| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. যোগসুত্তৰণ্ণনা
10. Yogasuttavaṇṇanā
১০. দসমে যোজেন্তীতি কম্মং ৰিপাকেন ভৰাদিং, ভৰন্তরাদীহি দুক্খেন সত্তং যোজেন্তি ঘটেন্তীতি যোগা। কামনট্ঠেন কামো চ সো যথাৰুত্তেনত্থেন যোগো চাতি কামযোগো। ভৰযোগো নাম ভৰরাগোতি দস্সেতুং ‘‘রূপারূপভৰেসূ’’তিআদি ৰুত্তং। তত্থ পঠমো উপপত্তিভৰেসু রাগো, দুতিযো কম্মভৰেসু, ততিযো ভৰদিট্ঠিসহগতো যথা রজ্জনট্ঠেন রাগো, এৰং যুজ্জনট্ঠেন যোগোতি ৰুত্তো। চতূসু সচ্চেসু অঞ্ঞাণন্তি ইদং সুত্তন্তনযং নিস্সায ৰুত্তং। সুত্তন্তসংৰণ্ণনা হেসাতি, তদন্তোগধত্তা ৰা পুব্বন্তাদীনং।
10. Dasame yojentīti kammaṃ vipākena bhavādiṃ, bhavantarādīhi dukkhena sattaṃ yojenti ghaṭentīti yogā. Kāmanaṭṭhena kāmo ca so yathāvuttenatthena yogo cāti kāmayogo. Bhavayogo nāma bhavarāgoti dassetuṃ ‘‘rūpārūpabhavesū’’tiādi vuttaṃ. Tattha paṭhamo upapattibhavesu rāgo, dutiyo kammabhavesu, tatiyo bhavadiṭṭhisahagato yathā rajjanaṭṭhena rāgo, evaṃ yujjanaṭṭhena yogoti vutto. Catūsu saccesu aññāṇanti idaṃ suttantanayaṃ nissāya vuttaṃ. Suttantasaṃvaṇṇanā hesāti, tadantogadhattā vā pubbantādīnaṃ.
সমুদযন্তি দ্ৰে সমুদযা খণিকসমুদযো পচ্চযসমুদযো চ। উপ্পাদক্খণো খণিকসমুদযো, পচ্চযোৰ পচ্চযসমুদযো। সমুদযতে সমুদযনং সমুদযো, সমুদেতি এতস্মাতি সমুদযোতি এৰং উভিন্নং সমুদযানং সদ্দত্থতোপি ভেদো ৰেদিতব্বো। পচ্চযসমুদযং পজানন্তোপি ভিক্খু খণিকসমুদযং পজানাতি, খণিকসমুদযং পজানন্তোপি পচ্চযসমুদযং পজানাতি। পচ্চযতো হি সঙ্খারানং উদযং পস্সতো খণতো চ নেসং উদযদস্সনং সুখং হোতি, খণতো চ নেসং উদযং পস্সতো পগেৰ পচ্চযানং সুগ্গহিতত্তা পচ্চযতো দস্সনং সুখেন ইজ্ঝতি। ইধ পন খণিকসমুদযং দস্সেন্তো আহ ‘‘সমুদযন্তি উপ্পত্তি’’ন্তি।
Samudayanti dve samudayā khaṇikasamudayo paccayasamudayo ca. Uppādakkhaṇo khaṇikasamudayo, paccayova paccayasamudayo. Samudayate samudayanaṃ samudayo, samudeti etasmāti samudayoti evaṃ ubhinnaṃ samudayānaṃ saddatthatopi bhedo veditabbo. Paccayasamudayaṃ pajānantopi bhikkhu khaṇikasamudayaṃ pajānāti, khaṇikasamudayaṃ pajānantopi paccayasamudayaṃ pajānāti. Paccayato hi saṅkhārānaṃ udayaṃ passato khaṇato ca nesaṃ udayadassanaṃ sukhaṃ hoti, khaṇato ca nesaṃ udayaṃ passato pageva paccayānaṃ suggahitattā paccayato dassanaṃ sukhena ijjhati. Idha pana khaṇikasamudayaṃ dassento āha ‘‘samudayanti uppatti’’nti.
