| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(14) 4. யோதா⁴ஜீவவக்³கோ³
(14) 4. Yodhājīvavaggo
1. யோதா⁴ஜீவஸுத்தவண்ணனா
1. Yodhājīvasuttavaṇṇanā
134. சதுத்த²ஸ்ஸ பட²மே யுத்³த⁴ங் உபஜீவதீதி யோதா⁴ஜீவோ. ராஜாரஹோதி ரஞ்ஞோ அனுச்ச²விகோ. ராஜபொ⁴க்³கோ³தி ரஞ்ஞோ உபபோ⁴க³பரிபோ⁴கோ³. அங்க³ந்தேவ ஸங்க்²யங் க³ச்ச²தீதி ஹத்தோ² விய பாதோ³ விய ச அவஸ்ஸங் இச்சி²தப்³ப³த்தா அங்க³ந்தி ஸங்க்²யங் க³ச்ச²தி. தூ³ரே பாதீ ஹோதீதி உத³கே உஸப⁴மத்தங் , த²லே அட்டு²ஸப⁴மத்தங், ததோ வா உத்தரிந்தி தூ³ரே கண்ட³ங் பாதேதி. து³ட்ட²கா³மணிஅப⁴யஸ்ஸ ஹி யோதா⁴ஜீவோ நவஉஸப⁴மத்தங் கண்ட³ங் பாதேஸி, பச்சி²மப⁴வே போ³தி⁴ஸத்தோ யோஜனப்பமாணங். அக்க²ணவேதீ⁴தி அவிராதி⁴தவேதீ⁴, அக்க²ணங் வா விஜ்ஜு விஜ்ஜந்தரிகாய விஜ்ஜி²துங் ஸமத்தோ²தி அத்தோ². மஹதோ காயஸ்ஸ பதா³லேதாதி ஏகதோப³த்³த⁴ங் ப²லகஸதம்பி மஹிங்ஸசம்மஸதம்பி அங்கு³ட்ட²பமாணப³ஹலங் லோஹபட்டம்பி சதுரங்கு³லப³ஹலங் அஸனபத³ரம்பி வித³த்தி²ப³ஹலங் உது³ம்ப³ரபத³ரம்பி தீ³க⁴ந்தேன வாலிகஸகடம்பி வினிவிஜ்ஜி²துங் ஸமத்தோ²தி அத்தோ². யங்கிஞ்சி ரூபந்திஆதி³ விஸுத்³தி⁴மக்³கே³ வித்தா²ரிதமேவ. நேதங் மமாதிஆதி³ தண்ஹாமானதி³ட்டி²படிக்கே²பவஸேன வுத்தங். ஸம்மப்பஞ்ஞாய பஸ்ஸதீதி ஸம்மா ஹேதுனா காரணேன ஸஹவிபஸ்ஸனாய மக்³க³பஞ்ஞாய பஸ்ஸதி. பதா³லேதீதி அரஹத்தமக்³கே³ன பதா³லேதி.
134. Catutthassa paṭhame yuddhaṃ upajīvatīti yodhājīvo. Rājārahoti rañño anucchaviko. Rājabhoggoti rañño upabhogaparibhogo. Aṅganteva saṅkhyaṃ gacchatīti hattho viya pādo viya ca avassaṃ icchitabbattā aṅganti saṅkhyaṃ gacchati. Dūre pātī hotīti udake usabhamattaṃ , thale aṭṭhusabhamattaṃ, tato vā uttarinti dūre kaṇḍaṃ pāteti. Duṭṭhagāmaṇiabhayassa hi yodhājīvo navausabhamattaṃ kaṇḍaṃ pātesi, pacchimabhave bodhisatto yojanappamāṇaṃ. Akkhaṇavedhīti avirādhitavedhī, akkhaṇaṃ vā vijju vijjantarikāya vijjhituṃ samatthoti attho. Mahato kāyassa padāletāti ekatobaddhaṃ phalakasatampi mahiṃsacammasatampi aṅguṭṭhapamāṇabahalaṃ lohapaṭṭampi caturaṅgulabahalaṃ asanapadarampi vidatthibahalaṃ udumbarapadarampi dīghantena vālikasakaṭampi vinivijjhituṃ samatthoti attho. Yaṃkiñci rūpantiādi visuddhimagge vitthāritameva. Netaṃ mamātiādi taṇhāmānadiṭṭhipaṭikkhepavasena vuttaṃ. Sammappaññāya passatīti sammā hetunā kāraṇena sahavipassanāya maggapaññāya passati. Padāletīti arahattamaggena padāleti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. யோதா⁴ஜீவஸுத்தங் • 1. Yodhājīvasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. யோதா⁴ஜீவஸுத்தவண்ணனா • 1. Yodhājīvasuttavaṇṇanā
