| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
10. яог̇асуд̇д̇аван̣н̣анаа
10. Yogasuttavaṇṇanā
10. д̣̇асамз ваддасмим̣ яож̇знд̇ийд̇и яог̇аа. гаамаяог̇од̇иаад̣̇ийсу бан̃жагаамаг̇ун̣иго рааг̇о гаамаяог̇о. руубааруубабхавзсу чанд̣̇арааг̇о бхаваяог̇о, д̇ат̇аа жхаананиганд̇и. сассад̇ад̣̇идтисахаг̇ад̇о жа рааг̇о д̣̇ваасадти д̣̇идтияо жа д̣̇идтияог̇о. жад̇уусу сажжзсу ан̃н̃аан̣ам̣ авиж̇ж̇ааяог̇о. гаамзсу ваа яож̇зд̇ийд̇и гаамаяог̇о. бхавзсу яож̇зд̇ийд̇и бхаваяог̇о. д̣̇идтийсу яож̇зд̇ийд̇и д̣̇идтияог̇о. авиж̇ж̇ааяа яож̇зд̇ийд̇и авиж̇ж̇ааяог̇од̇и хздтаа вуд̇д̇ад̇хаммаанам̣язвзд̇ам̣ ад̇хиважанам̣.
10. Dasame vaṭṭasmiṃ yojentīti yogā. Kāmayogotiādīsu pañcakāmaguṇiko rāgo kāmayogo. Rūpārūpabhavesu chandarāgo bhavayogo, tathā jhānanikanti. Sassatadiṭṭhisahagato ca rāgo dvāsaṭṭhi diṭṭhiyo ca diṭṭhiyogo. Catūsu saccesu aññāṇaṃ avijjāyogo. Kāmesu vā yojetīti kāmayogo. Bhavesu yojetīti bhavayogo. Diṭṭhīsu yojetīti diṭṭhiyogo. Avijjāya yojetīti avijjāyogoti heṭṭhā vuttadhammānaṃyevetaṃ adhivacanaṃ.
ид̣̇аани д̇з вид̇т̇аарзд̇ваа д̣̇ассзнд̇о гад̇амо жа, бхигкавзд̇иаад̣̇имааха. д̇ад̇т̇а самуд̣̇аяанд̇и уббад̇д̇им̣. ад̇т̇ан̇г̇аманд̇и бхзд̣̇ам̣. ассаад̣̇анд̇и мад̇хурабхаавам̣. аад̣̇ийнаванд̇и амад̇хурабхаавам̣ д̣̇осам̣. ниссаран̣анд̇и ниссадабхаавам̣. гаамзсууд̇и вад̇т̇угаамзсу. гаамарааг̇од̇и гаамз аараб̣бха уббаннарааг̇о. сзсабад̣̇зсуби зсзва наяо. анусзд̇ийд̇и ниб̣б̣ад̇д̇ад̇и. аяам̣ вужжад̇и, бхигкавз, гаамаяог̇од̇и, бхигкавз, ид̣̇ам̣ гаамзсу яож̇анагааран̣ам̣ б̣анд̇ханагааран̣ам̣ вужжад̇ийд̇и звам̣ саб̣б̣ад̇т̇а ад̇т̇о взд̣̇ид̇аб̣б̣о.
Idāni te vitthāretvā dassento katamo ca, bhikkhavetiādimāha. Tattha samudayanti uppattiṃ. Atthaṅgamanti bhedaṃ. Assādanti madhurabhāvaṃ. Ādīnavanti amadhurabhāvaṃ dosaṃ. Nissaraṇanti nissaṭabhāvaṃ. Kāmesūti vatthukāmesu. Kāmarāgoti kāme ārabbha uppannarāgo. Sesapadesupi eseva nayo. Anusetīti nibbattati. Ayaṃ vuccati, bhikkhave, kāmayogoti, bhikkhave, idaṃ kāmesu yojanakāraṇaṃ bandhanakāraṇaṃ vuccatīti evaṃ sabbattha attho veditabbo.
пассааяад̇анаананд̇и жагкаад̣̇ийнам̣ жагкусампассаад̣̇игааран̣аанам̣. авиж̇ж̇аа ан̃н̃аан̣анд̇и н̃аан̣абадибагкабхаавзна ан̃н̃аан̣асан̇каад̇аа авиж̇ж̇аа. ид̇и гаамаяог̇од̇и зд̇т̇а ид̇и сад̣̇д̣̇о жад̇уухиби яог̇зхи сад̣̇д̇хим̣ яож̇зд̇аб̣б̣о ‘‘звам̣ гаамаяог̇о, звам̣ бхаваяог̇о’’д̇и. сам̣яуд̇д̇од̇и бариваарид̇о. баабагзхийд̇и лаамагзхи. агусалзхийд̇и агосалласамбхууд̇зхи. сам̣гилзсигзхийд̇и сам̣гилзсанагзхи, басаннасса жид̇д̇асса басаннабхаавад̣̇уусагзхийд̇и ад̇т̇о. боноб̣бхавигзхийд̇и бунаб̣бхаваниб̣б̣ад̇д̇агзхи. сад̣̇арзхийд̇и сад̣̇арат̇зхи. д̣̇угкавибаагзхийд̇и вибаагагаалз д̣̇угкуббаад̣̇агзхи. ааяад̇им̣ ж̇аад̇иж̇араамаран̣игзхийд̇и анааг̇ад̇з бунаббунам̣ ж̇аад̇иж̇араамаран̣аниб̣б̣ад̇д̇агзхи. д̇асмаа аяог̇агкзмийд̇и вужжад̇ийд̇и яасмаа аббахийнаяог̇о буг̇г̇ало зд̇зхи д̇хаммзхи самбаяуд̇д̇о ход̇и, д̇асмаа жад̇уухи яог̇зхи кзмам̣ ниб̣б̣аанам̣ анад̇хиг̇ад̇ад̇д̇аа на яог̇агкзмийд̇и вужжад̇и.
