| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. யோக³ஸுத்தவண்ணனா
10. Yogasuttavaṇṇanā
10. த³ஸமே யோஜெந்தீதி கம்மங் விபாகேன ப⁴வாதி³ங், ப⁴வந்தராதீ³ஹி து³க்கே²ன ஸத்தங் யோஜெந்தி க⁴டெந்தீதி யோகா³. காமனட்டே²ன காமோ ச ஸோ யதா²வுத்தேனத்தே²ன யோகோ³ சாதி காமயோகோ³. ப⁴வயோகோ³ நாம ப⁴வராகோ³தி த³ஸ்ஸேதுங் ‘‘ரூபாரூபப⁴வேஸூ’’திஆதி³ வுத்தங். தத்த² பட²மோ உபபத்திப⁴வேஸு ராகோ³, து³தியோ கம்மப⁴வேஸு, ததியோ ப⁴வதி³ட்டி²ஸஹக³தோ யதா² ரஜ்ஜனட்டே²ன ராகோ³, ஏவங் யுஜ்ஜனட்டே²ன யோகோ³தி வுத்தோ. சதூஸு ஸச்சேஸு அஞ்ஞாணந்தி இத³ங் ஸுத்தந்தனயங் நிஸ்ஸாய வுத்தங். ஸுத்தந்தஸங்வண்ணனா ஹேஸாதி, தத³ந்தோக³த⁴த்தா வா புப்³ப³ந்தாதீ³னங்.
10. Dasame yojentīti kammaṃ vipākena bhavādiṃ, bhavantarādīhi dukkhena sattaṃ yojenti ghaṭentīti yogā. Kāmanaṭṭhena kāmo ca so yathāvuttenatthena yogo cāti kāmayogo. Bhavayogo nāma bhavarāgoti dassetuṃ ‘‘rūpārūpabhavesū’’tiādi vuttaṃ. Tattha paṭhamo upapattibhavesu rāgo, dutiyo kammabhavesu, tatiyo bhavadiṭṭhisahagato yathā rajjanaṭṭhena rāgo, evaṃ yujjanaṭṭhena yogoti vutto. Catūsu saccesu aññāṇanti idaṃ suttantanayaṃ nissāya vuttaṃ. Suttantasaṃvaṇṇanā hesāti, tadantogadhattā vā pubbantādīnaṃ.
ஸமுத³யந்தி த்³வே ஸமுத³யா க²ணிகஸமுத³யோ பச்சயஸமுத³யோ ச. உப்பாத³க்க²ணோ க²ணிகஸமுத³யோ, பச்சயோவ பச்சயஸமுத³யோ. ஸமுத³யதே ஸமுத³யனங் ஸமுத³யோ, ஸமுதே³தி ஏதஸ்மாதி ஸமுத³யோதி ஏவங் உபி⁴ன்னங் ஸமுத³யானங் ஸத்³த³த்த²தோபி பே⁴தோ³ வேதி³தப்³போ³. பச்சயஸமுத³யங் பஜானந்தோபி பி⁴க்கு² க²ணிகஸமுத³யங் பஜானாதி, க²ணிகஸமுத³யங் பஜானந்தோபி பச்சயஸமுத³யங் பஜானாதி. பச்சயதோ ஹி ஸங்கா²ரானங் உத³யங் பஸ்ஸதோ க²ணதோ ச நேஸங் உத³யத³ஸ்ஸனங் ஸுக²ங் ஹோதி, க²ணதோ ச நேஸங் உத³யங் பஸ்ஸதோ பகே³வ பச்சயானங் ஸுக்³க³ஹிதத்தா பச்சயதோ த³ஸ்ஸனங் ஸுகே²ன இஜ்ஜ²தி. இத⁴ பன க²ணிகஸமுத³யங் த³ஸ்ஸெந்தோ ஆஹ ‘‘ஸமுத³யந்தி உப்பத்தி’’ந்தி.
