| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
७. योनिसोमनसिकारपञ्हो
7. Yonisomanasikārapañho
७. राजा आह ‘‘भन्ते नागसेन, यो न पटिसन्दहति, ननु सो योनिसो मनसिकारेन न पटिसन्दहती’’ति? ‘‘योनिसो च महाराज, मनसिकारेन पञ्ञाय च अञ्ञेहि च कुसलेहि धम्मेही’’ति। ‘‘ननु, भन्ते, योनिसो मनसिकारो येव पञ्ञा’’ति? ‘‘न हि, महाराज, अञ्ञो मनसिकारो, अञ्ञा पञ्ञा, इमेसं खो, महाराज, अजेळकगोणमहिंसओट्ठगद्रभानम्पि मनसिकारो अत्थि, पञ्ञा पन तेसं नत्थी’’ति।
7. Rājā āha ‘‘bhante nāgasena, yo na paṭisandahati, nanu so yoniso manasikārena na paṭisandahatī’’ti? ‘‘Yoniso ca mahārāja, manasikārena paññāya ca aññehi ca kusalehi dhammehī’’ti. ‘‘Nanu, bhante, yoniso manasikāro yeva paññā’’ti? ‘‘Na hi, mahārāja, añño manasikāro, aññā paññā, imesaṃ kho, mahārāja, ajeḷakagoṇamahiṃsaoṭṭhagadrabhānampi manasikāro atthi, paññā pana tesaṃ natthī’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
योनिसोमनसिकारपञ्हो सत्तमो।
Yonisomanasikārapañho sattamo.
