| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
11. யோக³க்கே²மிவக்³கோ³
11. Yogakkhemivaggo
1. யோக³க்கே²மிஸுத்தங்
1. Yogakkhemisuttaṃ
104. ஸாவத்தி²னிதா³னங் . ‘‘யோக³க்கே²மிபரியாயங் வோ, பி⁴க்க²வே, த⁴ம்மபரியாயங் தே³ஸெஸ்ஸாமி. தங் ஸுணாத². கதமோ ச, பி⁴க்க²வே, யோக³க்கே²மிபரியாயோ த⁴ம்மபரியாயோ? ஸந்தி, பி⁴க்க²வே, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தே ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. தேஸஞ்ச பஹானாய அக்கா²ஸி யோக³ங், தஸ்மா ததா²க³தோ ‘யோக³க்கே²மீ’தி வுச்சதி…பே॰… ஸந்தி, பி⁴க்க²வே, மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தே ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. தேஸஞ்ச பஹானாய அக்கா²ஸி யோக³ங், தஸ்மா ததா²க³தோ ‘யோக³க்கே²மீ’தி வுச்சதி. அயங் கோ², பி⁴க்க²வே, யோக³க்கே²மிபரியாயோ த⁴ம்மபரியாயோ’’தி. பட²மங்.
104. Sāvatthinidānaṃ . ‘‘Yogakkhemipariyāyaṃ vo, bhikkhave, dhammapariyāyaṃ desessāmi. Taṃ suṇātha. Katamo ca, bhikkhave, yogakkhemipariyāyo dhammapariyāyo? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Te tathāgatassa pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tesañca pahānāya akkhāsi yogaṃ, tasmā tathāgato ‘yogakkhemī’ti vuccati…pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Te tathāgatassa pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tesañca pahānāya akkhāsi yogaṃ, tasmā tathāgato ‘yogakkhemī’ti vuccati. Ayaṃ kho, bhikkhave, yogakkhemipariyāyo dhammapariyāyo’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. யோக³க்கே²மிஸுத்தவண்ணனா • 1. Yogakkhemisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. யோக³க்கே²மிஸுத்தவண்ணனா • 1. Yogakkhemisuttavaṇṇanā
