| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
(೧೪) ೪. ಯೋಧಾಜೀವವಗ್ಗೋ
(14) 4. Yodhājīvavaggo
೧. ಯೋಧಾಜೀವಸುತ್ತವಣ್ಣನಾ
1. Yodhājīvasuttavaṇṇanā
೧೩೪. ಚತುತ್ಥಸ್ಸ ಪಠಮೇ ಯುದ್ಧಂ ಉಪಜೀವತೀತಿ ಯೋಧಾಜೀವೋ। ರಾಜಾರಹೋತಿ ರಞ್ಞೋ ಅನುಚ್ಛವಿಕೋ। ರಾಜಭೋಗ್ಗೋತಿ ರಞ್ಞೋ ಉಪಭೋಗಪರಿಭೋಗೋ। ಅಙ್ಗನ್ತೇವ ಸಙ್ಖ್ಯಂ ಗಚ್ಛತೀತಿ ಹತ್ಥೋ ವಿಯ ಪಾದೋ ವಿಯ ಚ ಅವಸ್ಸಂ ಇಚ್ಛಿತಬ್ಬತ್ತಾ ಅಙ್ಗನ್ತಿ ಸಙ್ಖ್ಯಂ ಗಚ್ಛತಿ। ದೂರೇ ಪಾತೀ ಹೋತೀತಿ ಉದಕೇ ಉಸಭಮತ್ತಂ , ಥಲೇ ಅಟ್ಠುಸಭಮತ್ತಂ, ತತೋ ವಾ ಉತ್ತರಿನ್ತಿ ದೂರೇ ಕಣ್ಡಂ ಪಾತೇತಿ। ದುಟ್ಠಗಾಮಣಿಅಭಯಸ್ಸ ಹಿ ಯೋಧಾಜೀವೋ ನವಉಸಭಮತ್ತಂ ಕಣ್ಡಂ ಪಾತೇಸಿ, ಪಚ್ಛಿಮಭವೇ ಬೋಧಿಸತ್ತೋ ಯೋಜನಪ್ಪಮಾಣಂ। ಅಕ್ಖಣವೇಧೀತಿ ಅವಿರಾಧಿತವೇಧೀ, ಅಕ್ಖಣಂ ವಾ ವಿಜ್ಜು ವಿಜ್ಜನ್ತರಿಕಾಯ ವಿಜ್ಝಿತುಂ ಸಮತ್ಥೋತಿ ಅತ್ಥೋ। ಮಹತೋ ಕಾಯಸ್ಸ ಪದಾಲೇತಾತಿ ಏಕತೋಬದ್ಧಂ ಫಲಕಸತಮ್ಪಿ ಮಹಿಂಸಚಮ್ಮಸತಮ್ಪಿ ಅಙ್ಗುಟ್ಠಪಮಾಣಬಹಲಂ ಲೋಹಪಟ್ಟಮ್ಪಿ ಚತುರಙ್ಗುಲಬಹಲಂ ಅಸನಪದರಮ್ಪಿ ವಿದತ್ಥಿಬಹಲಂ ಉದುಮ್ಬರಪದರಮ್ಪಿ ದೀಘನ್ತೇನ ವಾಲಿಕಸಕಟಮ್ಪಿ ವಿನಿವಿಜ್ಝಿತುಂ ಸಮತ್ಥೋತಿ ಅತ್ಥೋ। ಯಂಕಿಞ್ಚಿ ರೂಪನ್ತಿಆದಿ ವಿಸುದ್ಧಿಮಗ್ಗೇ ವಿತ್ಥಾರಿತಮೇವ। ನೇತಂ ಮಮಾತಿಆದಿ ತಣ್ಹಾಮಾನದಿಟ್ಠಿಪಟಿಕ್ಖೇಪವಸೇನ ವುತ್ತಂ। ಸಮ್ಮಪ್ಪಞ್ಞಾಯ ಪಸ್ಸತೀತಿ ಸಮ್ಮಾ ಹೇತುನಾ ಕಾರಣೇನ ಸಹವಿಪಸ್ಸನಾಯ ಮಗ್ಗಪಞ್ಞಾಯ ಪಸ್ಸತಿ। ಪದಾಲೇತೀತಿ ಅರಹತ್ತಮಗ್ಗೇನ ಪದಾಲೇತಿ।
134. Catutthassa paṭhame yuddhaṃ upajīvatīti yodhājīvo. Rājārahoti rañño anucchaviko. Rājabhoggoti rañño upabhogaparibhogo. Aṅganteva saṅkhyaṃ gacchatīti hattho viya pādo viya ca avassaṃ icchitabbattā aṅganti saṅkhyaṃ gacchati. Dūre pātī hotīti udake usabhamattaṃ , thale aṭṭhusabhamattaṃ, tato vā uttarinti dūre kaṇḍaṃ pāteti. Duṭṭhagāmaṇiabhayassa hi yodhājīvo navausabhamattaṃ kaṇḍaṃ pātesi, pacchimabhave bodhisatto yojanappamāṇaṃ. Akkhaṇavedhīti avirādhitavedhī, akkhaṇaṃ vā vijju vijjantarikāya vijjhituṃ samatthoti attho. Mahato kāyassa padāletāti ekatobaddhaṃ phalakasatampi mahiṃsacammasatampi aṅguṭṭhapamāṇabahalaṃ lohapaṭṭampi caturaṅgulabahalaṃ asanapadarampi vidatthibahalaṃ udumbarapadarampi dīghantena vālikasakaṭampi vinivijjhituṃ samatthoti attho. Yaṃkiñci rūpantiādi visuddhimagge vitthāritameva. Netaṃ mamātiādi taṇhāmānadiṭṭhipaṭikkhepavasena vuttaṃ. Sammappaññāya passatīti sammā hetunā kāraṇena sahavipassanāya maggapaññāya passati. Padāletīti arahattamaggena padāleti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧. ಯೋಧಾಜೀವಸುತ್ತಂ • 1. Yodhājīvasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧. ಯೋಧಾಜೀವಸುತ್ತವಣ್ಣನಾ • 1. Yodhājīvasuttavaṇṇanā
