| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១១. យោគក្ខេមិវគ្គោ
11. Yogakkhemivaggo
១. យោគក្ខេមិសុត្តវណ្ណនា
1. Yogakkhemisuttavaṇṇanā
១០៤. ចតូហិ យោគេហីតិ កាមយោគាទីហិ ចតូហិ យោគេហិ។ ខេមិនោតិ ខេមវតោ កុសលិនោ។ ការណភូតន្តិ កត្តព្ពឧបាយស្ស ការណភូតំ។ បរិយាយតិ បវត្តិំ និវត្តិញ្ច ញាបេតីតិ បរិយាយោ, ធម្មោ ច សោ បរិយត្តិធម្មត្តា បរិយាយោ ចាតិ ធម្មបរិយាយោ, តំ ធម្មបរិយាយំ។ យស្មា បន សោ តស្សាធិគមស្ស ការណំ ហោតិ, តស្មា វុត្តំ ‘‘ធម្មការណ’’ន្តិ។ យុត្តិន្តិ សមថវិបស្សនាធម្មានីតិ វា ចតុសច្ចធម្មានីតិ វា។ ‘‘តស្មា’’តិ បទំ ឧទ្ធរិត្វា – ‘‘កស្មា’’តិ ការណំ បុច្ឆន្តោ ‘‘កិំ អក្ខាតត្តា, ឧទាហុ បហីនត្តា’’តិ វិភជិត្វា បុច្ឆិ។ យស្មា បន ឆន្ទរាគប្បហានំ យោគក្ខេមិភាវស្ស ការណំ, ន កថនំ, តស្មា ‘‘បហីនត្តា’’តិអាទិ វុត្តំ។
104.Catūhiyogehīti kāmayogādīhi catūhi yogehi. Kheminoti khemavato kusalino. Kāraṇabhūtanti kattabbaupāyassa kāraṇabhūtaṃ. Pariyāyati pavattiṃ nivattiñca ñāpetīti pariyāyo, dhammo ca so pariyattidhammattā pariyāyo cāti dhammapariyāyo, taṃ dhammapariyāyaṃ. Yasmā pana so tassādhigamassa kāraṇaṃ hoti, tasmā vuttaṃ ‘‘dhammakāraṇa’’nti. Yuttinti samathavipassanādhammānīti vā catusaccadhammānīti vā. ‘‘Tasmā’’ti padaṃ uddharitvā – ‘‘kasmā’’ti kāraṇaṃ pucchanto ‘‘kiṃ akkhātattā, udāhu pahīnattā’’ti vibhajitvā pucchi. Yasmā pana chandarāgappahānaṃ yogakkhemibhāvassa kāraṇaṃ, na kathanaṃ, tasmā ‘‘pahīnattā’’tiādi vuttaṃ.
យោគក្ខេមិសុត្តវណ្ណនា និដ្ឋិតា។
Yogakkhemisuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. យោគក្ខេមិសុត្តំ • 1. Yogakkhemisuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. យោគក្ខេមិសុត្តវណ្ណនា • 1. Yogakkhemisuttavaṇṇanā
