| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩-৫. যোধাজীৰসুত্তাদিৰণ্ণনা
3-5. Yodhājīvasuttādivaṇṇanā
৩৫৫-৩৫৭. যুজ্ঝনং যোধো, সো আজীৰো এতস্সাতি যোধাজীৰো। তেনাহ – ‘‘যুদ্ধেন জীৰিকং কপ্পনকো’’তি, উস্সাহং ৰাযামং করোতীতি যুজ্ঝনৰসেন উস্সাহং ৰাযামং করোতি। পরিযাপাদেন্তীতি মরণপরিযন্তিকং আপদং পাপেন্তি। তেনাহ ‘‘মরণং পটিপজ্জাপেন্তী’’তি। দুট্ঠু ঠপিতন্তি দুট্ঠাকারেন অত্তনো পরেসঞ্চ অত্থাৰহভাৰং ন গতং পটিপন্নং। পরেহি সঙ্গামে জিতা হতা এত্থ জাযন্তীতি পরজিতো নাম নিরযো। অসিধনুগদাযসঙ্কুচক্কানি পঞ্চাৰুধানি। তং সন্ধাযাতি তং যোধাজীৰং পুগ্গলং সন্ধায। এতং ‘‘যো সো’’তিআদি ৰুত্তং। চতুত্থপঞ্চমেসূতি হত্থারোহঅস্সারোহসুত্তেসু। এসেৰ নযোতি এসো ততিযে ৰুত্তো এৰ অত্থতো ৰিসেসাভাৰতো।
355-357. Yujjhanaṃ yodho, so ājīvo etassāti yodhājīvo. Tenāha – ‘‘yuddhena jīvikaṃ kappanako’’ti, ussāhaṃ vāyāmaṃ karotīti yujjhanavasena ussāhaṃ vāyāmaṃ karoti. Pariyāpādentīti maraṇapariyantikaṃ āpadaṃ pāpenti. Tenāha ‘‘maraṇaṃ paṭipajjāpentī’’ti. Duṭṭhu ṭhapitanti duṭṭhākārena attano paresañca atthāvahabhāvaṃ na gataṃ paṭipannaṃ. Parehi saṅgāme jitā hatā ettha jāyantīti parajito nāma nirayo. Asidhanugadāyasaṅkucakkāni pañcāvudhāni. Taṃ sandhāyāti taṃ yodhājīvaṃ puggalaṃ sandhāya. Etaṃ ‘‘yo so’’tiādi vuttaṃ. Catutthapañcamesūti hatthārohaassārohasuttesu. Eseva nayoti eso tatiye vutto eva atthato visesābhāvato.
যোধাজীৰসুত্তাদিৰণ্ণনা নিট্ঠিতা।
Yodhājīvasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৩. যোধাজীৰসুত্তং • 3. Yodhājīvasuttaṃ
৪. হত্থারোহসুত্তং • 4. Hatthārohasuttaṃ
৫. অস্সারোহসুত্তং • 5. Assārohasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩-৫. যোধাজীৰসুত্তাদিৰণ্ণনা • 3-5. Yodhājīvasuttādivaṇṇanā
