| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. යොනිසොමනසිකාරපඤ්‌හො
7. Yonisomanasikārapañho
7. රාජා ආහ ‘‘භන්‌තෙ නාගසෙන, යො න පටිසන්‌දහති, නනු සො යොනිසො මනසිකාරෙන න පටිසන්‌දහතී’’ති? ‘‘යොනිසො ච මහාරාජ, මනසිකාරෙන පඤ්‌ඤාය ච අඤ්‌ඤෙහි ච කුසලෙහි ධම්‌මෙහී’’ති. ‘‘නනු, භන්‌තෙ, යොනිසො මනසිකාරො යෙව පඤ්‌ඤා’’ති? ‘‘න හි, මහාරාජ, අඤ්‌ඤො මනසිකාරො, අඤ්‌ඤා පඤ්‌ඤා, ඉමෙසං ඛො, මහාරාජ, අජෙළකගොණමහිංසඔට්‌ඨගද්‍රභානම්‌පි මනසිකාරො අත්‌ථි, පඤ්‌ඤා පන තෙසං නත්‌ථී’’ති.
7. Rājā āha ‘‘bhante nāgasena, yo na paṭisandahati, nanu so yoniso manasikārena na paṭisandahatī’’ti? ‘‘Yoniso ca mahārāja, manasikārena paññāya ca aññehi ca kusalehi dhammehī’’ti. ‘‘Nanu, bhante, yoniso manasikāro yeva paññā’’ti? ‘‘Na hi, mahārāja, añño manasikāro, aññā paññā, imesaṃ kho, mahārāja, ajeḷakagoṇamahiṃsaoṭṭhagadrabhānampi manasikāro atthi, paññā pana tesaṃ natthī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
යොනිසොමනසිකාරපඤ්‌හො සත්‌තමො.
Yonisomanasikārapañho sattamo.
