் தா³பெத்வா விஸ்ஸஜ்ஜேஸி. ‘த்³வே த்³வே ஸிப்பானி ஜானந்தா ஆக³ச்ச²ந்தூ’தி வுத்தே பன ஸத்த ஜனா ஆக³மங்ஸு. தேஸங் த்³வே த்³வே படிவீஸே தா³பேஸி. ‘தீணி ஸிப்பானி ஜானந்தா ஆக³ச்ச²ந்தூ’தி வுத்தே ஏகோவ ஆக³ச்சி². தஸ்ஸ தயோ படிவீஸே தா³பேஸி. ‘சத்தாரி ஸிப்பானி ஜானந்தா ஆக³ச்ச²ந்தூ’தி வுத்தே த்³வே ஜனா ஆக³மங்ஸு. தேஸங் சத்தாரி சத்தாரி படிவீஸே தா³பேஸி. ‘பஞ்ச ஸிப்பானி ஜானந்தா ஆக³ச்ச²ந்தூ’தி வுத்தே ஏகோபி நாக³ச்சி² . ‘ச² ஸிப்பானி ஜானந்தா ஆக³ச்ச²ந்தூ’தி வுத்தே ஏகோவ ஆக³ச்சி². தஸ்ஸ ச² படிவீஸே தா³பேஸி. ‘ஸத்த ஸிப்பானி ஜானந்தா ஆக³ச்ச²ந்தூ’தி வுத்தே ஏகோவ ஆக³ச்சி². தஸ்ஸ ஸத்த படிவீஸே தா³பேஸி.
Tatridaṃ opammaṃ – eko kira paṇḍito rājā rahogato cintesi – ‘imaṃ rājakulasantakaṃ na yathā vā tathā vā khāditabbaṃ, sippānucchavikaṃ vetanaṃ vaḍḍhessāmī’ti. So sabbe sippike sannipātāpetvā ‘ekekasippajānanake pakkosathā’ti āha. Evaṃ pakkosiyamānā aṭṭhārasa janā uṭṭhahiṃsu. Tesaṃ ekekaṃ paṭivīsaṃ dāpetvā vissajjesi. ‘Dve dve sippāni jānantā āgacchantū’ti vutte pana satta janā āgamaṃsu. Tesaṃ dve dve paṭivīse dāpesi. ‘Tīṇi sippāni jānantā āgacchantū’ti vutte ekova āgacchi. Tassa tayo paṭivīse dāpesi. ‘Cattāri sippāni jānantā āgacchantū’ti vutte dve janā āgamaṃsu. Tesaṃ cattāri cattāri paṭivīse dāpesi. ‘Pañca sippāni jānantā āgacchantū’ti vutte ekopi nāgacchi . ‘Cha sippāni jānantā āgacchantū’ti vutte ekova āgacchi. Tassa cha paṭivīse dāpesi. ‘Satta sippāni jānantā āgacchantū’ti vutte ekova āgacchi. Tassa satta paṭivīse dāpesi.
தத்த² பண்டி³தோ ராஜா விய அனுத்தரோ த⁴ம்மராஜா. ஸிப்பஜானநகா விய சித்தசித்தங்க³வஸேன உப்பன்னா த⁴ம்மா. ஸிப்பானுச்ச²விகவேதனவட்³ட⁴னங் விய கிச்சவஸேன தேஸங் தேஸங் த⁴ம்மானங் விப⁴த்திஆரோபனங்.
Tattha paṇḍito rājā viya anuttaro dhammarājā. Sippajānanakā viya cittacittaṅgavasena uppannā dhammā. Sippānucchavikavetanavaḍḍhanaṃ viya kiccavasena tesaṃ tesaṃ dhammānaṃ vibhattiāropanaṃ.
ஸப்³பே³பி பனேதே த⁴ம்மா ப²ஸ்ஸபஞ்சகவஸேன ஜா²னங்க³வஸேன இந்த்³ரியவஸேன மக்³க³வஸேன ப³லவஸேன மூலவஸேன கம்மபத²வஸேன லோகபாலவஸேன பஸ்ஸத்³தி⁴வஸேன லஹுதாவஸேன முது³தாவஸேன கம்மஞ்ஞதாவஸேன பாகு³ஞ்ஞதாவஸேன உஜுகதாவஸேன ஸதிஸம்பஜஞ்ஞவஸேன ஸமத²விபஸ்ஸனாவஸேன பக்³கா³ஹாவிக்கே²பவஸேனாதி ஸத்தரஸ ராஸயோ ஹொந்தீதி.
Sabbepi panete dhammā phassapañcakavasena jhānaṅgavasena indriyavasena maggavasena balavasena mūlavasena kammapathavasena lokapālavasena passaddhivasena lahutāvasena mudutāvasena kammaññatāvasena pāguññatāvasena ujukatāvasena satisampajaññavasena samathavipassanāvasena paggāhāvikkhepavasenāti sattarasa rāsayo hontīti.
த⁴ம்முத்³தே³ஸவாரகதா² நிட்டி²தா.
Dhammuddesavārakathā niṭṭhitā.
