| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. যোগসুত্তৰণ্ণনা
10. Yogasuttavaṇṇanā
১০. দসমে ৰট্টস্মিং যোজেন্তীতি যোগা। কামযোগোতিআদীসু পঞ্চকামগুণিকো রাগো কামযোগো। রূপারূপভৰেসু ছন্দরাগো ভৰযোগো, তথা ঝাননিকন্তি। সস্সতদিট্ঠিসহগতো চ রাগো দ্ৰাসট্ঠি দিট্ঠিযো চ দিট্ঠিযোগো। চতূসু সচ্চেসু অঞ্ঞাণং অৰিজ্জাযোগো। কামেসু ৰা যোজেতীতি কামযোগো। ভৰেসু যোজেতীতি ভৰযোগো। দিট্ঠীসু যোজেতীতি দিট্ঠিযোগো। অৰিজ্জায যোজেতীতি অৰিজ্জাযোগোতি হেট্ঠা ৰুত্তধম্মানংযেৰেতং অধিৰচনং।
10. Dasame vaṭṭasmiṃ yojentīti yogā. Kāmayogotiādīsu pañcakāmaguṇiko rāgo kāmayogo. Rūpārūpabhavesu chandarāgo bhavayogo, tathā jhānanikanti. Sassatadiṭṭhisahagato ca rāgo dvāsaṭṭhi diṭṭhiyo ca diṭṭhiyogo. Catūsu saccesu aññāṇaṃ avijjāyogo. Kāmesu vā yojetīti kāmayogo. Bhavesu yojetīti bhavayogo. Diṭṭhīsu yojetīti diṭṭhiyogo. Avijjāya yojetīti avijjāyogoti heṭṭhā vuttadhammānaṃyevetaṃ adhivacanaṃ.
ইদানি তে ৰিত্থারেত্ৰা দস্সেন্তো কতমো চ, ভিক্খৰেতিআদিমাহ। তত্থ সমুদযন্তি উপ্পত্তিং। অত্থঙ্গমন্তি ভেদং। অস্সাদন্তি মধুরভাৰং। আদীনৰন্তি অমধুরভাৰং দোসং। নিস্সরণন্তি নিস্সটভাৰং। কামেসূতি ৰত্থুকামেসু। কামরাগোতি কামে আরব্ভ উপ্পন্নরাগো। সেসপদেসুপি এসেৰ নযো। অনুসেতীতি নিব্বত্ততি। অযং ৰুচ্চতি, ভিক্খৰে, কামযোগোতি, ভিক্খৰে, ইদং কামেসু যোজনকারণং বন্ধনকারণং ৰুচ্চতীতি এৰং সব্বত্থ অত্থো ৰেদিতব্বো।
Idāni te vitthāretvā dassento katamo ca, bhikkhavetiādimāha. Tattha samudayanti uppattiṃ. Atthaṅgamanti bhedaṃ. Assādanti madhurabhāvaṃ. Ādīnavanti amadhurabhāvaṃ dosaṃ. Nissaraṇanti nissaṭabhāvaṃ. Kāmesūti vatthukāmesu. Kāmarāgoti kāme ārabbha uppannarāgo. Sesapadesupi eseva nayo. Anusetīti nibbattati. Ayaṃ vuccati, bhikkhave, kāmayogoti, bhikkhave, idaṃ kāmesu yojanakāraṇaṃ bandhanakāraṇaṃ vuccatīti evaṃ sabbattha attho veditabbo.
ফস্সাযতনানন্তি চক্খাদীনং চক্খুসম্ফস্সাদিকারণানং। অৰিজ্জা অঞ্ঞাণন্তি ঞাণপটিপক্খভাৰেন অঞ্ঞাণসঙ্খাতা অৰিজ্জা। ইতি কামযোগোতি এত্থ ইতি সদ্দো চতূহিপি যোগেহি সদ্ধিং যোজেতব্বো ‘‘এৰং কামযোগো, এৰং ভৰযোগো’’তি। সংযুত্তোতি পরিৰারিতো। পাপকেহীতি লামকেহি। অকুসলেহীতি অকোসল্লসম্ভূতেহি। সংকিলেসিকেহীতি সংকিলেসনকেহি, পসন্নস্স চিত্তস্স পসন্নভাৰদূসকেহীতি অত্থো। পোনোব্ভৰিকেহীতি পুনব্ভৰনিব্বত্তকেহি। সদরেহীতি সদরথেহি। দুক্খৰিপাকেহীতি ৰিপাককালে দুক্খুপ্পাদকেহি। আযতিং জাতিজরামরণিকেহীতি অনাগতে পুনপ্পুনং জাতিজরামরণনিব্বত্তকেহি। তস্মা অযোগক্খেমীতি ৰুচ্চতীতি যস্মা অপ্পহীনযোগো পুগ্গলো এতেহি ধম্মেহি সম্পযুত্তো হোতি, তস্মা চতূহি যোগেহি খেমং নিব্বানং অনধিগতত্তা ন যোগক্খেমীতি ৰুচ্চতি।
Phassāyatanānanti cakkhādīnaṃ cakkhusamphassādikāraṇānaṃ. Avijjā aññāṇanti ñāṇapaṭipakkhabhāvena aññāṇasaṅkhātā avijjā. Iti kāmayogoti ettha iti saddo catūhipi yogehi saddhiṃ yojetabbo ‘‘evaṃ kāmayogo, evaṃ bhavayogo’’ti. Saṃyuttoti parivārito. Pāpakehīti lāmakehi. Akusalehīti akosallasambhūtehi. Saṃkilesikehīti saṃkilesanakehi, pasannassa cittassa pasannabhāvadūsakehīti attho. Ponobbhavikehīti punabbhavanibbattakehi. Sadarehīti sadarathehi. Dukkhavipākehīti vipākakāle dukkhuppādakehi. Āyatiṃ jātijarāmaraṇikehīti anāgate punappunaṃ jātijarāmaraṇanibbattakehi. Tasmāayogakkhemīti vuccatīti yasmā appahīnayogo puggalo etehi dhammehi sampayutto hoti, tasmā catūhi yogehi khemaṃ nibbānaṃ anadhigatattā na yogakkhemīti vuccati.