অত্থঙ্গমোপি দুৰিধো অচ্চন্তত্থঙ্গমো, ভেদত্থঙ্গমোতি। অচ্চন্তত্থঙ্গমো অপ্পৰত্তিনিরোধো, নিব্বানন্তি কেচি। ভেদত্থঙ্গমো খণিকনিরোধো। তদুভযং পুব্বভাগে উগ্গহপরিপুচ্ছাদিৰসেন পস্সতো অঞ্ঞতরদস্সনেন ইতরদস্সনম্পি সিদ্ধমেৰ হোতি। পুব্বভাগেযেৰ আরম্মণৰসেন খযতো ৰযতো সম্মসনাদিকালে ভেদত্থঙ্গমং পস্সন্তো ব্যতিরেকৰসেন অনুস্সৰাদিতো অচ্চন্তত্থঙ্গমং পস্সতি, মগ্গক্খণে পন আরম্মণতো অচ্চন্তত্থঙ্গমং পস্সন্তো অসম্মোহতো ইতরম্পি পস্সতি। ইধ পন ভেদত্থঙ্গমং দস্সেন্তো আহ ‘‘অত্থঙ্গমন্তি ভেদ’’ন্তি। কামানং উপ্পত্তিভেদগ্গহণেনেৰ চেত্থ যথা কামানং পটিচ্চসমুপ্পন্নতা ৰিভাৰিতা, এৰং কামৰত্থুনোপীতি উভযেসম্পি অনিচ্চতা দুক্খতা অনত্ততা চ ৰিভাৰিতাতি দট্ঠব্বং। মধুরভাৰন্তি ইমিনা কামসন্নিস্সিতং সুখং সোমনস্সং দস্সেতি। ‘‘যং খো, ভিক্খৰে, ইমে পঞ্চ কামগুণে পটিচ্চ উপ্পজ্জতি সুখং সোমনস্সং, অযং কামানং অস্সাদো’’তি (ম॰ নি॰ ১.১৬৬) হি ৰুত্তং। অমধুরভাৰন্তি ইমিনা পন কামহেতুকং দুক্খং দোমনস্সং দস্সেতি।
Atthaṅgamopi duvidho accantatthaṅgamo, bhedatthaṅgamoti. Accantatthaṅgamo appavattinirodho, nibbānanti keci. Bhedatthaṅgamo khaṇikanirodho. Tadubhayaṃ pubbabhāge uggahaparipucchādivasena passato aññataradassanena itaradassanampi siddhameva hoti. Pubbabhāgeyeva ārammaṇavasena khayato vayato sammasanādikāle bhedatthaṅgamaṃ passanto byatirekavasena anussavādito accantatthaṅgamaṃ passati, maggakkhaṇe pana ārammaṇato accantatthaṅgamaṃ passanto asammohato itarampi passati. Idha pana bhedatthaṅgamaṃ dassento āha ‘‘atthaṅgamanti bheda’’nti. Kāmānaṃ uppattibhedaggahaṇeneva cettha yathā kāmānaṃ paṭiccasamuppannatā vibhāvitā, evaṃ kāmavatthunopīti ubhayesampi aniccatā dukkhatā anattatā ca vibhāvitāti daṭṭhabbaṃ. Madhurabhāvanti iminā kāmasannissitaṃ sukhaṃ somanassaṃ dasseti. ‘‘Yaṃ kho, bhikkhave, ime pañca kāmaguṇe paṭicca uppajjati sukhaṃ somanassaṃ, ayaṃ kāmānaṃ assādo’’ti (ma. ni. 1.166) hi vuttaṃ. Amadhurabhāvanti iminā pana kāmahetukaṃ dukkhaṃ domanassaṃ dasseti.
ফস্সাযতনানন্তি ছদ্ৰারিকস্স ফস্সস্স কারণভূতানং চক্খাদিআযতনানং। তেনাহ ‘‘চক্খাদীনং চক্খুসম্ফস্সাদিকারণান’’ন্তি। পুনব্ভৰকরণং পুনোভৰো উত্তরপদলোপেন, মনো-সদ্দস্স ৰিয চ পুরিমপদস্স ওকারন্ততা দট্ঠব্বা। পুনোভৰো সীলমেতেসন্তি পোনোভৰিকা। অথ ৰা সীলত্থেন ইকসদ্দেন গমিতত্থত্তা কিরিযাৰাচকসদ্দস্স অদস্সনং দট্ঠব্বং যথা অপূপভক্খনসীলো আপূপিকো। অথ ৰা পুনব্ভৰং দেন্তি, পুনব্ভৰায সংৰত্তন্তি, পুনপ্পুনব্ভৰে নিব্বত্তেন্তীতি পোনোভৰিকা। ‘‘তদ্ধিতা’’তি হি বহুৰচননিদ্দেসা ৰিচিত্তত্তা ৰা তদ্ধিতানং অভিধানলক্খণত্তা ৰা ‘‘পুনব্ভৰং দেন্তী’’তিআদীসুপি অত্থেসু পোনোভৰিকসদ্দসিদ্ধি দট্ঠব্বা।
Phassāyatanānanti chadvārikassa phassassa kāraṇabhūtānaṃ cakkhādiāyatanānaṃ. Tenāha ‘‘cakkhādīnaṃ cakkhusamphassādikāraṇāna’’nti. Punabbhavakaraṇaṃ punobhavo uttarapadalopena, mano-saddassa viya ca purimapadassa okārantatā daṭṭhabbā. Punobhavo sīlametesanti ponobhavikā. Atha vā sīlatthena ikasaddena gamitatthattā kiriyāvācakasaddassa adassanaṃ daṭṭhabbaṃ yathā apūpabhakkhanasīlo āpūpiko. Atha vā punabbhavaṃ denti, punabbhavāya saṃvattanti, punappunabbhave nibbattentīti ponobhavikā. ‘‘Taddhitā’’ti hi bahuvacananiddesā vicittattā vā taddhitānaṃ abhidhānalakkhaṇattā vā ‘‘punabbhavaṃ dentī’’tiādīsupi atthesu ponobhavikasaddasiddhi daṭṭhabbā.
ৰিসংযোজেন্তি পটিপন্নং পুগ্গলং কামযোগাদিতো ৰিযোজেন্তীতি ৰিসংযোগা, অসুভজ্ঝানাদীনি ৰিসংযোজনকারণানি। তেনাহ ‘‘ৰিসংযোগাতি ৰিসংযোজনকারণানী’’তিআদি।
Visaṃyojenti paṭipannaṃ puggalaṃ kāmayogādito viyojentīti visaṃyogā, asubhajjhānādīni visaṃyojanakāraṇāni. Tenāha ‘‘visaṃyogāti visaṃyojanakāraṇānī’’tiādi.
যোগসুত্তৰণ্ণনা নিট্ঠিতা।
Yogasuttavaṇṇanā niṭṭhitā.
ভণ্ডগামৰগ্গৰণ্ণনা নিট্ঠিতা।
Bhaṇḍagāmavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. যোগসুত্তং • 10. Yogasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. যোগসুত্তৰণ্ণনা • 10. Yogasuttavaṇṇanā
