| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༣. ཡོདྷཱཛཱིཝསུཏྟཾ
3. Yodhājīvasuttaṃ
༣༥༥. ཨཐ ཁོ ཡོདྷཱཛཱིཝོ གཱམཎི ཡེན བྷགཝཱ ཏེནུཔསངྐམི; ཨུཔསངྐམིཏྭཱ…པེ॰… ཨེཀམནྟཾ ནིསིནྣོ ཁོ ཡོདྷཱཛཱིཝོ གཱམཎི བྷགཝནྟཾ ཨེཏདཝོཙ – ‘‘སུཏཾ མེཏཾ, བྷནྟེ, པུབྦཀཱནཾ ཨཱཙརིཡཔཱཙརིཡཱནཾ ཡོདྷཱཛཱིཝཱནཾ བྷཱསམཱནཱནཾ – ‘ཡོ སོ ཡོདྷཱཛཱིཝོ སངྒཱམེ ཨུསྶཧཏི ཝཱཡམཏི, ཏམེནཾ ཨུསྶཧནྟཾ ཝཱཡམནྟཾ པརེ ཧནནྟི པརིཡཱཔཱདེནྟི, སོ ཀཱཡསྶ བྷེདཱ པརཾ མརཎཱ པརཛིཏཱནཾ དེཝཱནཾ སཧབྱཏཾ ཨུཔཔཛྫཏཱི’ཏི། ཨིདྷ བྷགཝཱ ཀིམཱཧཱ’’ཏི? ‘‘ཨལཾ , གཱམཎི, ཏིཊྛཏེཏཾ; མཱ མཾ ཨེཏཾ པུཙྪཱི’’ཏི། དུཏིཡམྤི ཁོ…པེ॰… ཏཏིཡམྤི ཁོ ཡོདྷཱཛཱིཝོ གཱམཎི བྷགཝནྟཾ ཨེཏདཝོཙ – ‘‘སུཏཾ མེཏཾ, བྷནྟེ, པུབྦཀཱནཾ ཨཱཙརིཡཔཱཙརིཡཱནཾ ཡོདྷཱཛཱིཝཱནཾ བྷཱསམཱནཱནཾ – ‘ཡོ སོ ཡོདྷཱཛཱིཝོ སངྒཱམེ ཨུསྶཧཏི ཝཱཡམཏི, ཏམེནཾ ཨུསྶཧནྟཾ ཝཱཡམནྟཾ པརེ ཧནནྟི པརིཡཱཔཱདེནྟི, སོ ཀཱཡསྶ བྷེདཱ པརཾ མརཎཱ པརཛིཏཱནཾ དེཝཱནཾ སཧབྱཏཾ ཨུཔཔཛྫཏཱི’ཏི། ཨིདྷ བྷགཝཱ ཀིམཱཧཱ’’ཏི?
355. Atha kho yodhājīvo gāmaṇi yena bhagavā tenupasaṅkami; upasaṅkamitvā…pe… ekamantaṃ nisinno kho yodhājīvo gāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ yodhājīvānaṃ bhāsamānānaṃ – ‘yo so yodhājīvo saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ , gāmaṇi, tiṭṭhatetaṃ; mā maṃ etaṃ pucchī’’ti. Dutiyampi kho…pe… tatiyampi kho yodhājīvo gāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ yodhājīvānaṃ bhāsamānānaṃ – ‘yo so yodhājīvo saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘ཨདྡྷཱ ཁོ ཏྱཱཧཾ, གཱམཎི, ན ལབྷཱམི – ‘ཨལཾ, གཱམཎི, ཏིཊྛཏེཏཾ; མཱ མཾ ཨེཏཾ པུཙྪཱི’ཏི། ཨཔི ཙ ཏྱཱཧཾ བྱཱཀརིསྶཱམི། ཡོ སོ, གཱམཎི, ཡོདྷཱཛཱིཝོ སངྒཱམེ ཨུསྶཧཏི ཝཱཡམཏི, ཏསྶ ཏཾ ཙིཏྟཾ པུབྦེ གཧིཏཾ 1 དུཀྐཊཾ དུཔྤཎིཧིཏཾ – ‘ཨིམེ སཏྟཱ ཧཉྙནྟུ ཝཱ བཛ྄ཛྷནྟུ ཝཱ ཨུཙྪིཛྫནྟུ ཝཱ ཝིནསྶནྟུ ཝཱ མཱ ཝཱ ཨཧེསུཾ ཨིཏི ཝཱ’ཏི། ཏམེནཾ ཨུསྶཧནྟཾ ཝཱཡམནྟཾ པརེ ཧནནྟི པརིཡཱཔཱདེནྟི; སོ ཀཱཡསྶ བྷེདཱ པརཾ མརཎཱ པརཛིཏོ ནཱམ ནིརཡོ ཏཏྠ ཨུཔཔཛྫཏཱིཏི། སཙེ ཁོ པནསྶ ཨེཝཾ དིཊྛི ཧོཏི – ‘ཡོ སོ ཡོདྷཱཛཱིཝོ སངྒཱམེ ཨུསྶཧཏི ཝཱཡམཏི ཏམེནཾ ཨུསྶཧནྟཾ ཝཱཡམནྟཾ པརེ ཧནནྟི པརིཡཱཔཱདེནྟི, སོ ཀཱཡསྶ བྷེདཱ པརཾ མརཎཱ པརཛིཏཱནཾ དེཝཱནཾ སཧབྱཏཾ ཨུཔཔཛྫཏཱི’ཏི, སཱསྶ ཧོཏི མིཙྪཱདིཊྛི། མིཙྪཱདིཊྛིཀསྶ ཁོ པནཱཧཾ, གཱམཎི, པུརིསཔུགྒལསྶ དྭིནྣཾ གཏཱིནཾ ཨཉྙཏརཾ གཏིཾ ཝདཱམི – ནིརཡཾ ཝཱ ཏིརཙྪཱནཡོནིཾ ཝཱ’’ཏི།