ৰিসংযোগোতি ৰিসংযোজনকারণানি। কামযোগৰিসংযোগোতি কামযোগতো ৰিসংযোজনকারণং। সেসপদেসুপি এসেৰ নযো। তত্থ অসুভজ্ঝানং কামযোগৰিসংযোগো, তং পাদকং কত্ৰা অধিগতো অনাগামিমগ্গো একন্তেনেৰ কামযোগৰিসংযোগো নাম। অরহত্তমগ্গো ভৰযোগৰিসংযোগো নাম, সোতাপত্তিমগ্গো দিট্ঠিযোগৰিসংযোগো নাম, অরহত্তমগ্গো অৰিজ্জাযোগৰিসংযোগো নাম। ইদানি তে ৰিত্থারৰসেন দস্সেন্তো কতমো চ, ভিক্খৰেতিআদিমাহ। তস্সত্থো ৰুত্তনযেনেৰ ৰেদিতব্বো।
Visaṃyogoti visaṃyojanakāraṇāni. Kāmayogavisaṃyogoti kāmayogato visaṃyojanakāraṇaṃ. Sesapadesupi eseva nayo. Tattha asubhajjhānaṃ kāmayogavisaṃyogo, taṃ pādakaṃ katvā adhigato anāgāmimaggo ekanteneva kāmayogavisaṃyogo nāma. Arahattamaggo bhavayogavisaṃyogo nāma, sotāpattimaggo diṭṭhiyogavisaṃyogo nāma, arahattamaggo avijjāyogavisaṃyogo nāma. Idāni te vitthāravasena dassento katamo ca, bhikkhavetiādimāha. Tassattho vuttanayeneva veditabbo.
ভৰযোগেন চূভযন্তি ভৰযোগেন চ সংযুত্তা, কিঞ্চি ভিয্যো উভযেনাপি সম্পযুত্তা, যেন কেনচি যোগেন সমন্নাগতাতি অত্থো। পুরক্খতাতি পুরতো কতা, পরিৰারিতা ৰা। কামে পরিঞ্ঞাযাতি দুৰিধেপি কামে পরিজানিত্ৰা। ভৰযোগঞ্চ সব্বসোতি ভৰযোগঞ্চ সব্বমেৰ পরিজানিত্ৰা। সমূহচ্চাতি সমূহনিত্ৰা। ৰিরাজযন্তি ৰিরাজেন্তো, ৰিরাজেত্ৰা ৰা। ‘‘ৰিরাজেন্তো’’তি হি ৰুত্তে মগ্গো কথিতো হোতি, ‘‘ৰিরাজেত্ৰা’’তি ৰুত্তে ফলং। মুনীতি খীণাসৰমুনি। ইতি ইমস্মিং সুত্তেপি গাথাসুপি ৰট্টৰিৰট্টমেৰ কথিতন্তি।
Bhavayogena cūbhayanti bhavayogena ca saṃyuttā, kiñci bhiyyo ubhayenāpi sampayuttā, yena kenaci yogena samannāgatāti attho. Purakkhatāti purato katā, parivāritā vā. Kāme pariññāyāti duvidhepi kāme parijānitvā. Bhavayogañca sabbasoti bhavayogañca sabbameva parijānitvā. Samūhaccāti samūhanitvā. Virājayanti virājento, virājetvā vā. ‘‘Virājento’’ti hi vutte maggo kathito hoti, ‘‘virājetvā’’ti vutte phalaṃ. Munīti khīṇāsavamuni. Iti imasmiṃ suttepi gāthāsupi vaṭṭavivaṭṭameva kathitanti.
ভণ্ডগামৰগ্গো পঠমো।
Bhaṇḍagāmavaggo paṭhamo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. যোগসুত্তং • 10. Yogasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. যোগসুত্তৰণ্ণনা • 10. Yogasuttavaṇṇanā