Samudayanti dve samudayā khaṇikasamudayo paccayasamudayo ca. Uppādakkhaṇo khaṇikasamudayo, paccayova paccayasamudayo. Samudayate samudayanaṃ samudayo, samudeti etasmāti samudayoti evaṃ ubhinnaṃ samudayānaṃ saddatthatopi bhedo veditabbo. Paccayasamudayaṃ pajānantopi bhikkhu khaṇikasamudayaṃ pajānāti, khaṇikasamudayaṃ pajānantopi paccayasamudayaṃ pajānāti. Paccayato hi saṅkhārānaṃ udayaṃ passato khaṇato ca nesaṃ udayadassanaṃ sukhaṃ hoti, khaṇato ca nesaṃ udayaṃ passato pageva paccayānaṃ suggahitattā paccayato dassanaṃ sukhena ijjhati. Idha pana khaṇikasamudayaṃ dassento āha ‘‘samudayanti uppatti’’nti.
அத்த²ங்க³மோபி து³விதோ⁴ அச்சந்தத்த²ங்க³மோ, பே⁴த³த்த²ங்க³மோதி. அச்சந்தத்த²ங்க³மோ அப்பவத்தினிரோதோ⁴, நிப்³பா³னந்தி கேசி. பே⁴த³த்த²ங்க³மோ க²ணிகனிரோதோ⁴. தது³ப⁴யங் புப்³ப³பா⁴கே³ உக்³க³ஹபரிபுச்சா²தி³வஸேன பஸ்ஸதோ அஞ்ஞதரத³ஸ்ஸனேன இதரத³ஸ்ஸனம்பி ஸித்³த⁴மேவ ஹோதி. புப்³ப³பா⁴கே³யேவ ஆரம்மணவஸேன க²யதோ வயதோ ஸம்மஸனாதி³காலே பே⁴த³த்த²ங்க³மங் பஸ்ஸந்தோ ப்³யதிரேகவஸேன அனுஸ்ஸவாதி³தோ அச்சந்தத்த²ங்க³மங் பஸ்ஸதி, மக்³க³க்க²ணே பன ஆரம்மணதோ அச்சந்தத்த²ங்க³மங் பஸ்ஸந்தோ அஸம்மோஹதோ இதரம்பி பஸ்ஸதி. இத⁴ பன பே⁴த³த்த²ங்க³மங் த³ஸ்ஸெந்தோ ஆஹ ‘‘அத்த²ங்க³மந்தி பே⁴த³’’ந்தி. காமானங் உப்பத்திபே⁴த³க்³க³ஹணேனேவ செத்த² யதா² காமானங் படிச்சஸமுப்பன்னதா விபா⁴விதா, ஏவங் காமவத்து²னோபீதி உப⁴யேஸம்பி அனிச்சதா து³க்க²தா அனத்ததா ச விபா⁴விதாதி த³ட்ட²ப்³ப³ங். மது⁴ரபா⁴வந்தி இமினா காமஸன்னிஸ்ஸிதங் ஸுக²ங் ஸோமனஸ்ஸங் த³ஸ்ஸேதி. ‘‘யங் கோ², பி⁴க்க²வே, இமே பஞ்ச காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங், அயங் காமானங் அஸ்ஸாதோ³’’தி (ம॰ நி॰ 1.166) ஹி வுத்தங். அமது⁴ரபா⁴வந்தி இமினா பன காமஹேதுகங் து³க்க²ங் தோ³மனஸ்ஸங் த³ஸ்ஸேதி.
Atthaṅgamopi duvidho accantatthaṅgamo, bhedatthaṅgamoti. Accantatthaṅgamo appavattinirodho, nibbānanti keci. Bhedatthaṅgamo khaṇikanirodho. Tadubhayaṃ pubbabhāge uggahaparipucchādivasena passato aññataradassanena itaradassanampi siddhameva hoti. Pubbabhāgeyeva ārammaṇavasena khayato vayato sammasanādikāle bhedatthaṅgamaṃ passanto byatirekavasena anussavādito accantatthaṅgamaṃ passati, maggakkhaṇe pana ārammaṇato accantatthaṅgamaṃ passanto asammohato itarampi passati. Idha pana bhedatthaṅgamaṃ dassento āha ‘‘atthaṅgamanti bheda’’nti. Kāmānaṃ uppattibhedaggahaṇeneva cettha yathā kāmānaṃ paṭiccasamuppannatā vibhāvitā, evaṃ kāmavatthunopīti ubhayesampi aniccatā dukkhatā anattatā ca vibhāvitāti daṭṭhabbaṃ. Madhurabhāvanti iminā kāmasannissitaṃ sukhaṃ somanassaṃ dasseti. ‘‘Yaṃ kho, bhikkhave, ime pañca kāmaguṇe paṭicca uppajjati sukhaṃ somanassaṃ, ayaṃ kāmānaṃ assādo’’ti (ma. ni. 1.166) hi vuttaṃ. Amadhurabhāvanti iminā pana kāmahetukaṃ dukkhaṃ domanassaṃ dasseti.
