| Library / Tipiṭaka / திபிடக • Tipiṭaka / த⁴ம்மஸங்க³ணீ-அனுடீகா • Dhammasaṅgaṇī-anuṭīkā |
யேவாபனகவண்ணனா
Yevāpanakavaṇṇanā
யதா² ததா² வாதி ஸம்மா மிச்சா² வா. அனதி⁴முச்சந்தோதி ‘‘இத³ங் கரிஸ்ஸாமி, ஏதங் கரிஸ்ஸாமீ’’தி ஏவங் பவத்தபுப்³ப³பா⁴க³ஸன்னிட்டா²னஹேதுகேன பயோக³காலஸன்னிட்டா²னேன அனிச்சி²னந்தோ. யத்த² ஹி அனிச்ச²யோ, தத்த² அப்படிபத்தி ஏவாதி. ஸங்ஸப்பனங் ஸங்ஸயோ. ஸோ ஹி ‘‘ஆஸப்பனா பரிஸப்பனா’’தி வுத்தோ. அஸதிபி ப்³யாபாரே தத்ரமஜ்ஜ²த்ததாய ஸதி தங்ஸம்பயுத்தத⁴ம்மா ஸகஸககிச்சவஸேன அனூனானதி⁴கதாய அலீனஅனுத்³த⁴ததாய ச ஸங்வத்தந்தீதி ஸா தேஸங் ததா²பவத்தியா பச்சயபூ⁴தா ஊனாதி⁴கபா⁴வங் நிவாரேதி வியாதி ஊனாதி⁴கனிவாரணரஸா வுத்தா. ததா² பவத்திபச்சயத்தாயேவ தேஸு த⁴ம்மேஸு மஜ்ஜ²த்ததாதி ச வுத்தா.
Yathātathā vāti sammā micchā vā. Anadhimuccantoti ‘‘idaṃ karissāmi, etaṃ karissāmī’’ti evaṃ pavattapubbabhāgasanniṭṭhānahetukena payogakālasanniṭṭhānena anicchinanto. Yattha hi anicchayo, tattha appaṭipatti evāti. Saṃsappanaṃ saṃsayo. So hi ‘‘āsappanā parisappanā’’ti vutto. Asatipi byāpāre tatramajjhattatāya sati taṃsampayuttadhammā sakasakakiccavasena anūnānadhikatāya alīnaanuddhatatāya ca saṃvattantīti sā tesaṃ tathāpavattiyā paccayabhūtā ūnādhikabhāvaṃ nivāreti viyāti ūnādhikanivāraṇarasā vuttā. Tathā pavattipaccayattāyeva tesu dhammesu majjhattatāti ca vuttā.
ஜா²னபத³ஸ்ஸாதி ஜா²னஸத்³த³ஸ்ஸ. தேஸூதி பஞ்சஸு. பஞ்ச ஹி அங்கா³னி ஜா²னபத³ஸ்ஸ அத்தோ²தி இத³ங் ஸங்வண்ணியமானத்தாயேவ இமங் சித்துப்பாத³ங் ஸந்தா⁴ய வுத்தங். ந ஹி ஸப்³ப³ஸ்மிங் சித்துப்பாதே³ பஞ்சேவ ஜா²னங்கா³னி. பத³ஸமூஹோ வாக்யங், பத³கொட்டா²ஸோ வா ப²ஸ்ஸபஞ்சமகாதி³ த⁴ம்மராஸி. வுத்தங் பூரிதந்தி ச²பண்ணாஸாதி³தாய பூரணவஸேன. ப²ஸ்ஸபச்சயா வேத³னா ‘‘பு²ட்டோ² வேதே³தி, பு²ட்டோ² ஸஞ்ஜானாதீ’’திஆதி³வசனதோ (ஸங்॰ நி॰ 4.93) ப²ஸ்ஸோ வேத³னாதீ³னங் பச்சயோ. யதி³பி ச²ந்தா³த³யோ யதா²வுத்தராஸிகிச்சாபா⁴வதோ தேஸு ந வத்தப்³பா³, விஸுங் ராஸிஅந்தரபா⁴வேன பன ஸரூபதோ வத்தப்³பா³தி சோத³னங் மனஸி கத்வா ‘‘வுத்தானம்பீ’’திஆதி³மாஹ.
Jhānapadassāti jhānasaddassa. Tesūti pañcasu. Pañca hi aṅgāni jhānapadassa atthoti idaṃ saṃvaṇṇiyamānattāyeva imaṃ cittuppādaṃ sandhāya vuttaṃ. Na hi sabbasmiṃ cittuppāde pañceva jhānaṅgāni. Padasamūho vākyaṃ, padakoṭṭhāso vā phassapañcamakādi dhammarāsi. Vuttaṃ pūritanti chapaṇṇāsāditāya pūraṇavasena. Phassapaccayā vedanā ‘‘phuṭṭho vedeti, phuṭṭho sañjānātī’’tiādivacanato (saṃ. ni. 4.93) phasso vedanādīnaṃ paccayo. Yadipi chandādayo yathāvuttarāsikiccābhāvato tesu na vattabbā, visuṃ rāsiantarabhāvena pana sarūpato vattabbāti codanaṃ manasi katvā ‘‘vuttānampī’’tiādimāha.
த⁴ம்முத்³தே³ஸவாரகதா²வண்ணனா நிட்டி²தா.
Dhammuddesavārakathāvaṇṇanā niṭṭhitā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / யேவாபனகவண்ணனா • Yevāpanakavaṇṇanā