Phassāyatanānanti cakkhādīnaṃ cakkhusamphassādikāraṇānaṃ. Avijjā aññāṇanti ñāṇapaṭipakkhabhāvena aññāṇasaṅkhātā avijjā. Iti kāmayogoti ettha iti saddo catūhipi yogehi saddhiṃ yojetabbo ‘‘evaṃ kāmayogo, evaṃ bhavayogo’’ti. Saṃyuttoti parivārito. Pāpakehīti lāmakehi. Akusalehīti akosallasambhūtehi. Saṃkilesikehīti saṃkilesanakehi, pasannassa cittassa pasannabhāvadūsakehīti attho. Ponobbhavikehīti punabbhavanibbattakehi. Sadarehīti sadarathehi. Dukkhavipākehīti vipākakāle dukkhuppādakehi. Āyatiṃ jātijarāmaraṇikehīti anāgate punappunaṃ jātijarāmaraṇanibbattakehi. Tasmāayogakkhemīti vuccatīti yasmā appahīnayogo puggalo etehi dhammehi sampayutto hoti, tasmā catūhi yogehi khemaṃ nibbānaṃ anadhigatattā na yogakkhemīti vuccati.
висам̣яог̇од̇и висам̣яож̇анагааран̣аани. гаамаяог̇ависам̣яог̇од̇и гаамаяог̇ад̇о висам̣яож̇анагааран̣ам̣. сзсабад̣̇зсуби зсзва наяо. д̇ад̇т̇а асубхаж̇жхаанам̣ гаамаяог̇ависам̣яог̇о, д̇ам̣ баад̣̇агам̣ гад̇ваа ад̇хиг̇ад̇о анааг̇аамимаг̇г̇о зганд̇знзва гаамаяог̇ависам̣яог̇о наама. арахад̇д̇амаг̇г̇о бхаваяог̇ависам̣яог̇о наама, сод̇аабад̇д̇имаг̇г̇о д̣̇идтияог̇ависам̣яог̇о наама, арахад̇д̇амаг̇г̇о авиж̇ж̇ааяог̇ависам̣яог̇о наама. ид̣̇аани д̇з вид̇т̇ааравасзна д̣̇ассзнд̇о гад̇амо жа, бхигкавзд̇иаад̣̇имааха. д̇ассад̇т̇о вуд̇д̇анаязнзва взд̣̇ид̇аб̣б̣о.
Visaṃyogoti visaṃyojanakāraṇāni. Kāmayogavisaṃyogoti kāmayogato visaṃyojanakāraṇaṃ. Sesapadesupi eseva nayo. Tattha asubhajjhānaṃ kāmayogavisaṃyogo, taṃ pādakaṃ katvā adhigato anāgāmimaggo ekanteneva kāmayogavisaṃyogo nāma. Arahattamaggo bhavayogavisaṃyogo nāma, sotāpattimaggo diṭṭhiyogavisaṃyogo nāma, arahattamaggo avijjāyogavisaṃyogo nāma. Idāni te vitthāravasena dassento katamo ca, bhikkhavetiādimāha. Tassattho vuttanayeneva veditabbo.
бхаваяог̇зна жуубхаяанд̇и бхаваяог̇зна жа сам̣яуд̇д̇аа, гин̃жи бхияяо убхаязнааби самбаяуд̇д̇аа, язна гзнажи яог̇зна саманнааг̇ад̇аад̇и ад̇т̇о. бурагкад̇аад̇и бурад̇о гад̇аа, бариваарид̇аа ваа. гаамз барин̃н̃ааяаад̇и д̣̇увид̇хзби гаамз бариж̇аанид̇ваа. бхаваяог̇ан̃жа саб̣б̣асод̇и бхаваяог̇ан̃жа саб̣б̣амзва бариж̇аанид̇ваа. самуухажжаад̇и самууханид̇ваа. вирааж̇аяанд̇и вирааж̇знд̇о, вирааж̇зд̇ваа ваа. ‘‘вирааж̇знд̇о’’д̇и хи вуд̇д̇з маг̇г̇о гат̇ид̇о ход̇и, ‘‘вирааж̇зд̇ваа’’д̇и вуд̇д̇з палам̣. мунийд̇и кийн̣аасавамуни. ид̇и имасмим̣ суд̇д̇зби г̇аат̇аасуби ваддавиваддамзва гат̇ид̇анд̇и.
Bhavayogena cūbhayanti bhavayogena ca saṃyuttā, kiñci bhiyyo ubhayenāpi sampayuttā, yena kenaci yogena samannāgatāti attho. Purakkhatāti purato katā, parivāritā vā. Kāme pariññāyāti duvidhepi kāme parijānitvā. Bhavayogañca sabbasoti bhavayogañca sabbameva parijānitvā. Samūhaccāti samūhanitvā. Virājayanti virājento, virājetvā vā. ‘‘Virājento’’ti hi vutte maggo kathito hoti, ‘‘virājetvā’’ti vutte phalaṃ. Munīti khīṇāsavamuni. Iti imasmiṃ suttepi gāthāsupi vaṭṭavivaṭṭameva kathitanti.
бхан̣д̣аг̇аамаваг̇г̇о батамо.
Bhaṇḍagāmavaggo paṭhamo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 10. яог̇асуд̇д̇ам̣ • 10. Yogasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 10. яог̇асуд̇д̇аван̣н̣анаа • 10. Yogasuttavaṇṇanā