ப²ஸ்ஸாயதனானந்தி ச²த்³வாரிகஸ்ஸ ப²ஸ்ஸஸ்ஸ காரணபூ⁴தானங் சக்கா²தி³ஆயதனானங். தேனாஹ ‘‘சக்கா²தீ³னங் சக்கு²ஸம்ப²ஸ்ஸாதி³காரணான’’ந்தி. புனப்³ப⁴வகரணங் புனோப⁴வோ உத்தரபத³லோபேன, மனோ-ஸத்³த³ஸ்ஸ விய ச புரிமபத³ஸ்ஸ ஓகாரந்ததா த³ட்ட²ப்³பா³. புனோப⁴வோ ஸீலமேதேஸந்தி போனோப⁴விகா. அத² வா ஸீலத்தே²ன இகஸத்³தே³ன க³மிதத்த²த்தா கிரியாவாசகஸத்³த³ஸ்ஸ அத³ஸ்ஸனங் த³ட்ட²ப்³ப³ங் யதா² அபூபப⁴க்க²னஸீலோ ஆபூபிகோ. அத² வா புனப்³ப⁴வங் தெ³ந்தி, புனப்³ப⁴வாய ஸங்வத்தந்தி, புனப்புனப்³ப⁴வே நிப்³ப³த்தெந்தீதி போனோப⁴விகா. ‘‘தத்³தி⁴தா’’தி ஹி ப³ஹுவசனநித்³தே³ஸா விசித்தத்தா வா தத்³தி⁴தானங் அபி⁴தா⁴னலக்க²ணத்தா வா ‘‘புனப்³ப⁴வங் தெ³ந்தீ’’திஆதீ³ஸுபி அத்தே²ஸு போனோப⁴விகஸத்³த³ஸித்³தி⁴ த³ட்ட²ப்³பா³.
Phassāyatanānanti chadvārikassa phassassa kāraṇabhūtānaṃ cakkhādiāyatanānaṃ. Tenāha ‘‘cakkhādīnaṃ cakkhusamphassādikāraṇāna’’nti. Punabbhavakaraṇaṃ punobhavo uttarapadalopena, mano-saddassa viya ca purimapadassa okārantatā daṭṭhabbā. Punobhavo sīlametesanti ponobhavikā. Atha vā sīlatthena ikasaddena gamitatthattā kiriyāvācakasaddassa adassanaṃ daṭṭhabbaṃ yathā apūpabhakkhanasīlo āpūpiko. Atha vā punabbhavaṃ denti, punabbhavāya saṃvattanti, punappunabbhave nibbattentīti ponobhavikā. ‘‘Taddhitā’’ti hi bahuvacananiddesā vicittattā vā taddhitānaṃ abhidhānalakkhaṇattā vā ‘‘punabbhavaṃ dentī’’tiādīsupi atthesu ponobhavikasaddasiddhi daṭṭhabbā.
விஸங்யோஜெந்தி படிபன்னங் புக்³க³லங் காமயோகா³தி³தோ வியோஜெந்தீதி விஸங்யோகா³, அஸுப⁴ஜ்ஜா²னாதீ³னி விஸங்யோஜனகாரணானி. தேனாஹ ‘‘விஸங்யோகா³தி விஸங்யோஜனகாரணானீ’’திஆதி³.
Visaṃyojenti paṭipannaṃ puggalaṃ kāmayogādito viyojentīti visaṃyogā, asubhajjhānādīni visaṃyojanakāraṇāni. Tenāha ‘‘visaṃyogāti visaṃyojanakāraṇānī’’tiādi.
யோக³ஸுத்தவண்ணனா நிட்டி²தா.
Yogasuttavaṇṇanā niṭṭhitā.
ப⁴ண்ட³கா³மவக்³க³வண்ணனா நிட்டி²தா.
Bhaṇḍagāmavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. யோக³ஸுத்தங் • 10. Yogasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. யோக³ஸுத்தவண்ணனா • 10. Yogasuttavaṇṇanā