‘‘Addhā kho tyāhaṃ, gāmaṇi, na labhāmi – ‘alaṃ, gāmaṇi, tiṭṭhatetaṃ; mā maṃ etaṃ pucchī’ti. Api ca tyāhaṃ byākarissāmi. Yo so, gāmaṇi, yodhājīvo saṅgāme ussahati vāyamati, tassa taṃ cittaṃ pubbe gahitaṃ 2 dukkaṭaṃ duppaṇihitaṃ – ‘ime sattā haññantu vā bajjhantu vā ucchijjantu vā vinassantu vā mā vā ahesuṃ iti vā’ti. Tamenaṃ ussahantaṃ vāyamantaṃ pare hananti pariyāpādenti; so kāyassa bhedā paraṃ maraṇā parajito nāma nirayo tattha upapajjatīti. Sace kho panassa evaṃ diṭṭhi hoti – ‘yo so yodhājīvo saṅgāme ussahati vāyamati tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ, gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
ཨེཝཾ ཝུཏྟེ, ཡོདྷཱཛཱིཝོ གཱམཎི པརོདི, ཨསྶཱུནི པཝཏྟེསི། ‘‘ཨེཏཾ ཁོ ཏྱཱཧཾ, གཱམཎི, ནཱལཏྠཾ – ‘ཨལཾ, གཱམཎི, ཏིཊྛཏེཏཾ; མཱ མཾ ཨེཏཾ པུཙྪཱི’’’ཏི། ‘‘ནཱཧཾ, བྷནྟེ, ཨེཏཾ རོདཱམི ཡཾ མཾ བྷགཝཱ ཨེཝམཱཧ ; ཨཔིཙཱཧཾ, བྷནྟེ, པུབྦཀེཧི ཨཱཙརིཡཔཱཙརིཡེཧི ཡོདྷཱཛཱིཝེཧི དཱིགྷརཏྟཾ ནིཀཏོ ཝཉྩིཏོ པལུདྡྷོ – ‘ཡོ སོ ཡོདྷཱཛཱིཝོ སངྒཱམེ ཨུསྶཧཏི ཝཱཡམཏི, ཏམེནཾ ཨུསྶཧནྟཾ ཝཱཡམནྟཾ པརེ ཧནནྟི པརིཡཱཔཱདེནྟི, སོ ཀཱཡསྶ བྷེདཱ པརཾ མརཎཱ པརཛིཏཱནཾ དེཝཱནཾ སཧབྱཏཾ ཨུཔཔཛྫཏཱི’’’ཏི། ‘‘ཨབྷིཀྐནྟཾ, བྷནྟེ…པེ॰… ཨཛྫཏགྒེ པཱཎུཔེཏཾ སརཎཾ གཏ’’ནྟི། ཏཏིཡཾ།
Evaṃ vutte, yodhājīvo gāmaṇi parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha ; apicāhaṃ, bhante, pubbakehi ācariyapācariyehi yodhājīvehi dīgharattaṃ nikato vañcito paluddho – ‘yo so yodhājīvo saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante…pe… ajjatagge pāṇupetaṃ saraṇaṃ gata’’nti. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣-༥. ཡོདྷཱཛཱིཝསུཏྟཱདིཝཎྞནཱ • 3-5. Yodhājīvasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣-༥. ཡོདྷཱཛཱིཝསུཏྟཱདིཝཎྞནཱ • 3-5. Yodhājīvasuttādivaṇṇanā
