| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. யுக³னத்³த⁴ஸுத்தவண்ணனா
10. Yuganaddhasuttavaṇṇanā
170. த³ஸமே ஸமத²புப்³ப³ங்க³மந்தி ஸமத²ங் புப்³ப³ங்க³மங் புரேசாரிகங் கத்வா. மக்³கோ³ ஸஞ்ஜாயதீதி பட²மோ லோகுத்தரமக்³கோ³ நிப்³ப³த்ததி. ஸோ தங் மக்³க³ந்தி ஏகசித்தக்க²ணிகமக்³க³ஸ்ஸ ஆஸேவனாதீ³னி நாம நத்தி², து³தியமக்³கா³த³யோ பன உப்பாதெ³ந்தோ தமேவ ஆஸேவதி பா⁴வேதி ப³ஹுலீகரோதீதி வுச்சதி. விபஸ்ஸனாபுப்³ப³ங்க³மந்தி விபஸ்ஸனங் புப்³ப³ங்க³மங் புரேசாரிகங் கத்வா ஸமத²ங் பா⁴வேதி, பகதியா விபஸ்ஸனாலாபீ⁴ விபஸ்ஸனாய ட²த்வா ஸமாதி⁴ங் உப்பாதே³தீதி அத்தோ².
170. Dasame samathapubbaṅgamanti samathaṃ pubbaṅgamaṃ purecārikaṃ katvā. Maggo sañjāyatīti paṭhamo lokuttaramaggo nibbattati. Sotaṃ magganti ekacittakkhaṇikamaggassa āsevanādīni nāma natthi, dutiyamaggādayo pana uppādento tameva āsevati bhāveti bahulīkarotīti vuccati. Vipassanāpubbaṅgamanti vipassanaṃ pubbaṅgamaṃ purecārikaṃ katvā samathaṃ bhāveti, pakatiyā vipassanālābhī vipassanāya ṭhatvā samādhiṃ uppādetīti attho.
யுக³னத்³த⁴ங் பா⁴வேதீதி யுக³னத்³த⁴ங் கத்வா பா⁴வேதி. தத்த² தேனேவ சித்தேன ஸமாபத்திங் ஸமாபஜ்ஜித்வா தேனேவ ஸங்கா²ரே ஸம்மஸிதுங் ந ஸக்கா. அயங் பன யாவதா ஸமாபத்தியோ ஸமாபஜ்ஜதி, தாவதா ஸங்கா²ரே ஸம்மஸதி. யாவதா ஸங்கா²ரே ஸம்மஸதி, தாவதா ஸமாபத்தியோ ஸமாபஜ்ஜதி. கத²ங்? பட²மஜ்ஜா²னங் ஸமாபஜ்ஜதி, ததோ வுட்டா²ய ஸங்கா²ரே ஸம்மஸதி, ஸங்கா²ரே ஸம்மஸித்வா து³தியஜ்ஜா²னங் ஸமாபஜ்ஜதி. ததோ வுட்டா²ய புன ஸங்கா²ரே ஸம்மஸதி. ஸங்கா²ரே ஸம்மஸித்வா ததியஜ்ஜா²னங்…பே॰… நேவஸஞ்ஞானாஸஞ்ஞாயதனஸமாபத்திங் ஸமாபஜ்ஜதி, ததோ வுட்டா²ய ஸங்கா²ரே ஸம்மஸதி. ஏவமயங் ஸமத²விபஸ்ஸனங் யுக³னத்³த⁴ங் பா⁴வேதி நாம.
Yuganaddhaṃ bhāvetīti yuganaddhaṃ katvā bhāveti. Tattha teneva cittena samāpattiṃ samāpajjitvā teneva saṅkhāre sammasituṃ na sakkā. Ayaṃ pana yāvatā samāpattiyo samāpajjati, tāvatā saṅkhāre sammasati. Yāvatā saṅkhāre sammasati, tāvatā samāpattiyo samāpajjati. Kathaṃ? Paṭhamajjhānaṃ samāpajjati, tato vuṭṭhāya saṅkhāre sammasati, saṅkhāre sammasitvā dutiyajjhānaṃ samāpajjati. Tato vuṭṭhāya puna saṅkhāre sammasati. Saṅkhāre sammasitvā tatiyajjhānaṃ…pe… nevasaññānāsaññāyatanasamāpattiṃ samāpajjati, tato vuṭṭhāya saṅkhāre sammasati. Evamayaṃ samathavipassanaṃ yuganaddhaṃ bhāveti nāma.
த⁴ம்முத்³த⁴ச்சவிக்³க³ஹிதந்தி ஸமத²விபஸ்ஸனாத⁴ம்மேஸு த³ஸவிபஸ்ஸனுபக்கிலேஸஸங்கா²தேன உத்³த⁴ச்சேன விக்³க³ஹிதங், ஸுக்³க³ஹிதந்தி அத்தோ². ஸோ, ஆவுஸோ, ஸமயோதி இமினா ஸத்தன்னங் ஸப்பாயானங் படிலாப⁴காலோ கதி²தோ. யங் தங் சித்தந்தி யஸ்மிங் ஸமயே தங் விபஸ்ஸனாவீதி²ங் ஓக்கமித்வா பவத்தங் சித்தங். அஜ்ஜ²த்தமேவ ஸந்திட்ட²தீதி விபஸ்ஸனாவீதி²ங் பச்சொத்த²ரித்வா தஸ்மிங்யேவ கோ³சரஜ்ஜ²த்தஸங்கா²தே ஆரம்மணே ஸந்திட்ட²தி. ஸன்னிஸீத³தீதி ஆரம்மணவஸேன ஸம்மா நிஸீத³தி. ஏகோதி³ ஹோதீதி ஏகக்³க³ங் ஹோதி. ஸமாதி⁴யதீதி ஸம்மா ஆதி⁴யதி ஸுட்ட²பிதங் ஹோதி. ஸேஸமெத்த² உத்தானத்த²மேவ.
Dhammuddhaccaviggahitanti samathavipassanādhammesu dasavipassanupakkilesasaṅkhātena uddhaccena viggahitaṃ, suggahitanti attho. So, āvuso, samayoti iminā sattannaṃ sappāyānaṃ paṭilābhakālo kathito. Yaṃ taṃ cittanti yasmiṃ samaye taṃ vipassanāvīthiṃ okkamitvā pavattaṃ cittaṃ. Ajjhattamevasantiṭṭhatīti vipassanāvīthiṃ paccottharitvā tasmiṃyeva gocarajjhattasaṅkhāte ārammaṇe santiṭṭhati. Sannisīdatīti ārammaṇavasena sammā nisīdati. Ekodi hotīti ekaggaṃ hoti. Samādhiyatīti sammā ādhiyati suṭṭhapitaṃ hoti. Sesamettha uttānatthameva.
படிபதா³வக்³கோ³ து³தியோ.
Paṭipadāvaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. யுக³னத்³த⁴ஸுத்தங் • 10. Yuganaddhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. யுக³னத்³த⁴ஸுத்தவண்ணனா • 10. Yuganaddhasuttavaṇṇanā
