| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៣-៥. យោធាជីវសុត្តាទិវណ្ណនា
3-5. Yodhājīvasuttādivaṇṇanā
៣៥៥-៣៥៧. យុជ្ឈនំ យោធោ, សោ អាជីវោ ឯតស្សាតិ យោធាជីវោ។ តេនាហ – ‘‘យុទ្ធេន ជីវិកំ កប្បនកោ’’តិ, ឧស្សាហំ វាយាមំ ករោតីតិ យុជ្ឈនវសេន ឧស្សាហំ វាយាមំ ករោតិ។ បរិយាបាទេន្តីតិ មរណបរិយន្តិកំ អាបទំ បាបេន្តិ។ តេនាហ ‘‘មរណំ បដិបជ្ជាបេន្តី’’តិ។ ទុដ្ឋុ ឋបិតន្តិ ទុដ្ឋាការេន អត្តនោ បរេសញ្ច អត្ថាវហភាវំ ន គតំ បដិបន្នំ។ បរេហិ សង្គាមេ ជិតា ហតា ឯត្ថ ជាយន្តីតិ បរជិតោ នាម និរយោ។ អសិធនុគទាយសង្កុចក្កានិ បញ្ចាវុធានិ។ តំ សន្ធាយាតិ តំ យោធាជីវំ បុគ្គលំ សន្ធាយ។ ឯតំ ‘‘យោ សោ’’តិអាទិ វុត្តំ។ ចតុត្ថបញ្ចមេសូតិ ហត្ថារោហអស្សារោហសុត្តេសុ។ ឯសេវ នយោតិ ឯសោ តតិយេ វុត្តោ ឯវ អត្ថតោ វិសេសាភាវតោ។
355-357. Yujjhanaṃ yodho, so ājīvo etassāti yodhājīvo. Tenāha – ‘‘yuddhena jīvikaṃ kappanako’’ti, ussāhaṃ vāyāmaṃ karotīti yujjhanavasena ussāhaṃ vāyāmaṃ karoti. Pariyāpādentīti maraṇapariyantikaṃ āpadaṃ pāpenti. Tenāha ‘‘maraṇaṃ paṭipajjāpentī’’ti. Duṭṭhu ṭhapitanti duṭṭhākārena attano paresañca atthāvahabhāvaṃ na gataṃ paṭipannaṃ. Parehi saṅgāme jitā hatā ettha jāyantīti parajito nāma nirayo. Asidhanugadāyasaṅkucakkāni pañcāvudhāni. Taṃ sandhāyāti taṃ yodhājīvaṃ puggalaṃ sandhāya. Etaṃ ‘‘yo so’’tiādi vuttaṃ. Catutthapañcamesūti hatthārohaassārohasuttesu. Eseva nayoti eso tatiye vutto eva atthato visesābhāvato.
យោធាជីវសុត្តាទិវណ្ណនា និដ្ឋិតា។
Yodhājīvasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
៣. យោធាជីវសុត្តំ • 3. Yodhājīvasuttaṃ
៤. ហត្ថារោហសុត្តំ • 4. Hatthārohasuttaṃ
៥. អស្សារោហសុត្តំ • 5. Assārohasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣-៥. យោធាជីវសុត្តាទិវណ្ណនា • 3-5. Yodhājīvasuttādivaṇṇanā
